ꓟꓲ ꓠꓯ ꓕꓱ ꓟ ꓗꓪ ꓔꓬ ꓟ ꓞꓳ ꓤ ꓤꓶꓻ ꓠꓯꓸꓼ ꓗꓪ꓾ ꓤꓶꓻ ꓟꓲꓽ ꓦꓲ ꓕꓳꓽ ꓥꓳꓽ ꓐꓯˍ ꓟ ꓙꓳˍ ꓡꓳ꓿ ꓟꓲꓽ ꓦꓲ ꓕꓳꓽ ꓥꓳꓽ ꓕꓱ ꓟ ꓠꓬ ꓣꓳ ꓤꓶꓻ ꓔꓯ ꓐꓬ ꓡꓰ ꓝꓲ ꓐ ꓡˍ ꓡꓳ꓿ ꓬꓲ ꓧꓶꓽ ꓗꓷ ꓡꓰ ꓝꓲ ꓐ ꓡˍ ꓡꓳ꓾ ꓙꓽ ꓐꓰꓽ ꓙꓽ ꓗꓪ ꓗꓷ ꓡꓰ ꓝꓲ ꓐ ꓡˍ ꓡꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓣꓳ ꓐꓰ ꓕꓲꓽ ꓪꓽ ꓔꓬ ꓠꓬ ꓙꓳꓺ ꓛꓱꓽ ꓟꓽ ꓛꓵ꓿ ꓪꓴ‐ꓢ ꓔꓯ ꓕꓲ ꓖꓳ ꓓꓱꓽ ꓕꓲꓽ ꓶ ꓟꓬ ꓡꓱꓸꓼ ꓙꓵꓻ ꓠ, ꓟ ꓡꓰꓽ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓟ‐ꓕꓲ꓿8ꓽ23‐27) ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓟꓲꓽ ꓦꓲ ꓕꓳꓽ ꓥꓳꓽ ꓐꓰ ꓬꓲꓻ ꓡꓯꓼ ꓟꓰꓼ ꓔꓯ ꓕꓼˍ ꓡꓳ꓾ ꓠꓽ ꓡꓰ ꓝꓲˍ ꓡꓳ꓾ ꓐꓯˍ ꓟ ꓔꓯ ꓟꓳꓻ ꓪˍ ꓡꓳ꓿
ꓪꓴ‐ꓢ ꓐꓯ ꓘꓶꓽ ꓬꓲ ꓠꓬꓲ ꓟꓳ ꓓꓴ ꓠꓬ꓾ ꓣꓳ ꓢꓲ ꓒ ꓬꓰ‐ꓢꓴ ꓔꓯ ꓙꓵˍ ꓟ ꓙꓵꓻ ꓠꓲ, ꓠꓬ ꓔꓱ, ꓚꓵ ꓠ, ꓟ꓾ ꓙꓵꓻ ꓠꓲ, ꓖꓳ ꓟ ꓠꓯ.ˍ ꓠ ꓗ, ꓟ꓾ ꓙꓵꓻ ꓠꓲ, ꓖꓳ ꓟ ꓪꓴꓽ ꓠ ꓗ, ꓟ ꓔꓯ ꓖꓴ ꓟ. ꓖꓶ ꓔꓬ ꓡꓳ꓿ ꓬꓲ ꓢꓯꓼ ꓮ ꓘꓶ. ꓪꓽ ꓠꓬꓲˍ ꓟ ꓬꓲꓻ ꓡꓯꓼ ꓟꓰꓼ ꓐꓰ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓔꓬ ꓢꓲ꓾ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓠꓬ ꓙꓳ ꓠꓬꓲ ꓐꓰ ꓘꓴꓻ ꓔꓬ ꓕꓯ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓢꓲ ꓒ ꓥꓳ ꓡꓳ. ꓓꓴ ꓬꓲ ꓢꓲ ꓒ ꓥ ꓟ ꓔꓯ꓾ ꓬꓲꓻ ꓡꓯꓼ ꓟꓰꓼ ꓐꓰ ꓟꓲꓽ ꓦꓲ ꓕꓳꓽ ꓥꓳꓽ ꓔꓯ ꓠꓽ ꓗꓷ ꓠ, ꓟ ꓐꓯ ꓖꓶ ꓗꓷ ꓢꓲ ꓢꓲ ꓡꓲ ꓗꓷ ꓡꓰˍ ꓟ ꓗꓪ ꓐꓰ꓾ ꓬꓰ‐ꓢꓴ ꓬꓲ ꓙꓳ ꓔꓬ ꓟ ꓠꓬ ꓮ ꓙꓵꓽ ꓐꓲ ꓜꓲꓼ ꓡꓰ ꓝꓲˍ ꓡꓳ ꓐꓯ ꓟ ꓔꓯ ꓟ. ꓖꓶ ꓔꓬ ꓡꓳ꓿
