ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓾ ꓬꓲ ꓒꓵꓽ ꓶ ꓙꓳˍ ꓟ ꓗꓪ ꓬꓲ ꓠꓲ, ꓟ ꓠꓬ ꓙꓳˍ ꓡꓳ꓾ ꓐꓰ ꓐꓯ ꓔ ꓟ ꓙꓳˍ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓒꓵꓽ ꓶ ꓮ ꓡꓲ ꓗꓪ ꓙꓳˍ ꓠꓬ ꓣꓳ ꓠꓲ, ꓟ ꓠꓬ ꓖꓳ ꓗꓪ ꓥꓳꓺ ꓓ, ꓥꓳ꓿ ꓮ ꓕꓯ ꓥ ꓟꓲ ꓖꓳ ꓟ ꓔꓯ ꓡꓰꓽ ꓣꓳ ꓓꓵꓽ ꓙˍ ꓥꓳ꓿ ꓮ ꓗꓪ ꓥˍ ꓟꓲ ꓖꓳ ꓟ ꓔꓯ ꓡꓰꓽ ꓣꓳ ꓧꓪ.ˍ ꓥꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓔꓱ,ˍ ꓟ ꓐꓯ ꓘꓶꓽ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓠꓬ ꓙꓲꓻ ꓫꓬ ꓢꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓑꓮꓲꓽ ꓔꓯ ꓣꓳꓽ ꓬꓰ ꓔꓬ ꓡꓳ꓿ ꓣꓳ ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓒꓲ‐ꓕꓱ ꓐꓰ ꓒꓳ‐ꓡꓳ ꓠꓬ ꓣꓳ ꓘꓴ ꓜꓲꓼ ꓞꓳ ꓕꓱ ꓟ ꓔꓶ ꓒꓬꓱꓼ ꓡˍ ꓟ꓾ ꓘꓴ ꓜꓲꓼ ꓞꓳ ꓠꓯꓸꓼ ꓗꓪ ꓢꓯꓼ ꓪꓽ ꓠꓬꓲ ꓠ, ꓟ ꓟꓬꓽ ꓠꓬꓲ ꓐꓷ, ꓠꓬꓲ ꓢꓯꓼ ꓕꓵꓼ ꓢꓴ ꓠꓬ ꓬꓲ ꓪ ꓠꓬꓲꓽ ꓣꓳ ꓥ ꓡꓳ꓿
ꓙꓲꓻ ꓫꓬ ꓢꓴ ꓒꓲ‐ꓕꓱ ꓐꓰ ꓒꓳ‐ꓡꓳ ꓑꓮꓲꓽ ꓔꓯ ꓬꓰˍ ꓟ ꓗꓪ ꓐꓰ ꓣꓳ ꓔꓯ ꓮ ꓫꓵꓽ ꓐꓯ ꓟꓳ. ꓖꓶ ꓡ ꓔꓬ ꓡ꓿ ꓬꓲ ꓪꓴ. ꓕꓲꓽ ꓫꓵꓽ ꓟ ꓠꓬ꓾ ꓬꓲ ꓪ ꓠꓬꓲꓽ ꓣꓳ ꓠꓬ ꓬꓲ ꓪ ꓕꓲꓽ ꓤꓶꓻ ꓡꓱꓸꓼ ꓔꓯ ꓢꓲ ꓒ ꓬꓰ‐ꓢꓴ ꓔꓯ ꓖꓶ ꓗꓷˍ ꓡꓳ ꓐꓯ ꓟ ꓣꓳ ꓔꓯ ꓢꓷ. ꓡꓰ ꓝꓲ ꓢꓲ ꓠꓬꓲ ꓬꓲ ꓪ ꓔꓯ ꓔꓯꓺ ꓢꓳ ꓓꓴ ꓬꓰ ꓠ, ꓟ ꓐꓱ ꓶ꓾ ꓙꓲꓻ ꓫꓬ ꓢꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓑꓮꓲꓽ ꓔꓯ ꓬꓰ ꓔꓬ ꓟ ꓥ ꓡꓳ꓿
