ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ (ꓬꓳ‐ꓦ꓿ 20ꓽ1‐2, 11‐18) ꓥ ꓢꓲ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓯ. ꓬꓲꓼ ꓡ ꓟ ꓢꓲ ꓒ ꓬꓰ‐ꓢꓴ ꓠꓬ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓔꓯ ꓟꓳ. ꓖꓶˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓬꓲ ꓪꓴ. ꓕꓯ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓟꓽ ꓚꓬ, ꓪ ꓔꓬ꓿ ꓗ ꓠꓯ. ꓢꓲ ꓒ ꓬꓰ‐ꓢꓴ ꓡꓰ ꓟ‐ꓡꓲꓳ꓾ ꓐꓰ ꓘꓴ ꓗꓷ ꓕꓯ ꓬꓲ ꓠꓬ ꓬꓰ‐ꓢꓴ ꓥ ꓟ ꓢꓷ. ꓡꓰꓳ꓾ ꓐꓰ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓠꓬ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓑꓮꓲꓽ (Mary Magdalene ꓑꓮꓲꓽ) ꓥ ꓡꓳ꓿
ꓬꓲ ꓞꓳ ꓙꓳ ꓗꓷ ꓟ ꓤꓶꓻ ꓔꓯ ꓣꓳ ꓡꓳ. ꓠꓬꓲ ꓡꓯ꓿ Mary Magdalene ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓐꓯˍ ꓟ ꓠꓬ ꓥꓶˍ ꓟ ꓠꓲꓽ 7 ꓟ ꓡꓰ ꓙꓵꓽˍ ꓟ ꓔꓯ ꓟꓶ ꓗꓷ ꓢꓴ ꓥ ꓡꓳ꓿ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓠꓻ ꓫꓬ, ꓖꓶˍ ꓟ ꓔꓯ ꓘꓳ ꓣꓴ ꓟꓶ ꓗꓷ ꓢꓲ ꓥꓶˍ ꓟ ꓦ ꓓꓯ,ˍ ꓟ ꓗꓪ ꓐꓰ ꓓꓻ ꓡꓰ ꓕꓯ ꓬꓰ‐ꓢꓴ ꓗ ꓠꓯ. ꓛꓳ ꓢꓴ ꓕꓲ ꓣꓳ ꓒꓬꓱꓼ ꓡ ꓗꓷꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓶꓼ ꓓꓳꓽ ꓫꓱ, ꓓꓳꓽ ꓟꓬꓱꓽ ꓬꓰˍ ꓟ ꓗꓪ ꓝꓲ ꓓꓴ ꓐꓴ ꓔꓯ ꓣꓱꓽ ꓙ ꓢꓲ ꓪꓴ‐ꓢ ꓟꓬꓱꓽ ꓬꓰ‐ꓢꓴ ꓕꓲ ꓣꓳˍ ꓡꓰ ꓐꓰ ꓣꓳ ꓟꓳꓻ ꓪˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓚ ꓟ. ꓖꓶ ꓡˍ ꓟ ꓔꓯ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓠ ꓠ, ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓬꓰ ꓗꓷ ꓟ ꓪꓽ ꓠꓬꓲ ꓓꓴ ꓟꓬꓱꓽ ꓔꓯ ꓢꓷ. ꓙ ꓟꓳ ꓗꓷ ꓢꓴ ꓕꓲ ꓣꓳˍ ꓟꓲ ꓥ ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓢꓲ ꓒ ꓬꓰ‐ꓢꓴ ꓠꓬ ꓬꓴ‐ꓔ ꓡ ꓞꓳ ꓐꓴ ꓡꓰ ꓘꓶꓻ ꓙꓵˍ ꓟ ꓔꓯ ꓔꓳ, ꓜꓳꓽˍ ꓟ ꓙꓵ, ꓗꓪ ꓬꓲ ꓠꓬ ꓢꓲ ꓒ ꓐꓰ ꓕꓲꓽ ꓪ ꓦꓰꓼ ꓔꓴ ꓔꓬ ꓟˍ ꓡꓰ ꓐꓰ꓾ ꓡꓳ, ꓬꓰˍ ꓗꓪ ꓛꓲ ꓟ, ꓟ ꓟ‐ꓡꓲ ꓐꓰ ꓕꓲ ꓪ ꓢꓲ ꓒ ꓬꓰ‐ꓢꓴ ꓬꓲ ꓡꓯꓼ ꓐꓳ ꓔꓶ. ꓓꓴ ꓛꓲ ꓔꓲ ꓗꓪ ꓔꓬ ꓗꓷ ꓢꓴ ꓥ ꓡꓳ꓿
ꓧꓶ. ꓕꓯ ꓗꓪ ꓝꓴꓲ. ꓙꓳ ꓢꓴ꓾ ꓢꓴ ꓡꓰ ꓡꓳ ꓔ ꓟ ꓟꓶ ꓢꓴ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓢꓯ. ꓬꓲꓼ ꓡˍ ꓟ ꓔꓯ ꓬꓲ ꓪꓴ. ꓟꓳꓻ ꓗꓷ ꓢꓴ ꓕꓲ ꓣꓳ ꓒꓬꓱꓼ ꓡꓺꓳ꓿ ꓕꓱ ꓟ ꓠꓬ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓦ ꓡꓱ ꓐꓳˍ ꓟ꓾ ꓢꓲ ꓒ ꓐꓱ ꓶ ꓣꓱꓽ ꓙ ꓬꓰ ꓙˍ ꓟ ꓪꓴ. ꓠꓬꓲ ꓥ ꓡꓳ꓿
ꓕꓱ ꓕꓲ ꓚꓱ, ꓠꓬ ꓣꓳ ꓐꓱ ꓶ ꓓꓵꓽ ꓙ ꓠꓬꓲ ꓓꓴ ꓔꓯ ꓢꓳ ꓓꓴ ꓥ ꓡꓳ꓿ ꓣꓳ ꓮ ꓙꓵꓽ ꓔꓯ ꓬꓰ ꓥꓳꓽ ꓡꓰ ꓬꓰ ꓛꓬ ꓡꓰ ꓟ ꓕꓲ ꓙꓰꓽ ꓠꓽ ꓙꓳˍ ꓡꓳ꓿ ꓣꓳ ꓤꓶꓻ ꓗꓪ ꓬꓰ ꓥꓳꓽ ꓡꓰ ꓗꓷ ꓟ ꓖꓳ ꓕꓲ ꓟ ꓑꓶ. ꓓꓴ ꓝꓮꓲ ꓕꓲ ꓧꓪ, ꓓꓵꓽ ꓙ ꓠꓲ, ꓟꓽ ꓫꓵ ꓠ ꓛꓲ꓾ ꓬꓰ ꓛꓬ ꓡꓰ ꓬꓰ ꓥꓳꓽ ꓡꓰ ꓟ ꓖꓳ ꓟ ꓔꓯ ꓓꓵꓽ ꓙ ꓠꓬꓲˍ ꓕ ꓑꓳꓸꓼ ꓣꓳ ꓔꓯ ꓫ. ꓔꓳ ꓡꓰ ꓝꓲˍ ꓟ ꓠꓽ ꓙꓳˍ ꓡꓳ꓿ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓗꓪ ꓟꓽ ꓐ ꓡ ꓟ ꓢꓯꓼ ꓐꓽˍ ꓟ ꓟꓬꓽ ꓡꓰ ꓠꓲ. ꓡꓰ ꓠꓽ ꓙꓳ ꓗꓴ.ˍ ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓴ ꓔꓯ ꓙꓲˍ ꓟ ꓔꓯ ꓬꓰ ꓠ, ꓟ꓾ ꓝꓴꓲ. ꓗꓪ ꓐꓰ ꓡꓲ, ꓓꓳ ꓡ ꓠ, ꓟ ꓘꓴꓻ ꓔꓬ ꓡꓳ꓿ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓠꓬ ꓬꓲ ꓤꓶꓻ ꓔꓯ ꓪ ꓜꓲ ꓙꓲˍ ꓟ ꓞꓳ ꓙꓳ ꓚꓱ, ꓗꓪ ꓐꓰ ꓬꓰ‐ꓢꓴ ꓔꓯ ꓛꓳꓻ ꓗꓷ ꓟ ꓡꓰꓽ ꓟꓽ ꓞꓲ꓾ ꓬꓲ ꓕꓲ ꓤꓶꓻ ꓡꓱꓸꓼ ꓔꓯ ꓥ ꓟꓲ ꓢꓲ ꓒ ꓔꓯ ꓔꓲꓺ ꓖꓶ ꓗꓷ ꓟ ꓥ ꓡꓳ꓿ ꓕꓱ ꓟ ꓔꓯ ꓡꓳ. ꓢꓲ ꓠꓴ ꓐꓰ ꓥꓪ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓮ ꓡꓲ ꓫꓵꓽ ꓤꓶꓻ꓾ ꓮ ꓡꓲ ꓫꓵꓽ ꓔꓲꓺ ꓖꓶ ꓓꓴ ꓗꓪ ꓐꓰ ꓣꓳ ꓠꓬ ꓢꓲ ꓒ ꓔꓯ ꓖꓶ ꓓꓴ ꓬꓰ ꓔꓬ ꓡ꓾ ꓐꓯ ꓟ ꓔꓯ ꓝꓮꓲ ꓕꓲ ꓧꓪ, ꓓꓵꓽ ꓙ ꓠꓬꓲ ꓓꓴ ꓬꓰ ꓡꓯ꓿
