ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓙꓲꓻˍ ꓟ ꓥꓪ. ꓔꓯ ꓠꓬ ꓡꓴ ꓗꓪ ꓗꓶ ꓔ ꓥꓳ꓿ ꓟꓽ ꓙꓲꓻ ꓟ ꓔꓯ ꓠꓬ ꓡꓳ ꓧꓳꓽ ꓗꓷˍ ꓥꓳ꓾ ꓐꓯ ꓟ ꓟ. ꓟꓲꓽ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿
ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓟ‐ꓕꓲ 13ꓽ47‐53 ꓗꓪ ꓟ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓟꓴꓽ ꓗꓪ ꓗꓴꓷꓼ ꓠꓬ ꓮ ꓡꓲ ꓗ, ꓟ ꓔꓯ ꓔꓯꓺ ꓥꓳꓽ ꓣꓱꓽ ꓢꓲ ꓠꓬꓲ ꓐꓯ ꓟ. ꓖꓶˍ ꓟ ꓥ ꓡꓳ꓿ ꓟꓴꓽ ꓗꓪ ꓗꓴꓷꓼ ꓠꓬ ꓥꓪ. ꓧꓪ ꓢꓴ ꓕꓲꓽ ꓣꓳ ꓡꓰ ꓥꓪ. ꓓꓳꓽ ꓗꓷ ꓠꓬ ꓥꓪ. ꓑꓱ. ꓗꓪ ꓥꓪ. ꓮ ꓟꓬ, ꓟꓶ ꓡꓰꓳ꓿ ꓖꓳ ꓕꓯ ꓠꓬ ꓗ ꓢ ꓗꓪ ꓚꓵ, ꓓꓯ ꓙꓰ ꓢꓲ ꓠꓬꓲ ꓥꓪ. ꓑꓱ. ꓗꓪ ꓪꓴ ꓓˍ ꓟ ꓥꓪ. ꓮ ꓙꓵꓽ ꓗꓪ ꓐꓰ ꓙꓲˍ ꓟ ꓔꓯ ꓥꓪ. ꓔꓯ ꓠꓬ ꓡꓴ ꓗꓪ ꓗꓶ ꓔ ꓡꓳ꓿ ꓟꓽ ꓙꓲꓻ ꓟ ꓥꓪ. ꓔꓯ ꓠꓬ ꓡꓳ ꓩꓴ ꓗꓷˍ ꓥꓳ꓾ ꓐꓯˍ ꓟ ꓟ. ꓟꓲꓽ ꓝꓲ. ꓔꓯꓺ ꓥꓳꓽ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓥꓪ. ꓧꓪ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓗꓪ ꓡˍ ꓕꓯ ꓙꓲꓻ ꓢꓴ ꓟꓽ ꓙꓲꓻ ꓢꓴ ꓮ ꓙꓵꓽ꓾ ꓟꓲ ꓠꓯ ꓡ ꓞꓳ ꓮ ꓙꓵꓽ ꓚꓬꓴ. ꓟꓶ ꓠ, ꓟ ꓐꓱ ꓶ ꓬꓲ ꓠꓬ ꓣꓳ ꓔꓯ ꓚꓬꓴ. ꓡ ꓠ, ꓟ ꓬꓲ ꓖꓶ ꓗꓷꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓥꓪ. ꓧꓪ ꓢꓴ ꓔꓯ ꓫꓱ.ˍ ꓡꓳ꓿ ꓬꓲ ꓠꓬ ꓙꓲꓻˍ ꓟ ꓥꓪ. ꓟꓽ ꓙꓲꓻ ꓟ ꓥꓪ. ꓮ ꓙꓵꓽ ꓓꓳꓽˍ ꓡꓳ꓿ ꓕꓱ ꓟ ꓕꓲ ꓡꓰ, ꓥꓳ꓾ ꓟꓲ ꓠꓯ ꓗꓪ ꓡ ꓢꓲ ꓠꓬꓲ ꓙꓲꓻˍ ꓟ ꓡ ꓞꓳ ꓟꓽ ꓙꓲꓻ ꓟ ꓡ ꓞꓳ ꓮ ꓙꓵꓽ ꓐꓱ ꓶ ꓬꓲ. ꓚꓬꓴ. ꓙ ꓡˍ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓚꓬꓴ. ꓖꓶ ꓡ ꓗ ꓠꓯ. ꓡꓳ, ꓬꓰˍ ꓕꓲ ꓠꓬꓲ ꓗꓪ ꓠꓬ ꓖꓳ ꓗꓪ ꓐꓰ ꓙꓲꓻˍ ꓟ ꓥꓪ. ꓐꓰ ꓟꓽ ꓙꓲꓻ ꓟ ꓥꓪ. ꓢꓲ.ˍ ꓟ ꓕꓲ ꓡꓰ,꓾ ꓣꓳ ꓟꓲ ꓠꓯ ꓡ ꓞꓳ ꓥ ꓟꓲ ꓡꓳ, ꓬꓰˍ ꓕꓲ ꓠꓬꓲ ꓗꓪ ꓠꓬ ꓙꓲꓻ ꓢꓴ ꓔꓯ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓬꓲ ꓡꓰ ꓧꓳꓽ ꓔꓯ, ꓬꓰˍ ꓥꓳ꓿ ꓟꓽ ꓙꓲꓻ ꓢꓴ ꓔꓯ ꓠꓬ ꓛꓬ ꓟꓵꓽ ꓗꓪ ꓬꓲ ꓡꓰ ꓡꓳ ꓧꓳꓽ ꓗꓷˍ ꓥꓳ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓕꓱ ꓟ ꓠꓬ ꓣꓳ ꓢꓷ. ꓠ, ꓟ ꓠꓬ ꓕꓱ ꓗꓪ ꓠꓬ꓾ ꓪꓴ‐ꓢ ꓠꓬ ꓠꓵꓻ ꓠꓲ, ꓢꓲ ꓒ ꓥ ꓡꓳ ꓐꓰ ꓐꓯˍ ꓥ ꓟꓲ꓾ ꓬꓲ ꓠꓬ ꓙꓲꓻ ꓔꓱ, ꓢꓴ ꓕꓲ ꓣꓳˍ ꓟꓲ ꓥ ꓡꓳ꓿ ꓙꓲꓻ ꓔꓱ, ꓢꓴ ꓐꓯˍ ꓟ ꓠꓬ ꓟꓽ ꓙꓲꓻ ꓟ ꓬꓰ ꓢꓴ ꓔꓯ ꓠꓬ ꓟꓽ ꓙꓲꓻ ꓟ ꓡꓰ꓾ ꓙꓲˍ ꓟ ꓬꓰ ꓢꓴ ꓔꓯ ꓠꓬ ꓙꓲˍ ꓟ ꓡꓰ꓾ ꓕꓱ ꓡꓱ ꓙꓰ ꓠ ꓔ ꓟ ꓔꓯ ꓐꓯˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓡꓳ, ꓬꓰˍ ꓟ ꓕꓲ ꓠꓬꓲ ꓗꓪ ꓐꓯ ꓟꓴ ꓘꓶꓽˍ ꓟ ꓙꓳˍ ꓡꓳ ꓐꓯˍ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿ ꓕꓱ ꓡꓱ ꓐꓰ ꓢꓷ. ꓡꓰ ꓢꓴ ꓣꓳ ꓠꓬ ꓕꓱ ꓡꓱ ꓐꓰ ꓢꓷ. ꓔ ꓟ ꓑꓶ. ꓓꓴ ꓣꓳ ꓠꓬ ꓝꓴꓲ. ꓗꓪ ꓐꓰ ꓒꓳ, ꓬꓲꓼ ꓡ ꓠ, ꓟ꓾ ꓪꓴ‐ꓢ ꓔꓯ ꓟꓶ ꓡꓰ ꓠ, ꓟ꓾ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓪꓴ‐ꓢ ꓣꓳ ꓢꓲ ꓒ꓾ ꓐꓰ ꓣꓳ ꓦ ꓡꓱ ꓐꓳ ꓠ, ꓟ ꓥꓳ꓾ ꓣꓳ ꓦ ꓡꓱ ꓠ, ꓟ ꓥꓳ꓿ ꓕꓱ ꓡꓱ ꓟꓽ ꓥ ꓥꓳ ꓐꓯˍ ꓠꓬ ꓣꓳ ꓠꓬ ꓡꓳ, ꓬꓰˍ ꓕꓲ ꓠꓬꓲ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓥꓪ ꓔꓯ ꓚꓬꓴ. ꓖꓶ ꓡꓺꓳ ꓐꓰ ꓐꓯ ꓔꓬ ꓥ ꓟꓲ ꓠꓴ ꓠꓬ ꓟꓽ ꓙꓲꓻ ꓟ ꓬꓰ ꓔꓬ ꓥꓳ ꓐꓯˍ ꓠꓬ꓾ ꓠꓴ ꓠꓬ ꓛꓬꓼ ꓟꓵꓽ ꓗꓪ ꓡꓳ ꓧꓳˍ ꓟ ꓟꓶˍ ꓥꓳ꓾ ꓐꓯ ꓟꓴ ꓘꓶꓽˍ ꓟ ꓟꓶˍ ꓥꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿
