ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓶꓻ ꓡꓲꓽ ꓓꓻ ꓟ ꓟꓯꓻ ꓢꓴ ꓠꓴ ꓪ ꓮ ꓙꓵꓽ ꓥꓪ ꓔꓯ ꓡꓯ꓿ ꓥꓪ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲˍ ꓥꓳ”꓾ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓟ‐ꓕꓲ 11ꓽ28‐30 ꓗꓪ ꓟ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴꓳ꓾ ꓠꓴ ꓪ ꓥꓪ ꓔꓯ ꓡꓯ꓿ ꓖꓳ ꓡꓱ ꓠꓬ ꓠꓴ ꓪ ꓔꓯ ꓥꓪ ꓪꓴꓽ ꓧꓶ ꓠꓽ ꓝꓲˍ ꓥꓳ꓿ ꓥꓪ ꓮ. ꓑꓶ ꓟꓯꓻ ꓢꓲ ꓥꓪ ꓔꓯ ꓢꓳ ꓡꓯ꓿ ꓮ ꓡꓲꓳ ꓐꓯˍ ꓠꓬ ꓥꓪ ꓠꓲ, ꓟ ꓠꓽ ꓠꓴꓽˍ ꓡꓳ꓿ ꓥꓪ ꓮ. ꓑꓶ ꓠꓽ ꓟꓯꓻ ꓢꓻˍ ꓡꓳ꓿ ꓥꓪ ꓶꓻˍ ꓟꓲ ꓡꓳꓻˍ ꓡꓳ꓾ ꓐꓯˍ ꓟ ꓟ. ꓟꓲꓽ ꓝꓲ. ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ꓾ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓠꓴ ꓪ ꓥꓪ ꓔꓯ ꓡꓯ꓿ ꓠꓴ ꓪ ꓔꓯ ꓥꓪ ꓪꓴꓽ ꓧꓶ ꓠꓽ ꓝꓲˍ ꓥꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓥ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓤꓶꓻ ꓗꓪ ꓒ‐ꓡꓲ‐ꓢꓷ ꓐꓴ ꓔꓯ ꓔꓯꓺ ꓢꓲ ꓐꓯ ꓔꓬ ꓟ ꓥ ꓡꓳ꓿ ꓒ‐ꓡꓲ‐ꓢꓷ ꓐꓴ꓾ ꓢ‐ꓓꓴ‐ꓗꓷ ꓐꓴ꓾ ꓔꓲ ꓒ ꓪꓴ. ꓓꓵ ꓣꓱꓽ ꓢꓴ ꓐꓴ ꓠꓬ ꓪꓴ‐ꓢ ꓤ ꓠꓱ ꓕꓯꓽ ꓢꓲ ꓗꓪ ꓙꓵꓽ ꓗ ꓮ ꓟꓬ, ꓫꓬ, ꓓꓳ ꓡ ꓢꓲ ꓠꓬꓲ ꓪꓴ‐ꓢ ꓤ ꓠꓱ ꓕꓯꓽ ꓢꓲ ꓗꓪ ꓚꓰ, ꓖꓶˍ ꓡꓳ꓿ ꓶꓻ ꓡꓲꓽ ꓓꓽ ꓟˍ ꓡꓰ ꓐꓰ ꓚꓰ, ꓖꓶˍ ꓡꓳ꓿ ꓖꓳ ꓕꓯ ꓪꓴ‐ꓢ ꓤ ꓠꓱ ꓐꓴ ꓠꓬ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓲ ꓠꓬꓲ ꓕꓲꓽ ꓠꓬꓲ ꓕꓲꓽ ꓠꓬꓲ ꓢꓯꓼ ꓕꓵꓼ ꓪꓴꓽ ꓧꓶ ꓔꓬ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓪ ꓶꓻ ꓠꓬ ꓟꓽ ꓡꓱ ꓡꓰ꓿
ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓖꓶ ꓡˍ ꓟ ꓶꓻ꓾ ꓥ ꓠꓬ ꓬꓲ ꓮ. ꓑꓶ ꓠꓬ ꓟꓯꓻ ꓢꓻˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓖꓶ ꓡˍ ꓟ ꓶꓻ ꓠꓬ ꓕꓲꓽ ꓟˍ ꓥ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓥ ꓡ ꓐꓯˍ ꓠꓬ ꓠꓵꓻ ꓠꓲ, ꓗꓪ ꓐꓰ ꓬꓰ ꓙ ꓣꓱꓽ ꓙ ꓠ, ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓟ. ꓖꓶ ꓡˍ ꓟ ꓬꓲ. ꓬꓲ ꓢꓲ ꓠꓬ꓾ ꓠꓱ. ꓐꓯ ꓮꓽ ꓟ ꓥˍ ꓟꓲ ꓠꓴ ꓔꓯ ꓖꓶ ꓡˍ ꓟ ꓕꓵꓼ ꓪ ꓠꓴ ꓔꓯ ꓐꓯ ꓖꓶ ꓡˍ ꓟ ꓐꓯ ꓘꓶꓽ ꓗꓪ ꓐꓰ ꓠꓴ ꓪ ꓠꓬ ꓶꓻ ꓡꓲꓽ ꓓꓽ ꓟ ꓕꓽ ꓟꓯꓻ꓿ ꓕꓽ ꓪꓴꓽ ꓧꓶ ꓪ ꓡꓰ ꓝꓲ꓿ ꓠꓬꓲ. ꓠꓬꓲ ꓠꓴ ꓔꓯ ꓥꓪ ꓟꓯꓻ ꓝꓲˍ ꓟ ꓶꓻ ꓠꓬ ꓢꓻˍ ꓡꓳ꓿ ꓡꓳˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓠꓵꓻ ꓠꓲ, ꓗꓪ ꓐꓰ ꓣꓱꓽ ꓙ ꓬꓰ ꓙ ꓠ, ꓟ ꓗꓪ ꓐꓰ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓒ‐ꓡꓲ‐ꓢꓷ ꓐꓴ꓾ ꓠꓱ. ꓐꓯ ꓮ ꓡꓲ ꓫꓵꓽ ꓖꓶ ꓡˍ ꓟ ꓶꓻ ꓥˍ ꓟꓲ ꓣꓳ ꓠꓬ ꓚꓳ ꓑ.ˍ ꓡꓰ ꓐꓰ ꓗꓷ ꓡꓰˍ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓖꓶ ꓡˍ ꓟ ꓬꓲ ꓮ. ꓑꓶ ꓬꓲ ꓶꓻ ꓠꓬ ꓣꓳ ꓔꓯ꓾ ꓚꓳ ꓑ. ꓕꓲꓽ ꓣꓳ ꓟꓽ ꓥ ꓥ ꓐꓰ ꓣꓳ ꓠꓬ ꓬꓲꓼ ꓤ ꓠꓬꓲ ꓤ ꓾ ꓕꓲꓽ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ,ˍ ꓟ꓾ ꓪꓴ‐ꓢ ꓔꓯ ꓠꓲ, ꓠꓵˍ ꓟ꓾ ꓠꓵꓻ ꓠꓲ, ꓗꓪ ꓐꓰ ꓢꓯ. ꓓ,ˍ ꓟ ꓞꓳ ꓤ ꓕꓲꓽ ꓣꓳ꓾ ꓡꓲ, ꓗꓷ ꓟꓶˍ ꓟ ꓞꓳ ꓤ ꓕꓲꓽ ꓣꓳˍ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓕꓱ ꓡꓱ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲ ꓠꓬ ꓕꓱ ꓡꓱ ꓬꓲ ꓮ. ꓑꓶ ꓠꓬ ꓡꓳꓻˍ ꓡꓳ꓾ ꓐꓯˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓬꓲ ꓔꓯ ꓡꓯ꓾ ꓐꓰ ꓐꓯ ꓖꓶ ꓔꓬ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓠꓬ ꓣꓳ ꓔꓯ ꓶꓻ ꓡꓲꓽ ꓓꓽ ꓟ ꓟꓯꓻ ꓡꓰ ꓝꓲˍ ꓟ ꓐꓯ ꓘꓶꓽ꓾ ꓣꓳ ꓔꓯ ꓘꓴꓻ ꓘꓶꓽ ꓮ ꓟꓬ, ꓙꓳˍ ꓡꓳ꓿ ꓔꓯꓺ ꓥꓳꓽ ꓐꓯˍ ꓠꓬ ꓳ ꓛꓳꓽ ꓒꓯ,ꓳ꓾ ꓗꓪ ꓛꓳꓽˍꓳ꓾ ꓖꓳ ꓗꓪ ꓙꓰ ꓡꓯ꓾ ꓥꓪ ꓔꓬ, ꓗꓪ ꓡꓯ꓾ ꓖꓳ ꓟ ꓬꓰˍ ꓠꓬ ꓒꓴ ꓫꓵꓺ ꓮ ꓟꓬ, ꓟꓶˍ ꓡꓳ꓿ ꓕꓱ ꓟ ꓬꓰˍ ꓠꓬ ꓒꓴ ꓫꓵꓺ ꓮ ꓟꓬ, ꓟꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓟꓬꓱꓽ ꓠꓬ ꓟꓽ ꓢꓲꓽ ꓟꓽ ꓫꓬ ꓟ ꓟꓬꓱꓽ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓟꓽ ꓢꓲꓽ ꓟꓽ ꓫꓬ ꓟ ꓟꓬꓱꓽ꓾ ꓢꓴ ꓟꓬ ꓐꓲ ꓓꓳ ꓢꓲ ꓠꓬꓲ ꓣꓳꓽ ꓒꓴ ꓫꓵꓺ ꓮ ꓟꓬ, ꓟꓶˍ ꓟ ꓟꓬꓱꓽ ꓖꓳ ꓟ ꓠꓬ ꓣꓳ ꓔꓯ ꓘꓴꓻ ꓔꓬ ꓡꓳ꓿ ꓖꓳ ꓕꓯ ꓣꓳ ꓠꓬ ꓒꓴ ꓫꓵꓺ ꓟꓶˍ ꓡꓳ ꓐꓯ ꓥ ꓟꓲ꓾ ꓟꓬꓱꓽ ꓖꓳ ꓟ ꓔꓯ ꓣꓳ ꓬꓰ ꓗꓷˍ ꓕꓯ ꓠꓽ ꓣꓳ ꓠꓽ ꓶꓻ ꓡꓲꓽ ꓓꓽ ꓟ ꓟꓶ ꓗꓷꓳ꓿
ꓣꓳ ꓮ ꓡꓲ ꓘꓶ ꓛꓲ ꓒꓴ ꓫꓵꓺ ꓟꓶ ꓡꓰˍ ꓥ ꓟꓲ꓾ ꓣꓳ ꓮ ꓡꓲ ꓘꓶ ꓛꓲ ꓙꓳꓻ ꓜꓽ ꓡˍ ꓥ ꓟꓲ꓾ ꓣꓳ ꓮ ꓡꓲ ꓘꓶ ꓛꓲ ꓟꓬꓱ ꓓꓳꓽ ꓙꓳ ꓡ ꓥ ꓟꓲ ꓣꓳ ꓠꓬ ꓟꓽ ꓢꓲꓽ ꓟꓽ ꓫꓬ ꓟ ꓶꓻ꓾ ꓥ ꓠꓬ ꓠꓱ. ꓐꓯ ꓡ ꓞꓳ ꓐꓯ ꓘꓶꓽ ꓗꓪ ꓐꓰ ꓣꓳ ꓔꓯ ꓚꓳ ꓑ. ꓕꓲꓽ ꓣꓳˍ ꓡꓰ ꓐꓰ ꓶꓻ ꓡꓲꓽ ꓓꓽ ꓟ ꓟꓯꓻ ꓝꓲˍ ꓟ꓾ ꓥ ꓠꓬ ꓒꓴ ꓫꓵꓺ ꓚꓳ ꓑ. ꓗꓪ ꓐꓰ ꓠꓴ ꓠꓬ ꓡꓲ, ꓗꓷ ꓟꓽ ꓐ ꓡ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓠꓵꓻ ꓠꓲ, ꓗꓪ ꓐꓰ ꓠꓴ ꓪ ꓛꓳ ꓫꓱꓽ꓾ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓠꓲ, ꓠꓵꓻ ꓡꓯ ꓘꓳ꓿ ꓠꓵꓻ ꓠꓲ, ꓗꓪ ꓐꓰ ꓠꓴ ꓪ ꓛꓳ ꓫꓱꓽ ꓙꓰˍ ꓥꓳ ꓐꓯ ꓠꓬ ꓠꓴ ꓪ ꓮ ꓫꓵꓽ ꓟꓽ ꓙꓳ ꓥˍ ꓟꓲ ꓮ ꓫꓵꓽ ꓟꓽ ꓛ ꓡꓰ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ ꓠꓴ ꓪ ꓠꓲ, ꓟ ꓢꓻ ꓡꓰˍ ꓥꓳ꓿ ꓥꓪ ꓠꓴ ꓪ ꓐꓱ ꓶ ꓔꓬ ꓟ ꓑꓶ. ꓓꓴ ꓥꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓐꓱ ꓶ ꓕꓶꓻ ꓕꓶꓻ ꓡꓰꓽ ꓦꓰꓼ ꓔꓴ ꓔꓬ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓣꓳ ꓠꓬ ꓠꓱ. ꓐꓯ ꓟꓽ ꓙꓲꓻ ꓟꓽ ꓫꓬ ꓟ ꓟꓬꓱꓽ꓾ ꓐꓯ ꓘꓶꓽ꓾ ꓞꓳ ꓤ ꓐꓯ ꓘꓶꓽ ꓗꓪ ꓐꓰ ꓣꓳ ꓠꓬ ꓶꓻ ꓡꓲꓽ ꓓꓽ ꓟ ꓕꓽ ꓗꓷ ꓡꓰ ꓝꓲ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓖꓶꓽ ꓡˍ ꓟ ꓶꓻ ꓠꓬ꓾ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓠꓲ, ꓠꓵꓻ ꓡꓯ ꓘꓳ꓿ ꓠꓵꓻ ꓠꓲ, ꓗꓪ ꓐꓰ ꓢꓯ. ꓔꓬ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓗꓪ ꓐꓰ ꓣꓳ ꓔꓯ ꓦꓻ ꓢꓯꓼ ꓪ ꓖꓶ ꓡ ꓔꓬ ꓟ ꓥ ꓡꓳ꓿
