ꓢꓲꓽ ꓫꓬ ꓕꓳꓽ ꓶ ꓗꓪ ꓟꓬꓱ ꓓꓳꓽ ꓮ ꓘꓶ. ꓙꓳˍ ꓟ ꓟꓷꓽ ꓠꓷ, ꓝ. ꓢꓴ ꓐꓴ ꓚ ꓟꓲꓽ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓪ ꓠꓬ ꓟ, ꓟ ꓤ ꓘꓶ ꓗꓪ ꓔꓬ ꓕꓯ ꓡꓰ꓾ ꓟ, ꓟ ꓦꓰꓽ ꓛꓲꓽ ꓗꓪ ꓔꓬ ꓕꓯ ꓡꓰ ꓪꓽ ꓠꓬꓲˍ ꓟ ꓟꓬꓱꓽ ꓬꓰ ꓠ, ꓟ ꓐꓱ ꓶ ꓪꓴ‐ꓢ ꓡꓰ ꓧꓶ. ꓕꓯ ꓡꓰ ꓙꓽ ꓖꓶ ꓔ ꓡꓳ꓾ ꓢꓲꓺ ꓔ ꓡꓳ꓾ ꓐꓯˍ ꓟ ꓔꓯ ꓟꓳꓻ ꓪˍ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓡꓴ‐ꓘ 1ꓽ57‐66, 80 ꓗꓪ ꓠꓬ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓦꓵꓻ ꓡˍ ꓟ ꓚꓱ, ꓔꓯ ꓟꓳ ꓪˍ ꓡꓳ꓿
ꓖꓳ ꓓꓱꓽ ꓔꓲ, ꓖꓶ ꓢꓴ ꓬꓳ‐ꓦ ꓔꓯ ꓥ ꓟꓲ ꓪꓴ‐ꓢ ꓠꓬ ꓟꓽ ꓞꓲ ꓟꓽ ꓡꓯ ꓕꓯ ꓡꓰ ꓙꓽ ꓖꓶ ꓔ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓪꓽ ꓠꓬꓲ ꓢꓴ ꓒꓬꓱꓼ ꓡˍ ꓥꓳ꓿ ꓟ, ꓟ ꓤ ꓘꓶꓻ ꓗꓪ ꓔꓬ ꓕꓯ ꓡꓰ ꓬꓲ ꓠꓬ ꓢꓲꓽ ꓫꓬ ꓟ ꓦ ꓡꓰ ꓐꓲ ꓞ, ꓥꓳ꓿
ꓬꓳ‐ꓦ ꓦꓵꓻ ꓡˍ ꓟ ꓬꓲ ꓔꓶ ꓙꓱꓼ ꓠꓬ ꓢꓲ ꓒ ꓙ ꓖꓴ ꓙꓽ ꓖꓶ ꓠ, ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓱ, ꓕ ꓠꓬꓲ ꓠ ꓔ ꓟ꓾ ꓓꓵꓽ ꓙꓽ ꓠꓬꓲ ꓠ ꓔ ꓟ ꓠꓬ ꓪꓴ‐ꓢ ꓠꓬ ꓣꓳ ꓔꓯ ꓙꓲ‐ꓢꓴ ꓢꓲ ꓤ ꓤꓶꓻ ꓗꓪ ꓐꓰ ꓬꓲ ꓔꓯ ꓢꓷ. ꓙ ꓟꓳ ꓙ ꓠ, ꓟ ꓘꓴꓻ ꓔꓬ ꓡꓳ꓿
ꓙꓲ‐ꓢꓴ ꓢꓲ ꓤ ꓕꓲ ꓣꓳ ꓠꓬ ꓮ ꓡꓲ ꓐꓰ ꓢꓷ. ꓙ ꓟꓳ ꓙ ꓠ ꓔ ꓡ꓿ ꓬꓳ‐ꓦ ꓬꓲ ꓤꓶꓻ ꓠꓬ ꓙꓽ ꓣꓳ ꓠꓲ, ꓒ ꓐꓲ ꓐꓰ ꓪꓴ‐ꓢ ꓔꓯ ꓣꓱꓽ ꓙˍ ꓟ꓾ ꓪꓴ‐ꓢ ꓐꓯ ꓘꓶꓽ ꓕꓲꓽ ꓘꓶ ꓡꓰ ꓕꓲꓽ ꓘꓶ ꓔꓯ ꓠ ꓡꓳ. ꓛꓳ ꓫꓱꓽˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓠꓲ, ꓠꓵˍ ꓟ ꓮꓽ ꓐ ꓮ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓙꓲ‐ꓢꓴ ꓢꓲ ꓤ ꓐꓴ ꓠꓬ ꓙꓽ ꓣꓳ ꓠꓲ, ꓒ ꓐꓲ ꓐꓰ꓾ ꓠ ꓡꓳ. ꓗꓴ. ꓢꓴ ꓕꓲ ꓣꓳˍ ꓡꓰ ꓐꓰ ꓪꓴ‐ꓢ ꓔꓯ ꓢꓷ. ꓙ ꓟꓳ ꓙ ꓢꓴ ꓐꓴ ꓒꓬꓱꓼ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
