ꓟ‐ꓕꓲ 9:32-37
ꓬꓲ ꓪꓽ ꓓꓳ ꓙꓰˍ ꓕꓯ꓾ ꓠꓲꓽ ꓜꓶꓽ ꓞꓹ ꓟ ꓞꓳ ꓟꓶꓻ ꓕꓲ ꓣꓳ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ ꓠꓲꓽ ꓔꓯ ꓖꓼ ꓓꓳ ꓗꓷ ꓠꓬ ꓞꓳ ꓟꓶ ꓠꓽ ꓫ ꓕꓱ ꓓꓳ ꓡ ꓠꓬꓲ꓾ ꓞꓳ ꓜꓴ ꓠꓬ ꓓꓵꓽ ꓙ ꓟꓶ ꓡꓰ ꓢꓲ꓾ ꓬꓲ-ꓢꓷ-ꓡꓰ ꓗꓳ ꓡꓳ ꓗꓪ ꓕꓱ ꓡꓱ ꓡꓴ ꓫꓵꓽ ꓮ ꓕꓯꓽˍ ꓟꓲ ꓟꓽ ꓟꓳꓻ ꓠꓬꓲ꓾ ꓐꓯˍ ꓡꓳ꓿ ꓖꓳ ꓡꓱ ꓥ ꓟꓲ ꓒ-ꓡꓲ-ꓢꓷ ꓐꓴ ꓡꓰ꓾ ꓬꓲ ꓠꓽ ꓠꓲꓽ ꓪ ꓔꓲ ꓢꓯꓼ ꓗꓪ ꓐꓰ ꓠꓲꓽ ꓖꓼ ꓓꓳˍ ꓡꓳ꓾ ꓐꓯˍ ꓡꓳ꓿
ꓬꓰ-ꓢꓴ ꓠꓬ ꓡꓳ ꓒꓱꓻˍ ꓐꓰ ꓘꓹ ꓥ ꓕ ꓑꓳꓸ ꓗꓪ ꓚꓳ ꓙꓰ ꓢꓲ꓾ ꓬꓲ ꓪꓽ ꓜꓲꓼ ꓦꓲ ꓗꓪ ꓟꓸ ꓟꓲ ꓟꓸ ꓖꓶ ꓠꓬꓲ꓾ ꓟꓴꓽ ꓗꓪ ꓗꓴꓷꓼ ꓶꓼ ꓓꓳ ꓫꓱꓹ ꓓꓳ ꓚ ꓟꓸ ꓖꓶ ꓠꓬꓲ ꓐꓰ ꓠꓻ ꓫꓵꓽ ꓠꓻ ꓙꓰꓽ ꓮꓽ ꓙꓵ ꓫꓬꓹ ꓖꓶˍ ꓡꓳ꓿ ꓞꓳ ꓜꓴꓻ ꓠꓬ ꓡꓳꓸ ꓢꓴ ꓟꓽ ꓙꓳ ꓟ ꓮ ꓣꓳˍ ꓡꓰ ꓐꓰ ꓗꓹ ꓢꓲ꓾ ꓬꓰ ꓙ ꓢꓴ ꓟꓽ ꓙꓳ ꓙꓳ ꓫꓸ ꓙꓵꓻ ꓟꓷ ꓙꓵꓻ ꓔꓬ ꓟ ꓔꓯ ꓬꓰ-ꓢꓴ ꓟꓳꓻˍ ꓠꓬꓲ꓾ ꓬꓲ ꓪꓽ ꓔꓯ ꓬꓲ ꓫꓱꓸ ꓤˍ ꓡꓳ꓿ ꓖꓳ ꓕꓯ ꓬꓲ ꓠꓬ ꓬꓲ ꓛꓳꓽ ꓒꓯꓹ ꓐꓴ ꓔꓯ꓾ ꓶꓼ ꓫꓺ ꓠꓯꓹ ꓟ ꓜꓽ ꓪꓳꓽ ꓡꓳ ꓪꓳꓽ ꓠꓬ ꓮꓽ ꓘꓶꓸ ꓟꓬꓽˍ ꓟꓲ ꓟꓬꓱꓽ ꓬꓰ ꓢꓴ ꓠꓽ ꓠꓲꓸˍ ꓡꓳ꓾ ꓐꓯˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓲ, ꓟ ꓙꓬ ꓔꓬ ꓢꓴ꓾ ꓦꓻ ꓔꓯ ꓟꓳ. ꓢꓯꓼ ꓐꓽ ꓔꓬ ꓢꓴ꓾ ꓥ ꓠꓬ ꓫꓬ, ꓓꓻ ꓡꓰ ꓟꓽ ꓓ ꓓ ꓟꓶ ꓤ ꓠꓻ ꓒꓬꓽ ꓔꓬ ꓢꓴ ꓕꓲꓽ ꓣꓳ ꓣꓳ ꓔꓯ ꓣꓳ ꓠꓬ ꓮ ꓡꓲ ꓫꓵꓽ ꓬꓰ ꓙ ꓓꓴ ꓐꓰ ꓥꓳ ꓡꓳ. ꓓꓴ ꓔꓯ ꓖꓶ ꓐ ꓡˍ ꓡ? ꓦꓻ ꓕꓲ ꓒꓳ,꓾ ꓠꓲ, ꓟ ꓕꓲꓽ ꓒꓳ, ꓐꓰ꓾ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓗꓪ ꓘꓶꓻ ꓡꓶ ꓓꓴ ꓫ. ꓙꓵ ꓓꓴ ꓠꓬ ꓮ ꓕꓯ ꓟꓲ ꓕꓲꓽ ꓡꓰ,ꓼ ꓒꓬꓱꓼ ꓡ ꓔꓬ ꓟ ꓥ ꓡꓳ꓿
