ꓢꓲ-ꓫꓬ-ꓟ-ꓦ ꓬꓲ ꓔꓯ ꓐꓬꓱ ꓠꓬ ꓮ ꓫꓵ ꓥ ꓡ꓾ꓐꓯ_ ꓟ ꓣꓳ ꓡꓳꓸ ꓠꓬꓲ ꓡꓯ= ꓬꓲ ꓪꓴꓸ ꓕꓲ ꓟ ꓟ ꓠꓬ ꓬꓲ ꓙꓬ ꓥ ꓡꓳ꓾ ꓬꓲ ꓙꓬ ꓠꓬ ꓢꓲ-ꓫꓬ-ꓟ-ꓦ ꓔꓯ ꓔꓯ ꓔ ꓡꓳ= ꓣꓳ ꓖꓳ ꓓꓱ ꓔꓲꓹ ꓕꓯ ꓢꓲ-ꓫꓬ-ꓟ-ꓦ ꓠꓯꓼ ꓘꓴꓽ ꓗꓪ ꓣꓳ ꓒꓬꓱ ꓟꓳ ꓡ ꓡꓳ꓾ ꓐꓰ ꓢꓲ ꓫꓬ ꓕꓳ ꓶ ꓗꓪ ꓙꓳ ꓡꓳ= ꓢꓲ-ꓫꓬ-ꓟ-ꓦ ꓬꓲ ꓙꓬ ꓗꓪ ꓐꓰ ꓣꓳ ꓮ ꓙꓵ ꓠꓬ ꓪꓴ-ꓢ ꓤ ꓠꓱ ꓒꓬꓱꓼ ꓡ ꓡꓳ= ꓢꓲ ꓒ ꓬꓰ-ꓢꓴ ꓬꓲꓲ ꓚꓲ ꓛꓬ ꓥ ꓟꓲ ꓬꓲ ꓙꓬ ꓘꓴꓽ ꓠꓯꓼ ꓗꓪ ꓖꓳ ꓓꓱ ꓔꓲꓹ ꓗꓷ ꓢꓲ ꓠꓬꓲ ꓕꓱ ꓡꓱ ꓐꓰ ꓢꓲ-ꓫꓬ-ꓟ-ꓦ ꓔꓯ ꓘꓳꓹ ꓣꓴ_ ꓡꓳ꓾ ꓐꓯ_ ꓟ ꓔꓯ ꓣꓳ ꓡꓳꓸ ꓟꓳ ꓡꓳ= ꓖꓳ ꓡꓱ ꓠꓬꓲ ꓣꓳ ꓮ ꓙꓵ ꓠꓬ ꓢꓲ-ꓫꓬ-ꓟ-ꓦ ꓠꓯꓼ ꓘꓴꓽ ꓗꓪ ꓖꓳ ꓓꓱ ꓔꓲꓹ ꓟꓶ ꓡꓰꓳ ꓐꓯ ꓟ ꓠꓬ ꓬꓲ ꓙꓬ ꓗꓪ ꓐꓰ ꓣꓳ ꓖꓳ ꓓꓱ ꓔꓲꓹ ꓟꓶ ꓡꓰꓳ ꓐꓯ_ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓪꓴꓸ ꓕꓲ ꓟ ꓟ ꓠꓬ ꓬꓲ ꓙꓬ ꓥ ꓡꓳ=
ꓠꓬꓲꓽ ꓫꓵ ꓕꓲꓽ ꓫꓵ ꓟ ꓠꓬ ꓟꓰ ꓞꓶ ꓟꓰ ꓖꓶ_ ꓟ ꓐꓰ ꓥ ꓡꓳ꓾ ꓢꓲ-ꓫꓬ-ꓟ-ꓦ ꓔꓯ ꓠꓬ ꓟꓰ ꓞꓶ ꓔꓯ ꓥ ꓟꓲ ꓔꓯ ꓔ ꓢꓰ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓟꓬꓱꓺ ꓙꓲ ꓢꓴ ꓐꓯ_ ꓟ ꓬꓲ ꓬꓲ ꓢꓷ ꓠꓬ ꓟꓰ ꓞꓶ ꓟꓰ ꓔ ꓢꓴ ꓥ ꓡꓳ= ꓮ ꓫꓵ ꓟꓰ ꓞꓶ ꓥ ꓡ꓾ ꓢꓲ-ꓫꓬ-ꓟ-ꓦ ꓟꓰ ꓞꓶ ꓟꓰ ꓔ ꓢꓴ ꓬꓲ ꓬꓲ ꓢꓷ ꓥ ꓡꓳ= ꓟꓰ ꓞꓶ ꓟꓰ ꓖꓶ ꓗꓷ ꓟ ꓗꓪ ꓐꓰ ꓪꓴ-ꓢ ꓡꓰ ꓢꓲ ꓚꓰꓸ ꓡꓰ ꓢꓴ ꓕꓲ ꓣꓳ ꓒꓬꓱꓼ ꓡ ꓡꓳ= ꓪꓴ-ꓢ ꓔꓬ ꓢꓴ ꓕꓲ ꓚꓱꓹ ꓐꓯ ꓠꓬ ꓢꓲ-ꓫꓬ-ꓟ-ꓦ ꓐꓲ ꓡ ꓢꓴ ꓕꓲ ꓣꓳ ꓒꓬꓱꓼ ꓡ ꓡꓳ= ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓠꓬ ꓢꓲ-ꓫꓬ-ꓟ-ꓦ ꓢꓯꓼ ꓪ ꓖꓶ_ ꓟ ꓘ-ꓣꓲ-ꓢ-ꓟ ꓣꓱ ꓛꓰ ꓕꓱ ꓟ ꓔꓯ ꓔꓯ ꓔ ꓟ ꓥ ꓡꓳ=
