ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓴ ꓢꓴ ꓔꓯ ꓮ ꓡꓲ ꓖꓽ ꓖꓶˍ ꓠꓬ꓾ ꓠꓴ ꓥˍ ꓟꓲ ꓖꓳ ꓡꓱ ꓖꓽ ꓖꓶˍ ꓟ ꓟꓶˍ ꓥꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (ꓟ‐ꓕꓲ 6ꓽ7‐15) ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓠꓬ “ꓢꓲ ꓒ ꓬꓰ‐ꓢꓴ ꓡꓰ ꓪꓽ ꓘꓴ ꓘꓶ ꓟ. ꓖꓶˍ ꓟ”꓿
ꓢꓲ ꓒ ꓬꓰ‐ꓢꓴ ꓡꓰ ꓪꓽ ꓘꓴ ꓘꓶ ꓟ. ꓖꓶ ꓔꓬ ꓟ ꓗꓪ ꓠꓬ꓾ ꓢꓴ ꓡꓰ ꓠꓴ ꓔꓯ ꓛꓬ ꓡ ꓕꓯ ꓠꓬ ꓠꓴ ꓖꓽ ꓖꓶ ꓠ, ꓟ ꓥꓳ꓿ ꓠꓴ ꓢꓴ ꓔꓯ ꓖꓽ ꓖꓶˍ ꓥꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓔꓬ ꓟ ꓐ, ꓐ ꓪꓴ‐ꓢ ꓥˍ ꓟꓲ ꓠꓴ ꓔꓯ ꓖꓽ ꓖꓶ ꓡˍ ꓥꓳ꓿ ꓠꓴ ꓢꓴ ꓔꓯ ꓖꓽ ꓖꓶˍ ꓟ ꓟꓽ ꓙꓳ ꓥꓳ ꓐꓯ ꓠꓬ ꓟꓴꓽ ꓗꓪ ꓗꓪ ꓔꓬ ꓟ ꓐ, ꓐ ꓪꓴ‐ꓢ ꓥˍ ꓟꓲ ꓠꓴ ꓔꓯ ꓟꓽ ꓖꓽ ꓖꓶ ꓡ꓾ ꓐꓰ ꓐꓯ ꓟ ꓐꓯ ꓘꓶ ꓥ ꓟꓲ ꓖꓳ ꓗꓪ ꓓꓵˍ ꓡꓳ꓿
ꓕꓱ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓣꓳ ꓠꓬ ꓣꓳ ꓛꓬ ꓗꓷˍ ꓥꓳ ꓐꓯ ꓠꓬ ꓛꓬ ꓗꓷ ꓥꓳꓽ ꓗꓷ ꓓꓴ ꓙꓳˍ ꓥꓳ ꓐꓯ ꓠꓬ ꓣꓳ ꓠꓬ ꓐ, ꓐ ꓪꓴ‐ꓢ ꓔꓬ ꓗꓪ ꓡ ꓢꓲ ꓠꓬꓲ꓾ ꓐ, ꓐꓽꓳ ꓥꓪ ꓠꓬ ꓝꓴꓲ. ꓙꓳ ꓢꓴ ꓥ ꓡꓳ꓿ ꓥꓪ ꓔꓯ ꓝꓴꓲ. ꓖꓽ ꓖꓶ ꓡꓯ꓾ ꓐꓰ ꓕꓱ ꓡꓱ ꓘꓴ ꓓꓰꓽ ꓢꓲ ꓠꓬꓲ ꓖꓽ ꓖꓶˍ ꓟ ꓘꓳ ꓣꓴ ꓟꓶ ꓠ, ꓟ ꓣꓳ ꓡˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓬ ꓢꓴ ꓔꓯ ꓖꓽ ꓖꓶ ꓠꓲ, ꓟꓽ ꓫꓵ꓿ ꓢꓴ ꓔꓯ ꓠꓬ ꓣꓳ ꓦꓯ. ꓠꓲ, ꓙꓵꓽˍ ꓟ꓾ ꓠꓲ, ꓟ ꓦꓶˍ ꓟ꓾ ꓠꓲ, ꓟ ꓠꓯꓸꓼ ꓗꓪ ꓐꓰ ꓙꓱꓽˍ ꓟ꓾ ꓖꓽ ꓖꓶ ꓟꓽ ꓐ ꓡ ꓟ ꓠꓲ, ꓟ꓾ ꓕꓱ ꓫꓵꓽ ꓮ ꓟꓬ, ꓙꓳˍ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳꓽ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓣꓳ ꓠꓬ ꓢꓴ ꓔꓯ ꓟꓽ ꓖꓽ ꓖꓶ ꓥꓳ ꓐꓯ ꓠꓬ ꓐ, ꓐ ꓪꓴ‐ꓢ ꓠꓬ ꓣꓳ ꓔꓯ ꓟꓽ ꓖꓽ ꓖꓶ ꓡ꓿ ꓣꓳ ꓠꓬ ꓢꓴ ꓔꓯ ꓖꓽ ꓖꓶˍ ꓕꓯ ꓐ, ꓐ ꓪꓴ‐ꓢ ꓥ ꓟꓲ ꓣꓳ ꓔꓯ ꓖꓽ ꓖꓶ ꓡˍ ꓥꓳ꓿
ꓖꓳ ꓟ ꓑꓶ. ꓓꓴ ꓕꓱ ꓟ ꓮ ꓫꓵꓽ ꓔꓯ ꓐꓯ ꓔꓬ ꓡ ꓐꓯ ꓠꓬ꓾ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽˍ ꓡꓰ ꓐꓰ꓾ ꓠꓴ ꓙꓲˍ ꓟ ꓬꓲ ꓜꓲ ꓫꓵ. ꓔ ꓥꓳ ꓐꓯˍ ꓠꓬ ꓙꓲˍ ꓟ ꓔꓯ ꓠꓴ ꓶꓼ ꓫ ꓪˍ ꓥꓳ꓿ ꓟꓽ ꓙꓲꓻ ꓟ ꓬꓲ ꓜꓲ ꓔꓯ ꓫꓵ. ꓔ ꓥꓳ ꓐꓯ ꓠꓬ ꓟꓽ ꓙꓲ ꓟ ꓬꓲ ꓜꓲ ꓔꓯ ꓠꓴ ꓶꓼ ꓫ ꓪˍ ꓥꓳ꓾ ꓐꓯˍ ꓟ ꓔꓯ ꓫꓱ.ˍ ꓡꓳ꓿ ꓝꓮꓲ ꓠꓴ ꓢꓴ ꓔꓯ ꓮ ꓡꓲ ꓐꓰ ꓙꓳꓻ ꓖꓶˍ ꓠꓬ ꓢꓴˍ ꓟꓲ ꓠꓴ ꓔꓯ ꓖꓳ ꓡꓱ ꓙꓳꓻ ꓖꓶ ꓡˍ ꓥꓳ꓾ ꓐꓯ ꓟ ꓔꓯ ꓫꓱ.ˍ ꓡꓳ꓿
ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓪꓴ‐ꓢ ꓦ ꓡꓱ ꓢꓴ ꓮ ꓟꓬ, ꓠꓬ꓾ ꓥꓪ ꓮ ꓡꓲ ꓬꓰ ꓔꓬ ꓥ ꓟꓲ ꓪꓴ‐ꓢ ꓠꓬ ꓥꓪ ꓔꓯ ꓖꓽ ꓖꓶ ꓡˍ ꓥꓳ꓾ ꓐꓰ ꓕꓱ ꓡꓱ ꓓꓵꓽ ꓙꓽ ꓔꓬ ꓟ ꓥ ꓡꓳ꓿ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓔꓲꓺ ꓢꓲꓽ ꓢꓲꓽ ꓡꓰꓽ ꓐꓯ ꓟ. ꓖꓶ ꓡ ꓔꓬ ꓟ ꓠꓬ꓾ ꓣꓳ ꓠꓽ ꓢꓴ ꓔꓯ ꓟꓽ ꓖꓽ ꓖꓶ ꓕꓯ ꓠꓽ ꓣꓳ ꓠꓽ ꓖꓽ ꓖꓶ ꓟꓽ ꓟꓶ꓾ ꓐꓰ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓢꓲꓽ ꓢꓲꓽ ꓡꓰꓽ ꓐꓯ ꓔ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓝꓴꓲ. ꓮ ꓟꓬ, ꓬꓰ ꓛꓬ ꓗꓷ ꓕꓯ ꓠꓬ꓾ ꓣꓳꓽ ꓐ, ꓐ ꓪꓴ‐ꓢ ꓔꓬ ꓗꓪ ꓟꓽ ꓙꓰ ꓧꓶ. ꓕꓯ ꓣꓳ ꓠꓬ ꓢꓴ ꓔꓯ ꓖꓽ ꓖꓶˍ ꓟ ꓙꓳˍ ꓡ ꓟꓽ ꓙꓳ ꓡ꓾ ꓐꓯ ꓟ ꓔꓯ ꓣꓳ ꓧꓶ. ꓕꓯ ꓢꓷ. ꓠ, ꓟ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓥ ꓟꓲ ꓣꓳ ꓔꓯ ꓐꓯˍ ꓡꓳ꓿ ꓠꓴ ꓪ ꓔꓲ ꓓꓴ ꓔꓲ ꓠ, ꓟ ꓪꓽ ꓘꓴ ꓦꓲꓻ ꓗꓪ ꓟꓽ ꓡ ꓧꓶ. ꓕꓯ ꓠꓴ ꓬꓲꓼ ꓠꓴ ꓠꓬꓲ ꓐꓴ ꓐꓰ ꓧꓳ, ꓑꓼ ꓡꓯ ꓘꓳˍ ꓟ ꓧꓶ. ꓕꓯ ꓙꓳ ꓠ ꓗ, ꓡꓳ꓿ ꓠꓴ ꓬꓲꓼ ꓠꓴ ꓠꓬꓲ ꓐꓴ ꓐꓰ ꓠꓲ, ꓧꓳ, ꓫꓵꓽ ꓧꓳ, ꓡꓯ ꓘꓳ ꓗ ꓠꓯ. ꓕꓯ ꓡꓰꓽ ꓥꓪ ꓔꓯ ꓔꓲ ꓖꓶ ꓓꓴ ꓔꓲ ꓖꓶ ꓡ꓾ ꓐꓯ ꓟ ꓔꓯ ꓥ ꓟꓲ ꓐꓯ ꓬꓯꓼˍ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓪꓴ‐ꓢ ꓔꓯ ꓪꓽ ꓟꓽ ꓘꓴ ꓧꓶ. ꓕꓯ ꓠꓬ ꓣꓳ ꓢꓴ ꓔꓯ ꓮ ꓡꓲ ꓐꓰ ꓛꓬ ꓓ, ꓡ꓾ ꓛꓬ ꓓ, ꓥꓳ ꓐꓯ ꓠꓬ ꓣꓳ ꓢꓴ ꓔꓯ ꓖꓽ ꓖꓶ ꓠ, ꓟ ꓓꓰꓽˍ ꓟ ꓡꓰꓽ ꓟꓽ ꓞꓲꓺ꓾ ꓢꓴ ꓥ ꓟꓲ ꓣꓳ ꓔꓯ ꓛꓬ ꓓ, ꓕꓯ ꓣꓳ ꓥ ꓟꓲ ꓖꓽ ꓖꓶ ꓠ, ꓟ ꓥꓳ꓿ ꓣꓳ ꓕꓱ ꓡꓱ ꓖꓽ ꓖꓶ ꓔꓬ ꓟ ꓐꓯˍ ꓟ ꓠꓬ ꓢꓴ ꓐꓱ ꓶ ꓙꓲˍ ꓟ ꓕꓲꓽ ꓡꓰ, ꓣꓳ ꓐꓱ ꓶ ꓥ ꓟꓲ ꓧ. ꓟ ꓥ ꓡꓳ꓿ ꓠꓬꓲꓽ ꓛꓱꓽ ꓧ. ꓟ ꓥ ꓡꓳ꓿ ꓠꓬꓲꓽ ꓣꓳ ꓐꓱ ꓶ ꓧ. ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓪꓴ‐ꓢ ꓠꓬ ꓣꓳ ꓕꓲꓽ ꓛꓱꓽˍ ꓡꓰ ꓧ ꓝꓲˍ ꓟ ꓟꓽ ꓥ꓿ ꓠꓬꓲꓽ ꓛꓱꓽ ꓧ ꓝꓲ ꓠꓲ, ꓫꓵˍ ꓟ꓾ ꓠꓬꓲꓽ ꓙꓵꓽ ꓪ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓟ ꓥꓳ꓿ ꓕꓱ ꓟ ꓠꓬ ꓪꓴ‐ꓢ ꓠꓲ, ꓡꓶꓽ ꓗꓪ ꓐꓰ ꓣꓳ ꓔꓯ ꓕꓱ ꓡꓱ ꓢꓲꓽ ꓢꓲꓽ ꓡꓰꓽ ꓐꓯ ꓟ. ꓖꓶ ꓔꓬ ꓟ ꓥ ꓡꓳ꓿
