ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓟꓽ ꓪꓽ ꓡꓯ ꓘꓳ ꓟ ꓮ ꓟꓬ, ꓙꓳ ꓡꓳ꓿ ꓫ. ꓕꓱ ꓘꓶꓽ ꓟꓽ ꓪꓽ ꓡꓯ ꓘꓳ꓿ ꓞꓳ ꓫꓵꓽ ꓞꓳ ꓙꓰꓽ ꓟꓽ ꓪꓽ ꓡꓯ ꓘꓳ꓿ ꓥꓳꓽ ꓫꓵꓽ ꓟꓽ ꓪꓽ ꓡꓯ ꓘꓳ꓿ ꓔꓬ, ꓔꓶ. ꓟꓽ ꓪꓽ ꓡꓯ ꓘꓳ꓿ ꓬꓲ ꓞꓲꓼ ꓟꓽ ꓪꓽ ꓡꓯ ꓘꓳ꓿ ꓕꓱ ꓡꓱ ꓫꓵꓽ ꓟꓽ ꓪꓽ ꓡꓯ ꓘꓳ ꓟꓽ ꓫꓱ. ꓡꓯ ꓘꓳ ꓥˍ ꓟꓲ ꓫꓱ. ꓡꓯ ꓘꓳˍ ꓟ ꓠꓬ ꓕꓲ ꓟ ꓙꓳˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓥ ꓡ ꓐꓰ ꓣꓳ ꓡꓳ. ꓠꓬꓲˍ ꓕꓯ꓾ ꓖꓳ ꓟ ꓠꓬ ꓫꓱ. ꓤ ꓠꓲ, ꓥ ꓡꓳ꓿ ꓕꓲ ꓣꓳ ꓛꓳꓽ ꓕꓲ ꓣꓳ ꓫꓱ. ꓤ ꓗꓴ.ˍ ꓟ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓗꓴ.ˍ ꓟ ꓠꓬ ꓮ ꓡꓲ ꓫꓵꓽ ꓞꓳ ꓫꓵꓽ꓾ ꓮ ꓡꓲ ꓗꓪ ꓔꓬ ꓢꓴ ꓥˍ ꓟꓲ ꓙꓳ ꓗꓴ.ˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓕꓱ ꓟ ꓠꓬ ꓪꓴ‐ ꓢ ꓗꓪ ꓐꓰ ꓡˍ ꓟ ꓑꓶ. ꓓꓴ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ‐ꓢ ꓠꓬ ꓧꓶ. ꓕꓯ ꓣꓳ ꓔꓯ ꓠꓲ, ꓠꓵ ꓗꓷꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓠ ꓗ, ꓡꓳ꓾ ꓐꓰ ꓙꓲꓻ ꓫꓬ ꓢꓴ ꓬꓳ‐ꓦ ꓡꓰ ꓐꓳ ꓔ ꓟ ꓙꓳˍ ꓡꓳ꓿ ꓣꓳ ꓟ. ꓟꓲꓽ ꓝꓲ. ꓔꓯ ꓠ ꓠ, ꓡꓯ꓿ ꓡꓴ‐ꓘ 10ꓽ25‐37
