ꓐꓹ ꓐ ꓪꓴ-ꓢ ꓬꓲ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓬꓲ ꓮ ꓡꓰ ꓓꓵꓽ ꓙ_ ꓟ ꓞꓳ ꓤ ꓐꓴ ꓢꓷꓸ ꓟꓽ ꓓ꓾ ꓢꓲ-ꓫꓬ-ꓟ-ꓦ ꓪꓴ-ꓢ ꓢꓲ ꓒ ꓬꓲ ꓦ ꓥ ꓟ ꓢꓲ-ꓫꓬ-ꓟ-ꓦ ꓪꓴ-ꓢ ꓬꓲ ꓗꓳꓸ ꓙꓰ ꓠꓬ ꓪꓴ-ꓢ ꓬꓲ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓮ ꓫꓵ ꓓ_ ꓡ꓾ ꓮ ꓫꓵ ꓙꓳ_ ꓡ꓾ ꓮ ꓡꓰ ꓐꓰ ꓟꓬꓱꓽ ꓬꓰ_ ꓡ꓾ ꓐꓰ ꓐꓯ_ ꓟ ꓔꓯ ꓣꓳ ꓢꓷꓸ ꓟꓽ ꓓ꓾ ꓢꓲ-ꓫꓬ-ꓟ-ꓦ ꓪꓴ-ꓢ ꓡꓰ ꓢꓷꓸ ꓘꓴ_ ꓡꓳ= ꓝꓮꓲ ꓢꓲ-ꓫꓬ-ꓟ-ꓦ ꓪꓴ-ꓢ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓪꓴ-ꓢ ꓐꓯ ꓘꓶꓽ ꓥ ꓟ ꓕꓲ ꓣꓳ_ ꓟ ꓤ ꓔꓲ ꓥ ꓟ ꓣꓳ ꓔꓯ ꓟꓳꓸ ꓖꓶ ꓡ ꓡꓳ= ꓣꓳ ꓔꓯ ꓢꓷꓸ ꓐ ꓡ ꓠꓹ ꓟ ꓐꓱ ꓶ ꓣꓳ ꓬꓲ ꓔꓯ ꓙꓵꓻ ꓐ ꓡ ꓠꓹ ꓟ ꓐꓱ ꓶ ꓢꓲ-ꓫꓬ-ꓟ-ꓦ ꓠꓬ ꓣꓳ ꓔꓯ ꓢꓯꓼ ꓪ ꓖꓶ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓢꓲ-ꓫꓬ-ꓟ-ꓦ ꓠꓬ ꓬꓲ ꓠꓬ ꓮ ꓡꓰ ꓫꓵ ꓪꓴ-ꓢ ꓥ꓾ ꓐꓯ_ ꓟ ꓔꓯ ꓢꓲ-ꓫꓬ-ꓟ-ꓦ ꓟꓷ ꓠꓷꓹ ꓗꓪ ꓐꓰ ꓣꓳ ꓔꓯ ꓟꓽ ꓐꓯ ꓟꓳꓸ ꓖꓶ ꓡ꓾ ꓢꓲ-ꓫꓬ-ꓟ-ꓦ ꓪꓴ-ꓢ ꓠꓬ ꓘꓶꓽ ꓫꓵꓼ ꓡꓵ ꓗꓪ ꓟꓷ ꓠꓷꓹ ꓝꓸ ꓢꓴ ꓮ ꓟꓬꓹ ꓣꓳ ꓗꓪ ꓐꓰ ꓐꓹ ꓐ ꓪꓴ-ꓢ ꓠꓬ ꓮ ꓡꓰ ꓫꓵ ꓪꓴ-ꓢ ꓥ ꓡꓳ꓾ ꓐꓯ_ ꓟ ꓔꓯ ꓞꓳ ꓤ ꓐꓴ ꓔꓯ ꓐꓯ ꓟꓳꓸ ꓖꓶ ꓡ ꓡꓳ= ꓟꓷ ꓠꓷꓹ ꓝꓸ ꓢꓴ ꓐꓴ ꓠꓬ ꓢꓲ-ꓫꓬ-ꓟ-ꓦ ꓬꓲ ꓪ ꓔꓯ ꓠꓬꓲ ꓟꓳ ꓓꓴ ꓣꓴ ꓖꓶ_ ꓟ ꓡꓰ ꓐꓰ ꓐꓹ ꓐ ꓪꓴ-ꓢ ꓟꓬꓱ ꓔꓯ ꓬꓲ ꓪ ꓛꓵ ꓔꓴ ꓢꓲ ꓠꓬꓲ ꓟꓬꓱꓺ ꓓꓳ ꓖꓶ_ ꓡꓳ=
