ꓗ-ꓕꓳ-ꓡꓲꓗ ꓐꓰ ꓐꓯ_ ꓟ ꓬꓲ ꓬꓲ ꓢꓷ ꓠꓬ ꓕꓲꓽ ꓟꓵꓽ ꓡꓱꓼ ꓐꓰ ꓕꓲ ꓟꓵ ꓕꓲ ꓫꓵ ꓗꓪ ꓙꓳ_ ꓟ ꓮ ꓙꓵ ꓐꓰ ꓗꓳꓸ ꓙꓰ ꓙꓳ_ ꓟ꓾ ꓐꓰ ꓥ ꓡꓳ= ꓗ-ꓕꓳ-ꓡꓲ ꓐꓯ_ ꓟ ꓠꓬ ꓕꓲ ꓔꓶꓸ ꓞ ꓕꓲ ꓘꓴꓸ ꓤ ꓗꓪ ꓡꓰ ꓖꓴ ꓡꓰ_ ꓟ ꓟꓽ ꓥ꓾ ꓮ ꓗꓪ ꓔꓬ ꓥ ꓟꓲ ꓮ ꓫꓵ ꓡ ꓞꓳ ꓥ ꓟꓲ ꓕꓲ ꓠꓲꓹ ꓕꓲ ꓪ ꓪ ꓘꓳ꓾ ꓕꓲ ꓫꓵ ꓡꓰ ꓙꓵꓻ ꓟ ꓢꓴ ꓬꓲ ꓜꓴ ꓕꓲ ꓜꓴ ꓥ ꓡꓳ= ꓡꓳ ꓒꓱ ꓕꓲ ꓟ ꓘꓹ ꓕꓲ ꓟ ꓗꓪ ꓖꓴ ꓡꓰ_ ꓟ ꓟꓽ ꓥ꓾ ꓕꓲ ꓟꓵ ꓡꓱꓼ ꓗꓪ ꓕꓲ ꓟꓲ ꓠꓯ ꓡꓱꓼ ꓗꓪ ꓠꓲ ꓗꓴ ꓚ ꓡꓰ ꓐꓰ ꓢꓲꓹ ꓚ ꓡꓰ ꓐꓰ ꓔꓷꓻ ꓔ ꓟ ꓘꓴ ꓜꓲꓼ ꓞꓳ ꓕꓲ ꓟ ꓥ ꓡꓳ= ꓠꓲ ꓗꓴ ꓚ ꓕꓲ ꓟ ꓔꓯ ꓣꓴ ꓕꓯ ꓮ ꓙꓵ ꓡꓱꓼ ꓙꓰ_ ꓟ ꓡꓰ ꓐꓰ ꓗ-ꓕꓳ-ꓡꓲꓗ ꓕꓱ ꓟ ꓕꓲ ꓫꓵ ꓫꓵ ꓗꓷ ꓡꓰ ꓠꓬ꓾ ꓕꓲ ꓟꓵ ꓡꓱꓼ ꓗꓪ ꓡꓱ ꓐꓰ ꓗꓷ ꓡꓰ_ ꓟ ꓥ ꓡꓳ= ꓗ-ꓕꓳ-ꓡꓲꓗ ꓐꓰ ꓐꓯ ꓕꓯ ꓕꓲ ꓟꓵ ꓕꓲ ꓫꓵ ꓡꓱꓼ ꓬꓲ ꓬꓲ ꓢꓷ ꓠꓯꓼ ꓘꓴ ꓗꓪ ꓬꓲ ꓬꓲ ꓢꓷ ꓠꓬꓲꓽ ꓫꓵ ꓙꓳ_ ꓢꓰ ꓡꓳ= ꓮ ꓫꓵ ꓑꓶ ꓓꓴ ꓕꓲ ꓟꓵ ꓡꓱꓼ ꓐꓰ ꓗꓳꓸ ꓙꓰ ꓙꓳ_ ꓐꓰ ꓐꓯ ꓡ꓾
ꓬꓲꓸ ꓪꓴꓸ ꓕꓲ ꓟ ꓟ ꓠꓬ꓾ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓢꓲ ꓒ ꓬꓰ-ꓢꓴ ꓔꓬ ꓟ ꓑꓶ ꓓꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓙꓵꓹ ꓐꓰ ꓬꓲ ꓔꓶꓸ ꓠꓬꓲꓽ ꓗꓳ ꓚ ꓗꓪ ꓟꓽ ꓔꓬ꓾ ꓣꓳ ꓟꓲ ꓠꓯ ꓞꓳ ꓤ ꓠꓬ ꓬꓲ ꓙꓵꓹ ꓐꓰ ꓬꓲ ꓔꓶꓸ ꓠꓬꓲ ꓗꓳ ꓚ ꓗꓪ ꓔꓬ ꓡꓳ= ꓠꓴ ꓠꓬ ꓕꓱ ꓕꓲ ꓙꓵꓹ ꓗꓪ ꓕꓱ ꓗꓪ ꓔꓬ ꓠꓬ꓾ ꓝꓮꓲ ꓕꓲ ꓙꓵꓹ ꓗꓪ ꓖꓳ ꓗꓪ ꓙꓰ ꓟꓽ ꓛꓵ꓾ ꓮ ꓫꓵ ꓑꓶ ꓓꓴ ꓥ ꓡ꓾ꓠꓴ ꓔꓯ ꓠꓬ ꓬꓲ ꓙꓵꓹ ꓐꓰ ꓬꓲ ꓔꓶꓸ ꓡꓰ ꓐꓱ ꓔ ꓡꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓠꓬ ꓖꓳ ꓡꓱ ꓟꓽ ꓥ꓾ ꓬꓲ ꓔꓯ ꓠꓬ ꓮ ꓫꓵ ꓡꓰ ꓐꓱ ꓟꓽ ꓓ꓾ ꓖꓳ ꓡꓱ ꓠꓬꓲ ꓢꓲ ꓫꓬ ꓕꓳ ꓶ ꓟꓽ ꓓꓳ ꓡ ꓢꓰ ꓕꓯ ꓘꓴ ꓜꓲꓼ ꓞꓳ ꓔꓲꓺ ꓒ ꓓꓽ ꓕꓲ ꓣꓳ ꓥ ꓟ꓾ ꓙꓲ ꓫꓬ ꓢꓴ ꓮꓴꓖꓴꓢꓔꓲꓠꓰ ꓡꓰ ꓕꓱ ꓡꓱ ꓐꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓔꓬ ꓗꓪ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓔꓬ ꓡꓳ꓾ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓔꓬ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓔꓬ ꓡꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓕꓲ ꓟꓵ ꓡꓱꓼ ꓐꓰ ꓗꓳꓸ ꓙꓰ ꓙꓳ_ ꓡꓳ ꓐꓰ ꓐꓯ_ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓔꓬ ꓟ ꓑꓶ ꓓꓴ ꓥ ꓡꓳ=
ꓝꓮꓲ ꓠꓬꓲꓽ ꓫꓵ ꓕꓲ ꓫꓵ ꓟ ꓠꓬ ꓘꓴ ꓜꓲꓼ ꓞꓳ ꓠꓬ ꓪꓴ-ꓢ ꓟꓸ ꓟꓲꓽ ꓚꓺ ꓠꓹ ꓟ ꓐꓱ ꓶ ꓕꓲ ꓟꓵꓽ ꓡꓱꓼ ꓗꓪ ꓝꓲ ꓩꓴ ꓪ ꓟꓶ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓢꓲ ꓒ ꓬꓰ-ꓢꓴ ꓗꓸ ꓠꓯ ꓛꓳ ꓢꓴ ꓮ ꓙꓵ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓝꓲ ꓩꓴ ꓗꓷ ꓟ ꓟꓶ ꓢꓴ ꓥ ꓟ ꓑꓶ ꓓꓴ ꓕꓲ ꓔꓶꓸ ꓡꓰ ꓟꓽ ꓔꓬ꓾ ꓮ ꓗꓪ ꓡꓰ ꓗꓪ ꓙꓰ ꓮ ꓗꓪ ꓡꓰ ꓛꓲ ꓔꓬ ꓟ ꓥ ꓡꓳ= ꓕꓱ ꓟ ꓠꓬ ꓗ-ꓕꓳ-ꓡꓲꓗ ꓬꓲ ꓬꓲ ꓢꓷ ꓥ ꓡꓳ= ꓗ-ꓕꓳ-ꓡꓲꓗ ꓬꓲ ꓘꓴꓽ ꓠꓯꓼ ꓗꓪ ꓠꓬ꓾ ꓠꓴ ꓮ ꓡꓰ ꓫꓵ ꓞꓳ ꓤ ꓮ ꓡꓰ ꓫꓵ ꓞꓳ ꓫꓵ ꓮ ꓡꓰ ꓫꓵ ꓡꓲꓽ ꓒꓰꓼ ꓔꓯ ꓣꓱ ꓥ ꓟꓲ ꓙꓵꓻ ꓠꓲꓹ ꓕꓲ ꓟ ꓔꓯ ꓡꓰ ꓪꓵꓼ ꓔꓬ ꓡꓳ= ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓬ ꓮ ꓗꓪ ꓔꓬ ꓥ ꓟꓲ ꓪꓽ ꓘꓴ ꓚꓱꓹ ꓟꓲ ꓕꓲ ꓡꓲꓹ ꓥꓳ=ꓙꓵꓻ ꓚꓱꓹ ꓟꓲ ꓕꓲ ꓡꓲꓹ ꓥꓳ=ꓞꓳ ꓫꓵ ꓚꓱꓹ ꓟꓲ ꓕꓲ ꓡꓲꓹ ꓥꓳ= ꓔꓲꓺ ꓒ ꓪ ꓔꓲ ꓠꓯꓼ ꓘꓴꓽ ꓗꓪ ꓦꓲꓻ ꓘꓴ ꓕꓲ ꓟ ꓡꓰ ꓐꓰ ꓡꓱ ꓡꓱ ꓡꓰ ꓔꓬ ꓡꓳ=ꓖꓳ ꓡꓱ ꓠꓬꓲ ꓗ-ꓕꓳ-ꓡꓲꓗ ꓐꓯ_ ꓟ ꓠꓬ ꓕꓲ ꓟꓵ ꓡꓱꓼ ꓐꓰ ꓬꓲ ꓬꓲ ꓢꓷ ꓙꓳ ꓡꓳ꓾ ꓞꓳ ꓫꓵ ꓮ ꓙꓵ ꓡꓱꓼ ꓐꓰ ꓗꓳꓸ ꓙꓰ ꓙꓳ ꓐꓯ_ ꓟ ꓥ ꓡꓳ=