ꓬꓰ‐ꓢꓴ ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓟꓽ ꓢꓻ ꓢꓴ꓾ ꓠꓲ, ꓫ. ꓟꓬ ꓫ. ꓔꓳ, ꓜꓳꓽ ꓔꓬ ꓢꓴ ꓐꓰ꓾ ꓦꓻ ꓔꓯ ꓟꓳ. ꓟꓽ ꓢꓲꓽ ꓫꓬ ꓟ ꓔꓳ, ꓜꓳꓽ ꓔꓬ ꓢꓴ ꓔꓯ ꓬꓲ ꓠꓬ ꓮ ꓘꓶ. ꓫꓱ. ꓤˍ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓠꓬ ꓥꓶˍ ꓟ ꓦꓻ ꓡꓰ ꓞꓳ, ꓔ ꓟ ꓗꓪ ꓐꓰ ꓩꓴ ꓖꓶˍ ꓟ꓾ ꓠꓻ ꓓꓴ ꓓꓻ ꓡꓰ ꓝꓲˍ ꓟ ꓕꓱ ꓡꓱ ꓫꓵꓽ ꓪꓽ ꓠꓬꓲ ꓓꓴ ꓬꓰ ꓖꓶˍ ꓡꓳ꓿
ꓢꓲ ꓒ ꓬꓲ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓚꓺˍ ꓕ ꓑꓳꓸꓼ ꓪꓴ‐ꓢ ꓬꓲ ꓗꓴꓷꓼ ꓠꓬ ꓪ ꓜꓲ ꓫꓬꓽ ꓫꓬꓽ ꓡꓰ ꓗꓷ ꓡ ꓢꓲ ꓠꓬꓲ꓾ ꓙꓵꓻ ꓠꓲ, ꓡꓰ ꓢꓲ ꓒ ꓔꓬ ꓗꓪ ꓡ ꓢꓴ ꓔꓯ ꓢꓯꓼ ꓟꓬ ꓐꓰ ꓩꓴ ꓗꓷ ꓟˍ ꓟ ꓙꓵꓽ ꓪ ꓬꓲ ꓫꓵꓼ ꓔꓯ ꓖꓶˍ ꓡꓳ꓿ ꓢꓲ ꓒ ꓠꓬ ꓬꓲ ꓔꓬ ꓗꓪ ꓚꓱ, ꓬꓲꓼ ꓡ ꓢꓴ ꓮ ꓙꓵꓽ ꓔꓯ ꓞꓳ, ꓔ ꓟ ꓮ ꓙꓵꓽ ꓗꓪ ꓐꓰ ꓡꓲ, ꓗꓷ ꓝꓲˍ ꓡꓳ꓿
ꓖꓳ ꓡꓱ ꓠꓬꓲ ꓣꓳ ꓠꓬ꓾ ꓣꓳ ꓔꓯ ꓞꓳ, ꓔ ꓟ ꓞꓳ, ꓚ ꓮ ꓙꓵꓽ ꓗꓪ ꓐꓰ ꓢꓲ ꓒ ꓠꓬ ꓣꓳ ꓔꓯ ꓚꓬꓴ. ꓙ ꓖꓶ ꓐ ꓡˍ ꓥꓳ ꓐꓯ ꓟ ꓔꓯ ꓥꓳ ꓡꓳ. ꓢꓲ ꓠꓬꓲ ꓙꓵꓻ ꓠꓲ, ꓡꓰ ꓢꓲ ꓒ ꓔꓬ ꓗꓪ ꓣꓳ ꓫ. ꓙꓵ ꓟꓷꓼ ꓙꓵ ꓓꓴ꓾ ꓠꓲ, ꓫ. ꓟꓬ ꓫ. ꓓꓴ ꓮ ꓙꓵꓽ ꓬꓲ ꓔꓯ ꓐꓯ ꓖꓶ ꓙꓰ ꓡꓯ꓾ ꓐꓰ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓪ ꓖꓶ ꓔꓬ ꓟ ꓥ ꓡꓳ꓿