ꓖꓳ ꓡꓱ ꓐꓯ ꓥ ꓟꓲ ꓢꓲ-ꓫꓬ-ꓟ-ꓦ ꓪꓴ-ꓢ ꓮ ꓡꓰ ꓫꓵ ꓪꓴ-ꓢ ꓥ꓾ ꓐꓰ ꓐꓯ_ ꓟ ꓬꓲ ꓪ ꓟꓷ ꓠꓷꓹ ꓘꓶꓽ ꓗꓪ ꓐꓰ ꓟꓽ ꓓꓳ ꓡ꓾ ꓖꓳ ꓡꓱ ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓢꓲ-ꓫꓬ-ꓟ-ꓦ ꓪꓴ-ꓢ ꓔꓯ ꓠꓬ ꓣꓳ ꓠꓬ ꓮꓽ ꓟ ꓟꓲ ꓟꓽ ꓟꓳ ꓠꓬꓲ ꓑ ꓟꓲ ꓟꓽ ꓑ ꓙ ꓠꓬꓲ ꓐꓯ ꓢꓲ ꓠꓬꓲ ꓕꓱ ꓡꓱ ꓐꓰ ꓐꓳ ꓔ ꓟ ꓙꓳ_ ꓡꓳ= ꓢꓲ-ꓫꓬ-ꓟ-ꓦ ꓔꓯ ꓠꓬ ꓣꓳ ꓟꓽ ꓟꓳ ꓠꓬꓲ ꓟꓽ ꓑ ꓙ ꓠꓬꓲ ꓖꓳ ꓡꓱ ꓥ ꓟꓲ ꓬꓲ ꓮ ꓡꓰ ꓐꓰ ꓞꓳ ꓙꓳ_ ꓟ꓾ ꓮ ꓡꓰ ꓐꓰ ꓟꓬꓱꓽ ꓬꓰ_ ꓟ ꓔꓯ ꓠꓬ ꓣꓳ ꓟꓳ ꓓ_ ꓡꓳ= ꓪꓴ-ꓢ ꓔꓯ ꓣꓳ ꓙꓵꓻ ꓠꓹ ꓟ ꓐꓱ ꓶ ꓪꓴ-ꓢ ꓠꓯꓼ ꓘꓴꓽ ꓗꓪ ꓣꓳ ꓞꓳ ꓙꓳ ꓐ ꓡ ꓠꓹ ꓟ ꓐꓱ ꓶ ꓪꓴ-ꓢ ꓠꓯꓼ ꓗꓪ ꓪꓽ ꓘꓴ ꓐ ꓡ ꓠꓹ ꓟ ꓐꓱ ꓶ ꓬꓲ ꓠꓬ ꓣꓳ ꓔꓯ ꓬꓰ ꓙ ꓖꓶ ꓔꓬ ꓡꓳ= ꓣꓳ ꓔꓯ ꓠꓲꓹ ꓗꓳꓸ ꓖꓶ ꓔꓬ ꓡꓳ= ꓣꓳ ꓔꓯ ꓟꓬ ꓗꓳ ꓖꓶ ꓔꓬ ꓡꓳ꓾ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ-ꓫꓬ-ꓟ-ꓦ ꓔꓯ ꓠꓬ ꓣꓳ ꓬꓲ ꓔꓯ ꓒꓬꓱ ꓔꓳꓹ ꓟꓬ ꓔꓳꓹ ꓟꓳ ꓟꓽ ꓓ ꓥ ꓟꓲ ꓬꓲ ꓚꓱꓹ ꓣꓳ ꓢꓷꓸ ꓟꓽ ꓓ ꓥ ꓟꓲ ꓬꓲ ꓠꓬ ꓣꓳ ꓔꓯ ꓪꓴ-ꓢ ꓔꓯ ꓙꓵꓻ ꓐ ꓡ ꓠꓹ ꓟ ꓐꓱ ꓶ ꓠꓲꓹ ꓠꓵ ꓐ ꓡ ꓠꓹ ꓟ ꓐꓱ ꓶ ꓬꓲ ꓠꓬ ꓟꓬꓱꓽ ꓬꓰ ꓔꓬ ꓟ ꓥ ꓡꓳ= ꓟꓲ ꓠꓯ ꓕꓱ ꓟ ꓠꓬ ꓬꓲ ꓔꓯ ꓟꓳ_ ꓟꓲ ꓟꓽ ꓟꓳ ꓠꓬꓲ ꓢꓷꓸ ꓟꓲ ꓢꓷꓸ ꓟꓽ ꓘꓴ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓘꓳꓹ ꓣꓴ ꓢꓴ ꓠꓯꓼ ꓘꓴꓽ ꓗꓪ ꓢꓲ-ꓫꓬ-ꓟ-ꓦ ꓠꓬ ꓔꓬ ꓡꓳ= ꓮ ꓫꓵ ꓑꓶ ꓓꓴ ꓥ ꓡ꓾ ꓢꓲ-ꓫꓬ-ꓟ-ꓦ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓦ ꓥ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓬꓲ ꓦ ꓠꓬ ꓢꓲ-ꓫꓬ-ꓟ-ꓦ ꓥ ꓟ ꓑꓶ ꓓꓴ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓠꓯꓼ ꓘꓴꓽ ꓗꓪ ꓢꓲ-ꓫꓬ-ꓟ-ꓦ ꓠꓬ ꓚꓵ ꓘꓶꓽ ꓕ ꓟ ꓡꓰ ꓐꓰ ꓔꓬ ꓡꓳ= ꓣꓳ ꓔꓯ ꓙ ꓖꓴ ꓟꓳꓸ ꓖꓶ ꓔꓬ ꓡꓳ= ꓣꓳ ꓔꓯ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓠꓲꓹ ꓗꓳ ꓟꓬ ꓗꓳꓸ ꓖꓶ ꓔꓬ ꓡꓳ=
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ-ꓫꓬ-ꓟ-ꓦ ꓔꓯ ꓣꓳ ꓘꓳꓹ ꓣꓴ ꓠꓹ ꓟ ꓐꓱ ꓶ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓣꓳ ꓠꓲꓹ ꓟ ꓔꓯ ꓮ ꓕꓯ ꓥ ꓟꓲ ꓢꓲ ꓢꓲ ꓫꓬ ꓫꓬ ꓡꓰ ꓗꓷ ꓔ ꓡꓯ꓾ ꓖꓳ ꓟ ꓡꓰ ꓟꓽ ꓞꓲ ꓢꓲ ꓒ ꓬꓰ-ꓢꓬ ꓔꓯ ꓣꓳ ꓪ ꓙꓲ ꓙꓵꓻ ꓐ ꓡ ꓢꓲ ꓠꓬꓲ ꓢꓲ ꓒ ꓬꓰ-ꓢꓴꓔꓯ ꓣꓳ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓗꓷ ꓐ ꓡ ꓥꓳ ꓐꓰ ꓐꓯ ꓠꓬ ꓢꓲ-ꓫꓬ-ꓟ-ꓦ ꓠꓬ ꓣꓳ ꓠꓯꓼ ꓘꓴꓽ ꓗꓪ ꓟꓬꓱꓽ ꓬꓰ ꓔꓬ ꓟ ꓥ ꓡꓳ= ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓢꓲ-ꓫꓬ-ꓟ-ꓦ ꓔꓯ ꓟꓬꓱꓽ ꓟꓽ ꓖꓶ ꓬꓰ ꓟ꓾ꓢꓲ-ꓫꓬ-ꓟ-ꓦ ꓔꓯ ꓟꓽ ꓧꓳ ꓣꓱ ꓝꓲ ꓟ ꓑꓶ ꓓꓴ ꓢꓲ-ꓫꓬ-ꓟ-ꓦ ꓠꓬ ꓬꓲ ꓟꓬꓱꓽ ꓬꓰ ꓟꓽ ꓠ ꓐꓰ ꓗꓷ ꓔꓬ ꓡꓳ=ꓖꓳ ꓡꓱ ꓠꓬꓲ ꓣꓳ ꓦꓲꓻ ꓘꓴ ꓠꓯꓼ ꓗꓪ ꓣꓳ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓪꓴ ꓡ ꓟꓴ ꓡ ꓠꓹ ꓟ ꓐꓱ ꓶ ꓢꓲ-ꓫꓬ-ꓟ-ꓦ ꓔꓯ ꓣꓳ ꓔꓬ ꓖꓴ ꓖꓶ ꓢꓲ ꓠꓬꓲ ꓕꓱ ꓡꓱ ꓞꓳ ꓙꓳ ꓥꓳ ꓐꓯ ꓠꓬ ꓣꓳ ꓠꓬ ꓢꓲ-ꓫꓬ-ꓟ-ꓦ ꓬꓲ ꓢꓶꓽ ꓮ ꓟꓬꓹ ꓓꓱꓼ ꓡ ꓥꓳ ꓐꓰ ꓢꓷꓸ ꓙ ꓟꓳ ꓙ ꓖꓶ ꓩꓴ ꓡ ꓥꓳ=
