ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓴ ꓪ ꓙꓲꓻ ꓫꓬˍ ꓟ ꓠꓬ ꓒ‐ꓡꓲ‐ꓢꓷ ꓐꓴ ꓕꓯꓽ ꓢꓲ ꓟꓽ ꓥ ꓕꓯ ꓠꓽ ꓠꓴ ꓪ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓥ ꓡꓳ꓿
ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓟ‐ꓕꓲ 5ꓽ20‐25 ꓗꓪ ꓟ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓴ ꓪ ꓠꓬ ꓕꓳꓽ ꓶ ꓐꓳ ꓒꓽ ꓐꓰ ꓒ‐ꓡꓲ‐ꓢꓷ ꓐꓴ ꓙꓲꓻ ꓫꓬ, ꓟ ꓕꓯꓽ ꓢꓲ ꓟꓽ ꓥ ꓠꓬ ꓮ ꓡꓲ ꓥˍ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓓꓵꓽ ꓡꓰ꓿ ꓮ ꓠꓱ ꓡ ꓞꓳ ꓔꓯ ꓐꓯˍ ꓟ ꓠꓬ꓾ ꓞꓳ ꓤ ꓕꓽ ꓢꓰꓼ꓿ ꓞꓳ ꓤ ꓢꓰꓼˍ ꓕꓯ ꓠꓬ ꓠꓴ ꓪ ꓠꓽ ꓛꓬꓼ ꓟꓵꓽ ꓗꓪ ꓙꓰ ꓪˍ ꓥꓳ꓿ ꓠꓴ ꓪ ꓠꓽ ꓐꓯ ꓟꓴ ꓘꓶˍ ꓟ ꓟꓶˍ ꓥꓳ꓾ ꓐꓰ ꓐꓯˍ ꓟ ꓠꓴ ꓪ ꓢꓷ.ˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓥꓪ ꓠꓴ ꓪ ꓔꓯ ꓐꓯ ꓖꓶˍ ꓠꓬꓲ ꓬꓲ ꓬꓲꓼ ꓬꓲ ꓠꓬꓲ ꓕꓲꓽ ꓣꓳ ꓔꓯ꓾ ꓞꓳ ꓪꓴ.꓾ ꓐꓰ ꓐꓯ ꓢꓴ ꓠꓽ ꓐꓯ ꓟꓴ ꓘꓶˍ ꓟ ꓟꓶˍ ꓥꓳ꓿ ꓬꓲ ꓬꓲꓼ ꓬꓲ ꓠꓬꓲ ꓕꓲꓽ ꓣꓳ ꓔꓯ ꓠꓲ, ꓟ ꓦꓶ ꓢꓴ ꓥˍ ꓟꓲ ꓐꓯ ꓟꓴ ꓘꓶˍ ꓟ ꓗꓪ ꓐꓰ ꓡꓲ, ꓗꓷ ꓟꓽ ꓓ꓿
ꓕꓱ ꓟˍ ꓡꓰꓽ ꓟꓽ ꓞꓲ ꓬꓲ ꓬꓲꓼ ꓬꓲ ꓠꓬꓲ ꓕꓲꓽ ꓣꓳ ꓔꓯ꓾ ꓠꓴ ꓠꓬ ꓞꓳ ꓟꓶꓻ ꓞꓳ ꓥꓼ꓾ ꓮ ꓫꓵꓽˍ ꓟꓽ ꓑꓳꓽ ꓡꓳ ꓢꓴ ꓐꓰ꓾ ꓕꓱ ꓡꓱ ꓐꓯ ꓢꓴ ꓥ ꓟꓲ ꓮ ꓔꓳ. ꓛꓬꓼ ꓟꓵꓽ ꓪꓳꓽ ꓟꓵꓽ ꓗꓪ ꓐꓰ ꓡꓲ, ꓗꓷ ꓟꓽ ꓓ꓾ ꓐꓰ ꓢꓲ ꓒ ꓬꓰ‐ꓢꓴ ꓢꓲꓽ ꓢꓲꓽ ꓡꓰꓽ ꓐꓯˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ ꓢꓲ ꓒ ꓬꓰ‐ꓢꓴ ꓠꓬ꓾ ꓒ‐ꓡꓲ‐ꓢꓷ ꓐꓴ ꓕꓯꓽ ꓢꓲ ꓠꓴ ꓪ ꓟꓽ ꓙꓲꓻ ꓫꓬ ꓕꓯ ꓠꓽ ꓟꓴꓽ ꓗꓪ ꓗꓴꓷꓼ ꓗꓪ ꓮ ꓡꓲ ꓥ ꓟꓲ ꓟꓽ ꓓꓵꓽ ꓡꓰ꓾ ꓐꓰ ꓐꓯˍ ꓟ ꓬꓲ. ꓬꓲ ꓢꓲ ꓠꓬ ꓒ‐ꓡꓲ‐ꓢꓷ ꓐꓴ ꓠꓬ ꓮ ꓡꓲ ꓗ, ꓡ ꓐꓰ ꓐꓯˍ ꓠꓬ꓾ ꓡ ꓞꓳ ꓕꓽ ꓢꓰꓼ ꓐꓯˍ ꓟ ꓙꓵꓽ ꓗ ꓔꓯ ꓬꓲ ꓪ ꓢꓷ.ˍ ꓡꓳ꓿ ꓡ ꓞꓳ ꓢꓰꓼˍ ꓕꓯ ꓠꓽ ꓮ ꓔꓳ. ꓛꓬꓼ ꓟꓵꓽ ꓥ ꓠꓬ꓾ ꓐꓯ ꓟꓴ ꓘꓶˍ ꓟ ꓗꓪ ꓐꓰ ꓡꓲ, ꓗꓷ ꓟꓽ ꓐ ꓡ ꓐꓯˍ ꓟ ꓔꓯ ꓥ ꓟꓲ꓾ ꓒ‐ꓡꓲ‐ꓢꓷ ꓐꓴ ꓢꓷ.ˍ ꓡꓳ꓿ ꓕꓱ ꓟ ꓑꓶ. ꓓꓴ ꓒ‐ꓡꓲ‐ꓢꓷ ꓐꓴ ꓠꓬ ꓡ ꓞꓳ ꓟꓽ ꓢꓰꓼ꓿ ꓖꓳ ꓡꓱ ꓐꓯ ꓥ ꓟꓲ ꓒ‐ꓡꓲ‐ꓢꓷ ꓐꓴ ꓠꓬ ꓮ ꓡꓲ ꓬꓰˍ ꓡ ꓐꓰ ꓐꓯˍ ꓠꓬ꓾ ꓬꓲ ꓬꓲꓼ ꓬꓲ ꓠꓬꓲ ꓔꓯ ꓠꓴ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓗꓴ. ꓢꓴ꓾ ꓠꓴ ꓠꓬ ꓮ ꓫꓵꓽˍ ꓟꓲ ꓟꓽ ꓑꓳꓽ ꓡꓳꓽ ꓢꓴ꓾ ꓠꓴ ꓠꓬ ꓞꓳ ꓟꓶꓻ ꓞꓳ ꓥꓼ꓾ ꓠꓴ ꓠꓬ ꓡꓽ ꓚꓬ ꓥ ꓠꓬ ꓞꓳ ꓪꓴ.꓾ ꓥ ꓠꓬ ꓒ‐ꓡꓲ‐ꓢꓷ ꓐꓴ ꓠꓬ ꓬꓲ. ꓬꓲꓼ ꓬꓲ ꓠꓬꓲ ꓔꓯ ꓠꓲ, ꓟ ꓮ ꓘꓶ. ꓦꓶˍ ꓡꓳ꓿ ꓕꓱ ꓟ ꓑꓶ. ꓓꓴ ꓕꓱ ꓡꓱ ꓬꓰ ꓢꓴ ꓥˍ ꓟꓲ ꓞꓳ ꓤ ꓢꓰꓼˍ ꓟ ꓔꓯ ꓫꓱ.ˍ ꓡꓳ꓿
ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓣꓳ ꓔꓯ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓒ‐ꓡꓲ‐ꓢꓷ ꓐꓴ ꓠꓬ ꓡ ꓞꓳ ꓖꓳ ꓓꓱꓽ ꓢꓰꓼˍ ꓟ ꓟꓽ ꓥ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓐꓰ ꓬꓲ. ꓬꓲꓼ ꓬꓲ. ꓠꓬꓲ ꓔꓯ ꓠꓲ, ꓟ ꓗꓪ ꓐꓰ ꓢꓰꓼ ꓔꓬ ꓟ ꓥ ꓡꓳ꓿ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓐꓯ ꓢꓰꓼ ꓔꓬ ꓟˍ ꓟꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ꓾ ꓣꓳ ꓧꓪꓽ ꓖꓳ ꓓꓱꓽ ꓗꓪ ꓐꓰ ꓢꓰꓼˍ ꓟ ꓡꓰꓽ ꓟꓽ ꓥ꓾ ꓠꓲ, ꓟ ꓗꓪ ꓐꓰ ꓢꓰꓼ ꓗꓷˍ ꓥꓳ ꓠꓲ, ꓟ ꓗꓪ ꓐꓰ ꓛꓬ ꓗꓷˍ ꓥꓳ ꓐꓯˍ ꓟ ꓖꓳ ꓕꓲꓽ ꓣꓳ ꓥ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓮ ꓡꓲ ꓥ ꓟꓲ ꓟꓽ ꓓꓵꓽ ꓡꓰ꓾ ꓐꓯ ꓟ ꓣꓳ ꓔꓯ ꓐꓯ ꓟ. ꓖꓶ ꓡ ꓔꓬ ꓟ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓠꓬ ꓧꓪꓽ ꓖꓳ ꓓꓱꓽ ꓙꓰ ꓢꓲ ꓠꓬꓲ ꓢꓴ ꓔꓯ ꓣꓳꓽ ꓟꓽ ꓙꓲꓻ ꓟ ꓟꓽ ꓬꓰ꓿ ꓢꓴ ꓔꓯ ꓣꓳꓽ ꓟꓽ ꓢꓰꓼ꓾ ꓢꓴ ꓔꓯ ꓟꓽ ꓓꓶꓽ ꓟꓽ ꓔꓲ. ꓢꓴ ꓔꓯ ꓣꓳꓽ ꓮ ꓫꓵꓽˍ ꓟꓲ ꓟꓽ ꓬꓰ꓿ ꓖꓳ ꓡꓱ ꓐꓯ ꓥ ꓟꓲ ꓣꓳꓽ ꓠꓲ, ꓟ ꓗꓪ ꓐꓰ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓠꓲ, ꓟ ꓦꓶ ꓢꓲ ꓠꓬꓲ ꓟꓽ ꓜꓳꓽ ꓟꓽ ꓙꓲꓻ ꓐꓯˍ ꓥꓳ ꓐꓯ ꓠꓬ꓾ ꓣꓳ ꓠꓬ ꓮ ꓡꓲ ꓥˍ ꓟꓲ ꓐꓯ ꓟꓴ ꓘꓶˍ ꓟ ꓗꓪ ꓐꓰ ꓡꓲ, ꓗꓷ ꓟꓽ ꓐ ꓡ꓿ ꓣꓳ ꓠꓬ ꓒ‐ꓡꓲ‐ꓢꓷ ꓐꓴ ꓐꓰ ꓕꓲꓽ ꓡꓰ, ꓗꓷ ꓡꓰˍ ꓥꓳ꓿
ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ꓾ ꓡ ꓞꓳ ꓖꓳ ꓓꓱꓽ ꓡꓰ ꓢꓴ ꓔꓯ ꓟꓽ ꓓꓶꓽ ꓟꓽ ꓔꓲ. ꓟꓽ ꓢꓰꓼ ꓟ ꓡꓰꓽ ꓟꓽ ꓞꓲ꓾ ꓬꓳ. ꓚꓰꓽ ꓓꓰ ꓡꓰˍ ꓟ ꓠꓬ ꓣꓳ ꓠꓬ ꓠꓲ, ꓟ ꓗꓪ ꓐꓰ ꓥ ꓟꓲ ꓣꓳ ꓠꓬ ꓢꓲꓽ ꓢꓲꓽ ꓫꓬ ꓫꓬ ꓡꓰꓽ ꓗꓷ ꓪˍ ꓟ ꓥ ꓡꓳ꓿ ꓮ ꓡꓲ ꓐꓰ ꓗꓷ ꓪˍ ꓡ ꓐꓯ ꓠꓬ꓾ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓣꓳ ꓔꓱ, ꓚꓵˍ ꓟ꓾ ꓣꓳ ꓬꓲꓼ ꓤ ꓠꓬꓲ ꓤ ꓚꓵ ꓕꓲ ꓡꓰ, ꓠꓲ, ꓠꓵ ꓠ, ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓮ ꓝꓲ. ꓞꓲꓽ ꓔꓱ, ꓔꓱ, ꓚꓵ ꓚꓵ ꓬꓰ ꓝꓲ ꓠꓲ, ꓫꓵˍ ꓟ ꓠꓬ ꓣꓳ ꓬꓲꓼ ꓤ ꓠꓬꓲ ꓤ ꓐꓴ꓾ ꓣꓳ ꓠꓶꓽ ꓛꓳꓽ ꓐꓴ ꓔꓯ ꓬꓲꓼ ꓤ ꓠꓬꓲ ꓤ ꓐꓴ ꓕꓲꓽ ꓡꓰ, ꓐꓰ ꓣꓳ ꓠꓲ, ꓠꓵ ꓠ, ꓟ꓾ ꓖꓳ ꓡꓱ ꓐꓰ ꓣꓳ ꓟꓳꓻ ꓠ, ꓟ꓾ ꓖꓳ ꓡꓱ ꓐꓰ ꓣꓳ ꓬꓲꓼ ꓤ ꓠꓬꓲ ꓤ ꓐꓴ ꓐꓰ ꓣꓳ ꓠꓲ, ꓟ ꓠꓯꓸꓼ ꓗꓪ ꓘꓳ ꓣꓴ ꓐ ꓡ ꓠ, ꓟ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓕꓱ ꓡꓱ ꓬꓰ ꓝꓲ ꓠꓲ, ꓫꓵˍ ꓟ ꓥ ꓡꓳ꓿
ꓠꓴ ꓠꓬ ꓥꓪ ꓤ ꓥꓪ ꓬꓲꓼ ꓥꓪ ꓠꓬꓲ ꓥꓳ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳ ꓔꓯ ꓕꓱ ꓡꓱ ꓘꓳ ꓣꓴˍ ꓟ ꓡꓰ ꓐꓰ꓾ ꓣꓳ ꓥ ꓟꓲ ꓣꓳ ꓬꓲꓼ ꓣꓳ ꓠꓬꓲ ꓣꓳ ꓠꓶꓽ ꓛꓳꓽ ꓐꓴ ꓔꓯ ꓮ ꓡꓰ ꓓ, ꓥ ꓟꓲ ꓣꓳ ꓠꓬ ꓠꓵꓻ ꓠꓲ, ꓗꓪ ꓐꓰ ꓘꓳ ꓣꓴ ꓠ, ꓟ ꓥ ꓡꓳ꓿ ꓖꓳ ꓡꓱ ꓥ ꓕꓯ ꓠꓽ ꓣꓳ ꓠꓬ ꓐꓯ ꓟꓴ ꓘꓶˍ ꓟ ꓔꓯ ꓡꓲ, ꓗꓷ ꓢꓲ ꓠꓬꓲ ꓣꓳ ꓠꓵꓻ ꓠꓲ, ꓗꓪ ꓐꓰ ꓢꓯꓼ ꓔꓬ ꓟ ꓑꓶ. ꓓꓴ ꓖꓳ ꓗꓪ ꓠꓬ ꓮ ꓘꓶ. ꓙꓲˍ ꓟ ꓪꓴ‐ꓢ ꓤ ꓠꓱ ꓐꓴ ꓒꓬꓱꓼ ꓡˍ ꓥꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓟ ꓬꓲ ꓠꓲ, ꓡꓶꓽ ꓥ ꓡꓳ꓿
