ꓟ‐ꓕ ꓐꓰ ꓟ‐ꓡꓲ ꓔꓯ ꓥꓳꓽ (Sunday reflection)
ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (16) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 10ꓽ38‐42 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓟ‐ꓕ ꓐꓰ ꓟ‐ꓡꓲ ꓟꓬꓱꓺ ꓔ ꓐꓴ ꓦꓲꓻ ꓗꓪ ꓗ ꓙꓰ ꓟ ꓙꓵ, ꓕꓯ ꓟ‐ꓡꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠ ꓠ, ꓔꓬ ꓡꓳ꓿
ꓟ‐ꓕ ꓠꓬ ꓟꓬꓱꓽ ꓮ ꓟꓬ, ꓟꓬꓽ ꓔꓬ ꓟ ꓪꓴ. ꓠꓬꓲ ꓟ‐ꓡꓲ ꓔꓯ ꓬꓰ ꓙ ꓠ, ꓟ ꓐꓯ ꓗꓷ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ‐ꓕ ꓠꓴ ꓠꓬ ꓟꓬꓱꓽ ꓮ ꓟꓬ, ꓟꓬꓽ ꓔꓬ ꓟ ꓪꓴ. ꓠꓬꓲ ꓙꓽ ꓫ. ꓔꓬ ꓐꓭ꓿ ꓟ‐ꓡꓲ ꓠꓬ ꓟꓬꓽ ꓠꓬꓲ ꓙꓲ ꓟ ꓖꓳ ꓕꓲ ꓐꓱ ꓔꓯ ꓢꓲ ꓣꓴ ꓗꓷ ꓠꓬꓲ꓾ ꓬꓲ ꓔꓯˍ ꓐꓰ ꓣꓴ ꓔꓯ, ꓙꓰ ꓟꓽ ꓓꓽ ꓐꓰ ꓐꓯ ꓗꓷ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓮ ꓫꓵꓽ ꓑꓶ. ꓓꓴ ꓙ ꓫ. ꓔꓬ ꓡ ꓐꓰ ꓠꓽ ꓠꓬꓲˍ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓢꓯ. ꓔꓬ ꓟ ꓦꓬꓼ ꓠꓬꓲ ꓗꓪ ꓟꓲ ꓠꓯ ꓤꓶꓻ ꓦꓬꓼ ꓠꓬꓲ ꓠꓬ ꓮ ꓘꓶ. ꓛꓲ ꓒꓳ, ꓡꓶꓽ ꓔꓬ ꓪꓴꓽ ꓟꓴꓽ ꓔꓬ ꓟ ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿ ꓠꓴ ꓥꓪ ꓠꓬ ꓣꓳ ꓚꓲ. ꓛꓬ ꓦꓲꓻ ꓐꓱ ꓶ ꓤ ꓠꓱ ꓤ ꓐꓱ ꓶ ꓜ ꓓꓴ ꓓꓳ ꓓꓴ ꓐꓱ ꓶ ꓟꓬꓱꓽ ꓮ ꓟꓬ, ꓛꓲ ꓟꓬꓽ ꓔꓬ ꓟ ꓥ ꓡꓳ꓿
ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓠꓬ ꓣꓳ ꓔꓯ ꓫ. ꓕꓱ ꓠꓲ, ꓫꓵˍ ꓟꓲ ꓝꓮꓲ ꓣꓳ ꓔꓬ ꓟ ꓞꓳ ꓘ, ꓗꓪ ꓐꓰ ꓣꓳ ꓔꓯ ꓮ ꓘꓶ. ꓛꓲ ꓣꓳ ꓬꓯꓼ ꓔꓬ ꓥ ꓟꓲ ꓣꓳ ꓠꓬ ꓟꓬꓱꓽ ꓟꓬꓽ ꓔꓬ ꓟ ꓪꓴ. ꓠꓬꓲ ꓬꓲ ꓪ ꓔꓯ ꓣꓳ ꓕꓲ ꓦꓲꓻ ꓢꓴ ꓔꓯ ꓬꓲ ꓙꓵ, ꓖꓶ ꓟꓽ ꓐ ꓡ ꓟ ꓮ ꓟꓬ, ꓙꓳˍ ꓟ ꓦꓬꓼ ꓠꓬꓲ ꓥ ꓡꓳ꓿
ꓕꓱ ꓡꓰ ꓠꓲ, ꓫ. ꓟꓬ, ꓫ. ꓓꓴ ꓔꓳ, ꓜꓳ ꓔꓬ ꓟ ꓙꓵ, ꓕꓯ ꓠꓴ ꓥꓪ ꓔꓯ ꓮ ꓘꓶ. ꓛꓲ ꓣꓳ ꓬꓯꓼ ꓣꓱ ꓞ ꓔꓬ ꓥ ꓟꓲ ꓣꓳ ꓠꓬ ꓬꓲ ꓪ ꓔꓯ ꓬꓰ ꓙ ꓟꓽ ꓐ ꓡ ꓟ ꓮ ꓟꓬ, ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓟꓲ ꓠꓯ ꓤꓶꓻ ꓦꓬꓼ ꓠꓬꓲ ꓔꓯ ꓡꓰ ꓫꓱ, ꓔꓬ ꓟ ꓪꓴ. ꓠꓬꓲ ꓟ‐ꓕ ꓡꓰ ꓐꓰ ꓣꓳ ꓠꓬ ꓟꓬꓱꓽ ꓮ ꓟꓬ, ꓟꓬꓽ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓙꓲ ꓟ ꓚꓱ, ꓗꓪ ꓞꓳ ꓫꓱ, ꓠ, ꓟ ꓢꓲꓺ ꓒ ꓐꓰ ꓕꓲ ꓪ ꓙ ꓫꓱ, ꓠ, ꓟ ꓣꓳꓺ ꓚꓵ, ꓟ ꓔꓯ ꓠꓴ ꓥꓪ ꓔꓯ ꓟ. ꓖꓶ ꓡ ꓟ ꓥ ꓡꓳ‐
ꓢꓲꓺ ꓒ ꓬꓰ‐ꓢꓴ ꓡꓰ ꓣꓳ ꓤꓶꓻ ꓠꓯ, ꓗꓪ ꓕꓲ ꓫꓵꓽ ꓡꓰ ꓣꓳ ꓬꓯꓼ ꓟ ꓠꓬ ꓬꓲ ꓥ ꓡꓳ ꓐꓰ ꓠꓬꓲ. ꓠꓬꓲ ꓐꓯ ꓔ ꓟ ꓥ ꓡꓳ꓿ ꓣꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓠꓲ, ꓠꓵ ꓓꓴ ꓬꓰ ꓡꓯ꓿ ꓣꓳ ꓢꓯ. ꓔꓬ ꓟ ꓕꓲ ꓤꓶꓻ ꓗꓪ ꓬꓲ ꓐꓱ ꓶ ꓡꓰ ꓢꓯ. ꓔꓬ ꓠ, ꓟ ꓐꓰ ꓢꓲꓺ ꓒ ꓡꓰ ꓣꓳ ꓔꓯ ꓮ ꓫꓵꓽ ꓟꓬꓱꓽ ꓬꓰ ꓝꓲ ꓠꓲ, ꓫꓵˍ ꓟ ꓔꓯ ꓣꓳ ꓠ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓥ ꓡꓳ꓿
ꓙꓲˍ ꓟ ꓔꓯ ꓣꓳ ꓤꓶꓻ ꓠꓯ, ꓗꓪ ꓢꓲ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟ‐ꓕ ꓔꓯ ꓫ. ꓕꓱ ꓗꓷ ꓟ ꓠꓬ ꓣꓳ ꓠꓲ, ꓟ ꓗꓪ ꓮ ꓘꓶ. ꓛꓲ ꓓꓵ ꓙ ꓓꓴ ꓙꓳ ꓟ ꓥ ꓡꓳ꓿ ꓠꓴ ꓥꓪ ꓥ ꓟꓲ ꓮ ꓟꓶ ꓟ ꓙꓵ, ꓗꓪ ꓮ ꓕꓯ ꓥ ꓟꓲ ꓬꓲ ꓙꓵ, ꓟꓽ ꓙꓳ ꓪꓽ ꓘꓴ ꓠ, ꓟ ꓝꓮꓲ ꓟꓬꓱꓽ ꓔꓯ ꓡꓰ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓠꓲ, ꓫ. ꓟꓬ, ꓫ. ꓓꓴ ꓐꓰ ꓓꓴ ꓙ ꓪꓴꓽ ꓧꓶꓽ ꓓꓴ ꓠꓬ ꓣꓳ ꓔꓯ ꓮ ꓘꓶ. ꓛꓲ ꓓꓴ ꓙ ꓟꓬꓽ ꓡꓰ ꓝꓲ ꓟ ꓥ ꓡꓳ꓿ ꓕꓱ ꓡꓰ ꓐꓰ ꓗꓷ ꓡꓰ ꓟ ꓙꓵ, ꓕꓯ ꓢꓲꓺ ꓒ ꓔꓯ ꓧꓪ, ꓠ, ꓟ ꓐꓰ ꓬꓲ ꓔꓯ ꓙꓵꓻ ꓠ, ꓟ ꓮ ꓘꓶ. ꓛꓲ ꓣꓳ ꓚꓵˍ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓗꓪ ꓐꓰ ꓠꓴ ꓥꓪ ꓠꓬ ꓢꓲꓺ ꓒ ꓔꓯ ꓡꓰ ꓣꓳ ꓬꓯꓼ ꓔꓬ ꓟ ꓔꓯ ꓣꓳ ꓓꓵ ꓙ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓡꓰ ꓧꓪ. ꓓꓴ ꓬꓰ ꓡꓯ꓿ ꓬꓲ ꓔꓯ ꓫ. ꓕꓱ ꓓꓴ ꓬꓰ ꓡꓯ꓿ ꓬꓲ ꓡꓰ ꓣꓳ ꓔꓯ ꓫ. ꓕꓱ ꓘꓶꓽ ꓔꓯ ꓠ ꓠ, ꓓꓴ ꓬꓰ ꓡꓯ꓿ ꓙꓲˍ ꓟ ꓟꓬꓱꓽ ꓔꓯ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
