ꓘꓴ ꓜꓲꓼ ꓞꓳ ꓐꓯ_ ꓟ ꓬꓲ ꓪꓴꓸ ꓕꓲ ꓫꓵ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓟ ꓥ ꓡꓳ꓾ ꓢꓲ ꓒ ꓬꓰ-ꓢꓴ ꓬꓲ ꓚꓲ ꓛꓬ ꓐꓯ ꓔ ꓡꓳ꓾ ꓥꓪ ꓠꓬ ꓛꓱꓼ ꓡꓱ ꓚꓺ ꓥ ꓡꓳ꓾ ꓠꓴ ꓪ ꓠꓬ ꓡꓯꓼ ꓗꓸ ꓥ ꓡꓳ=ꓢꓲꓹ ꓒꓬ ꓥ ꓡꓳ꓾ ꓥꓪ ꓔꓯ ꓟꓽ ꓠꓳꓼ ꓞ ꓟ ꓠꓬ ꓮꓽ ꓟ ꓥ ꓟꓲ ꓢꓯꓸ ꓟꓽ ꓐ ꓡ꓾ ꓐꓰ ꓐꓯ ꓔ ꓡꓳ= ꓘꓴ ꓜꓲꓼ ꓞꓳ ꓐꓯ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓘꓴꓽ ꓗꓪ ꓞꓳ ꓙꓳ ꓔꓬ ꓟ꓾ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓠꓲꓹ ꓕꓲ ꓪ ꓞꓳ ꓙꓳ ꓔꓬ ꓟ꓾ ꓥ ꓡꓳ= ꓝꓮꓲ ꓢꓲ ꓒ ꓬꓰ-ꓢꓴ ꓐꓯ ꓔ ꓢꓰ ꓡꓳ꓾ ꓥꓪ ꓧꓪꓽ ꓜ ꓢꓲ ꓥꓪ ꓫꓵꓽ ꓓꓳ ꓢꓴ ꓠꓬ ꓥꓪ ꓠꓯꓼ ꓗꓪ ꓔꓬ ꓡꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓣꓳ ꓟꓲ-ꓢ ꓬꓰ_ ꓟ ꓢꓲ ꓫꓬ ꓑ ꓑ ꓔꓯ ꓘꓳꓹ ꓣꓴ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓘꓴꓽ ꓗꓪ ꓔꓬ ꓡꓳ꓾ ꓐꓰ ꓐꓯ_ ꓟ ꓚꓱꓹ ꓥ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓚꓲ ꓛꓬ ꓟꓷ ꓠꓷꓹ ꓘꓶꓽ ꓗꓪ ꓐꓰ ꓥꓪ ꓧꓪꓽ ꓜ ꓢꓲ ꓥꓪ ꓫꓵ ꓓꓳ ꓢꓴ ꓠꓬ ꓕꓲ ꓞꓲꓼ ꓢꓯꓼ ꓟꓬ ꓟꓶ_ ꓥꓳ = ꓥꓪ ꓠꓬ ꓬꓲ ꓠꓯꓼ ꓗꓪ ꓔꓬ ꓡ ꓥꓳ꓾ ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓬꓲ ꓪꓴꓸ ꓕꓲ ꓫꓵ ꓟ ꓠꓬ ꓘꓴ ꓜꓲꓼ ꓞꓳ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓠꓳꓼ ꓡꓯ ꓘꓳ_ ꓟ ꓧꓹ ꓟꓽ ꓓ ꓟ ꓕꓲ ꓫꓵ ꓥ ꓡꓳ=
