ꓶꓻ ꓟꓯꓻ ꓢꓴ ꓪꓴꓽ ꓧꓶ ꓠꓽ ꓟꓶ ꓠ, ꓟ (Sunday reflection )
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (14) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 11ꓽ25‐30 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓡꓰ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓿ ꓥꓪ ꓡꓰ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲ ꓥꓳ ꓐꓰ ꓐꓯ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓓꓽ ꓪꓴ. ꓐ, ꓐ ꓪꓴ‐ꓢ ꓔꓯ ꓫꓱ, ꓖꓶ ꓟ ꓠꓬ ꓐ, ꓐ ꓪꓴ‐ꓢ ꓠꓴ ꓠꓬ ꓙ ꓜꓲꓼ ꓢꓴ ꓐꓰ ꓢꓷ. ꓠꓲ, ꓙꓳ ꓢꓴ ꓔꓯ ꓕꓱ ꓟꓬ ꓫꓵꓽ ꓟ ꓚꓵ ꓔ ꓢꓲ ꓤ ꓠꓱ ꓤ ꓔꓯ ꓟꓳ. ꓖꓶ ꓡꓳ ꓐꓰ ꓫꓱ. ꓖꓶ ꓡꓳ꓿ ꓕꓱ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓡꓰ ꓐ, ꓐ ꓪꓴ‐ꓢ ꓔꓯ ꓫꓱ, ꓖꓶ ꓟ ꓠꓬ ꓪꓴ‐ꓢ ꓢꓷ. ꓠꓲ, ꓠꓬ ꓟꓲ ꓠꓯ ꓡ ꓞꓳ ꓐꓴ ꓢꓷ. ꓠꓲ, ꓕꓯ ꓢꓲ ꓪꓴꓽ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓟꓲ ꓠꓯ ꓞꓳ ꓤ ꓠꓬ ꓪꓴ‐ꓢ ꓔꓯ ꓙꓻ ꓣꓳ ꓟ ꓠꓲ, ꓟ ꓗꓪ ꓐꓰ ꓬꓲ ꓔꓯ ꓙꓵꓻ ꓢꓲ ꓬꓲ ꓗ. ꓠꓯ ꓛꓳ ꓠ, ꓟ ꓣꓳ ꓚꓵꓻ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓢꓲꓽ ꓫꓬ ꓟ‐ꓦ ꓪꓴ‐ꓢ ꓡꓰ ꓖꓶ ꓡ ꓟ ꓙ ꓜꓲꓼ ꓠꓲ, ꓢꓷ. ꓠꓲ, ꓔꓯ ꓮ ꓘꓶ. ꓛꓲ ꓪꓽ ꓪꓴꓽ ꓘꓳ, ꓠ, ꓟ ꓣꓳ ꓚꓵꓻ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓣꓳ ꓟꓲ ꓠꓯ ꓟꓲ ꓠꓯ ꓡ ꓞꓳ ꓠꓬ ꓪꓴ‐ꓢ ꓔꓯ ꓙꓵꓻ ꓕꓯ ꓤ ꓠꓱ ꓤ ꓕꓲ ꓣꓳ ꓪꓴ‐ꓢ ꓔꓯ ꓙꓵꓻ ꓟ ꓡꓰ ꓐꓰ ꓙꓵꓻ ꓠ, ꓟ ꓣꓳ ꓚꓵ. ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓤ ꓠꓱ ꓤ ꓖꓴ ꓠꓬ ꓔꓱ ꓚꓵ, ꓟ ꓙꓵꓻ ꓠꓲ, ꓡꓰ ꓙꓵꓻ ꓟ ꓪꓴ. ꓠꓬꓲ ꓙ ꓣꓳ ꓟ ꓠꓲ, ꓟ ꓡꓰ ꓪꓴ‐ꓢ ꓔꓯ ꓤ ꓠꓱ ꓤ ꓕꓲ ꓣꓳ ꓡꓰ ꓐꓰ ꓙꓵꓻ ꓠ ꓟ ꓐꓯ ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓢꓷ. ꓠꓲ, ꓔꓯ ꓣꓳ ꓟꓲ ꓠꓯ ꓡ ꓞꓳ ꓪꓴ. ꓠꓶ. ꓗꓪ ꓐꓰ ꓮ ꓙꓵꓽ ꓢꓷ. ꓪ ꓟꓽ ꓓꓽ ꓟ ꓪꓴ. ꓠꓬꓲ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓓꓴ ꓙ ꓪꓴꓽ ꓧꓶ ꓢꓲ ꓠꓬꓲ ꓶꓻ ꓡꓰ ꓓꓽ ꓟ ꓟꓯꓻ ꓢꓴ ꓐꓴ ꓥꓪ ꓔꓯ ꓡꓯ ꓬꓲ ꓡꓰ ꓪꓴꓽ ꓧꓶ ꓠꓽ ꓝꓲ ꓥ ꓡꓳ ꓐꓰ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓮ ꓟꓶ ꓟ ꓙꓵ, ꓗꓪ ꓣꓳ ꓠꓬ ꓔꓬ ꓟ ꓗꓴꓷꓼ ꓡꓳ ꓒꓱ ꓞꓳ ꓘ, ꓗꓪ ꓔꓬ ꓟꓽ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓐꓰ ꓝꓮꓲ ꓣꓳ ꓚꓲ. ꓛꓬ ꓗꓪ ꓒꓬꓱꓼ ꓔꓬ ꓟ ꓠꓲ, ꓫ. ꓟꓬ ꓫ. ꓓꓴ ꓮ ꓙꓵꓽ ꓑꓶ. ꓓꓴ ꓧꓪ ꓖꓳ ꓓꓱꓽ ꓕꓲ ꓒꓳ, ꓐꓰ ꓦꓻ ꓠꓬ ꓮ ꓘꓶ. ꓛꓲ ꓓꓴ ꓙ ꓪꓴꓽ ꓧꓶ ꓓꓴ ꓙꓳ, ꓟ ꓥ ꓡꓳ꓿
ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ. ꓠꓯ, ꓗꓪ ꓡ ꓠ, ꓟ ꓐꓰ ꓬꓲ ꓖꓶ ꓢꓯꓼ ꓪ ꓬꓲ ꓫꓵꓼ ꓖꓶ ꓠ, ꓟ ꓐꓱ ꓶ ꓠꓴ ꓥꓪ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓠꓬ ꓓꓴ ꓙ ꓪꓴꓽ ꓧꓶ ꓟꓬ ꓔꓬ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓙꓰ ꓠ, ꓟ ꓟꓲ ꓡꓰ ꓢꓲ ꓠꓬꓲ ꓠꓱ. ꓐꓯꓼ ꓔꓶ. ꓗꓪ ꓙꓰ ꓔꓬ ꓡ ꓐꓰ ꓚꓲ. ꓛꓬ ꓚꓱ, ꓔꓯ ꓓꓵ ꓙ ꓠ,ꓟ ꓢꓲꓺꓒ ꓬꓰ‐ꓢꓴ ꓡꓰ ꓠ ꓠꓬꓲˍ ꓔꓬ ꓟ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓠꓬ ꓥꓪ ꓡꓽ ꓡꓰ ꓠꓽ ꓟꓯꓻ ꓢˍ ꓡꓳ꓿ ꓥꓪ ꓶꓻ ꓟꓲ ꓡꓳꓻ ꓡꓳ ꓐꓰ ꓢꓲꓺ ꓒ ꓡꓰ ꓐꓯ ꓔ ꓟ ꓥ ꓡꓳ꓿ ꓕꓱ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺꓤ ꓐꓴ ꓮ ꓡꓰ ꓐꓰ ꓢꓲꓺ ꓒ ꓐꓰ ꓙꓻ ꓡꓯꓽ ꓘꓳ, ꓠ, ꓟ ꓔꓯ ꓟ. ꓖꓶ ꓟ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓙꓵꓻ ꓠꓬ ꓫ. ꓓꓴ ꓟꓷ ꓓꓴ ꓟꓽ ꓙꓳ ꓐꓰ ꓟꓽ ꓐꓯ ꓔ ꓥ ꓟꓲ ꓣꓳ ꓬꓲ ꓔꓯ ꓙꓵꓻ ꓠꓬ ꓣꓳ ꓛꓰ ꓡꓯ ꓫꓴ ꓘꓳ, ꓣꓴ ꓟꓶ ꓡꓰ ꓢꓲ ꓠꓬꓲ ꓫ. ꓓꓴ ꓟꓷ ꓓꓴ ꓗꓪ ꓐꓰ ꓧꓪ. ꓡꓰ ꓐ ꓡ ꓟ ꓢꓯꓼ ꓪ ꓣꓱ ꓛꓰ ꓡꓯꓽ ꓫꓴ ꓟꓶ ꓓꓴ ꓥꓳꓽ ꓐꓯ ꓔ ꓡꓳ꓿ ꓝꓮꓲ ꓣꓳ ꓠꓬ ꓬꓲ ꓔꓯ ꓙꓵꓻ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓓꓴ ꓥꓳ ꓐꓰ ꓢꓲꓺ ꓒ ꓡꓰ ꓐꓯ ꓔ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓔꓯ ꓙꓻ ꓣꓳ ꓟ ꓠꓲ, ꓡꓰ ꓬꓲ ꓔꓯ ꓙꓵꓻ ꓢꓲ ꓠ, ꓟ ꓣꓳ ꓚꓵ, ꓟ ꓐꓰ ꓢꓲꓺ ꓒ ꓔꓯ ꓙꓵꓻ ꓕꓯ ꓤ ꓠꓱ ꓤ ꓡꓰ ꓐꓰ ꓙꓵꓻ ꓠ, ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓙꓰ ꓟ ꓚꓱ, ꓔꓯ ꓘꓳ, ꓣꓴ ꓢꓲ ꓠꓬꓲ ꓣꓳ ꓠꓯ, ꓗꓪ ꓔꓳ, ꓜꓳ ꓔꓬ ꓟ ꓫ. ꓓꓴ ꓟꓷꓽ ꓓꓴ ꓠꓲ, ꓫ. ꓟꓬ ꓫ. ꓓꓴ ꓮ ꓙꓵꓽ ꓔꓯ ꓢꓲꓺ ꓒ ꓐꓰ ꓕꓲ ꓪ ꓟꓯꓻ ꓠ, ꓟ ꓣꓳ ꓚꓵ. ꓟ ꓥ ꓡꓳ꓿
ꓢꓲꓺ ꓒ ꓣꓳ ꓔꓯ ꓬꓲ ꓐꓰ ꓕꓲ ꓪ ꓛꓳꓽ ꓫꓱ, ꓠ, ꓟ ꓘꓴ ꓔꓬ ꓟ ꓢꓯꓼ ꓔꓯ ꓠ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓢꓲꓺ ꓒ ꓘꓴ ꓢꓯꓼ ꓔꓯ ꓠ ꓠ, ꓡꓯ꓿ ꓓꓴ ꓙ ꓪꓴꓽ ꓧꓶ ꓔꓯ ꓢꓲꓺ ꓒ ꓠꓯ, ꓗꓪ ꓙꓰ ꓓꓴ ꓬꓰ ꓡꓯ= ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