ꓒꓲ‐ꓕꓱ ꓤꓶꓻ ꓔꓯ ꓣꓳ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓥꓪ. ꓓꓳꓽ ꓜꓽ ꓒꓽ ꓕꓲ ꓣꓳ ꓥ ꓡꓳ꓿ ꓮ ꓕꓯ ꓥ ꓟꓲ ꓮ ꓗꓪ ꓥ ꓟꓲ ꓬꓲ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓖꓳ ꓡꓱ ꓥꓪ. ꓓꓳꓽ ꓢꓲ ꓠꓬꓲ ꓢꓯꓼ ꓟꓬ ꓗꓳ. ꓔꓬ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓕꓲ ꓠꓬꓲ ꓙꓳˍ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓘꓴ ꓢꓲ ꓠꓬꓲ꓾ ꓠꓴ ꓔꓯ ꓠꓬ ꓮ ꓟꓶ ꓗꓪ ꓚꓳ. ꓡ ꓞꓳ ꓔꓯ ꓓꓳꓽ ꓢꓴ ꓒꓬꓱꓼ ꓬꓰ ꓝꓲˍ ꓥꓳ꓾ ꓐꓰ ꓐꓯ ꓢꓲ ꓠꓬꓲ ꓬꓲ ꓔꓯ ꓘꓴ ꓗꓷꓳ꓿ ꓖꓳ ꓗꓪ ꓚꓳ. ꓬꓲ ꓠꓬ ꓬꓲ ꓔꓯ ꓙꓳˍ ꓟ ꓮ ꓙꓵꓽ꓾ ꓬꓲ ꓔꓯ ꓙꓳˍ ꓟ ꓦꓲ ꓢꓲ ꓟ꓾ ꓤ ꓫꓵ. ꓤ ꓠꓱ꓾ ꓬꓲ ꓟꓬꓱꓽ ꓮ ꓙꓵꓽ ꓔꓯ ꓡꓳ ꓔꓲ. ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓖꓼ ꓛꓳ ꓙꓰꓳ꓿ ꓕꓲ ꓤꓶꓻ ꓡꓱꓸꓼ ꓢꓲ ꓒ ꓬꓰ‐ꓢꓴ ꓗ ꓠꓯ. ꓬꓲ ꓛꓳ ꓙꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ꓿ ꓬꓲ ꓟꓶꓽ ꓕꓯ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓡꓯꓼ ꓐꓳ ꓔꓶ. ꓓꓴ ꓔꓯ ꓟ. ꓡꓰꓽ ꓟꓰ, ꓐꓰ ꓢꓲ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ꓿ ꓬꓲ ꓕꓱ ꓡꓱ ꓥꓪ. ꓓꓳꓽ ꓒ ꓗꓪ ꓐꓰ ꓢꓯꓼ ꓟꓬ ꓔꓯ ꓬꓲ ꓒꓵꓽ ꓶ ꓥ ꓟ ꓚꓵ ꓚꓵ ꓢꓲ ꓒ ꓔꓯ ꓬꓲ ꓢꓷ. ꓡꓰ ꓠꓬꓲ ꓬꓲ ꓠꓬ ꓬꓲ ꓢꓯꓼ ꓟꓬ ꓕꓲ ꓟ ꓡꓱꓸꓼ ꓢꓲ ꓒ ꓔꓯ ꓖꓶ ꓗꓷꓳ꓿ ꓣꓳ ꓐꓱ ꓶ ꓔꓯꓺ ꓢꓳ ꓓꓴ ꓕꓲꓽ ꓟ ꓥ ꓡꓳ꓿