ꓠꓬꓲꓽ ꓫꓵ ꓠꓬ ꓳꓠꓰ ꓐꓳꓓꓬ ꓐꓯ ꓟ ꓔꓯ ꓢꓷꓸ ꓠ ꓔ ꓡꓳ= ꓢꓲ ꓫꓬ ꓕꓳ ꓶ ꓗꓪ ꓖꓳ ꓓꓱ ꓕꓲ ꓟ ꓘꓴꓽ ꓗꓪ ꓛꓲ ꓒꓯꓹ ꓡꓯ ꓒꓯꓹ ꓟꓬ ꓢꓶꓽ ꓙꓳ ꓥ ꓟꓲ ꓮ ꓙꓵ ꓠꓬ ꓕꓲ ꓖꓳ ꓓꓱ ꓥꓳ꓾ ꓐꓰ ꓐꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓪꓴꓸ ꓓꓵ ꓣꓱꓽ ꓢꓴ ꓥ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓧꓳꓽ ꓣꓱ ꓢꓴ ꓥ ꓡꓳ= ꓟꓽ ꓪ_ ꓟ ꓛꓲ ꓒꓯꓹ ꓡꓯ ꓒꓯꓹ ꓙꓳ ꓥ ꓟꓲ ꓞꓳ ꓫꓵ ꓞꓳ ꓙꓰ ꓮ ꓟꓬꓹ ꓙꓳ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓯꓼ ꓘꓴꓽ ꓗꓪ ꓣꓳ ꓕꓱ ꓡꓱ ꓐꓰ ꓔꓬ ꓡꓳ= ꓟꓬ ꓠꓬꓲ ꓣꓳ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓠꓴ ꓮ ꓫꓵ ꓫꓵ ꓥ ꓡ꓾ ꓐꓰ ꓟꓽ ꓠ ꓠꓬꓲ ꓡ꓾ꓗ-ꓕꓳ-ꓡꓲꓗ ꓥ ꓡ ꓐꓰ ꓠ ꓠꓬꓲ ꓡ ꓥꓳ= ꓕꓱ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓘꓴꓽ ꓗꓪ ꓕꓲ ꓠꓲꓹ ꓕꓲ ꓪ ꓥ ꓡꓳ= ꓡꓲꓽ ꓒꓰꓼ ꓟꓽ ꓢꓲ ꓥꓳꓽ ꓫꓵ ꓟꓽ ꓢꓲ ꓕꓱ ꓟ ꓔꓯ ꓕꓲ ꓖꓳ ꓓꓱ ꓐꓰ ꓐꓯ_ ꓟ ꓥ ꓡꓳ=
ꓝꓮꓲ ꓘꓴ ꓜꓲꓼ ꓞꓳ ꓐꓯ ꓟ ꓢꓲ-ꓫꓬ-ꓟ-ꓦ ꓔꓬ ꓟ ꓢꓲ-ꓫꓬ-ꓟ-ꓦ ꓦꓲꓻ ꓥ ꓡꓳ= ꓢꓲ-ꓫꓬ-ꓟ-ꓦ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓦ ꓥ ꓢꓲ ꓠꓬꓲ ꓬꓲ ꓔꓯ ꓙꓵꓻ ꓢꓴ ꓠꓯꓼ ꓘꓴꓽ ꓗꓪ ꓔꓬ ꓟ ꓥ ꓡꓳ= ꓘꓴ ꓜꓲꓼ ꓞꓳ ꓐꓯ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓔꓬ ꓢꓲ ꓠꓬꓲ ꓢꓲ-ꓫꓬ-ꓟ-ꓦ ꓠꓯꓼ ꓗꓪ ꓙꓻ ꓫꓱꓽ ꓔꓬ ꓟ ꓢꓲ-ꓫꓬ-ꓟ-ꓦ ꓢꓯꓼ ꓪ ꓘꓴꓽ ꓠꓯꓼ ꓗꓪ ꓞꓳ ꓙꓳ ꓔꓬ ꓟ꓾ꓥ ꓡꓳ= ꓘꓴ ꓜꓲꓼ ꓞꓳ ꓐꓯ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓱ ꓶ ꓟꓯꓸ ꓡꓯꓸ ꓟ ꓥ ꓡꓳ꓾ ꓢꓲ ꓫꓬ ꓕꓳ ꓶ ꓗꓪ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓟꓯꓸ ꓡꓯꓸ ꓒꓽ ꓥ ꓢꓲ ꓠꓬꓲ ꓬꓲ ꓘꓴ ꓜꓲꓼ ꓞꓳ ꓠꓬ ꓟꓯꓸ ꓡꓯꓸ ꓟ ꓥ ꓡꓳ ꓐꓱ ꓔꓯ ꓔ ꓫꓵ ꓮ ꓟꓬꓹ ꓙꓳ_ ꓡꓳ=
