ꓔꓲꓺ ꓒ ꓪ ꓔꓲ ꓡꓰ ꓡꓰꓳ (14) ꓡꓰ ꓴꓢꓮ ꓗꓴꓷꓼ ꓔꓰꓫꓮꓢ ꓟꓵꓽ ꓗꓪ ꓬꓲꓻ ꓙꓬ ꓙꓵꓽ ꓡ ꓢꓲ ꓠꓬꓲ ꓫꓵꓻ ꓡꓰ ꓢꓴ ꓐꓴ ꓦꓻ ꓐꓱ ꓶ ꓐꓰ ꓠꓻ ꓓꓴ ꓡꓰ ꓢꓴ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓪꓽ ꓘꓴ ꓙ ꓟ ꓓꓳꓽ
7 ꓦ ꓟ 6 ꓠꓬꓲ 2025 ꓘꓳꓼ ꓕꓯ ꓗ‐ꓔꓳ‐ꓡꓲꓗ ꓟꓵꓽ ꓗꓳ. ꓓꓵ ꓓꓵ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺꓤ ꓐꓴ ꓔꓯ ꓧꓳꓽ ꓪꓴ. ꓟꓴ ꓔꓬ ꓢꓴ ꓔꓲꓺ ꓒ ꓪ ꓔꓲ ꓡꓰꓳ(14) ꓠꓬ ꓗꓳ. ꓗꓷ ꓟ ꓠꓽ ꓥꓪꓽ ꓠꓬꓲ ꓠꓯꓼ ꓙꓵ, ꓕꓯ ꓴꓢꓮ ꓗꓴꓷꓼ ꓔꓰꓫꓮꓢ ꓟꓵꓽ ꓗꓪ ꓬꓲꓻ ꓙꓬ ꓙꓵꓽ ꓡ ꓟ ꓪꓴ. ꓠꓬꓲ ꓫꓵꓻ ꓡꓰ ꓢꓴ ꓐꓴ ꓐꓱ ꓶ ꓪꓽ ꓘꓴ ꓙ ꓟ ꓐꓰ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓐꓱ ꓶ ꓥ ꓟꓲ ꓪꓽ ꓘꓴ ꓙ ꓖꓶ ꓔꓬ ꓡꓳ ꓐꓰ ꓫ. ꓕꓱ ꓔ ꓟ ꓥ ꓡꓳ꓿
ꓴꓢꓮ ꓗꓴꓷꓼ ꓔꓰꓫꓮꓢ ꓟꓵꓽ ꓗꓪ ꓙꓳ ꓟ ꓖꓴꓮꓓꓮꓡꓴꓑꓰ ꓬꓲꓻ ꓙꓬ ꓡꓳ ꓠꓬ ꓟꓽ ꓓꓵ ꓙ ꓔ ꓟ ꓙꓵ, ꓕꓯ ꓬꓲꓻ ꓙꓬ ꓮ ꓟꓬ, ꓙꓵꓽ ꓟꓶ. ꓡ ꓢꓲ ꓠꓬꓲ ꓑ ꓫꓬ (51) ꓣꓳ ꓥ ꓟꓲ ꓫꓵꓻ ꓡꓰ ꓢꓲ ꓠꓬꓲ ꓮ ꓟꓬ, ꓠꓬ ꓟꓶꓽ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓖꓳ ꓡꓱ ꓟ ꓡꓰ ꓟꓽ ꓞꓲ ꓙꓲ‐ꓢꓴ ꓢꓲꓺ ꓤ ꓢꓳꓻ ꓤ ꓐꓴ ꓠꓬ ꓬꓲꓻ ꓙꓬ ꓡꓳ ꓒꓽ ꓕꓲ ꓗꓪ ꓢꓳꓻ ꓜꓲꓼ ꓓꓴ ꓬꓰ ꓔꓬ ꓢꓴ ꓢꓳꓻ ꓤ (27) ꓣꓳ ꓮ ꓙꓵꓽ ꓥ ꓟꓲ ꓬꓲꓻ ꓙꓬ ꓙꓵꓽ ꓡ ꓟ ꓗꓪ ꓟꓶꓽ ꓔꓬ ꓡꓳ ꓐꓰ ꓐꓯ ꓔ ꓡꓳ꓿
ꓙꓵꓽ ꓪ ꓙꓳ ꓢꓴ ꓐꓴ ꓡꓰ ꓔꓰꓫꓮꓢ ꓟꓵꓽ ꓗꓪ ꓝ. ꓢꓲ ꓠꓬꓲ ꓬꓲꓻ ꓙꓬ ꓙꓵꓽ ꓡ ꓓꓴ ꓙꓳˍ ꓐꓰ ꓐꓯ ꓔ ꓡꓳ꓿ ꓝꓮꓲ ꓬꓲꓻ ꓙꓬ ꓙꓵꓽ ꓡ ꓟ ꓪꓴ. ꓠꓬꓲ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓬꓰ ꓙ ꓢꓴ ꓜꓴꓻ ꓡꓰ ꓬꓰ ꓙ ꓟ ꓪꓴ. ꓠꓬꓲ ꓮ ꓘꓶ. ꓛꓲ ꓫ. ꓟꓳ ꓔꓬ ꓡꓳ ꓐꓰ ꓔꓲꓺ ꓒ ꓪ ꓔꓲ ꓡꓰ ꓫ. ꓕꓱ ꓔ ꓡꓳ꓿ ꓝꓮꓲ ꓔꓰꓫꓮꓢ ꓡꓳ ꓒꓱ ꓗꓪ ꓐꓰ ꓔꓲꓺ ꓒ ꓓꓽ ꓡꓰ ꓬꓲꓻ ꓙꓬ ꓙꓵꓽ ꓡ ꓟ ꓪꓴ. ꓠꓬꓲ ꓫ. ꓓꓴ ꓔꓳ, ꓜꓳ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓐꓰ ꓪꓽ ꓘꓴ ꓙ ꓠ, ꓟ ꓓꓰꓽ ꓔ ꓟ ꓥ ꓡꓳ꓿ ꓝꓮꓲ ꓔꓲꓺ ꓒ ꓪ ꓔꓲ ꓡꓰ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓬꓰ ꓙ ꓔꓳ, ꓙ ꓠ, ꓟ ꓓꓰꓽ ꓔ ꓡꓳ ꓐꓰ ꓦꓮꓔꓲꓚꓮꓠ ꓠꓰꓪꓢ ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