ꓝꓮꓲ ꓕꓲ ꓫꓵꓽ ꓟ ꓠꓬ ꓙꓲꓻ ꓫꓬ ꓢꓴ ꓒꓳ‐ꓡꓳ ꓤꓶꓻ ꓔꓯ ꓣꓳ ꓡꓳ. ꓠꓬꓲˍ ꓥ ꓟꓲ ꓬꓲ ꓠꓬ꓾ ꓒ ꓪꓴ. ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓤ, ꓠꓬꓲ ꓢꓴ꓾ ꓢꓲ ꓒ ꓬꓰ‐ꓢꓴ ꓔꓯ ꓘꓶꓻ ꓙꓵ ꓢꓴ꓾ ꓢꓲ ꓒ ꓬꓰ‐ꓢꓴ ꓗ ꓠꓯ. ꓢꓲ ꓖꓼ ꓢꓴ ꓮ ꓙꓵꓽ ꓔꓯ ꓐꓱ ꓓꓴꓽ ꓗꓪ ꓧꓳꓽ ꓢꓴ꓾ ꓘꓶꓻ ꓙꓵ ꓒꓽ ꓕꓲ ꓣꓳ ꓥ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓬꓲ ꓔꓯ ꓘꓴ ꓢꓲ ꓠꓬꓲ ꓮ. ꓟꓴꓽ ꓗꓪ ꓐꓰ ꓞꓰꓻ ꓝꓲ ꓢꓲ ꓬꓲ ꓔꓯ ꓦꓻ ꓐꓬꓱꓽ ꓟꓳ. ꓖꓶ ꓗꓷ ꓢꓲ ꓠꓬꓲ ꓬꓲ ꓔꓯ ꓢꓲꓺ ꓗꓷˍ ꓟ ꓗꓪ ꓐꓰ ꓬꓲ ꓠꓬ ꓚꓵ ꓚꓵ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓗꓷ ꓢꓲ ꓠꓬꓲ ꓙꓵꓻ ꓠꓲ, ꓕꓱ ꓟ ꓐꓱ ꓶ ꓬꓲ ꓠꓬ ꓢꓯꓼ ꓟꓬ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓡꓰ ꓕꓱ ꓡꓰ ꓐꓯ ꓔ ꓟ ꓙꓳˍ ꓡꓳ꓿ ꓥꓪ ꓠꓬ ꓟꓽ ꓒꓵꓽ ꓥ ꓟꓲ ꓢꓲ ꓒ ꓥꓪ ꓔꓯ ꓢꓲ ꓗꓷꓳ꓿ ꓥꓪ ꓠꓬ ꓝꓲ ꓓꓴ ꓐꓴ ꓘꓴꓽ ꓠꓯꓸꓼ ꓗꓪ ꓣꓳ ꓓꓰ ꓡꓰˍ ꓟ ꓝꓲ ꓓꓴ ꓕꓲꓽ ꓣꓳ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓥꓪ ꓢꓲ ꓒ ꓠꓬ ꓥꓪ ꓔꓯ ꓢꓲ ꓔ ꓟ ꓑꓶ. ꓓꓴ ꓥꓪ ꓠꓬ ꓮ ꓫꓵꓽˍ ꓟꓲ ꓬꓰ ꓐ ꓡˍ ꓡꓳ ꓐꓰ ꓐꓯ ꓔ ꓡꓳ꓿
