YO-V 11:19-27
ꓟ‐ꓕ ꓐꓰ ꓟ‐ꓡꓲ ꓬꓲ ꓪ ꓠꓬꓲ ꓤ ꓫꓵꓻ ꓟ ꓑꓶ. ꓓꓴ꓾ ꓬꓴ‐ꓔ ꓡ ꓞꓳ ꓮ ꓟꓬ, ꓠꓬ ꓬꓲ ꓪ ꓔꓯ ꓠꓲ, ꓟ ꓗꓴ ꓖꓶ ꓠ, ꓟ ꓡˍ ꓡꓳ꓿
ꓬꓰ‐ꓢꓴ ꓡˍ ꓟ ꓔꓯ ꓟ‐ꓕ ꓑ ꓙꓽ ꓠꓬ ꓓꓳ ꓙꓰ ꓢꓲ ꓬꓲ ꓔꓯ ꓞꓵ ꓬꓰˍ ꓡꓳ꓿ ꓟ‐ꓡꓲ ꓠꓽ ꓦꓲ ꓗꓪ ꓠꓬꓲ. ꓠ. ꓔꓬ ꓢꓰꓽ ꓡꓳ꓿ ꓖꓳ ꓡꓱ ꓢꓲ ꓟ‐ꓕ ꓡꓰ ꓬꓰ‐ꓢꓴ ꓔꓯ ꓢꓲ ꓒꓽꓳ꓾ ꓠꓴ ꓕꓱ ꓗꓪ ꓔꓬ ꓐꓭ ꓠꓬ ꓥꓪ ꓠꓬꓲ ꓤ ꓟꓽ ꓫꓵꓻ ꓡꓳ ꓫꓵꓽ ꓥꓳ꓿ ꓖꓳ ꓡꓱ ꓢꓲ ꓮ ꓟꓶˍ ꓟꓲ ꓪꓴ‐ꓢ ꓔꓯ ꓠꓴ ꓮ ꓫꓵꓽ ꓓꓰꓽˍ ꓟꓲ ꓪꓴ‐ꓢ ꓡꓰ ꓠꓴ ꓔꓯ ꓖꓶ ꓡˍ ꓟ ꓟ ꓥꓪ ꓢꓷ.ˍ ꓡꓳ꓾ ꓐꓯˍ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓔꓯ꓾ ꓠꓴ ꓠꓬꓲ ꓤ ꓠꓬ ꓢꓯ. ꓬꓲꓼ ꓡˍ ꓢꓰꓽ ꓥꓳ꓾ ꓐꓯ ꓖꓶˍ ꓡꓳ꓿
ꓟ‐ꓕ ꓡꓰ ꓬꓲ ꓔꓯ꓾ ꓥꓳ꓾ ꓡꓳ, ꓬꓰˍ ꓟ ꓦꓬꓼ ꓠꓬꓲ ꓗꓪ ꓬꓲ ꓝꓮꓲ ꓢꓯ. ꓬꓲꓼ ꓡˍ ꓟ ꓥꓪ ꓢꓷ.ˍ ꓡꓳ꓾ ꓐꓯˍ ꓡꓳ꓿ ꓖꓳ ꓕꓯ ꓬꓰ‐ꓢꓴ ꓡꓰ꓾ ꓥꓪ ꓠꓽ ꓢꓯ. ꓬꓲꓼ ꓡˍ ꓟ ꓐꓰ ꓢꓯꓼ ꓟꓬ ꓥ ꓡꓳ꓿ ꓥꓪ ꓔꓯ ꓙꓵꓻ ꓢꓴ ꓠꓬ ꓫꓵꓻˍ ꓟꓲ ꓢꓯ. ꓬꓲꓼ ꓡˍ ꓥꓳ꓿ ꓢꓯ. ꓔꓬ ꓢꓲ ꓥꓪ ꓔꓯ ꓙꓵꓻ ꓢꓴ ꓥ ꓕ ꓑꓳ ꓠꓬ ꓕꓲ ꓞꓲꓼ ꓟꓽ ꓫꓵꓻ꓿ ꓕꓱ ꓟ ꓔꓯ ꓠꓴ ꓙꓵꓻˍ ꓡ? ꓐꓯˍ ꓡꓳ꓿
************
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓣꓳ ꓐꓴ ꓔꓯ꓾ ꓞꓳ ꓤ ꓙꓵꓻ ꓠꓲ, ꓐꓰ ꓟꓽ ꓡꓳ, ꓬꓰ ꓟ ꓪꓽ ꓠꓬꓲˍ ꓟ ꓪꓴ‐ꓢ ꓬꓲ ꓠꓵꓻ ꓠꓲ, ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓕꓲ ꓟ ꓛꓳꓽ ꓕꓲ ꓟ ꓧꓪ ꓢꓲ ꓡꓳ, ꓬꓰˍ ꓕꓯ ꓟꓳꓻ ꓡꓯ ꓘꓳˍ ꓟ꓾ ꓜꓲ ꓡꓯ ꓘꓳˍ ꓟ ꓔꓯ ꓟꓳꓻ ꓪˍ ꓡꓳ꓿ ꓕꓱ ꓟ ꓠꓬ ꓙ ꓖꓴ ꓠꓬꓲꓽ ꓚꓱ, ꓔꓯ ꓫꓱ. ˍ ꓡꓳ꓿ ꓞꓳ ꓤ ꓙꓵꓻ ꓠꓲ, ꓐꓰ ꓐꓯˍ ꓟ ꓕꓲ ꓚꓱ, ꓐꓰ ꓟꓽ ꓡꓳ, ꓬꓰ ꓟ ꓪꓴ‐ꓢ ꓬꓲ ꓠꓵꓻ ꓠꓲ, ꓐꓴ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓖꓼ ꓧꓪ ꓔꓬ ꓢꓲ ꓠꓬꓲ꓾ ꓡꓳ, ꓬꓰˍ ꓕꓯ ꓟꓳꓻ ꓡꓯ ꓘꓳ ꓜꓲꓺ ꓡꓯ ꓘꓳ ꓗꓷ ꓟ ꓥ ꓡꓳ꓿ ꓙꓻ ꓖꓴ ꓠꓬꓲꓽ ꓚꓱ, ꓠꓬ ꓡꓳ, ꓬꓰˍ ꓕꓲ ꓔꓳ. ꓜꓲ ꓡꓯ ꓘꓳˍ ꓟ ꓡꓰ ꓐꓰ ꓥꓳ꓿
ꓟ‐ꓕ ꓐꓰ ꓟ‐ꓡꓲ ꓠꓬ ꓬꓲ ꓪ ꓠꓬꓲ ꓤ ꓫꓵꓻ ꓟ ꓑꓶ. ꓓꓴ ꓥꓴꓻˍ ꓡꓳ꓿ ꓬꓲ ꓪ ꓠꓬ ꓫ. ꓙꓵ ꓟꓷ ꓙꓵ, ꓕꓯ꓾ ꓞꓳ ꓤ ꓕꓲ ꓣꓳ ꓢꓯꓼ ꓪ ꓗꓪ ꓐꓰ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓟ ꓦꓬꓼ ꓠꓬꓲ ꓛꓲ ꓡˍ ꓕꓯ ꓢꓲ ꓒ ꓔꓯ ꓧꓪˍ ꓡꓳ꓿ ꓣꓳ ꓥˍ ꓟꓲ ꓫ. ꓙꓵ ꓓꓴ ꓔꓳ, ꓜꓳꓽ ꓡˍ ꓕꓯ ꓪꓴ‐ꓢ ꓔꓯ ꓧꓪˍ ꓡꓳ꓿ ꓟꓽ ꓐ ꓡ ꓕꓯ ꓥꓴꓻˍ ꓡꓳ꓾ ꓕꓱ ꓟ ꓗꓪ ꓐꓰ ꓣꓳ ꓠꓬ ꓙ ꓖꓴ ꓠꓬꓲꓽ ꓚꓱ, ꓔꓯ ꓟꓳꓻ ꓪˍ ꓟ ꓥ ꓡꓳ꓿ ꓣꓳ ꓠꓬ ꓢꓲ ꓒ ꓔꓯ ꓟꓷꓼ ꓢꓲꓼˍ ꓕꓯ ꓬꓲ ꓥ ꓟꓲ ꓣꓳ ꓔꓬ ꓗꓪ ꓛꓲ ꓡˍ ꓡꓳ꓾ ꓐꓯˍ ꓟ ꓥ ꓡꓳ꓿
ꓢꓲ ꓒꓽꓳ꓾ ꓠꓴ ꓕꓱ ꓗꓪ ꓔꓬ ꓐꓭ ꓠꓬ ꓥꓪ ꓠꓬꓲ ꓤ ꓟꓽ ꓫꓵꓻ ꓡꓳ ꓫꓵꓽ ꓥꓳ꓾ ꓐꓰ ꓟ‐ꓕ ꓡꓰ ꓬꓰ‐ꓢꓴ ꓔꓯ ꓐꓯˍ ꓕꓯ꓾ ꓬꓰ‐ꓢꓴ ꓠꓬ “ꓥꓪ ꓠꓽ ꓢꓯ. ꓬꓲꓼ ꓡˍ ꓟ ꓐꓰ ꓢꓯꓼ ꓟꓬ ꓥ ꓡꓳ” ꓐꓰ ꓒꓳ, ꓖꓶˍ ꓡꓳ꓿ ꓐꓯ ꓘꓶꓽ ꓕꓱ ꓟ ꓗꓪ ꓐꓰ ꓣꓳ ꓠꓬ ꓟꓬ ꓐꓲ ꓘꓴꓽ ꓠꓯꓸꓼ ꓗꓪ ꓐꓰ ꓙꓵꓻ ꓠꓲ, ꓙꓳ ꓡꓯ꓿ ꓫꓵꓻ ꓓꓴꓽ ꓠꓬ ꓣꓳ ꓔꓯ ꓧꓪ. ꓡꓰ ꓠ. ꓠ. ꓓˍ ꓟ ꓗꓪ ꓥˍ ꓟꓲ ꓣꓳ ꓠꓬ ꓙꓵꓻ ꓠꓲ, ꓔꓯ ꓕꓽ ꓡꓳ ꓗꓷ꓾ ꓕꓶ ꓕꓶ ꓡꓰꓽ ꓪꓳ ꓔ ꓡꓯ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓟ ꓥ ꓡꓳ
