ꓮ ꓠꓱ ꓕꓯ ꓙꓲꓻ ꓫꓬ ꓢꓴ ꓕꓲꓽ ꓣꓳ ꓙꓳˍ ꓡꓳ꓿ ꓬꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓐꓰ ꓬꓲ ꓢꓯꓼ ꓟꓬ ꓞꓷ, ꓗꓷˍ ꓟ ꓬꓲ ꓢꓷ.ˍ ꓕꓯ ꓬꓲ ꓝꓲ ꓓꓴ ꓐꓴ ꓬꓲ ꓛꓳꓽ ꓒꓯ, ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ꓿ ꓥꓪ ꓠꓴ ꓔꓯ ꓪ ꓔꓯ ꓕꓲ ꓙꓰꓽ ꓐꓯ ꓟꓳ. ꓖꓶ ꓠꓲ, ꓫꓵˍ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓮ ꓗꓪ ꓥ ꓟꓲ ꓮ ꓡꓲ ꓗꓪ ꓥ ꓟꓲ꓾ ꓮꓽ ꓟ ꓔꓯ ꓥˍ ꓟꓲ ꓧꓪ. ꓡꓰ ꓓˍ ꓫꓵꓽ꓾ ꓓꓶꓽ ꓧꓪ. ꓡꓰ ꓓˍ ꓫꓵꓽ ꓚꓱ, ꓕꓲ ꓚꓱ, ꓙꓳˍ ꓡꓳ꓿ ꓕꓱ ꓟ ꓔꓯ ꓠꓬ ꓢꓷ. ꓢꓴ ꓮ ꓘꓶ. ꓟꓽ ꓙꓳ꓿ ꓚꓱ, ꓕꓱ ꓟ ꓔꓯ ꓠꓬ ꓥꓪ ꓠꓬ ꓕꓳꓽ ꓶ ꓗꓪ ꓐꓰ ꓢꓷ. ꓠꓲ, ꓗꓪ ꓐꓰ ꓢꓷ.ˍ ꓟ ꓟꓽ ꓥ꓿ ꓮꓽ ꓟˍ ꓟꓲ ꓐꓯ ꓖꓶ ꓡˍ ꓟ ꓟꓽ ꓥ꓿ ꓥꓪ ꓚꓲ. ꓛꓬ ꓚꓳꓽ ꓚꓲ. ꓛꓬ ꓛꓳ ꓫꓱꓽ ꓢꓲ ꓠꓬꓲ꓾ ꓥꓪ ꓚꓲ. ꓛꓬ ꓢꓷ. ꓡˍ ꓟ ꓥꓳ꓿ ꓕꓱ ꓟ ꓠꓬ ꓪꓽ ꓘꓴˍ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿
ꓠꓴ ꓫ. ꓙꓵ ꓟꓷ ꓙꓵˍ ꓕꓯ ꓪ ꓜꓲ ꓪꓽ ꓘꓴ꓿ ꓠꓴ ꓔꓯ ꓟꓲ ꓠꓯ ꓕꓱ ꓟ ꓗꓪ ꓟꓲ ꓠꓯ ꓕꓳꓽ ꓥꓳꓽ ꓕꓲ ꓟ ꓓꓶꓽ ꓡˍ ꓕꓯ꓾ ꓑꓰ, ꓡˍ ꓕꓯ ꓠꓴ ꓪ ꓜꓲ ꓛꓲ ꓝꓲ. ꓖꓶꓽ ꓢꓲ ꓪꓽ ꓘꓴ꓿ ꓖꓳ ꓡꓱ ꓠꓬ ꓠꓴ ꓠꓬ ꓮ ꓡꓲ ꓗꓪ ꓥˍ ꓟꓲ ꓮ ꓫꓵꓽ ꓠꓲ, ꓫꓵˍ ꓥ ꓟꓲ ꓪ ꓡꓰˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿ ꓥ ꓡꓳ꓾ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓮ ꓡꓲ ꓪꓽ ꓘꓴ ꓠ, ꓟ ꓟꓳ. ꓖꓶ ꓡˍ ꓡꓳ꓿ ꓡꓴ‐ꓘ ꓕꓳꓽ ꓶ 11ꓽ1‐13 ꓗꓪ ꓣꓳ ꓠ ꓠ, ꓓꓴ ꓬꓰ ꓡꓯ꓿
ꓕꓲ ꓠꓬꓲ ꓙꓳˍ ꓠꓬ꓾ ꓬꓰ-ꓢꓴ ꓠꓽ ꓟꓵꓽ ꓕꓲ ꓖ ꓗꓪ ꓪꓽ ꓘꓴ ꓔꓬ ꓢꓲ꓾ ꓪꓽ ꓘꓴ ꓓꓳ ꓡꓰ ꓠꓬ ꓬꓲ ꓛꓳꓽ ꓒꓯꓹ ꓗꓪ ꓟ ꓕꓲ ꓣꓳ ꓡꓰ꓾ ꓢꓲ ꓒꓽꓳ꓾ ꓬꓳ-ꓦ ꓡꓰ ꓬꓲ ꓛꓳꓽ ꓒꓯꓹ ꓐꓴ ꓔꓯ ꓪꓽ ꓘꓴ ꓟꓸ ꓖꓶˍ ꓟ ꓡꓰ ꓐꓰ꓾ ꓥꓪ ꓠꓴꓽ ꓔꓯˍ ꓟꓲ ꓪꓽ ꓘꓴ ꓟꓸ ꓖꓶ ꓡꓯ꓾ ꓐꓯˍ ꓡꓳ꓿ꓖꓳ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓠꓴ ꓪꓽ ꓪꓽ ꓘꓴˍ ꓕꓯ ꓕꓱ ꓡꓱ ꓐꓯ꓿ ꓟꓴꓽ ꓗꓪ ꓕꓯ ꓢꓲ ꓗꓪ ꓔꓬ ꓟ ꓥꓪ ꓠꓴꓽ ꓐꓹ ꓐꓽꓳ꓾ ꓠꓴ ꓢꓲꓽ ꓫꓬˍ ꓟ ꓟꓬꓱꓺ ꓔꓯ ꓒꓵꓽ ꓗꓴꓸ ꓝꓲ꓿ ꓠꓴ ꓗꓴꓷꓼ ꓓꓳ ꓡ ꓝꓲ꓿ ꓟꓴꓽ ꓗꓪ ꓕꓯ ꓢꓲ ꓗꓪ ꓠꓴ ꓠꓲꓹ ꓡꓶ ꓒꓬꓱ ꓡ ꓟ ꓡꓰ ꓐꓰ꓾ ꓟꓲ ꓠꓯ ꓕꓯ ꓢꓲ ꓗꓪˍ ꓟꓲ ꓒꓬꓱ ꓡ ꓝꓲ꓿ꓕꓲ ꓠꓬꓲ ꓐꓱ ꓶ ꓕꓲ ꓠꓬꓲ ꓥꓪ ꓠꓴꓽ ꓣꓱꓽ ꓬꓯꓼˍ ꓟ ꓜꓽ ꓓꓴ꓾ ꓠꓴ ꓡꓰ ꓥꓪ ꓠꓴꓽ ꓔꓯ ꓖꓶ ꓜꓽ ꓡꓯ꓿ꓥꓪ ꓠꓴꓽ ꓔꓯ ꓛꓬꓻ ꓡ ꓢꓴ ꓮꓽ ꓙꓵ ꓔꓯ ꓥꓪ ꓠꓴꓽ ꓖꓽ ꓖꓶˍ ꓟ ꓡꓰ ꓐꓰ꓾ ꓠꓴ ꓡꓰ ꓥꓪ ꓠꓴꓽ ꓝꓴꓲ ꓖꓽ ꓖꓶ ꓡꓯ꓿ ꓫꓵꓽ ꓠꓬꓲˍ ꓟ ꓗꓪ ꓥꓪ ꓠꓴꓽ ꓔꓯ ꓕꓽ ꓧꓳꓽ ꓓꓵꓽ ꓙꓰ꓾ ꓥꓶ ꓟ ꓗꓪ ꓐꓰ ꓠꓽ ꓥꓪ ꓠꓴ ꓔꓯ ꓚꓬꓴ ꓓꓳ ꓖꓶ ꓡꓯ꓾ ꓐꓰ ꓪꓽ ꓘꓴ꓾ ꓐꓯˍ ꓡꓳ꓿ꓬꓰ-ꓢꓴ ꓡꓰ ꓝꓮꓲ ꓬꓲ ꓪꓽ ꓔꓯ꓾ ꓠꓴ ꓪꓽ ꓗꓪ ꓟ ꓕꓲ ꓣꓳ ꓠꓬ ꓬꓲ ꓗꓪ ꓛꓳꓽ ꓕꓲ ꓣꓳ ꓔꓯ ꓦꓬꓼ ꓔꓱꓺ ꓫꓵ ꓗꓪ ꓙꓰ ꓢꓲ꓾ ꓗꓪ ꓛꓳꓽꓳ꓾ ꓥꓪ ꓔꓯ ꓑ ꓑ ꓢ ꓑꓬ ꓛꓵꓽ ꓖꓶꓽ ꓡꓯ꓿ꓮ ꓡꓲꓳ ꓐꓯ ꓠꓬ ꓥꓪ ꓗꓪ ꓛꓳꓽ ꓕꓲ ꓣꓳ ꓥꓪ ꓦꓲ ꓗꓪ ꓛꓲ ꓡ ꓢꓲ꓾ ꓥꓪ ꓬꓲ ꓔꓯ ꓮꓸ ꓫꓵ ꓖꓶ ꓜꓽ ꓓꓴ ꓟꓽ ꓙꓳ ꓡꓰꓳ꓾ ꓐꓯ ꓖꓶ ꓐꓷˍ ꓠꓬ꓾ꓬꓲ ꓠꓽ ꓦꓲ ꓠꓯꓸꓼ ꓗꓪ ꓐꓰ ꓒꓳꓹ ꓖꓶ ꓢꓲ꓾ ꓥꓪ ꓔꓯ ꓕꓽ ꓘꓶꓻ ꓡꓶ ꓡꓯ꓿ ꓮ ꓟꓶ ꓠꓽ ꓗ ꓘꓶꓽ ꓚꓵꓸ ꓗꓷꓳ꓿ ꓤ ꓠꓱ ꓐꓴˍ ꓟꓲ ꓬꓲꓼ ꓖꓴ ꓗꓪ ꓥꓪˍ ꓐꓰ ꓕꓲꓽ ꓪꓺꓼ ꓬꓲꓼ ꓔ ꓔꓬ ꓡꓳ꓿ ꓠꓴ ꓔꓯ ꓑ ꓑ ꓧꓪ ꓖꓶ ꓠꓹ ꓟ ꓥꓪ ꓔꓴ ꓡ ꓟꓽ ꓠꓺ꓾ ꓐꓯ ꓖꓶˍ ꓥꓳ꓿ꓖꓳ ꓡꓱ ꓥ ꓟꓲ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓬꓲ ꓪꓴꓸ ꓕꓯ ꓬꓲ ꓟꓽ ꓔꓴ ꓡ ꓥ ꓟꓲ꓾ ꓡꓽ ꓞꓳ ꓖꓳ ꓕꓲ ꓣꓳ ꓡꓰ ꓬꓲ ꓗꓪ ꓛꓳꓽ ꓔꓯ ꓟꓽ ꓟꓶ ꓟꓽ ꓞꓽ ꓓꓰꓽ ꓐꓷˍ ꓠꓬ꓾ ꓬꓲ ꓔꓴ ꓡ ꓢꓲ ꓬꓲ ꓮꓸ ꓫꓵ ꓣꓱꓽ ꓬꓯꓼˍ ꓟꓲ ꓖꓶˍ ꓥꓳ꓿ꓥꓪ ꓝꓮꓲ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓓꓰꓽ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓖꓶ ꓡ ꓥꓳ꓿ ꓧꓪ꓾ ꓖꓳ ꓡꓱ ꓠꓬ ꓠꓴ ꓪꓽ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲ’ꓼ꓾ ꓖꓳ ꓡꓱ ꓠꓬ ꓠꓴ ꓪꓽ ꓔꓯ ꓒꓴ ꓖꓶ ꓡ ꓥꓳ꓿ꓮ ꓡꓲꓳ ꓐꓯ ꓠꓬ ꓓꓰꓽ ꓢꓴ ꓠꓬ ꓓꓰꓽ ꓟꓶˍ ꓥꓳ꓿ ꓧꓪ ꓢꓴˍ ꓟꓲ ꓧꓪ ꓟꓶˍ ꓥꓳ꓿ ꓗ ꓘꓶꓽ ꓲ’ꓼ ꓢꓴ ꓔꓯ ꓠꓬ ꓒꓴ ꓖꓶ ꓡ ꓥꓳ꓿ꓠꓴ ꓪꓽ ꓗꓳ ꓡꓳ ꓗꓪ ꓐꓹ ꓐ ꓣꓱꓽ ꓢꓴ ꓕꓲ ꓣꓳ ꓔꓯ꓾ ꓬꓲ ꓤ ꓡꓰ ꓑ ꓑ ꓓꓰꓽ ꓡ ꓠꓬ꓾ Bꓸ ꓛꓲ ꓖꓶ ꓢꓴ ꓙꓳˍ ꓡ? ꓥꓪꓸ ꓓꓰꓽˍ ꓠꓬ꓾ ꓥꓪꓸ ꓪꓴꓸ ꓙꓴꓽ ꓩꓴꓻ ꓣꓴ ꓖꓶ ꓢꓴ ꓙꓳˍ ꓡ?ꓮꓸ Bꓸ ꓩꓴ ꓓꓰꓽˍ ꓠꓬ꓾ ꓟꓲ ꓙꓱꓼ ꓖꓶ ꓢꓴ ꓙꓳˍ ꓡ?ꓠꓴ ꓪꓽ ꓠꓬ ꓥꓶˍ ꓟ ꓡꓽ ꓞꓳ ꓥꓻ ꓥ ꓟꓲ꓾ ꓠꓴ ꓪꓽ ꓤ ꓠꓱ ꓐꓴ ꓔꓯ ꓙꓲꓻˍ ꓟ ꓖꓴꓽ ꓙꓴꓽ ꓖꓶ ꓠꓹ ꓟ ꓢꓷꓸˍ ꓠꓬ꓾ ꓟꓴꓽ ꓗꓪ ꓗꓪ ꓟ ꓠꓴ ꓪꓽ ꓐꓹ ꓐ ꓠꓽ ꓬꓲ ꓔꓯ ꓓꓰꓽ ꓢꓴ ꓔꓯ ꓠꓴ ꓪꓽ ꓢꓶꓸ ꓟꓽ ꓞꓲ ꓢꓲ-ꓫꓬ-ꓟ-ꓦ ꓖꓶ ꓡ ꓥꓳ꓾ ꓟꓽ ꓥ ꓡ?꓾ ꓐꓯˍ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟ. ꓟꓲꓽ ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓪꓽ ꓘꓴˍ ꓟ ꓠꓬ ꓮ ꓡꓲ ꓘꓶ. ꓛꓲ ꓬꓳ. ꓚꓰꓽˍ ꓡ꓾ ꓮ ꓡꓲ ꓐꓰ ꓪꓽ ꓘꓴ ꓠꓯ, ꓡ꓾ ꓐꓯˍ ꓟ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓟ. ꓟꓲꓽ ꓔꓯ ꓕꓲ ꓝꓲ. ꓗꓪ ꓚꓳ. ꓕꓲ ꓝꓲ. ꓣꓳ ꓡꓳ. ꓠꓬꓲˍ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓚꓲ. ꓛꓬ ꓥ ꓟꓲ ꓮ ꓕꓯ ꓥ ꓟꓲ ꓪꓽ ꓘꓴ ꓔꓬ ꓡꓳ꓾ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿ ꓢ ꓘꓪ ꓕꓯ ꓬꓲ ꓠꓬ ꓪ ꓚꓲ ꓗꓪ ꓓꓯ ꓢꓲ ꓠꓬꓲ ꓪꓽ ꓘꓴˍ ꓡꓳ꓿ ꓬꓲ ꓕꓲ ꓤꓶꓻ ꓡꓱꓸꓼ ꓔꓯ ꓪꓽ ꓘꓴˍ ꓟ ꓠꓯꓸꓼ ꓗꓪ ꓫꓺ ꓔ ꓟ ꓥ ꓡꓳ꓿ ꓬꓲ ꓟꓬꓱꓽ ꓬꓰˍ ꓟ꓾ ꓞꓳ ꓙꓳˍ ꓟ ꓮ ꓙꓵꓽ ꓠꓬ ꓪꓽ ꓘꓴˍ ꓟ ꓗꓪ ꓐꓰ ꓡˍ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓔꓯꓺ ꓢꓳ ꓓꓴ ꓬꓰ ꓡꓯ꓿ ꓮ ꓡꓲ ꓘꓶ ꓛꓲ ꓪꓴꓽ ꓧꓶˍ ꓥ ꓟꓲ ꓕꓲ ꓠꓬꓲ ꓕꓲ ꓠꓬꓲ ꓪꓽ ꓟꓽ ꓘꓴ ꓘꓴ ꓐꓰ ꓕꓽ ꓙ ꓬꓰ ꓝꓲ꓿ ꓮ ꓡꓲ ꓘꓶ ꓛꓲ ꓢꓯꓼ ꓐꓽˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓓꓵꓽ ꓙꓽ ꓙꓽ ꓕꓽ ꓗꓳ. ꓬꓰ ꓝꓲ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓔꓯꓺ ꓟꓳ. ꓖꓶ ꓔꓬ ꓟ ꓥ ꓡꓳ꓿ ꓬꓲ ꓚꓲ. ꓛꓬ ꓬꓲ ꓡꓰ ꓔꓯꓺ ꓟꓳ. ꓖꓶ ꓔꓲ. ꓟ ꓥ ꓡꓳ꓿
ꓝꓮꓲ ꓡꓯꓼ ꓫꓵ ꓬꓲ ꓠꓬ ꓪꓽ ꓘꓴ ꓟ. ꓖꓶˍ ꓕꓯ ꓕꓱ ꓡꓱ ꓐꓰ ꓬꓲ ꓐꓯ ꓘꓶꓽ ꓔꓯ ꓣꓳ ꓑ ꓙꓽˍ ꓡꓳ꓿ ꓠꓴ ꓪ ꓪꓽ ꓘꓴˍ ꓕꓯ ꓥꓪ ꓠꓴꓽ ꓐ, ꓐꓽꓳ꓾ ꓠꓴ ꓢꓲꓽ ꓫꓬ ꓟ ꓟꓬꓱ ꓔꓯ ꓒꓵꓽ ꓗꓴ. ꓝꓲ꓾ ꓐꓰ ꓧꓶ. ꓕꓯ ꓬꓲ ꓐꓯˍ ꓡꓳ꓿ ꓟꓲ ꓠꓯ ꓕꓱ ꓟ ꓗꓪ ꓠꓬ ꓐ, ꓐ ꓪꓴ‐ꓢ ꓬꓲ ꓟꓬꓱ ꓓꓳꓽ ꓓꓳ ꓠ, ꓟ ꓡꓰꓽ ꓥ ꓡꓳ꓿ ꓙꓳˍ ꓟ ꓮ ꓙꓵꓽ ꓠꓬ ꓪꓴ‐ꓢ ꓔꓯ ꓢꓷ. ꓠ, ꓟ꓾ ꓬꓲ ꓔꓯ ꓠꓲ, ꓠꓵ ꓠ, ꓟ꓾ ꓬꓲ ꓟꓬꓱ ꓓꓳꓽ ꓓꓳ ꓠ, ꓟ ꓚꓰꓼ ꓔ ꓡꓳ꓿ ꓖꓳ ꓡꓱ ꓠꓬꓲ ꓪꓽ ꓘꓴˍ ꓟ ꓗꓪ ꓬꓲ ꓪꓴ. ꓕꓲꓽ ꓘꓶꓽ ꓟ ꓠꓬ ꓮ ꓕꓯ ꓥ ꓟꓲ ꓪꓴ‐ꓢ ꓔꓯ ꓫꓱ. ꓖꓶ ꓠ, ꓟ ꓥ ꓡꓳ꓾ ꓐꓯˍ ꓟ ꓣꓳ ꓡꓳ. ꓟꓳˍ ꓡꓳ꓿
ꓝꓮꓲ꓾ ꓠꓴ ꓗꓴꓷꓼ ꓓꓳ ꓡ ꓝꓲ꓾ ꓐꓰ ꓬꓲ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓗꓴꓷꓼ ꓔꓯ ꓣꓳ ꓐꓰ ꓕꓲ ꓡꓰ, ꓔꓬ ꓝꓲ ꓗꓷꓳ꓿ ꓣꓳ ꓠꓯꓸꓼ ꓗꓪ ꓬꓲ ꓗꓴꓷꓼ ꓔꓯ ꓝꓲ ꓩꓴ ꓗꓷꓳ꓿ ꓢꓲ ꓒ ꓬꓰ‐ꓢꓴ ꓗꓪ ꓐꓰ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟ ꓥ ꓡꓳ꓿ ꓡ ꓠ, ꓟ ꓕꓲ ꓤꓶꓻ ꓗꓪ ꓡꓰꓽ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓟ ꓟꓽ ꓥ ꓥ ꓟꓲ ꓠꓯ ꓕꓱ ꓟ ꓗꓪ ꓡꓰ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻˍ ꓕꓯ ꓬꓲ ꓔꓯ ꓠꓲ, ꓠꓵˍ ꓕꓯ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓢꓲ ꓒ ꓡꓰ ꓟ. ꓔ ꓟ ꓪꓽ ꓘꓴ ꓓꓴ ꓟ. ꓖꓶˍ ꓟ ꓡꓰꓽ ꓟꓽ ꓞꓲ ꓬꓲ ꓠꓬ ꓔꓯꓺ ꓥꓳꓽ ꓕꓲ ꓟ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓢꓰꓽ ꓡꓳ꓿ ꓡ ꓞꓳ ꓕꓲ ꓣꓳ ꓟ ꓠꓬ ꓬꓲ ꓛꓳꓽ ꓒꓯ, ꓥ ꓟ ꓑꓶ. ꓓꓴ ꓬꓲ ꓓꓰꓽˍ ꓟ ꓟꓶˍ ꓟ ꓟꓽ ꓥ ꓥ ꓐꓰ꓾ ꓠꓲ, ꓟ ꓟꓽ ꓙꓬ ꓙꓬ ꓐꓰ ꓟꓽ ꓙꓽ ꓫ. ꓫ. ꓐꓰ ꓡꓯꓼ ꓫꓵ ꓓꓰꓽˍ ꓟ ꓑꓶ. ꓓꓴ ꓟꓶ ꓡꓰ ꓟ ꓥ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓐꓰ ꓥꓪ ꓤꓶꓻ ꓗꓪ ꓢꓻ ꓢꓻ ꓡꓰꓽ ꓠꓲ, ꓟ ꓕꓽ ꓙꓬ ꓡꓰ ꓝꓲ ꓡꓯ꓿ ꓪꓽ ꓘꓴˍ ꓟ ꓗꓪ ꓢꓯꓼ ꓕꓵꓼ ꓡꓯ꓿ ꓕꓲ ꓠꓬꓲ ꓟꓽ ꓖꓶ ꓡ ꓠꓬ ꓠꓬꓲꓽ ꓠꓬꓲ ꓓꓰꓽ ꓡꓯ꓿ ꓠꓬꓲꓽ ꓠꓬꓲ ꓟꓽ ꓖꓶ ꓡ ꓠꓬ ꓢꓽ ꓬꓲ ꓓꓰꓽ ꓡꓯ꓾ ꓟꓽ ꓟꓶ ꓕ ꓑꓳꓸꓼ ꓓꓰꓽ ꓡꓯ꓾ ꓢꓲ ꓒ ꓬꓰ‐ꓢꓴ ꓬꓲ ꓡꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓓꓰꓽ꓾ ꓖꓳ ꓡꓱ ꓠꓬꓲ ꓠꓴ ꓪꓽ ꓘꓴˍ ꓟ ꓟꓶˍ ꓥꓳ꓿ ꓗ ꓘꓶꓽ ꓲʼꓼ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓒꓴ ꓖꓶ ꓡˍ ꓥꓳ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓫ. ꓙꓵ ꓟꓷ ꓙꓵˍ ꓟ ꓗ, ꓘꓶꓽ ꓕꓱ ꓟ ꓔꓯ ꓲʼꓼ ꓘꓳ, ꓗꓷ ꓢꓲ ꓠꓬꓲ ꓪꓴ‐ꓢ ꓡꓰ ꓖꓶ ꓡˍ ꓟ ꓶꓽ ꓤ ꓫꓱ, ꓤ ꓔꓯ ꓘꓳ ꓣꓴ ꓠ, ꓟ ꓐꓱ ꓶ ꓮ ꓕꓯ ꓟꓲ ꓠꓲ, ꓟ ꓟꓽ ꓙꓬ ꓡꓰ ꓡꓰ ꓐꓰ ꓪꓽ ꓘꓴ ꓢꓲ ꓠꓬꓲ ꓞꓳ ꓙꓳ ꓙꓰ ꓡꓯ꓿ ꓮ ꓙꓵꓽ ꓢꓴ ꓔꓯ ꓫ. ꓟꓳ꓿