ꓢ ꓫꓵ ꓕꓲ ꓫꓵ ꓟ ꓠꓬ ꓢꓲ-ꓫꓬ-ꓟ-ꓦ ꓔꓯ ꓮꓸ ꓔꓳꓸ ꓔꓯ ꓔꓯ ꓔ ꓡꓳ= ꓢꓲ-ꓫꓬ-ꓟ-ꓦ ꓠꓬ ꓝꓲ ꓓꓴ ꓐꓴ ꓐꓰ ꓢꓲ ꓫꓬ ꓟ-ꓡꓲ-ꓬ ꓕꓯ ꓢꓲ ꓗꓪ ꓬꓯꓼ ꓡ ꓕꓯ ꓮꓸ ꓔꓳꓸ ꓡꓰ ꓐꓰ ꓬꓯꓼ ꓡ ꓡꓳ= ꓝꓮꓲ ꓟꓵ ꓗꓴꓸ ꓐꓰ ꓠꓬꓲ ꓟꓳ ꓓꓴ ꓔꓯ ꓥ ꓟꓲ ꓔꓯ ꓔ ꓡꓳ= ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓬꓲ-ꓙꓲ ꓟꓵ ꓗꓪ ꓐꓰ ꓔꓷꓹ ꓞꓰ ꓙꓰ ꓕꓯ ꓬꓲ ꓪ ꓔꓯ ꓟꓵ ꓗꓴꓸ ꓐꓰ ꓠꓬꓲ ꓟꓳ ꓓꓴ ꓗꓪ ꓐꓰ ꓙ ꓖꓴ ꓟꓳꓸ ꓖꓶ_ ꓡꓳ=
ꓝꓮꓲ ꓢꓲ-ꓫꓬ-ꓟ-ꓦ ꓔꓯ ꓠꓬ ꓪꓴ-ꓢ ꓡꓯ ꓒꓯꓹ ꓐꓰ ꓐꓯ ꓔ ꓫꓵ ꓙꓳ_ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓡꓯ ꓒꓯꓹ ꓐꓰ ꓞꓳ ꓠꓻ ꓔꓯ ꓫꓬꓹ ꓖꓶ_ ꓡꓳ= ꓤ ꓠꓱ ꓤ ꓔꓯ ꓶ ꓥꓳꓽ ꓙꓱ ꓖꓶ_ ꓡꓳ= ꓬꓲ ꓡꓯ ꓒꓯꓹ ꓚꓰꓹ ꓢꓲ ꓠꓬꓲ ꓠꓻ ꓢꓴ ꓒꓬ ꓢꓴ ꓔꓯ ꓫꓬꓹ ꓓ ꓡꓰ_ ꓡꓳ=ꓕꓱ ꓟ ꓡꓰ ꓐꓰ ꓝꓲ ꓓꓴ ꓐꓴ ꓥ ꓟꓲ ꓢꓲ-ꓫꓬ-ꓟ-ꓦ ꓡꓯ ꓒꓯꓹ ꓗꓪ ꓐꓰ ꓓꓵ ꓙ ꓟꓶ ꓓꓴ ꓬꓰ ꓓꓳ ꓡ ꓡꓳ=ꓢꓲ-ꓫꓬ-ꓟ-ꓦ ꓔꓯ ꓠꓬ ꓪꓴ-ꓢ ꓡꓯ ꓒꓯꓹ ꓐꓰ ꓥ ꓟꓲ ꓔꓯ ꓔ ꓟ ꓥ ꓡꓳ=ꓢꓲ-ꓫꓬ-ꓟ-ꓦ ꓔꓯ ꓪꓴ-ꓢ ꓡꓯ ꓠꓬꓲ ꓐꓰ ꓥ ꓟꓲ ꓔꓯ ꓔ ꓡꓳ= ꓢꓲ ꓒ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓠꓲꓽ ꓗꓼ ꓓꓳ_ ꓡꓳ꓾ ꓐꓰ ꓐꓯ ꓔ ꓡꓳ=
ꓬꓲꓸ ꓟꓶꓽ ꓕꓲꓽ ꓟ ꓟ ꓠꓬ ꓢꓲ-ꓫꓬ-ꓟ-ꓦ ꓔꓯ ꓠꓬ ꓓꓱ ꓑꓶ ꓔꓯ ꓔꓯ ꓔ ꓡꓳ= ꓕꓱ ꓟ ꓠꓬ ꓣꓳ ꓢꓲ-ꓫꓬ-ꓟ-ꓦ ꓔꓯ ꓐꓬꓱ ꓗꓪ ꓐꓰ ꓢꓲ ꓫꓬ ꓕꓳ ꓶ ꓗꓪ ꓙꓳ_ ꓟ ꓥ ꓡꓳ=ꓬꓲ ꓔꓯ ꓮ ꓡꓰ ꓐꓰ ꓔꓯ ꓐꓬꓱ ꓔꓯ ꓔ ꓥ ꓟꓲ ꓢꓲ-ꓫꓬ-ꓟ-ꓦ ꓕꓲ ꓟ ꓥ ꓡꓳ ꓐꓯ_ ꓟ ꓔꓯ ꓮ ꓙꓵ ꓢꓴ ꓢꓷꓸ ꓠꓹ ꓟ ꓐꓱ ꓶ ꓐꓯ ꓟꓸ ꓖꓶ ꓡ ꓟ ꓥꓳ=