ꓥ ꓡꓳ꓾ ꓬꓲ ꓕꓳꓽ ꓶ ꓐꓳ ꓔ ꓟˍ ꓟꓲ ꓮ ꓟꓬ, ꓙꓳˍ ꓡꓳ꓿ ꓟ. ꓟꓲꓽ ꓐꓳ ꓔ ꓟ ꓥˍ ꓟꓲ ꓮ ꓟꓬ, ꓙꓳˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓬꓲ ꓠꓬ ꓪꓴ‐ꓢ ꓟꓬꓱꓽ ꓬꓰˍ ꓟ ꓢꓲ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓕꓵꓼˍ ꓟ ꓠꓬ ꓪꓴꓽ ꓧꓶ ꓟꓽ ꓗꓴ. ꓗꓴ. ꓢꓯꓼ ꓐꓽ ꓟꓽ ꓗꓴ. ꓗꓴ. ꓕꓱ ꓡꓱ ꓢꓯꓼ ꓕꓵꓼ ꓗꓳ. ꓡˍ ꓡꓳ꓿ ꓟꓬꓽ ꓠꓬꓲ ꓬꓲ ꓠꓬ ꓬꓴ‐ꓔ ꓡ ꓞꓳ ꓟꓽ ꓥ ꓢꓴ ꓐꓱ ꓶ꓾ ꓘꓴ ꓜꓲꓼ ꓞꓳ ꓐꓱ ꓶ ꓬꓲ ꓠꓬ ꓢꓯꓼ ꓕꓵꓼ ꓗꓳ. ꓙꓰˍ ꓡꓳ꓿ ꓖꓳ ꓡꓱ ꓠꓬꓲ ꓬꓴ‐ꓔ ꓡ ꓞꓳ ꓟꓽ ꓥ ꓢꓴ ꓮ ꓟꓬ, ꓠꓬ ꓙꓵꓻ ꓠꓲ, ꓔꓯ ꓟꓶ ꓡꓰ ꓢꓲ ꓠꓬꓲ ꓪꓴ‐ꓢ ꓟꓬꓱ ꓓꓳꓽ ꓓꓳ ꓡꓺꓳ꓿ ꓬꓲ ꓟꓶꓽ ꓕꓯ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓘꓶꓻ ꓠꓬꓲ ꓙꓵ ꓠꓬꓲ ꓕꓱ ꓡꓱ ꓫꓵꓽ ꓔꓳ, ꓜꓳꓽˍ ꓟ ꓡꓰꓽ ꓟꓽ ꓞꓲꓺ꓾ ꓡꓳ, ꓬꓰˍ ꓕꓯ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓱ ꓶ ꓪꓴ. ꓓꓵ ꓓꓶꓻ ꓘꓽ ꓗꓷˍ ꓗꓪ ꓛꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓠꓲ, ꓠꓵ ꓢꓲ ꓠꓬꓲ ꓬꓲ ꓒꓵꓽ ꓶ ꓔꓯ ꓬꓲ ꓧꓪ ꓟꓶ ꓡꓰꓳ꓿
ꓙꓲꓻ ꓫꓬ ꓢꓴ ꓒꓲ‐ꓕꓱ ꓐꓰ ꓙꓲꓻ ꓫꓬ ꓢꓴ ꓒꓳ‐ꓡꓳ ꓑꓮꓲꓽ ꓬꓰˍ ꓟ ꓬꓲ ꓪꓴ. ꓕꓲ ꓫꓵꓽ ꓟ ꓠꓬ ꓬꓲ ꓪ ꓮ ꓡꓲ ꓐꓰ ꓒꓵꓽ ꓶ ꓔꓯ ꓧꓪ ꓟꓶ ꓡꓰ ꓢꓲ ꓠꓬꓲ ꓬꓲ ꓪ ꓢꓴ ꓔꓯ ꓖꓶ ꓗꓷˍ ꓡꓳ ꓐꓯ ꓟ ꓣꓳ ꓔꓯꓺ ꓢꓳ ꓓꓴ ꓥ ꓡꓳ꓿ ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓠꓬ ꓚꓵ ꓚꓵ ꓙꓳˍ ꓡꓳ ꓐꓯ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓟ ꓥ ꓡꓳ꓿ ꓚꓵ ꓚꓵ ꓪꓴ‐ꓢ ꓐꓯ ꓘꓶꓽ ꓠ ꓠ, ꓢꓲ ꓠꓬꓲ ꓢꓯꓼ ꓕꓵꓼ ꓢꓴ꓾ ꓚꓵ ꓚꓵ ꓒꓵꓽ ꓶ ꓥ ꓟ ꓢꓲ ꓒ ꓬꓰ‐ꓢꓴ ꓔꓯ ꓕꓲꓽ ꓠꓬꓲ ꓕꓲꓽ ꓠꓬꓲ ꓣꓳ ꓮ ꓫꓵꓽ ꓬꓰˍ ꓥ ꓟꓲ ꓬꓲ ꓔꓯ ꓟꓽ ꓟꓶ ꓬꓰ꓾ ꓟꓽ ꓐꓬ ꓡꓰ ꓟꓽ ꓛꓵꓽ ꓡꓰ ꓝꓲ ꓐꓰ ꓙꓵꓻ ꓠꓲ, ꓕꓱ ꓟ ꓔꓯ ꓪꓳ ꓫꓳ. ꓔ ꓢꓲ ꓠꓬꓲ ꓣꓳ ꓬꓲ ꓟꓬꓱꓽ ꓐꓬꓱꓽ ꓘꓶꓽ ꓔꓯ ꓢꓯꓼ ꓕꓵꓼˍ ꓥꓳ ꓐꓯ ꓠꓬ ꓕꓲꓽ ꓠꓬꓲ ꓙꓳˍ ꓠꓬ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓘꓳ ꓣꓴ ꓟꓶˍ ꓥꓳ ꓐꓯ ꓟ ꓣꓳ ꓔꓯ ꓟꓳ. ꓖꓶ ꓡ ꓔꓬ ꓡꓳ꓿
ꓬꓲ ꓪ ꓠꓬꓲꓽ ꓫꓵ. ꓔꓯꓺ ꓥꓳꓽ ꓔꓯ ꓡꓳ. ꓢꓲ ꓠꓬꓲ ꓟꓴꓽ ꓗꓪ ꓗꓴꓷꓼ ꓠꓬ ꓚꓵ ꓚꓵ ꓙꓳˍ ꓡꓳ꓾ ꓟꓴꓽ ꓗꓪ ꓗꓴꓷꓼ ꓐꓯ ꓟ ꓠꓬ ꓮꓽ ꓔꓳ ꓟꓽ ꓥ ꓐꓯ ꓟ ꓣꓳꓽ ꓔꓯ ꓢꓷ. ꓡꓰ ꓝꓲˍ ꓡꓳ꓿ ꓝꓮꓲ ꓞꓳ ꓤ ꓗꓪ ꓐꓰ ꓪꓴ‐ꓢ ꓟꓬꓱ ꓓꓳꓽ ꓓꓳ ꓡˍ ꓡꓳ ꓐꓯ ꓟ ꓣꓳ ꓔꓯ ꓠ ꓠ, ꓗꓴ. ꓡꓰ ꓝꓲˍ ꓡꓳ꓿ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓣꓳ ꓛꓳꓻ ꓫꓱꓽˍ ꓟ꓾ ꓣꓳ ꓫ. ꓕꓱˍ ꓟ꓾ ꓣꓱꓽ ꓬꓰˍ ꓟ ꓮ ꓙꓵꓽ ꓠꓬ ꓪꓴ‐ꓢ ꓟꓲꓽ ꓙꓬ ꓞꓳ ꓤ ꓟꓲꓽ ꓙꓬ ꓗꓪ ꓜꓳꓽ ꓜꓳꓽ ꓞꓳ ꓙꓳˍ ꓕꓯ ꓣꓳ ꓠꓬ ꓕꓲꓽ ꓠꓬꓲ ꓙꓳˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰˍ ꓥꓳ ꓐꓯ ꓟ ꓣꓳ ꓔꓯ ꓪꓴ‐ꓢ ꓡꓰ ꓕꓵꓼ ꓪ ꓖꓶ ꓡˍ ꓟ ꓠꓬ ꓚꓵ ꓚꓵ ꓔꓱ, ꓜꓳꓽˍ ꓡꓳ ꓐꓯ ꓟ ꓣꓳꓽ ꓔꓯ ꓢꓷ. ꓡꓰ ꓝꓲˍ ꓡꓳ꓿
ꓢ ꓫꓵꓽ ꓕꓲꓽ ꓫꓵꓽ ꓟ ꓠꓬ ꓑꓮꓲꓽ ꓕꓱ ꓟ ꓔꓯ ꓬꓰˍ ꓟ ꓗꓪ ꓐꓰ ꓣꓳ ꓥˍ ꓟꓲ ꓣꓳ ꓒꓵꓽ ꓶ ꓕꓱ ꓟ ꓔꓯ ꓣꓳꓽ ꓢꓷ. ꓡꓰ ꓗ ꓠꓯ. ꓣꓳ ꓥ ꓟꓲ ꓠꓱ. ꓐꓯ ꓢꓴ ꓔꓯ ꓐꓯ ꓖꓶ ꓠ, ꓟ ꓶꓻ ꓙꓳˍ ꓡ ꓳ ꓐꓯˍ ꓟ ꓣꓳ ꓔꓯ ꓢꓷ. ꓡꓰ ꓝꓲˍ ꓡꓳ꓿ ꓣꓳꓽ ꓮ ꓙꓵꓽ ꓠꓬ ꓖꓳ ꓓꓱꓽ ꓔꓲ, ꓟꓶ ꓗꓷ ꓗ ꓠꓯ. ꓪꓴ‐ꓢ ꓟꓬꓱꓽ ꓟꓯꓻ ꓢꓴˍ ꓡꓰꓽ ꓥ ꓡꓳ꓿ ꓣꓳ ꓚꓲ. ꓛꓬ ꓟꓶ ꓔ ꓟ ꓒꓵꓽ ꓶ ꓕꓱ ꓟ ꓠꓱ. ꓐꓯ ꓢꓴ ꓔꓯ ꓟꓳ. ꓖꓶ ꓠ, ꓟ꓾ ꓠꓱ. ꓐꓯ ꓢꓴ ꓔꓯ ꓚ ꓟꓳ. ꓖꓶ ꓠ,ꓟ꓾ ꓪꓴ‐ꓢ ꓠꓬ ꓮ ꓡꓲ ꓘꓶ ꓛꓲ ꓪꓽ ꓠꓬꓲˍ ꓟ꓾ ꓮ ꓡꓲ ꓘꓶ ꓛꓲ ꓙꓲˍ ꓟ꓾ ꓮ ꓡꓲ ꓘꓶ ꓛꓲ ꓣꓳ ꓔꓯ ꓠꓬꓲ ꓙ ꓡꓳ. ꓙ ꓖꓶˍ ꓟ꓾ ꓮ ꓡꓲ ꓘꓶ ꓛꓲ ꓣꓳ ꓔꓯ ꓚꓬꓴ. ꓓꓳ ꓖꓶˍ ꓟ ꓔꓯ ꓠꓱ. ꓐꓯ ꓢꓴ ꓔꓯ ꓐꓯ ꓟꓳ. ꓖꓶ ꓠ, ꓟ ꓶꓻ ꓙꓳˍ ꓡꓳ꓿
ꓑꓮꓲꓽ ꓕꓱ ꓟ ꓬꓰˍ ꓟ ꓗꓪ ꓐꓰ ꓒꓲ‐ꓕꓱˍ ꓐꓰ ꓒꓳ‐ꓡꓳ ꓡꓰ ꓐꓰ ꓣꓳ ꓠꓬ ꓠꓱ. ꓐꓯ ꓢꓴ ꓔꓯ ꓐꓯ ꓟꓳ. ꓖꓶ ꓩꓴ ꓡˍ ꓟ ꓟꓲꓢꓢꓲꓳꓠꓮꓣꓬ ꓐꓰ ꓐꓯˍ ꓟ ꓣꓳ ꓮ ꓙꓵꓽ ꓢꓴ ꓠꓬ ꓪꓴ‐ꓢ ꓟꓬꓱꓽ ꓟꓯꓻ ꓢꓴˍ ꓡꓰꓽ ꓥ ꓡꓳ ꓐꓯ ꓟ ꓢꓷ. ꓠ, ꓟ ꓐꓱ ꓶ ꓣꓳꓽ ꓑꓮꓲꓽ ꓕꓱ ꓟ ꓔꓯ ꓬꓰ ꓔꓬ ꓟ ꓥ ꓡꓳ꓿ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲꓻ ꓫꓬ ꓢꓴ ꓒꓳ‐ꓡꓳ ꓐꓰ ꓒꓲ‐ꓕꓱ ꓑꓮꓲꓽ ꓗꓪ ꓬꓲ ꓪ ꓪꓽ ꓘꓴ ꓙ ꓖꓶˍ ꓟ ꓔꓯ ꓣꓳ ꓘꓳ ꓣꓴ ꓢꓲ ꓠꓬꓲ ꓣꓳ ꓠꓬ ꓣꓳ ꓒꓵꓽ ꓶ ꓠꓬ ꓢꓲ ꓒ ꓬꓰ‐ꓢꓴ ꓥ ꓡꓳ ꓐꓯ ꓟ ꓔꓯ ꓓꓵꓽ ꓙ ꓢꓲ ꓠꓬꓲ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙˍ ꓟ ꓦꓬꓼ ꓠꓬꓲ ꓗꓪ ꓣꓳ ꓒꓵꓽ ꓶ ꓔꓯ ꓡꓰꓽ ꓥꓳ ꓡꓳ. ꓢꓲ ꓠꓬꓲ ꓢꓯꓼ ꓕꓵꓼ ꓙꓰ ꓡꓯ꓿
