ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓴ ꓪ ꓠꓬ ꓬꓲ ꓒꓵꓽ ꓟꓽ ꓓꓳ ꓓꓳ ꓟꓶ ꓡꓰꓳ꓿ ꓖꓳ ꓡꓱ ꓠꓬꓲ ꓬꓲ ꓒꓵꓽ ꓟꓽ ꓧꓪ ꓧꓪ ꓖꓶ꓾ ꓐꓰ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓗꓪ ꓐꓰ ꓣꓳ ꓦꓻ ꓢꓯꓼ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓟ‐ꓕꓲ 10ꓽ7‐15 ꓗꓪ ꓟ ꓥꓳ꓿ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓖꓶˍ ꓟ ꓠꓬ꓾ ꓠꓴ ꓪ ꓙꓰ ꓢꓲ ꓠꓻ ꓢꓴ ꓒꓬꓽ ꓢꓴ ꓔꓯ ꓫꓬ, ꓖꓶ꓿ ꓟꓴꓽ ꓗꓪ ꓗꓴꓷꓼ ꓠꓶꓽ ꓡꓺꓳ ꓐꓰ ꓐꓯ ꓖꓶ꓿ ꓔ. ꓟꓼ ꓩꓴ. ꓓꓲꓻ ꓢꓴ ꓔꓯ ꓥˍ ꓟꓲ ꓫꓬꓻ ꓡꓰ ꓝꓲ꓿ ꓠꓲꓽ ꓜꓶꓽ ꓞ, ꓢꓴ ꓔꓯ ꓥˍ ꓟꓲ ꓠꓲꓽ ꓖꓼ ꓓꓳ ꓖꓶ꓾ ꓐꓰ ꓐꓯˍꓟ ꓟ. ꓟꓲꓽ ꓝꓲ. ꓥ ꓡꓳ꓿ ꓕꓱ ꓟˍ ꓡꓰꓽ ꓟꓽ ꓞꓲ ꓢꓲ ꓒ ꓬꓰ‐ꓢꓴ ꓠꓬ ꓝꓮꓲ ꓐꓯˍ ꓢꓰꓽ ꓡꓳ꓿ ꓠꓴ ꓪ ꓠꓬ ꓬꓲ ꓒꓵꓽ ꓟꓽ ꓓꓳ ꓓꓳ ꓟꓶ ꓡꓰꓳ꓿ ꓖꓳ ꓡꓱ ꓠꓬꓲ ꓬꓲ ꓒꓵꓽ ꓟꓽ ꓧꓪ ꓧꓪ ꓢꓴ ꓔꓯ ꓖꓶꓽ꓾ ꓐꓰˍ ꓟꓲ ꓐꓯ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓖꓶˍ ꓟ ꓬꓲ. ꓒꓵꓽ ꓟꓽ ꓓꓳ ꓓꓳ ꓟꓶ ꓔ ꓟ ꓔꓯ ꓢꓴ ꓔꓯ ꓥˍ ꓟꓲ ꓬꓲ ꓒꓵꓽ ꓟꓽ ꓧꓪ ꓧꓪ ꓖꓶ ꓐꓯˍ ꓟ ꓬꓲ. ꓬꓲ ꓢꓲ ꓠꓬ꓾ ꓣꓳ ꓟꓶ ꓔ ꓟ ꓮ ꓙꓵꓽ ꓠꓬ ꓣꓳ ꓐꓱ ꓶ ꓥ ꓡꓳ꓿ ꓣꓳ ꓠꓬ ꓢꓴ ꓗꓪ ꓐꓰ ꓟꓶ ꓔ ꓟ꓾ ꓥ ꓠꓬ꓾ ꓐ, ꓐ ꓪꓴ‐ꓢ ꓔꓬ, ꓗꓪ ꓐꓰ ꓟꓶ ꓔ ꓟ ꓮ ꓙꓵꓽ꓾ ꓥ ꓠꓬ꓾ ꓮꓽ ꓐ ꓮ ꓟ ꓗꓪ ꓐꓰ ꓟꓶ ꓔ ꓟ ꓮ ꓙꓵꓽ ꓠꓬ ꓣꓳ ꓚꓲ. ꓛꓬ ꓐꓱ ꓶˍ ꓡꓰꓽ ꓥ ꓡꓳ꓿ ꓚꓲ. ꓛꓬ ꓠꓲ, ꓡꓶꓽ ꓐꓲ ꓡꓰ ꓝꓲ ꓠ, ꓟ ꓡꓰꓽ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓟ ꓔꓯ ꓬꓲ ꓟꓽ ꓠꓲ, ꓒꓴ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓐꓯˍ ꓢꓰꓽ ꓡꓳ꓿ ꓬꓲ ꓒꓵꓽ ꓟꓽ ꓧꓪ ꓧꓪ ꓢꓴ ꓔꓯ ꓖꓶꓽ꓾ ꓐꓯˍ ꓟ ꓠꓬ ꓠꓴ ꓪ ꓚꓲ. ꓛꓬ ꓐꓱ ꓶˍ ꓡꓰꓽ ꓠꓴ ꓪ ꓙ ꓖꓴ ꓕꓽ ꓫꓱꓽ꓿ ꓠꓴ ꓪ ꓚꓲ. ꓛꓬ ꓐꓱ ꓶˍ ꓡꓰꓽ ꓠꓴ ꓪ ꓕꓽ ꓬꓰ꓿ ꓢꓴ ꓔꓯ ꓬꓲ ꓒꓵꓽ ꓟꓽ ꓧꓪ ꓧꓪ ꓖꓶ꓿ ꓐꓯ ꓠꓲ, ꓫꓵˍ ꓟ ꓠꓬ ꓠꓴ ꓪ ꓚꓲ. ꓛꓬ ꓐꓱ ꓶ ꓕꓽ ꓢꓲꓺ꓿ ꓠꓱ. ꓐꓯ ꓢꓴ ꓠꓶꓽ ꓛꓳꓽ ꓐꓱ ꓶ ꓠꓴ ꓪ ꓢꓯ. ꓔꓬ ꓓꓴ ꓥꓳ꓾ ꓐꓯˍ ꓟ ꓐꓯ ꓘꓶꓽ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓠꓴ ꓪ ꓚꓲ. ꓛꓬ ꓐꓱ ꓶ ꓢꓶ. ꓟꓽ ꓞꓲ꓾ ꓠꓴ ꓪ ꓠꓲ, ꓡꓶꓽ ꓐꓲ ꓡ ꓠ, ꓟ ꓢꓶ. ꓟꓽ ꓞꓲ ꓠꓶꓽ ꓛꓳꓽ ꓐꓱ ꓶ ꓣꓱꓽ ꓞ, ꓟ ꓮ ꓙꓵꓽ ꓗꓪ ꓠꓴ ꓪ ꓠꓬ ꓙꓰ ꓢꓲ ꓠꓬꓲ ꓠꓻ ꓫꓬ, ꓖꓶ ꓠ, ꓟ꓾ ꓟ. ꓟꓲꓽ ꓚ ꓟ. ꓖꓶ ꓠ, ꓟ꓾ ꓠꓲꓽ ꓔꓯ ꓖꓼ ꓓꓳ ꓖꓶ ꓠ, ꓟ꓾ ꓔ. ꓟꓼ ꓩꓴ. ꓓꓲꓻ ꓢꓴ ꓔꓯ ꓫꓬꓻ ꓡꓰ ꓝꓲ ꓠ, ꓟ꓾ ꓕꓱ ꓡꓱ ꓬꓰ ꓝꓲ ꓠ, ꓟ ꓢꓲ ꓒ ꓬꓰ‐ꓢꓴ ꓕꓵꓼ ꓪ ꓖꓶ ꓢꓲ ꓠꓬꓲ ꓙꓰ ꓝꓲˍ ꓟ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓑꓶ. ꓓꓴ ꓬꓲ ꓕꓱ ꓡꓱ ꓐꓯˍ ꓡ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓚꓲ. ꓛꓬ ꓥˍ ꓟꓲ ꓟꓲ ꓠꓯ ꓕꓯꓽ ꓢꓲ ꓗꓪ ꓪꓴꓽ ꓓꓰ ꓡꓰˍ ꓟ꓾ ꓟꓴꓽ ꓗꓪ ꓗꓴꓷꓼ ꓗꓪ ꓙꓳˍ ꓟ ꓖꓴꓽ ꓙꓴꓽ ꓮ ꓙꓵꓽ꓾ ꓪꓴ‐ꓢ ꓬꓲ ꓐꓬꓱꓼ ꓡꓱꓼ ꓡꓱꓼ ꓟ ꓗꓴꓷꓼ ꓗꓪ ꓙꓳˍ ꓟ ꓖꓴꓽ ꓙꓴꓽ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶˍ ꓡꓰꓽ ꓥ ꓡꓳ꓿ ꓐ, ꓐ ꓪꓴ‐ꓢ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓮ ꓙꓵꓽ ꓖꓶ ꓔ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓣꓳꓽ ꓡꓳ. ꓠꓬꓲ ꓡꓯ꓿ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓮ ꓫꓵꓽ ꓕꓲꓽ ꓙꓰꓽ ꓬꓲ ꓐꓱ ꓶ ꓤꓰꓻ ꓓ, ꓡ꓿ ꓮ ꓫꓵꓽ ꓟꓽ ꓤꓰꓻ ꓞ,꓿ ꓡꓳ, ꓬꓰˍ ꓗꓪ ꓬꓲ ꓙꓳꓽ ꓐꓬ ꓗꓪ ꓐꓰ ꓫꓵꓽ ꓐꓰ ꓬꓲꓻ ꓙꓬ ꓬꓲꓻ ꓓꓳ ꓡˍ ꓗꓪ ꓛꓲ ꓬꓲ ꓠꓬ ꓙꓳˍ ꓟ ꓮ ꓙꓵꓽ ꓣꓳ ꓐꓱ ꓶ ꓖꓶ ꓗꓷˍ ꓟ ꓥ ꓡꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓚꓲ. ꓛꓬ ꓐꓰ ꓶ ꓢꓶ. ꓟꓽ ꓞꓲ ꓠꓱ. ꓐꓯ ꓢꓴ꓾ ꓬꓲ ꓠꓲ, ꓠꓵˍ ꓟ ꓠꓶꓽ ꓛꓳꓽ꓾ ꓥ ꓠꓬ ꓟꓲ ꓠꓯ ꓡ ꓞꓳ ꓐꓱ ꓶ ꓬꓲ ꓖꓶ ꓗꓷˍ ꓟ ꓕꓲꓽ ꓡꓰ, ꓬꓲ ꓝꓲ ꓓꓴ ꓐꓴ꓾ ꓥ ꓠꓬ ꓣꓳ ꓮ ꓙꓵꓽ ꓔꓯ ꓥˍ ꓟꓲ ꓠꓵꓻ ꓠꓲ, ꓗꓪ ꓐꓰ ꓣꓱꓽ ꓙ ꓖꓶ ꓡˍ ꓟ꓾ ꓕꓱ ꓡꓱ ꓬꓰ ꓝꓲ ꓠꓲ, ꓫꓵˍ ꓟ ꓢꓲ ꓒ ꓬꓰ‐ꓢꓴ ꓠꓲ, ꓡꓶꓽ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓕꓱ ꓡꓱ ꓠꓵꓻ ꓠꓲ, ꓗꓪ ꓐꓰ ꓢꓴ ꓔꓯ ꓣꓱꓽ ꓙ ꓬꓰ ꓙ ꓔꓬ ꓕꓯ ꓠꓬ ꓮ ꓡꓲ ꓕꓲꓽ ꓦꓲ ꓗꓪ ꓓꓵꓽ ꓡꓰˍ ꓥ ꓟꓲ ꓖꓳ ꓕꓲꓽ ꓦꓲ ꓗꓪ ꓠꓴ ꓔꓯ ꓘꓳ ꓣꓴˍ ꓕ ꓑꓳꓸꓼ ꓠꓴ ꓔꓬ꓾ ꓐꓰ ꓐꓯ ꓖꓶˍ ꓡꓳ꓿ ꓕꓱ ꓡꓱ ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓣꓳ ꓢꓴ ꓐꓱ ꓶ ꓧ.