ꓢꓲꓺ ꓒ ꓬꓰ‐ꓢꓴ ꓬꓲ ꓢꓲꓽ ꓬꓲ ꓧꓪꓽ ꓥ ꓟ ꓢꓲꓽ ꓫꓬ ꓖꓳ ꓓꓱꓽ ꓑꓮꓲꓽ (Holy Eucharist)
ꓠꓬꓲ. ꓠꓬꓲ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓬꓲ ꓢꓲ ꓬꓲ ꓧꓪꓽ ꓥ ꓟ ꓢꓲꓽ ꓫꓬ ꓖꓳ ꓓꓱꓽ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 9ꓽ11‐17 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓡ ꓞꓳ ꓥꓪꓽ ꓔꓴ ꓣꓳ ꓔꓯ ꓖꓶꓽ ꓜꓽˍ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓘꓳ ꓫꓱ. ꓫꓱˍ ꓐꓰ ꓐꓱ‐ꓢꓰ‐ꓓ ꓟꓬꓱ ꓔ ꓟ ꓡꓳ ꓒꓰ ꓗꓪ ꓙꓵꓽ ꓙꓰˍ ꓡꓳ꓿ ꓞꓳ ꓜꓴ ꓐꓴ ꓢꓷ. ꓡꓰ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓬꓰ‐ꓢꓴ ꓠꓬ ꓬꓲ ꓪ ꓔꓯ ꓪꓴ‐ꓢ ꓗꓴꓷꓼ ꓟ. ꓟꓲꓽ ꓚ ꓟ. ꓖꓶ ꓡꓳ꓿ ꓟꓲꓽ ꓟꓲ ꓓꓵꓽ ꓡꓰ ꓐꓰ ꓗ, ꓕꓯ ꓝꓲ ꓓꓴ ꓐꓴ ꓔꓯ ꓬꓲ ꓔꓯ ꓡ ꓢꓲ ꓠꓬꓲ ꓞꓳ ꓜꓴꓻ ꓔꓯ ꓚꓚꓳ ꓡꓳ ꓟ ꓡꓳ ꓒꓱ ꓘ, ꓒꓱ ꓗꓪ ꓬꓲꓼ ꓔ. ꓖꓶ ꓐꓰ ꓜꓽ ꓓꓴ ꓧꓪ ꓙꓰ ꓝꓲ ꓐꓰ ꓐꓯ ꓡꓳ꓿
ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓔꓯ ꓬꓲ ꓪ ꓔꓯ ꓠꓴ ꓪ ꓖꓶ ꓜꓽ ꓐꓯ ꓖꓶ ꓡꓳ꓿ ꓬꓲ ꓪ ꓡꓰ ꓠꓹꓼ ꓠꓴꓽ ꓠꓬ ꓡ ꓞꓳ ꓔꓱ ꓟꓬ ꓟ ꓐꓱ ꓶ ꓜꓽ ꓓꓴ ꓟꓽ ꓪꓴꓻ ꓙꓰ ꓠꓬ ꓕꓱ ꓗꓪ ꓟꓽ ꓑ ꓑ ꓥꓪꓽ ꓑꓬˍ ꓐꓰ ꓥꓪ. ꓠꓬꓲ ꓟ ꓡꓰ ꓙꓳˍ ꓡꓳ ꓐꓰ ꓐꓯ ꓖꓶ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓪ ꓔꓯ ꓕꓯ ꓜꓴꓻ ꓟ ꓥꓪꓽ ꓞꓲ ꓣꓳ ꓛꓲ ꓕꓲ ꓜꓴꓻ ꓕꓲ ꓜꓴꓻ ꓐꓰ ꓠꓬꓲ. ꓠ. ꓝꓲ ꓡꓳ꓿
ꓬꓲ ꓠꓬ ꓑ ꓑ ꓖꓳ ꓥꓪꓽ ꓑꓬ ꓐꓰ ꓥꓪ. ꓠꓬꓲꓽ ꓟ ꓟ ꓣꓴ ꓔ ꓢꓲ꓾ ꓟꓴ ꓗꓪ ꓗꓪ ꓡꓳ. ꓢꓲ ꓠꓬꓲ ꓶꓼ ꓥꓳꓽ ꓙꓱꓽ ꓖꓶ ꓗꓷ ꓠꓬ ꓦꓶ, ꓗꓷ ꓢꓲ ꓞꓳ ꓜꓴꓻ ꓔꓯ ꓑꓶ ꓖꓶ ꓠ, ꓟ ꓛꓳꓽ ꓒꓯ, ꓐꓴ ꓔꓯ ꓖꓶ ꓡꓳ꓿ ꓬꓲ ꓪ ꓮ ꓜꓴꓻ ꓡꓱ ꓜꓽ ꓐꓳ ꓡꓰˍ ꓡꓳ꓿ ꓜꓰꓻ ꓡꓰ ꓟ ꓬꓲ ꓧꓶꓽ ꓬꓲ ꓟꓲ ꓠꓬ ꓛꓳꓽ ꓒꓯ, ꓐꓴ ꓡꓰ ꓞꓲ ꓠꓬꓲꓽ ꓠꓳ. ꓘꓴꓽ ꓖꓳ ꓫ ꓟꓶˍ ꓡꓳ ꓥ ꓡꓳ꓿
ꓬꓳ‐ꓦ ꓕꓳ ꓶ 6ꓽ54 ꓗꓪ ꓥꓪ ꓧꓪꓽ ꓜ ꓢꓲ ꓥꓪ ꓫꓵꓽ ꓓꓳ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ ꓝꓮꓲ ꓡꓳ, ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓬꓲ ꓔꓯ ꓢꓯ. ꓬꓲꓼ ꓡ ꓝꓲ ꓥꓳ ꓐꓰ ꓐꓯ ꓔ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓢꓲꓽ ꓫꓬ ꓑ ꓑ ꓠꓬ ꓬꓲ ꓚꓵꓻ ꓚꓵꓻ ꓔꓬ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓮ ꓘꓶ. ꓛꓲ ꓢꓲꓽ ꓫꓬ ꓟ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓚꓵꓻ ꓚꓵꓻ ꓔꓬ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓔꓲꓺ ꓒ ꓐꓴ ꓡꓰ ꓶ ꓥꓳꓼ ꓙꓱꓽ ꓖꓶ ꓗ. ꓠꓯ ꓑ ꓑ ꓐꓰ ꓛꓱ ꓡꓱ ꓬꓲ ꓠꓬ ꓚꓵꓻ ꓚꓵꓻ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ ꓒꓬꓱꓼ ꓡ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ ꓔꓯ ꓘꓳ, ꓣꓴ ꓟ ꓙꓵ, ꓔꓯ ꓮ ꓘꓶ. ꓛꓲ ꓞꓳ ꓒꓵꓽ ꓢꓲ ꓠꓬꓲ ꓮ ꓘꓶ. ꓭ ꓟꓴ ꓢꓲ ꓠꓬꓲ ꓘꓳ, ꓣꓴ ꓠ, ꓟ ꓘꓴ ꓜꓲꓼ ꓞꓳ ꓡꓰ ꓟ. ꓖꓶ ꓔ ꓡꓳ꓿
ꓮ ꓘꓶ. ꓢꓲꓽ ꓫꓬ ꓟ ꓢꓲꓺ ꓒ ꓬꓰ‐ꓢꓴ ꓧꓪꓽ ꓖꓳ ꓓꓱꓽ ꓑꓮꓲꓼ ꓔꓯ ꓙꓲꓻ ꓫꓬ ꓢꓴ ꓢꓔ. Thomas Aquinas ꓡꓰ (1264) ꓘꓳꓼ ꓕꓯ ꓓꓴ ꓙ ꓟꓶ ꓓꓴ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ ꓑꓮꓲ ꓔꓯ ꓬꓰ ꓗꓷ ꓗ. ꓠꓯ ꓟꓴ ꓗꓳ ꓓꓵ ꓓꓵ ꓗꓪ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓬꓰ ꓔꓬ ꓠ ꓥ ꓡꓳ꓿
ꓠꓬꓲ.ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ 2 ꓕꓱ ꓥ ꓟ ꓝꓲ ꓓꓴ ꓒꓳ‐ꓡꓳ ꓡꓰ ꓐꓳ ꓔ ꓟ 1 ꓘꓳ‐ꓡꓱ‐ꓕꓴ ꓕꓳ ꓶ 9ꓽ23‐26 ꓝꓲ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓪꓴꓽ ꓜ ꓗꓷ ꓟ ꓖꓳ ꓕꓲ ꓦꓬꓼ ꓗꓪ ꓬꓲ ꓠꓬ ꓑ ꓑ ꓣꓴ ꓢꓲ꓾ ꓫ. ꓟꓳ ꓗꓷ ꓠꓬ ꓦꓶ, ꓢꓲ ꓠꓬꓲ ꓕꓱ ꓟ ꓠꓽ ꓠꓴ ꓪ ꓐꓱ ꓶ ꓖꓶ ꓗꓷ ꓟ ꓥꓪ ꓖꓳ ꓓꓱꓽ ꓥ ꓡꓳ꓿ ꓠꓴ ꓪ ꓥꓪ ꓔꓯ ꓓꓵꓽ ꓙ ꓛꓲ ꓡ ꓠ, ꓟ ꓕꓱ ꓡꓱ ꓬꓰ ꓐꓯ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ, ꓔꓯ ꓣꓳ ꓘꓳ, ꓣꓴ ꓠꓬ ꓣꓳ ꓦꓻ ꓢꓯꓼ ꓪ ꓟꓶ ꓡꓰ ꓢꓲ ꓠꓬꓲ ꓕꓲ ꓞꓲ ꓕꓲ ꓑ ꓢꓯꓼ ꓟꓬ ꓟꓶ ꓠ, ꓟ ꓙꓳ ꓟ ꓔꓯ ꓣꓳ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓕꓲ ꓧꓪ ꓧꓪ ꓣꓳ ꓠꓬ ꓮ ꓡꓰ ꓐꓰ ꓑ ꓑ ꓐꓰ ꓛꓱ ꓡꓱ ꓪꓳꓽ ꓬꓲꓻ ꓠꓬ ꓢꓲꓺꓒ ꓬꓲ ꓫꓵꓽ ꓬꓲ ꓧꓪ ꓠꓬ ꓮ ꓡꓰ ꓐꓰ ꓒꓬꓱꓼ ꓡ ꓓ ꓢꓲ ꓐꓰ ꓠ ꓠꓬꓲˍ ꓖꓴ ꓟ ꓥ ꓡꓳ꓿ ꓪꓴ‐ꓢ ꓠꓬ ꓮ ꓙꓵꓽ ꓔꓯ ꓬꓲ ꓡꓰ ꓚꓰ ꓢꓴ ꓥ ꓟ ꓪꓴ. ꓠꓬꓲ ꓬꓲ ꓠꓬ ꓮ ꓫꓵꓽ ꓟꓲ ꓒꓬꓱꓼ ꓡ ꓐ ꓢꓴ ꓥ ꓡꓳ꓿
ꓪꓴ‐ꓢ ꓠꓬ ꓮ ꓫꓵꓽ ꓑꓶ. ꓓꓴ ꓕꓱ ꓡꓰ ꓐꓰ ꓑ ꓑ ꓐꓰ ꓛꓱ ꓡꓱ ꓬꓲ ꓗꓪ ꓬꓲ ꓫꓵꓽ ꓬꓲ ꓧꓪ ꓒꓬꓱꓼ ꓡ ꓝꓲ ꓠꓬ ꓐꓯ ꓠꓬ ꓔꓱ ꓚꓵ ꓟ ꓪꓴ‐ꓢ ꓠꓵꓻ ꓠꓲ, ꓑꓶ. ꓓꓴ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓠ, ꓟ ꓬꓲ ꓫꓵꓽ ꓬꓲ ꓧꓪ ꓔꓯ ꓜ ꓠ, ꓟ ꓮ ꓘꓶ. ꓛꓲ ꓣꓳ ꓚꓵ ꓟ ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓟ. ꓖꓶ ꓔ ꓡꓳ꓿
ꓣꓳ ꓢꓲꓺ ꓒ ꓬꓲ ꓫꓵꓽ ꓬꓲ ꓧꓪ ꓘꓳ, ꓣꓴ ꓗꓷ ꓠꓬ ꓬꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓪꓴ‐ꓢ ꓤ ꓠꓱ ꓚꓵ ꓒꓬꓱꓼ ꓡ ꓗꓷ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓖꓳ‐ꓖꓳ‐ꓕ ꓪ ꓚꓲ ꓗꓪ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓢꓲꓺ ꓒ ꓢꓲꓺ ꓒ ꓠꓵꓻ ꓠꓲ, ꓔꓯ ꓟꓲ ꓠꓯ ꓡ ꓞꓳ ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿
ꓠꓬꓲ. ꓠꓬꓲ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪ ꓘꓳ, ꓣꓴ ꓟꓶ ꓠ, ꓟ ꓢꓯꓼ ꓕꓵꓼ ꓡꓯ꓿ ꓕꓲ ꓞꓲꓼ ꓢꓯꓼ ꓟꓬ ꓟꓶ ꓠ, ꓟ ꓢꓯꓼ ꓒ ꓡꓰ ꓖꓶ ꓡ ꓟ ꓢꓲꓽ ꓫꓬ ꓑ ꓑ ꓔꓯ ꓘꓳ, ꓣꓴ ꓓꓴ ꓬꓰ ꓡꓯ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
