ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓧꓶ. ꓕꓯ ꓟꓷꓽ ꓠꓷ, ꓝ. ꓒ ꓐꓴ ꓐꓰ ꓔꓱ, ꓜꓳꓽ ꓢꓴ ꓐꓴ ꓟꓳꓻ ꓠꓲ, ꓫꓵˍ ꓟ ꓔꓯ ꓠꓴ ꓪ ꓟꓳꓻ ꓗꓷꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓦ ꓢꓯꓼ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓟ‐ꓕꓲ 13ꓽ10‐17 ꓗꓪ ꓟ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓢꓲ ꓒ ꓬꓰ‐ꓢꓴ ꓡꓰ꓾ ꓕꓲ ꓐꓱ ꓙꓳˍ ꓟ ꓠꓬ ꓟꓬ ꓢꓶꓽ ꓙꓳ ꓢꓲ ꓟꓽ ꓟꓳꓻ꓾ ꓠ, ꓑꓳ ꓙꓳ ꓢꓲ ꓟꓽ ꓑ ꓙꓽ꓾ ꓠꓲ, ꓟ ꓙꓳ ꓢꓲ ꓠꓵꓻ ꓠꓲ, ꓟꓽ ꓙꓳ꓾ ꓠꓲ, ꓟ ꓗ ꓘꓶꓽ ꓚꓵ. ꓔ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟꓬ ꓢꓶꓽ ꓙꓳ ꓢꓲ ꓟꓳꓻ ꓢꓴ꓾ ꓠ. ꓑꓳ ꓙꓳ ꓢꓲ ꓑ ꓙꓽ ꓢꓴ꓾ ꓠꓲ, ꓟ ꓙꓳ ꓢꓲ ꓠꓬꓲ ꓠꓵꓻ ꓠꓲ, ꓗꓪ ꓐꓰ ꓘꓳ ꓣꓴ ꓗꓷ ꓢꓴ ꓠꓽ ꓶꓼ ꓙꓳ ꓫꓱ, ꓙꓳˍ ꓡꓳ꓾” ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓐꓯˍ ꓟ ꓠꓬꓲ. ꓠꓬꓲ ꓟ ꓐꓯ ꓘꓶꓽ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓔꓬ ꓟ ꓠꓬ ꓮ ꓫꓵꓽ ꓔꓯ ꓐꓯ ꓔꓬ ꓡ ꓐꓯˍ ꓠꓬ꓾ ꓧꓶ. ꓕꓯ ꓟꓷꓽ ꓠꓷ, ꓝ. ꓒ ꓐꓴ ꓐꓰ ꓔꓱ, ꓜꓳꓽ ꓢꓴ ꓐꓴ ꓮ ꓘꓶ. ꓟꓳꓻ ꓠꓲ, ꓫꓵˍ ꓟ꓾ ꓮ ꓘꓶ. ꓥꓳ ꓡꓳ. ꓔ ꓟ ꓚꓬꓴ. ꓢꓲ ꓒ꓾ ꓬꓲ ꓫꓵꓽ ꓧꓳ. ꓗꓷ ꓢꓲ ꓠꓬꓲ ꓝꓴꓲ. ꓗꓪ ꓐꓰ ꓣꓳ ꓐꓱ ꓶ ꓚꓬꓴ. ꓖꓶ ꓡˍ ꓟ꓾ ꓣꓳ ꓐꓱ ꓶ ꓮ ꓙꓵꓽ ꓥ ꓟ ꓢꓲ ꓒ ꓬꓰ‐ꓢꓴ ꓔꓯ ꓟꓷꓽ ꓠꓷ, ꓝ. ꓒ ꓐꓴ ꓮ ꓘꓶ. ꓟꓳꓻ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓪ ꓠꓬ ꓟꓽ ꓟꓳꓻ ꓟꓳꓻ ꓫꓵꓻ ꓘꓷ ꓡꓰꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓣꓳ ꓠꓬ ꓟꓳꓻ ꓡꓰꓳ꓿ ꓠꓴ ꓪ ꓗ, ꓛꓲꓽ꓾ ꓐꓰ ꓐꓯˍ ꓟ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓒ‐ꓡꓲ‐ꓢꓷ ꓐꓴ꓾ ꓢ‐ꓓꓴ‐ꓗꓷ ꓐꓴ꓾ ꓔꓲ ꓒ ꓪꓴ. ꓓꓵ ꓣꓱꓽ ꓢꓴ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓟꓳꓻ꓿ ꓠ. ꓑꓳ ꓙꓳˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓟꓽ ꓑ ꓙꓽ꓿ ꓠꓲ, ꓟ ꓙꓳˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓟꓽ ꓘꓳ ꓣꓴ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓐꓯ ꓘꓶꓽ ꓕꓱ ꓟ ꓔꓯ ꓐꓯ ꓔꓬ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓠꓬꓲ. ꓠꓬꓲ ꓗꓪ ꓮ ꓡꓲ ꓐꓯ ꓖꓶ ꓡ ꓔꓬ ꓡ ꓐꓯ ꓠꓬ꓾ ꓠꓴ ꓪ ꓟꓬ ꓢꓶꓽ ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓴ ꓪ ꓟꓽ ꓟꓳꓻ꓿ ꓠꓴ ꓪ ꓠ. ꓑꓳ ꓙꓳˍ ꓡꓳ꓾ ꓖꓳ ꓡꓱ ꓐꓯ ꓥ ꓟꓲ ꓠꓴ ꓪ ꓟꓽ ꓑ ꓙꓽ꓿ ꓠꓴ ꓪ ꓠꓲ, ꓟ ꓙꓳˍ ꓡꓳ꓾ ꓖꓳ ꓡꓱ ꓐꓯ ꓥ ꓟꓲ ꓠꓴ ꓪ ꓠꓲ, ꓟ ꓘꓳ ꓣꓴ ꓟꓽ ꓗꓴ.꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯ ꓠꓬ꓾ ꓠꓬꓲ. ꓠꓬꓲ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓟꓽ ꓟꓳꓻ꓾ ꓟꓳˍ ꓟꓲ ꓟꓳꓻ ꓟꓽ ꓓꓻ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓮ ꓡꓲ ꓟꓳꓻ ꓓ, ꓡ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓐꓯˍ ꓟ ꓡꓰ ꓐꓰ ꓣꓳꓺ ꓓꓰ ꓡꓰˍ ꓟ꓾ ꓣꓳ ꓬꓰ ꓖꓶ ꓜꓽ ꓐ ꓡˍ ꓟ꓾ ꓣꓳ ꓔꓯ ꓮ ꓘꓶ. ꓦ ꓡꓱ ꓐꓳ ꓔꓬ ꓢꓴ ꓞꓳ ꓟꓳꓽ ꓐꓴ꓾ ꓤ ꓠꓱ ꓐꓴ꓾ ꓫ. ꓫꓵꓽ ꓠꓶꓽ ꓛꓳꓽ ꓐꓴ꓾ ꓖꓳ ꓟ ꓔꓯ ꓣꓳꓽ ꓟꓽ ꓟꓳꓻ ꓥꓳ ꓐꓯ ꓠꓬ ꓣꓳ ꓠꓬ ꓟꓬ ꓢꓶꓽ ꓙꓳˍ ꓥ ꓟꓲ ꓟꓽ ꓟꓳꓻ ꓟ ꓥꓳ꓿
ꓫ. ꓙꓵ ꓟꓷꓼ ꓙꓵ ꓢꓴ ꓥꓴꓻ ꓔꓬ ꓢꓴ ꓥꓴꓻ ꓘꓶꓽ꓾ ꓮ ꓘꓶ. ꓫ. ꓙꓵ ꓟꓷꓼ ꓙꓵ ꓔꓳ, ꓜꓳꓽ ꓔꓬ ꓢꓲ ꓠꓬꓲ ꓘꓴꓻ ꓓꓰꓽ ꓘꓶꓽ꓾ ꓖꓳ ꓟ ꓔꓯ ꓣꓳ ꓟꓽ ꓑ ꓙ ꓠꓬ ꓣꓳꓽ ꓠꓬ ꓠ. ꓑꓳ ꓟꓽ ꓙꓳ ꓟ ꓕꓲꓽ ꓡꓰ, ꓥꓳ꓿ ꓖꓳ ꓟ ꓡꓰꓽ ꓟꓽ ꓞꓲꓺ ꓣꓳ ꓠꓬ ꓣꓳ ꓠꓲ, ꓠꓵꓻ ꓢꓴ ꓔꓯ ꓣꓳ ꓘꓳ ꓣꓴ ꓢꓲ꓾ ꓣꓳ ꓟꓽ ꓠꓲ, ꓠꓵꓻ ꓢꓴ ꓔꓯ ꓣꓳꓽ ꓟꓽ ꓘꓳ ꓣꓴ꓿ ꓫ. ꓢꓴ ꓟꓷꓼ ꓢꓴ ꓔꓯ꓾ ꓥ ꓠꓬ ꓖꓳ ꓕꓲ ꓣꓳ ꓠꓬ ꓞꓳ ꓘꓴꓽ ꓥ ꓡꓳ꓿ ꓖꓳ ꓕꓲ ꓣꓳ ꓠꓬ ꓕꓱ ꓡꓱ ꓗ, ꓡꓳ꓾ ꓖꓳ ꓡꓱ ꓗ, ꓡꓳ ꓐꓯ ꓢꓲ ꓣꓳ ꓠꓲ, ꓟ ꓗꓪ ꓟꓽ ꓘꓳ, ꓣꓴ ꓣꓴ ꓐꓰ ꓣꓳ ꓠꓲ, ꓟ ꓗꓪ ꓟꓽ ꓖꓶ ꓓꓵꓽ ꓡ ꓥꓳ ꓐꓯˍ ꓠꓬ꓾ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓟꓽ ꓗꓴ. ꓟ ꓐꓰ ꓕꓲꓽ ꓡꓰ, ꓥꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯ ꓠꓬ꓾ ꓣꓳ ꓠꓬ ꓪꓴ‐ꓢ ꓔꓯ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓧꓪ.ˍ ꓟ ꓟꓬꓽˍ ꓡꓳ꓿ ꓪꓽ ꓘꓴ ꓦꓲꓻ ꓗꓪ ꓡꓰꓽ ꓪꓴ‐ꓢ ꓙꓳˍ ꓡꓳ ꓐꓯ ꓢꓲ꓾ ꓪꓽ ꓘꓴ ꓦꓲꓻ ꓗꓪ ꓠꓬ ꓣꓳ ꓠꓬ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ꓾ ꓐꓲꓻ ꓐꓲꓻ ꓟꓳ ꓟꓳ ꓡꓰꓽ ꓕꓱ ꓡꓱ ꓬꓰ ꓢꓲ ꓠꓬꓲ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓔꓬ ꓡꓳ꓿ ꓪꓴ‐ꓢ ꓔꓯˍ ꓟꓲ ꓙꓰ ꓢꓲ ꓠꓬꓲ ꓡꓳ. ꓠꓬꓲ ꓔꓬ ꓡꓳ꓿ ꓪꓴ‐ꓢ ꓔꓯˍ ꓟꓲ ꓘꓳ ꓣꓴ ꓔꓬ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓒ ꓕꓲꓺ ꓗꓪ ꓔꓬ ꓟ ꓣꓳ ꓠꓶꓽ ꓛꓳꓽ ꓐꓴ꓾ ꓣꓳ ꓦꓲꓻ ꓘꓴꓽ ꓠꓯꓸꓼ ꓗꓪ꓾ ꓥ ꓠꓬ ꓣꓳ ꓐꓰ ꓕꓲ ꓡꓰ, ꓟꓬꓱꓽ ꓬꓰ ꓔꓬ ꓟ ꓗꓪ꓾ ꓣꓳ ꓔꓯ ꓮ ꓘꓶ. ꓠꓶꓽ ꓞ, ꓢꓴ꓾ ꓣꓳ ꓗꓪ ꓐꓰ ꓮ ꓘꓶ. ꓠꓲ, ꓗꓴ ꓟꓬ ꓗꓴ ꓖꓶ ꓠ, ꓟ ꓠꓶꓽ ꓞ, ꓢꓴ꓾ ꓖꓳ ꓟ ꓠꓬ ꓣꓳ ꓢꓲ ꓒ ꓬꓰ‐ꓢꓴ ꓥꓳ꓿ ꓬꓲ ꓪ ꓔꓯ ꓬꓰ ꓙˍ ꓥꓳ ꓐꓯ ꓠꓬ ꓠꓴ ꓪ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓔ, ꓙ ꓢꓲ꓾ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴˍ ꓟ ꓕꓲꓽ ꓡꓰ, ꓥꓳ꓿
ꓕꓱ ꓡꓱ ꓟꓽ ꓥ ꓥꓳ ꓐꓯ ꓕꓯ ꓠꓽ ꓥꓪ ꓠꓴꓽ ꓪꓴ‐ꓢ ꓦ ꓡꓱ ꓢꓴ ꓥꓳ ꓐꓰ ꓮ ꓡꓲ ꓘꓷ ꓛꓲ ꓐꓯ ꓔꓬ ꓐꓯ ꓔꓬ꓾ ꓪꓽ ꓘꓴ ꓦꓲꓻ ꓗꓪ ꓕꓲ ꓠꓬꓲ ꓕꓲ ꓠꓽ ꓡꓰ ꓙꓰ ꓮ ꓡꓲ ꓬꓰ ꓫꓵˍ ꓬꓰ꓾ ꓢꓲ ꓒ ꓬꓰ‐ꓢꓴ ꓔꓯ ꓠꓴ ꓪ ꓟꓳꓻ ꓟꓽ ꓗꓴ. ꓥꓳ ꓐꓯ ꓠꓬ꓾ ꓠꓴ ꓪ ꓠꓬ ꓬꓲ ꓖꓳꓽ ꓥꓳ꓿