ˍ ꓟ ꓙꓲꓻˍ ꓟ ꓬꓰ ꓖꓶˍ ꓟ꓾ ꓐꓯ ꓟ. ꓖꓶˍ ꓟ꓾ ꓚꓴꓽ ꓬꓲ, ꓖꓶˍ ꓟ꓾ ꓕꓱ ꓡꓱ ꓬꓰ ꓖꓶˍ ꓕꓯ ꓠꓬ ꓘꓳ ꓣꓴ ꓢꓴ ꓮ ꓙꓵꓽ ꓠꓬ ꓢꓲ ꓡꓲ ꓟ ꓟꓶˍ ꓥꓳ꓾ ꓣꓱꓽ ꓛꓰꓽ ꓟꓶˍ ꓥꓳ꓿ ꓖꓳ ꓡꓱ ꓥ ꓟꓲ ꓕꓱ ꓘꓶ ꓛꓲ ꓬꓰ ꓖꓶ ꓔꓬ ꓐꓯ ꓥ ꓟꓲ ꓟꓽ ꓘꓳ ꓣꓴ ꓥꓳ ꓐꓯˍ ꓠꓬ ꓠꓴ ꓪ ꓠꓲ, ꓟ ꓕꓽ ꓫ.꓿ ꓠꓴ ꓪ ꓖꓶ ꓗꓷ ꓟ ꓠꓵꓻ ꓠꓲ, ꓮ ꓙꓵꓽ ꓠꓬ ꓢꓲ ꓡꓲ ꓟ ꓮ ꓙꓵꓽ ꓠꓬ ꓠꓴ ꓪ ꓔꓯ ꓚꓱ, ꓬꓲꓼ ꓡˍ ꓥꓳ꓾ ꓐꓯˍ ꓟ ꓕꓲꓽ ꓡꓰ, ꓥꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓔꓯ ꓠꓵꓻ ꓠꓲ, ꓖꓶ ꓠꓲ, ꓫꓵˍ ꓡꓳ꓿ ꓕꓱ ꓡꓱ ꓖꓶ ꓔꓬ ꓕꓯ ꓠꓬ ꓣꓳ ꓠꓬ ꓠꓵꓻ ꓠꓲ, ꓖꓳ ꓟ ꓔꓯ ꓣꓳꓽ ꓟꓽ ꓘꓳ ꓣꓴ ꓕꓯ ꓠꓽ꓾ ꓣꓳ ꓔꓯ ꓧ. ꓟ ꓙꓲˍ ꓟ ꓟ. ꓖꓶ ꓡ ꓕꓯ ꓣꓳꓽ ꓟꓽ ꓘꓳ ꓣꓴ ꓕꓯ ꓠꓬ ꓖꓳ ꓢꓲ ꓡꓲ ꓟ ꓙꓲˍ ꓟ ꓮ ꓙꓵꓽ ꓠꓬ ꓣꓳ ꓗꓪ ꓐꓰ ꓬꓲ ꓪ ꓔꓬ ꓗꓪ ꓓꓵꓽ ꓙꓰˍ ꓥꓳ꓿
ꓕꓱ ꓟ ꓑꓶ. ꓓꓴ ꓣꓳ ꓮ ꓙꓵꓽ ꓠꓬ ꓣꓳ ꓚꓲ. ꓛꓬ ꓐꓱ ꓶ ꓕꓯꓽ ꓢꓲ ꓠꓱ. ꓐꓯ ꓢꓴ ꓐꓱ ꓶ ꓠꓵꓻ ꓠꓲ, ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓖꓶ ꓗꓷˍ ꓟ ꓕꓲꓽ ꓡꓰ,ˍ ꓣꓳ ꓥˍ ꓟꓲ ꓛꓳ ꓫꓱꓽ ꓓꓴ ꓥꓳ꓾ ꓐꓰ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓦꓻ ꓢꓯꓼ ꓪ ꓣꓴ ꓓꓴ ꓥꓳ꓿