ꓖꓳ ꓡꓱ ꓥ ꓟꓲ ꓝꓲ ꓓꓴ ꓐꓴ ꓠꓬ ꓬꓲ ꓔꓯ ꓒ ꓐꓲꓸꓼ ꓟꓽ ꓙꓵꓻ꓿ ꓓꓵꓽ ꓙ ꓟꓶ ꓔꓬ ꓖꓴˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳ ꓔꓬ ꓟ ꓬꓲ ꓔꓶ ꓙꓱꓼ ꓠꓬ ꓦꓻ ꓕꓲꓽ ꓒꓳ, ꓣꓱꓽ ꓞ, ꓟ ꓔꓯ ꓐꓲ ꓠ, ꓟ ꓟꓽ ꓥ ꓥ꓾ ꓧꓪꓽ ꓖꓳ ꓓꓱꓽ ꓣꓱꓽ ꓞ, ꓟ ꓐꓲ ꓡꓰ ꓠ, ꓟ ꓥ ꓟ ꓑꓶ. ꓓꓴ꓾ ꓬꓲ ꓪ ꓙꓵꓻ ꓠꓲ, ꓠꓬ ꓮ ꓕꓯ ꓟꓲ ꓟꓽ ꓕꓶꓺ ꓞ, ꓓ,꓿ ꓦꓬꓼ ꓠꓬꓲ ꓟꓽ ꓢꓲꓺ ꓬꓲ ꓙꓵ, ꓟꓽ ꓢꓲꓺ ꓬꓲ ꓪ ꓙꓵꓻ ꓠꓲ, ꓠꓬ ꓒꓳ, ꓡꓶ. ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡˍ ꓟ ꓠꓬ ꓝꓲ ꓠ, ꓟ ꓐꓱ ꓶ ꓟꓽ ꓥ ꓥ ꓣꓱꓽ ꓙ ꓠ, ꓟ ꓐꓱ ꓶ ꓥ ꓡꓳ꓾ ꓐꓯ ꓟ ꓔꓯ ꓠꓲ, ꓟ ꓗꓪ ꓓꓵꓽ ꓙ ꓟꓶ ꓔ ꓢꓲ꓾ ꓣꓳ ꓤꓶꓻ ꓙꓵꓻ ꓠꓲ, ꓠꓬ ꓮ ꓕꓯ ꓟꓲ ꓕꓶꓺ ꓞ, ꓠ ꓗ, ꓡꓳ꓿
ꓫ. ꓙꓵ ꓟꓷ ꓙꓵ ꓓꓴ꓾ ꓠꓲ, ꓫ. ꓟꓬ ꓫ. ꓓꓴ꓾ ꓣꓳ ꓤꓶꓻ ꓟꓲꓽ ꓦꓲ ꓕꓳꓽ ꓥꓳꓽ ꓐꓴ ꓠꓬ ꓣꓳ ꓙꓵꓻ ꓠꓲ, ꓔꓯ ꓪ ꓜꓲ ꓕꓶꓺ ꓞ, ꓡꓰ ꓝꓲˍ ꓡ꓿ ꓖꓳ ꓡꓱ ꓟꓽ ꓥ ꓠꓬ ꓪ ꓜꓲ ꓢꓯꓼ ꓐꓽ ꓡꓰ ꓝꓲˍ ꓡ꓾ ꓐꓯ ꓟ ꓔꓯ ꓣꓳ ꓓꓵꓽ ꓙ ꓠꓬꓲ ꓓꓴ ꓥ ꓡꓳ꓿ ꓙꓵꓻ ꓠꓲ, ꓣꓳ ꓢꓴ ꓐꓴꓳ꓾ ꓠꓴ ꓪ ꓮ ꓫꓵꓽ ꓪꓴ. ꓠꓬꓲ ꓙꓳꓺˍ ꓡ? ꓐꓰ ꓐꓯˍ ꓟ꓾ ꓙꓳꓺ ꓔꓬ ꓟ ꓝꓲ ꓓꓴ ꓐꓴ ꓔꓯ ꓐꓯ ꓖꓶˍ ꓟ ꓢꓲ ꓒ ꓬꓲ ꓐꓯ ꓘꓶꓽ ꓔꓯ꓾ ꓣꓳ ꓤꓶꓻ ꓟꓲꓽ ꓦꓲ ꓕꓳꓽ ꓥꓳꓽ ꓔꓯ ꓔꓳ, ꓜꓳꓽ ꓡˍ ꓕ ꓑꓳꓸꓼ ꓮ ꓕꓯ ꓟꓲ ꓓꓵꓽ ꓙ ꓟꓶ ꓢꓲ ꓢꓯꓼ ꓪ ꓣꓴ ꓗꓴ. ꓠ, ꓟ ꓢꓯꓼ ꓕꓵꓼ ꓙꓰ ꓓꓴ ꓬꓰ ꓡꓯ꓿