ꓕꓲ ꓧꓪꓹ ꓙꓳˍ ꓠꓬ꓾ ꓙꓵꓽ ꓗ ꓒ ꓕꓲ ꓣꓳ ꓬꓰ-ꓢꓴ ꓔꓯ ꓫꓵꓽ ꓠꓬꓲˍ ꓐꓰ ꓦꓰꓼ ꓡ ꓢꓲ꓾ ꓟꓸ ꓒꓽꓳ꓾ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠꓹ ꓟ ꓥꓪ ꓮ ꓡꓲ ꓬꓰ ꓠꓯꓹ ꓡ? ꓐꓯˍ ꓡꓳ꓿ꓬꓰ-ꓢꓴ ꓡꓰ ꓬꓲ ꓔꓯ꓾ ꓙꓵꓽ ꓗ ꓕꓳ ꓶ ꓗꓪ ꓮ ꓡꓲ ꓐꓳ ꓔ ꓡ?꓾ ꓠꓴ ꓮ ꓡꓲ ꓵ ꓟꓶˍ ꓡ?꓾ ꓐꓰ ꓠ ꓠꓬꓲˍ ꓕꓯ꓾ꓬꓲ ꓒꓳꓹ ꓖꓶ ꓢꓲ꓾ ꓠꓴ ꓠꓬ ꓕꓲ ꓠꓲꓹ ꓟ ꓡꓱꓸꓼ꓾ ꓕꓲ ꓶꓻ ꓟꓬ ꓡꓱꓸꓼ꓾ ꓕꓲ ꓢꓯꓼ ꓡꓱꓸꓼ꓾ ꓕꓲ ꓙꓽ ꓠꓲꓹ ꓡꓱꓸꓼ꓾ ꓢꓲ ꓒꓽ ꓠꓴ ꓪꓴ-ꓢ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓿ ꓝꓮꓲ꓾ ꓠꓴ ꓚꓲꓸ ꓛꓬ ꓔꓯ ꓠꓲꓹ ꓠꓵꓻˍ ꓟ ꓡꓰ ꓐꓰ꓾ ꓠꓴ ꓠꓶꓽ ꓛꓳ ꓕꓲꓺ ꓛꓳ ꓔꓯ ꓠꓲꓹ ꓠꓵ ꓠ ꓗꓹ ꓡꓳ꓾ ꓐꓰ ꓐꓳ ꓔ ꓡꓳ꓾ ꓐꓰ ꓒꓳꓹ ꓖꓶˍ ꓡꓳ꓿ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓒꓳꓹ ꓖꓶ ꓬꓯꓼˍ ꓡꓳ꓿ ꓠꓴ ꓕꓱ ꓡꓱ ꓬꓰˍ ꓕꓯ ꓠꓽ ꓢꓯꓸ ꓔꓬ ꓪˍ ꓥꓳ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓥ ꓟꓲ ꓙꓵꓽ ꓗ ꓒꓽ ꓖꓳ ꓟ ꓠꓬ ꓚꓲꓸ ꓛꓬ ꓠꓽ ꓔꓱꓹ ꓜꓳꓽ ꓢꓴ ꓥ ꓟ ꓟꓳꓸ ꓖꓶ ꓠꓲꓹ ꓫꓵˍ ꓠꓬꓲ꓾ ꓬꓰ-ꓢꓴ ꓔꓯ꓾ ꓖꓳ ꓡꓱ ꓥ ꓠꓬ ꓥꓪ ꓠꓶꓽ ꓛꓳ ꓕꓲꓺ ꓛꓳ ꓮꓽ ꓟ ꓥ ꓡ?꓾ ꓠ ꓠꓬꓲˍ ꓡꓳ꓿ꓬꓰ-ꓢꓴ ꓡꓰ ꓒꓳꓹ ꓖꓶ ꓢꓲ꓾ ꓡꓽ ꓞꓳ ꓕꓲ ꓣꓳ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓙꓱ-ꓡꓲ-ꓘꓳ ꓗꓪ ꓬꓯꓼ ꓙꓰˍ ꓕꓯ꓾ ꓬꓲ ꓠꓬ ꓒꓬꓹ ꓜꓽ ꓢꓴ ꓕꓲ ꓧꓳꓽ ꓔꓯ ꓔꓳꓹ ꓜꓳˍ ꓡꓳ꓿ ꓬꓲ ꓪꓽ ꓡꓰ ꓬꓲ ꓖꓴꓽ ꓙꓴꓽ ꓮꓽ ꓙꓵ ꓦꓴꓻ ꓗꓷ ꓢꓲ꓾ ꓬꓲ ꓔꓯ ꓔꓲꓸ ꓢꓲ ꓠꓬꓲ꓾ ꓟꓻ ꓫꓵꓻ ꓟꓻ ꓢꓯꓸ ꓡꓳꓺ ꓔ ꓬꓰ ꓢꓲ ꓙꓰ ꓗꓷꓳ꓿ꓖꓳ ꓕꓯ ꓙ ꓖꓴ ꓖꓳ ꓕꓲ ꓚꓱꓹ ꓗꓪ ꓔꓲ ꓒ ꓕꓲ ꓣꓳ ꓬꓯꓼ ꓡ ꓢꓲ꓾ ꓬꓲ ꓔꓯ ꓟꓳꓻ ꓗꓷ ꓠꓬ ꓖꓳꓻ ꓫꓬꓺꓼ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ꓝꓮꓲ ꓡꓱ-ꓬꓲ ꓡꓽ ꓞꓳ ꓕꓲ ꓣꓳˍ ꓟꓲ ꓖꓳ ꓕꓲ ꓔꓳꓸ ꓗꓪ ꓛꓲ ꓡ ꓢꓲ ꓬꓲ ꓔꓯ ꓡꓳꓸ ꓟꓳꓻˍ ꓠꓬ꓾ ꓮꓽ ꓢꓳꓻ ꓕꓲ ꓣꓳ ꓟ ꓡꓰ ꓐꓰ ꓖꓳꓻ ꓫꓬꓺꓼ ꓗꓪ ꓐꓰ ꓗꓳꓸ ꓙꓰˍ ꓡꓳ꓿ꓖꓳ ꓡꓱ ꓥ ꓟꓲ ꓓꓴꓻ ꓓꓳ ꓢꓴ ꓢ-ꓟ-ꓡꓲ ꓡꓽ ꓞꓳ ꓕꓲ ꓣꓳ ꓖꓳ ꓗꓪ ꓛꓲ ꓡ ꓢꓲ ꓬꓲ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓔꓯ ꓫꓱꓸ ꓤ ꓔꓴ ꓡ ꓡꓳ꓿ꓬꓲ ꓠꓬ ꓬꓲ ꓔꓯ ꓡ ꓢꓲ꓾ ꓬꓲ ꓠꓻ ꓓꓴ ꓗꓪ ꓮꓽ ꓛꓬꓽ ꓞꓶˍ ꓐꓰ ꓛꓱꓼ ꓡꓱꓼ ꓙꓵ ꓟꓰꓺ ꓖꓶ ꓢꓲ ꓠꓬꓲ ꓬꓲ ꓜꓶꓻ ꓕꓱꓹ ꓖꓶˍ ꓡꓳ꓿ ꓝꓮꓲ ꓠꓬ ꓬꓲ ꓚꓲꓸ ꓛꓬ ꓕꓳ-ꓡ-ꓟꓴꓽ ꓕꓯꓽ ꓢꓲ ꓜꓶꓽ ꓝꓲ ꓢꓲ꓾ ꓪꓰꓻ ꓤ ꓦꓲ ꓗꓪ ꓧꓳꓽ ꓔꓯꓹ ꓙꓰ ꓢꓲ ꓠꓬꓲ ꓬꓲ ꓔꓯ ꓣꓱꓽ ꓙˍ ꓡꓳ꓿ꓗꓸ ꓠꓯꓸ ꓕꓲ ꓠꓬꓲ ꓠꓬ꓾ ꓓꓲ-ꓠ-ꓣꓲ ꓠꓬꓲꓽ ꓒꓯꓼ ꓣꓴ ꓓꓳ ꓡ ꓢꓲ ꓪꓰꓻ ꓤ ꓦꓲ ꓢꓲ ꓒꓽ ꓔꓯ ꓖꓶ ꓢꓲ ꓠꓬꓲ꓾ ꓠꓴ ꓬꓲ ꓔꓯ ꓡꓳꓸ ꓙ ꓠꓬꓲ ꓙ꓿ ꓕꓱ ꓟ ꓕꓯꓽ ꓢꓲ ꓬꓲ ꓑꓶꓸ ꓓꓴ ꓠꓴ ꓮꓸ ꓫꓵ ꓣꓱꓽ ꓗꓷˍ ꓟꓲ꓾ ꓥꓪ ꓬꓲꓼ ꓡ ꓕꓯ ꓠꓴ ꓔꓯ ꓚꓱꓹ ꓖꓶˍ ꓥꓳ꓾ ꓐꓯ ꓖꓶˍ ꓡꓳ꓿
ꓠꓴ ꓓꓵꓽ ꓙ ꓠꓬꓲ꓾ ꓡꓽ ꓞꓳ ꓕꓱ ꓢ ꓣꓳ ꓟ ꓗꓪ ꓐꓰ ꓒꓬꓹ ꓜ ꓢꓴ ꓔꓯ ꓔꓳꓹ ꓜꓳ ꓢꓴ ꓬꓲ ꓠꓶꓽ ꓛꓳ ꓕꓲꓺ ꓛꓳ ꓒꓬꓱꓼ ꓡ ꓟ ꓠꓬ ꓮ ꓡꓲ ꓕꓲ ꓣꓳ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿ꓙꓵꓽ ꓗ ꓒ ꓡꓰ꓾ ꓬꓲ ꓔꓯ ꓫꓱꓸ ꓤ ꓢꓴ ꓖꓳ ꓕꓲ ꓣꓳ ꓟ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ꓿ ꓖꓳ ꓕꓯ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴˍ ꓟꓲ ꓖꓳ ꓕꓲ ꓣꓳ ꓟ ꓡꓰ ꓐꓰ ꓬꓰ ꓙꓰ꓾ ꓐꓯ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓔꓯ ꓥꓳꓽ ꓕꓱ ꓟ ꓠꓬ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓵꓻ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓗꓪ ꓐꓰ ꓣꓳ ꓔꓯ ꓮ ꓫꓵꓽ ꓐꓯ ꓖꓶ ꓡˍ ꓡ꓾ ꓐꓰ ꓐꓯˍ ꓕꓯ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓠꓬ ꓙꓵꓻ ꓕꓲ ꓖꓽ ꓟꓽ ꓓꓻ ꓐꓯˍ ꓟ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓠꓬ ꓣꓳ ꓕꓲꓽ ꓠꓬꓲ ꓕꓲꓽ ꓠꓬꓲ ꓬꓰ ꓜꓲ ꓙꓳˍ ꓟ ꓡꓰꓽ ꓬꓰ ꓢꓲ ꓠꓬꓲ꓾ ꓚꓲ. ꓛꓬ ꓐꓱ ꓶˍ ꓡꓰꓽ ꓓꓵꓽ ꓙ ꓢꓲ ꓠꓬꓲ ꓛꓲ ꓬꓰ ꓟꓽ ꓓꓻ ꓐꓯˍ ꓟ ꓣꓳ ꓔꓯ ꓟꓳ. ꓖꓶ ꓡˍ ꓡꓳ꓿
ꓮ ꓡꓲ ꓐꓯ ꓢꓲ ꓛꓲ ꓬꓰˍ ꓡ꓿ ꓟꓴ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓠ, ꓟ ꓐꓱ ꓶ ꓙꓵꓻˍ ꓟ ꓗꓪ ꓐꓰ ꓛꓳꓻ ꓫꓱꓽ꓾ ꓠꓵꓻ ꓠꓲ, ꓙ ꓖꓴ ꓗꓪ ꓐꓰ ꓛꓳ ꓫꓱꓽ ꓠ ꓗ, ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓠꓴꓻ ꓐꓰ ꓥꓪ ꓔꓯ ꓢ‐ꓟ‐ꓡꓲ ꓡ ꓞꓳ ꓡꓰ ꓐꓰ ꓬꓰ ꓠ, ꓟ ꓐꓱ ꓶ ꓣꓳ ꓔꓯ ꓬꓲꓼ ꓠꓬꓲ. ꓖꓶ ꓡ ꓔꓬ ꓡꓳ꓿ ꓣꓳ ꓟ. ꓟꓲꓽ ꓕꓱ ꓟ ꓔꓯ ꓡꓳ. ꓠꓬꓲˍ ꓕꓯ ꓔꓲ ꓒ ꓣꓱꓽ ꓢꓴ ꓥˍ ꓟꓲ ꓫꓱ. ꓤ ꓠꓲ, ꓟꓽ ꓙꓳ ꓟ ꓔꓯ ꓡꓳ. ꓟꓳꓻˍ ꓡꓳ꓿ ꓬꓲ ꓠꓬ ꓖꓳ ꓗꓪ ꓟꓽ ꓫꓵꓻ ꓟꓽ ꓢꓯ. ꓓꓳꓽ ꓓ,ˍ ꓟ ꓔꓯ ꓡꓳ. ꓟꓳꓻˍ ꓥ ꓟꓲ ꓠꓲ, ꓟ ꓩꓴ ꓠꓬꓲ꓾ ꓟꓽ ꓫꓱ. ꓤ ꓠꓬꓲ ꓖꓳ ꓫꓬꓸꓼ ꓗꓪ ꓐꓰ ꓟꓽ ꓢꓷ. ꓟ ꓡꓰ ꓙꓰ ꓗꓳ. ꓬꓰꓳ꓿ ꓖꓳ ꓟˍ ꓡꓰ ꓐꓰ ꓡꓱ‐ꓬꓲ ꓢꓴ ꓥˍ ꓟꓲ ꓟꓳꓻˍ ꓥ ꓟꓲ ꓟꓽ ꓟꓳꓻ ꓟ ꓡꓰ ꓙꓰ ꓗꓳ. ꓬꓰꓳ꓿
ꓕꓱ ꓟ ꓠꓬ ꓠꓬꓲ. ꓠꓬꓲ ꓠꓴꓻ ꓥꓪ ꓟꓲꓽ ꓙꓬ ꓗꓪ ꓟꓬ ꓢꓶꓽ ꓒꓴ ꓢꓲ ꓡꓳ. ꓠꓬꓲ ꓡꓯ꓿ ꓢ‐ꓟ‐ꓡꓲ ꓐꓰ ꓬꓴ‐ꓔ ꓡ ꓞꓳ ꓠꓬ ꓟꓽ ꓕꓽ ꓡꓯ ꓘꓳ꓿ ꓛꓴꓽ ꓙꓳ ꓢꓴ ꓥ ꓡꓳ꓿ ꓬꓲ ꓪ ꓠꓬ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓓꓶꓽ ꓡꓯ ꓘꓳ ꓢꓴ꓾ ꓔꓲ. ꓡꓯ ꓘꓳ ꓢꓴ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲꓽ ꓫꓬ ꓕꓳꓽ ꓶ ꓘꓴꓽ ꓗꓪ ꓑ ꓙꓽˍ ꓟ ꓢ‐ꓟ‐ꓡꓲ ꓡ ꓞꓳ ꓖꓳ ꓕꓲ ꓣꓳ ꓟ ꓠꓬ ꓫꓱ. ꓤ ꓢꓴ ꓥ ꓢꓲ ꓠꓬꓲ ꓠꓻ ꓔꓬ ꓟ꓾ ꓟꓽ ꓫꓵꓻ ꓟꓽ ꓢꓯ. ꓓ, ꓟ꓾ ꓬꓲ ꓚꓲ. ꓛꓬ ꓮ ꓫꓵꓽˍ ꓡꓰ. ꓬꓰ ꓟꓽ ꓐ ꓡ ꓟ ꓖꓳ ꓕꓲ ꓣꓳ ꓔꓯ ꓬꓲ ꓟꓶꓻ ꓛ ꓣꓴ ꓢꓲ ꓠꓬꓲ ꓕꓱ, ꓖꓶˍ ꓡꓳ꓿ ꓧꓪꓽ ꓞꓶꓻ ꓟꓰ ꓖꓶˍ ꓡꓳ꓿ ꓠꓻ ꓓꓴ ꓠꓯ ꓞꓲꓼ ꓫꓬ, ꓖꓶˍ ꓡꓳ꓿
ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓜꓶꓽ ꓠ, ꓟ ꓕꓳꓽ ꓡ ꓟꓴꓽ ꓕꓯꓽ ꓢꓲ ꓗꓪ ꓚꓰ, ꓖꓶ ꓢꓲ ꓠꓬꓲ ꓪꓰ ꓤ ꓦꓲꓻ ꓗꓪ ꓧꓳꓽ ꓔꓯ, ꓡˍ ꓡꓳ꓿ ꓕꓱ ꓟ ꓠꓬ ꓬꓲ ꓠꓵꓻ ꓠꓲ, ꓥ ꓡꓳ꓿ ꓬꓲ ꓠꓬ ꓬꓴ‐ꓔ ꓟꓽ ꓥ ꓥˍ ꓟꓲ ꓬꓴ‐ꓔ ꓐꓰ ꓛꓴꓽ ꓙꓳˍ ꓥ ꓟꓲ꓾ ꓬꓲ ꓠꓬ ꓬꓲ ꓔꓯ ꓫꓱ. ꓤˍ ꓡꓳ꓿ ꓬꓲ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓫꓱ. ꓤ ꓠꓲ, ꓚꓳ. ꓗꓳ. ꓙꓰ ꓠꓬ ꓮ ꓫꓵꓽ ꓟꓽ ꓙꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓣꓳ ꓔꓯ꓾ ꓠꓴ ꓪ ꓥˍ ꓟꓲ ꓕꓱ ꓡꓱ ꓬꓰ꓾ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓣꓳ ꓠꓬ ꓟ. ꓟꓲꓽ ꓕꓱ ꓟ ꓘꓴꓽ ꓗꓪ ꓚꓬꓴ. ꓟꓶˍ ꓟ꓾ ꓟꓽ ꓫꓵꓻ ꓟꓽ ꓢꓯ. ꓓꓳꓽ ꓓ, ꓢꓴ ꓥˍ ꓟꓲ ꓥ ꓡꓳ꓾ ꓐꓰ ꓣꓳ ꓔꓯ ꓓꓵꓽ ꓙꓽ ꓝꓲˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓔꓯ ꓠꓲꓽ ꓢ‐ꓓꓯ ꓡꓰ ꓓꓶꓽ ꓔꓲ.ˍ ꓟ꓾ ꓣꓳ ꓔꓯ ꓝꓴꓲ. ꓗꓪ ꓐꓰ ꓓꓶꓽ ꓔꓲ.ˍ ꓟ ꓗꓪ ꓐꓰ ꓣꓳ ꓠꓬ ꓟꓽ ꓫꓵꓻ ꓟꓽ ꓢꓯ. ꓕꓱ ꓡꓱ ꓓꓳꓽ ꓓ, ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓐꓰ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ ꓟ ꓣꓳ ꓫꓵꓽ ꓣꓳ ꓧꓪ ꓟꓽ ꓥ ꓟ꓾ ꓣꓳ ꓠꓬ ꓐꓶꓽ ꓛꓳ ꓥ ꓡꓳ꓿ ꓧꓶ. ꓕꓯ ꓪꓴ‐ꓢ ꓔꓯ ꓟꓽ ꓢꓷ. ꓢꓴ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓫꓱ. ꓤ ꓢꓲ ꓠꓬꓲ ꓬꓲ ꓠꓬ ꓣꓳ ꓔꓯ ꓠꓯ ꓞꓲꓼ ꓟꓰ ꓖꓶ ꓡˍ ꓡꓳ꓿ ꓧꓪꓽ ꓤꓶꓻ ꓟꓰ ꓖꓶ ꓡˍ ꓡꓳ꓿ ꓬꓲ ꓕꓯꓽ ꓢꓲ ꓗꓪ ꓜꓶꓽ ꓝꓲ ꓢꓲ ꓠꓬꓲ ꓣꓳ ꓔꓯ ꓠꓻ ꓫꓬ, ꓖꓶˍ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓥ ꓟꓲ ꓢ‐ꓟ‐ꓡꓲ ꓡ ꓞꓳ ꓕꓲ ꓣꓳˍ ꓡꓰ ꓐꓰ ꓣꓳ ꓔꓯ ꓬꓰ ꓙ ꓡˍ ꓟ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓠꓬ ꓣꓳ ꓝꓴꓲ. ꓑꓶ. ꓓꓴ ꓡꓵ ꓟꓽ ꓘꓴ꓿ ꓣꓳ ꓠꓬ ꓣꓳ ꓝꓴꓲ. ꓑꓶ. ꓓꓴ ꓠꓯꓸꓼ ꓘꓪ ꓗꓪ ꓓꓳꓽ ꓓ, ꓡꓳ꓿ ꓔꓲ. ꓓ, ꓡꓳ꓿ ꓖꓳ ꓗꓪ ꓣꓳ ꓠꓬ ꓠꓻ ꓓꓳꓽ ꓔꓬ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓠꓵꓻ ꓠꓲ, ꓡꓰ ꓣꓳ ꓔꓯ ꓚꓬꓴ. ꓙ ꓡꓺꓳ꓿ ꓣꓳ ꓔꓯ ꓠꓯꓻ ꓞꓲꓼ ꓫꓬ, ꓖꓶ ꓗꓷꓳ꓿ ꓣꓳ ꓠꓬ ꓬꓲ ꓠꓻ ꓓꓴ ꓗꓪ ꓐꓰ ꓓꓻ ꓡꓰꓳ꓿ ꓖꓳ ꓡꓱ ꓠꓬꓲ ꓬꓲ‐ꓢ‐ꓬ ꓕꓳꓽ ꓶ ꓗꓪ꓾ ꓬꓲ ꓠꓻ ꓓꓴ ꓑ ꓬꓲ ꓫ. ꓙꓵˍ ꓟ ꓗꓪ ꓐꓰ ꓣꓳ ꓠꓻ ꓓꓴ ꓑ ꓠꓬ ꓓꓻ ꓡꓰˍ ꓡꓳ꓾ ꓐꓰ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓠꓯꓻ ꓞꓲꓼ ꓣꓳ ꓔꓯ ꓫꓬ, ꓖꓶ ꓡˍ ꓟ ꓠꓬ ꓬꓲ ꓚꓲ. ꓛꓬ ꓬꓲ ꓫꓵꓽ ꓬꓲ ꓧꓪꓽ ꓗꓪ ꓐꓰ ꓣꓳ ꓔꓯ ꓫꓬ, ꓖꓶ ꓡ ꓔꓬ ꓟ ꓥ ꓡꓳ꓿ ꓣꓳ ꓥˍ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓵꓻ ꓠꓲ, ꓘꓳ ꓣꓴ ꓟꓶ ꓡꓰ ꓗ ꓠꓯ. ꓣꓳ ꓥˍ ꓟꓲ ꓠꓵꓻ ꓠꓲ, ꓕꓱ ꓟ ꓔꓯ ꓠꓱ. ꓐꓯ ꓢꓴ ꓔꓯ ꓖꓶ ꓠ, ꓟ꓾ ꓢ‐ꓟ‐ꓡꓲ ꓡ ꓞꓳˍ ꓡꓰ ꓐꓰ ꓠꓱ. ꓐꓯ ꓢꓴ ꓔꓯ ꓫꓱ. ꓤ ꓗꓴ. ꓠ, ꓟ꓾ ꓠꓲ, ꓠꓵꓻ ꓗꓴ. ꓠ, ꓟ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓘꓶꓽ ꓥ ꓟ꓾ ꓠꓴ ꓪˍ ꓟꓲ ꓖꓳ ꓕꓲ ꓣꓳ ꓟ ꓡꓰ ꓬꓰ ꓙꓰ꓾ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ ꓚꓲ. ꓛꓬ ꓦꓲꓻ ꓗꓪ ꓚꓳ.꓾ ꓚꓲ. ꓚꓬ ꓝꓮꓲ. ꓝꓲ꓾ ꓚꓲ. ꓛꓬ ꓝꓮꓲ. ꓝꓲ ꓗꓪ ꓚꓳ. ꓚꓲ. ꓛꓬ ꓡꓳ ꓒꓱ ꓗꓪ ꓕꓱ ꓡꓱ ꓫꓵꓽ ꓟꓬꓱꓽ ꓬꓰ ꓐ ꓡ ꓠ, ꓟ ꓐꓱ ꓢꓯꓼ ꓕꓵꓼ ꓙꓰ ꓓꓴ ꓬꓰ ꓡꓯ꓿
