ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓑꓮꓲꓽ ꓦꓬꓼ ꓠꓬꓲ (Sunday reflection)
ꓠꓬꓲ. ꓠꓬꓲ ꓠꓬ ꓘꓴ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓝꓲ ꓓꓴ ꓐꓴ ꓮ ꓙꓵꓽ ꓕꓯ ꓢꓲ ꓪꓴꓽ ꓢꓴ ꓝꓲ ꓓꓴ ꓠꓬꓲꓽ ꓣꓳ ꓥ ꓟ ꓝꓲ ꓓꓴ ꓒꓲ‐ꓕꓱ ꓐꓰ ꓝꓲ ꓓꓴ ꓒꓳ‐ꓡꓳ ꓐꓴ ꓠꓬꓲꓽ ꓣꓳ ꓑꓮꓲꓼ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ 16ꓽ13‐19 ꓝꓲ. ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓢꓴ ꓡꓰ ꓬꓲ ꓔꓯ ꓮ ꓟꓽ ꓥ ꓟ ꓢꓴ ꓡꓰ ꓮ ꓡꓲ ꓐꓯˍ ꓡ? ꓐꓰ ꓠ ꓠꓬꓲˍ ꓕꓯ ꓝꓲ ꓓꓴ ꓒꓲ‐ꓕꓱ ꓡꓰ ꓠꓴ ꓠꓬ ꓠꓴ ꓠ ꓙꓲ‐ꓢꓴ ꓖꓳ ꓕꓲ ꓣꓳ ꓟ ꓥꓳ꓿ ꓢꓯ. ꓔꓬ ꓟ ꓪꓴ‐ꓢ ꓬꓲ ꓮ‐ꓐꓲ ꓥꓳ ꓐꓰ ꓐꓯ ꓖꓶ ꓡꓳ꓿ ꓝꓮꓲ ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓪ ꓗꓴꓷꓼ ꓜꓳ ꓜꓴ ꓬꓲ ꓔꓯ ꓖꓶ ꓔ ꓟ ꓥ ꓡꓳ꓿
ꓝꓲ ꓓꓴ ꓒꓲ‐ꓕꓱ ꓠꓬ ꓖ‐ꓡꓲ‐ꓡꓲ ꓟꓵꓽ ꓗꓪ ꓥꓪ. ꓧꓪ ꓢꓴ ꓥ ꓢꓲ ꓠꓬꓲ ꓬꓲ ꓔꓯ ꓢꓲꓺ ꓒ ꓬꓰ‐ꓢꓴ ꓡꓳ. ꓟꓳ ꓗꓷ ꓗ. ꓠꓯ ꓝꓲ ꓓꓴ ꓒꓬꓱꓼ ꓠ, ꓟ ꓘꓴ ꓗꓷ ꓢꓴ ꓥ ꓡꓳ꓿ ꓢ‐ꓟꓳ ꓒꓲ‐ꓕꓱ ꓐꓯ ꓟ ꓠꓬ ꓮ‐ꓣꓲ‐ꓟ ꓥꓳꓽ ꓗꓪ ꓐꓰ ꓡꓳ‐ꓓꓲ ꓒꓽ ꓐꓰ ꓟꓬꓱꓺ ꓔ ꓟ ꓥ ꓡꓳ꓿ ꓝꓲ ꓓꓴ ꓒꓲ‐ꓕꓱ ꓠꓬ ꓟꓽ ꓐꓲꓻ ꓜꓲꓼ ꓢꓴ ꓥ ꓟꓲ ꓬꓲ ꓔꓯ ꓡ ꓞꓳ ꓔꓯ ꓧꓪ, ꓢꓴ ꓝꓲ ꓓꓴ ꓒꓬꓱꓼ ꓡ ꓠ,ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿ ꓝꓮꓲ ꓒꓲ‐ꓕꓱ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓴꓷꓼ ꓜꓳ ꓜꓴ ꓬꓲ ꓔꓯ ꓖꓶ ꓔ ꓢꓲ ꓠꓬꓲ ꓟꓲ ꓠꓯ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓬꓲ ꓔꓯ ꓐꓯ ꓘꓶꓽ ꓔꓯ ꓠ ꓡꓳ ꓠ, ꓟ ꓙꓵꓽ ꓪ ꓖꓶ ꓔ ꓟ ꓥ ꓡꓳ꓿
ꓝꓮꓲ ꓝꓲ ꓓꓴ ꓒꓳ‐ꓡꓳ ꓠꓬ ꓙꓲ‐ꓢꓴ ꓢꓲꓺ ꓤ ꓟꓽ ꓒꓬꓱꓼ ꓡ ꓢꓲ ꓕꓯ ꓬꓲ ꓠꓬ ꓬꓴ‐ꓔ ꓙꓵꓻ ꓠꓲ, ꓔꓯ ꓘꓳ, ꓣꓴ ꓢꓴ ꓕꓲ ꓣꓳ ꓥ ꓡꓳ꓿ ꓬꓲ ꓐ, ꓐ ꓢꓲ ꓟ, ꓟ ꓠꓬ ꓒꓴ ꓫꓵꓽ ꓮ ꓟꓬ, ꓙꓳ ꓢꓴ ꓟꓬꓱꓺ ꓓꓳꓽ ꓙꓳ ꓢꓴ ꓦꓵꓻ ꓘꓴꓽ ꓗꓪ ꓐꓰ ꓬꓲ ꓠꓬ ꓡ ꓢꓴ ꓥ ꓡꓳ꓿ ꓬꓲ ꓞꓲ ꓪꓴꓽ ꓡ ꓟ ꓙꓵ, ꓔꓯ ꓬꓴ‐ꓔ ꓙꓵꓻ ꓗꓽ ꓔꓯ ꓢꓳꓻ ꓣꓴ ꓢꓲ ꓠꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓫ ꓟꓳ ꓢꓲ ꓠꓬꓲ ꓢꓰꓼ ꓢꓴ ꓥ ꓡꓳ꓿ ꓖꓳ ꓡꓰ ꓥ ꓟꓲ ꓓ‐ꓟ‐ꓢ‐ꓗ ꓡꓳ ꓒꓱ ꓗꓪ ꓒꓳ‐ꓡꓳ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓠ, ꓟ ꓙꓰ ꓟ ꓙ ꓖꓴ ꓗꓪ ꓮ.‐ꓟꓳꓽ ꓕꓯ ꓢꓲ ꓗꓪ ꓐꓰ ꓞꓰꓼ ꓡꓰ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓗ. ꓠꓯ ꓢꓲ ꓛꓳꓽ ꓢꓴ ꓒꓬꓱꓼ ꓡ ꓝꓲ ꓟ ꓥ ꓡꓳ꓿
ꓝꓲ ꓓꓴ ꓐꓴ ꓠꓬꓲꓽ ꓣꓳ ꓠꓬ ꓬꓲ ꓪ ꓞꓳ ꓙꓳ ꓢꓯ. ꓔꓬ ꓗꓷ ꓟ ꓟꓽ ꓪ ꓡꓯꓽ ꓘꓳ ꓥ ꓟꓲ ꓘꓴ ꓜꓲꓼ ꓞꓳ ꓐꓱ ꓶ ꓬꓲ ꓪ ꓠꓬꓲꓽ ꓣꓳ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓟ. ꓟꓲ ꓮ ꓟꓬ, ꓚꓺ ꓖꓶ ꓢꓲ ꓠꓬꓲ ꓢꓲꓺ ꓒ ꓐꓱ ꓶ ꓢꓯꓼ ꓟꓬ, ꓖꓶ ꓗꓷ ꓢꓴ ꓐꓴ ꓥ ꓡꓳ꓿ ꓝꓲ ꓓꓴ ꓐꓴ ꓠꓬꓲꓽ ꓣꓳ ꓠꓬ ꓫ. ꓓꓴ ꓮ ꓟꓬ, ꓙꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓖꓶ ꓟ ꓙꓵꓻ ꓠꓲ, ꓗꓪ ꓐꓰ ꓫ. ꓓꓴ ꓔꓯ ꓧꓪ. ꓡꓰ ꓢꓴ ꓐꓴ ꓥ ꓡꓳ꓿
ꓝꓲ ꓓꓴ ꓒꓲ‐ꓕꓱ ꓔꓯ ꓣꓳ‐ꓟ ꓟꓯꓼ ꓐꓴ ꓡꓰ ꓕꓳ ꓦꓲꓻ ꓐꓱ ꓓꓵ ꓗꓪ ꓐꓱ ꓗꓷ ꓟ ꓙꓵ, ꓕꓯ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓙꓳ ꓡꓰ ꓥ ꓟꓲ ꓪꓴ‐ꓢ ꓡꓰ ꓬꓲ ꓔꓯ ꓬꓰ ꓙ ꓟ ꓪꓴ. ꓠꓬꓲ ꓣꓳ‐ꓟ ꓟꓯꓼ ꓐꓴ ꓡꓰ ꓐꓯ ꓔ ꓟ ꓕꓳ ꓦꓲꓻ ꓗꓪ ꓐꓰ ꓡꓲ. ꓡ ꓟ ꓥ ꓡꓳ꓿ ꓝꓲ ꓓꓴ ꓕꓳ ꓶ 12ꓽ1‐11 ꓝꓲ ꓗꓪ ꓡꓳ. ꓟꓳ ꓓ ꓟ ꓥ ꓡꓳ꓿ ꓝꓲ ꓓꓴ ꓒꓳ‐ꓡꓳ ꓥ ꓟꓲ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳ ꓚꓺ ꓟ ꓙꓵ, ꓕꓯ ꓫ. ꓓꓴ ꓟꓷ ꓓꓴ ꓮ ꓟꓬ, ꓙꓳ ꓥ ꓟ ꓢꓲꓺ ꓒ ꓔꓯ ꓙꓵꓻ ꓟ ꓠꓵꓻ ꓠꓲ, ꓗꓪ ꓐꓰ ꓬꓲ ꓠꓬ ꓮ ꓟꓬ, ꓢꓯꓼ ꓕꓵꓼ ꓗꓷꓳ꓿
ꓕꓱ ꓟ ꓔꓯ ꓡꓳ. ꓠꓬꓲ ꓕꓯ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓟ ꓙꓵ, ꓕꓯ ꓝꓲ ꓓꓴ ꓒꓳ‐ꓡꓳ ꓐꓰ ꓝꓲ ꓓꓴ ꓒꓲ‐ꓕꓱ ꓔꓯ ꓔꓯꓺ ꓢꓳꓻ ꓢꓲ ꓠꓬꓲ ꓮ ꓟꓶ ꓡꓰ ꓟꓽ ꓐꓬ ꓡꓰ ꓙꓵꓻ ꓠꓲ, ꓔꓯ ꓪꓳꓽ ꓔ ꓢꓲ ꓠꓬꓲ ꓢꓯ. ꓔꓬ ꓡꓯ꓿ ꓮ ꓟꓶ ꓟ ꓙꓵ, ꓪ ꓗꓴꓷꓼ ꓫꓵꓽ ꓪꓴꓽ ꓟꓴ ꓗꓪ ꓓꓵ ꓓꓵ ꓗꓪ ꓢꓰꓼ ꓡꓯꓽ ꓘꓳ, ꓓꓴ ꓫꓵꓽ ꓪꓴꓽ ꓒꓬꓱꓼ ꓔꓬ ꓟ ꓙꓵ, ꓕꓯ ꓠꓲ, ꓫ. ꓟꓬꓽ ꓫ. ꓓꓴ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓝꓲ ꓓꓴ ꓐꓴ ꓮ ꓡꓰ ꓢꓯ. ꓔꓬ ꓗꓷ ꓟ ꓔꓯ ꓢꓯꓼ ꓪ ꓣꓴ ꓢꓲ ꓠꓬꓲ ꓞꓳ ꓙꓳ ꓡꓯ꓿
ꓝꓲ ꓓꓴ ꓒꓳ‐ꓡꓳ ꓡꓰ ꓐꓰ ꓫ. ꓓꓴ ꓟꓷ ꓓꓴ ꓠꓲ, ꓫ. ꓟꓬꓽ ꓫ. ꓓꓴ꓾ ꓟꓽ ꓓꓵ ꓙ ꓔ ꓟ ꓫꓵꓽ ꓪꓴꓽ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓞꓳ ꓫꓱ, ꓠꓬ ꓧꓪ. ꓡꓰ ꓓꓴ ꓔꓯ ꓣꓳ ꓘꓳ, ꓣꓴ ꓟꓶ ꓓꓴ ꓥꓳ꓿ ꓢꓲꓺ ꓒ ꓠꓵꓻ ꓠꓲ, ꓗꓪ ꓐꓰ ꓮ ꓙꓵꓽ ꓔꓯ ꓧꓪ. ꓡꓰ ꓓꓴ ꓥꓳ꓿ ꓝꓲ ꓓꓴ ꓐꓴ ꓔꓯ ꓟ. ꓖꓶ ꓔ ꓟ ꓔꓯ ꓛꓳꓽ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓙꓵꓽ ꓪ ꓖꓶ ꓔ ꓟ ꓟꓴ ꓗꓪ ꓗꓴꓷꓼ ꓜꓳ ꓜꓴ ꓝꓮꓲ ꓟꓲ ꓠꓯ ꓗꓪ ꓟꓲ ꓠꓯ ꓗꓪ ꓠꓴ ꓡꓰ ꓮ ꓫꓵꓽ ꓞꓳ, ꓔ ꓠꓬ ꓟꓴ ꓗꓪ ꓗꓪˍ ꓟꓲ ꓞꓳ, ꓔ ꓥꓳ꓿ ꓟꓲ ꓠꓯ ꓗꓪ ꓠꓴ ꓡꓰ ꓮ ꓫꓵꓽ ꓩꓴ ꓗꓷ ꓠꓬ ꓟꓴ ꓗꓪ ꓗꓪˍ ꓟꓲ ꓩꓴ ꓗꓷ ꓥꓳ ꓐꓰ ꓐꓯ ꓔ ꓟ ꓐꓯ ꓘꓶꓽ ꓔꓯ ꓓꓵ ꓙ ꓢꓲ ꓠꓬꓲ ꓢꓲꓺ ꓒ ꓗ. ꓠꓯ ꓛꓳꓽ ꓫꓱ, ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿
