ꓘꓴ ꓜꓲꓼ ꓞꓳ ꓐꓯ_ ꓟ ꓠꓬ ꓮ ꓟꓬꓹ ꓗꓪ ꓐꓰ ꓢꓲꓺ ꓓꓳ ꓡ ꓟ ꓬꓲ ꓜꓴ ꓮ ꓟꓬꓹ ꓗꓪ ꓐꓰ ꓣꓴ ꓓꓳ ꓡ ꓟ ꓕꓱ ꓡꓱ ꓬꓲ ꓬꓲ ꓢꓷ ꓙꓳ_ ꓡꓳ꓾ ꓮ ꓡꓰ ꓐꓰ ꓥ ꓡ꓾ ꓔꓯ ꓥꓳꓽ ꓐꓯ ꓠꓬ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓫꓵ ꓞꓳ ꓙꓰ ꓮ ꓟꓬꓹ ꓔꓬ ꓡꓳ꓾ ꓟꓽ ꓪ ꓡꓯ ꓘꓳ ꓟ ꓔꓬ ꓔꓶꓸ꓾ ꓟꓽ ꓪ ꓡꓯ ꓘꓳ ꓟ ꓥꓳꓽ ꓫꓵ ꓥꓳꓽ ꓙꓰ ꓕꓱ ꓡꓱ ꓗꓪ ꓐꓰ ꓘꓴ ꓔ ꓟ ꓔꓯ ꓟꓶ ꓢꓴ ꓐꓰ ꓥ ꓡꓳ= ꓖꓳ ꓡꓱ ꓠꓬꓲ ꓕꓲ ꓚꓱꓹ ꓐꓯ ꓠꓬ ꓪꓴ-ꓢ ꓬꓲ ꓘꓴ ꓜꓲꓼ ꓞꓳ ꓐꓰ ꓐꓯ ꓕꓯ ꓠꓱꓸ ꓐꓯꓼ ꓡ ꓞꓳ ꓐꓰ ꓟꓽ ꓫꓱꓹ ꓟ꓾ ꓠꓱꓸ ꓐꓯꓼ ꓡ ꓞꓳ ꓐꓰ ꓟꓽ ꓪ ꓟ꓾ ꓠꓱꓸ ꓐꓯꓼ ꓡ ꓞꓳ ꓘꓴꓽ ꓠꓯꓼ ꓗꓪ ꓐꓰ ꓢꓲꓺ ꓓꓳ ꓡ ꓟ꓾ ꓞꓳ ꓤ ꓞꓳ ꓜꓴ ꓐꓰ ꓥ ꓡꓳ= ꓖꓳ ꓡꓱ ꓠꓬꓲ ꓘꓴ ꓜꓲꓼ ꓞꓳ ꓐꓰ ꓣꓳ ꓐꓯ ꓕꓯ ꓬꓲ ꓟꓸ ꓢꓶꓽ ꓕꓱ ꓟ ꓔꓯ ꓬꓲ ꓚꓰ ꓖꓼ ꓕꓯ ꓕꓱ ꓡꓱ ꓐꓰ ꓥ ꓡꓳ=
ꓖꓳ ꓡꓱ ꓠꓬꓲ ꓘꓴ ꓜꓲꓼ ꓞꓳ ꓕꓱ ꓟ ꓠꓬ ꓮ ꓡꓰ ꓗꓪ ꓐꓰ ꓓꓳ ꓡ ꓡ꓾ꓕꓱ ꓟ ꓔꓯ ꓣꓳ ꓡꓳꓸ ꓠꓬꓲ ꓕꓯ ꓚꓚꓚ ꓐꓯ_ ꓟ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓪꓴ-ꓢ ꓐꓯ ꓘꓶꓽ ꓟꓸ ꓖꓶ_ ꓟ ꓚꓱꓹ ꓗꓪ ꓕꓱ ꓡꓱ ꓐꓯ ꓔ ꓡꓳ= ꓮꓽ ꓠꓱ ꓕꓯ ꓐꓹ ꓐ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓐꓰ ꓬꓲꓸ ꓔꓶꓻ ꓙꓱꓼ ꓙꓳ_ ꓟ ꓠꓬ ꓘꓴ ꓜꓲꓼ ꓞꓳ ꓕꓱ ꓟ ꓥꓳ꓾ ꓐꓰ ꓐꓳ ꓔ ꓡꓳ= ꓮ ꓫꓵ ꓑꓶ ꓓꓴ ꓥ ꓡ꓾ ꓪꓴ-ꓢ ꓠꓬ ꓞꓳ ꓤ ꓔꓯ ꓚꓰꓼ ꓕꓯ ꓬꓲ ꓠꓬ ꓬꓲ ꓐꓰ ꓕꓲ ꓡꓲꓹ ꓔꓬ ꓠꓹ ꓟ꓾ ꓬꓲ ꓣꓱ ꓛꓰ ꓔꓯ ꓒꓯꓹ ꓟꓶ ꓠꓹ ꓟ꓾ ꓬꓲ ꓙꓵ_ ꓟ ꓔꓯ ꓘꓳꓹ ꓣꓴ ꓠꓹ ꓟ꓾ ꓬꓲ ꓠꓬ ꓚꓰꓼ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓞꓳ ꓤ ꓠꓬ ꓝꓴꓲ ꓬꓰ ꓗꓷ ꓗꓸ ꓠꓯꓸ ꓛꓬꓼ ꓟꓵꓽ ꓗꓪ ꓙꓰ ꓠꓹ ꓟ ꓗꓷ ꓡꓰꓳ꓾ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓲꓹ ꓟ ꓘꓴꓽ ꓠꓯꓼ ꓗꓪ ꓕꓲ ꓠꓬꓲ ꓙꓳ ꓠꓬ ꓬꓲ ꓪ ꓔꓯ ꓥꓪ ꓚꓬꓴ_ ꓥꓳ= ꓕꓲ ꓠꓬꓲ ꓙꓳ ꓠꓬ ꓬꓲ ꓪ ꓔꓯ ꓥꓪ ꓔꓬ ꓗꓪ ꓧꓳꓽ ꓔꓯꓹ ꓡ ꓥꓳ꓾ ꓐꓰ ꓬꓲ ꓠꓲꓹ ꓟ ꓠꓯꓼ ꓗꓪ ꓕꓱ ꓡꓱ ꓐꓰ ꓙꓳ_ ꓡꓳ=
ꓬꓲ ꓚꓰ ꓬꓲ ꓪꓴ ꓕꓳ ꓶ ꓗꓪ ꓬꓲ ꓠꓬ ꓪꓵꓼ ꓘꓶꓽ ꓖꓶ ꓔ ꓡꓳ= ꓚꓬꓴ ꓢꓲ ꓒꓽ ꓕꓲ ꓣꓳ ꓛꓲ ꓡ ꓥꓳ꓾ ꓐꓯ_ ꓟ ꓪꓵꓼ ꓘꓶꓽ ꓖꓶ ꓔ ꓡꓳ= ꓘꓶꓽ ꓫꓵꓼ ꓡꓵ ꓦꓬꓼ ꓠꓬꓲ ꓗꓪ ꓪꓴ-ꓢ ꓠꓬ ꓬꓲ ꓘꓴ ꓜꓲꓼ ꓞꓳ ꓔꓯ ꓔꓶꓻ ꓠꓹ ꓟ ꓐꓱ ꓶ ꓬꓲ-ꓢꓷ-ꓡꓲ ꓡ ꓞꓳ ꓔꓯ ꓢꓲꓺ ꓢꓲ ꓠꓬꓲ ꓙ ꓖꓶ ꓡꓳ꓾ ꓟꓷ ꓠꓷꓹ ꓝꓸ ꓢꓴ ꓗꓪ ꓐꓰ ꓙ ꓖꓴ ꓟꓳꓸ ꓖꓶ_ ꓡꓳ= ꓬꓲ ꓠꓬ ꓮ ꓡꓰ ꓫꓵ ꓪꓴ-ꓢ ꓥ ꓟ꓾ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒꓽ ꓬꓰ-ꓢꓴ ꓛꓲ ꓡ ꓕꓯ ꓘꓶꓽ ꓫꓵꓼ ꓡꓵ ꓠꓬ ꓐꓲ ꓡꓰ ꓢꓲ ꓠꓬꓲ ꓘꓶꓽ ꓫꓵꓼ ꓫꓵꓼ ꓐꓰ ꓢꓲ ꓒꓽ ꓬꓰ-ꓢꓴ ꓬꓲ ꓫꓬꓹ ꓔꓶ ꓙꓰ_ ꓡꓳ= ꓖꓳ ꓗꓪ ꓐꓰ ꓢꓲ ꓒꓽ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓘꓴꓽ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓔꓶ_ ꓡꓳ= ꓘꓴ ꓜꓲꓼ ꓞꓳ ꓐꓯ_ ꓟ ꓠꓬ ꓮ ꓟꓬꓹ ꓗꓪ ꓐꓰ ꓢꓲ ꓣꓴ ꓔ ꓟ ꓐꓰ ꓐꓯ ꓟ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓠꓱꓸ ꓐꓯꓼ ꓮ ꓟꓬꓹ ꓗꓪ ꓐꓰ ꓢꓲ ꓣꓴ ꓢꓲ ꓠꓬꓲ ꓘꓴ ꓜꓲꓼ ꓞꓳ ꓕꓱ ꓟ ꓔꓯ ꓔꓶ ꓡꓳ꓾ ꓘꓴ ꓜꓲꓼ ꓞꓳ ꓕꓱ ꓟ ꓠꓬ ꓠꓬꓲꓸ ꓠꓬꓲ ꓗꓪ ꓛꓲ ꓕꓷ ꓞꓹ ꓔꓬ ꓡꓳ= ꓘꓴ ꓜꓲꓼ ꓞꓳ ꓐꓰ ꓐꓯ ꓕꓯ ꓢꓲꓺ ꓔ ꓟ ꓟꓶ_ ꓟ ꓐꓰ ꓥ ꓡꓳ=
