ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓑꓮꓲꓽ
ꓠꓬꓲ ꓠꓬꓲ. ꓠꓬꓲ ꓠꓬ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓑꓮꓲꓽ ꓠꓬꓲ. ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ (14ꓽ15‐16/ 23‐26 ) ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ʼꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓥꓪ ꓔꓯ ꓠꓲ, ꓠꓵ ꓠꓬ ꓥꓪ ꓕꓵꓼ ꓪ ꓠꓴ ꓪ ꓒꓵꓽ ꓛꓳˍ ꓥꓳ꓿
ꓐ, ꓐ ꓡꓰ ꓠꓲ, ꓗꓴ ꓖꓶ ꓢꓴ ꓬꓲ ꓔꓱ ꓬꓲ ꓕꓲ ꓣꓳ ꓠꓴ ꓪ ꓔꓯ ꓖꓶ ꓡ ꓠ, ꓟ ꓥꓪ ꓡꓰ ꓬꓲ ꓔꓯ ꓓꓰꓽ ꓥꓳ꓿ ꓬꓲ ꓠꓬ ꓠꓴ ꓪ ʼꓐꓰ ꓕꓲ ꓞꓲꓼ ꓕꓲ ꓑ ꓔꓬ ꓥꓳ ꓐꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓟ ꓑꓮꓲꓽ ꓐꓰ ꓢꓲ‐ꓫꓬ‐ꓟ‐ꓦ ꓟꓲ ꓠꓯ ꓗꓪ ꓬꓲꓼ ꓡ ꓟ ꓑꓮꓲꓽ ꓠꓬ ꓮ ꓘꓶ. ꓛꓲ ꓠꓲ, ꓡꓯꓽ ꓘꓳ, ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓐꓱ ꓶ ꓮ ꓘꓶ. ꓣꓳ ꓚꓵ. ꓟ ꓑꓮꓲꓽ ꓥ ꓟ ꓢꓯ. ꓬꓲꓼ ꓡ ꓟ ꓑꓮꓲꓽ ꓬꓰ ꓓꓳ ꓗ. ꓠꓯ (50) ꓦꓬꓼ ꓕꓯ ꓢꓲ‐ꓫꓬ‐ꓟ‐ꓦ ꓟꓲ ꓠꓯ ꓗꓪ ꓬꓲꓼ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓡꓯ ꓫꓴ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓞꓳ ꓙꓳ ꓟ ꓤꓶꓻ ꓗꓪ ꓮ ꓘꓶ. ꓛꓲ ꓣꓳ ꓚꓵ. ꓟ ꓥ ꓡꓳ꓿ ꓝꓮꓲ ꓢꓲ‐ꓫꓬ‐ꓟ‐ꓦ ꓐꓰ ꓧ, ꓡꓰ ꓠꓬ ꓣꓳ ꓠꓬꓲ ꓫꓵꓻ ꓔꓬ ꓟ ꓕꓲ ꓡꓰ ꓥ ꓟꓲ ꓫꓱ ꓡꓯꓽ ꓘꓳ, ꓟ ꓔꓯ ꓤ ꓟꓳ ꓠ, ꓟ ꓣꓳ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓟꓽ ꓓꓯ ꓙꓰ ꓢꓲ ꓕꓯ ꓬꓲ ꓝꓲ ꓓꓴ ꓐꓴ ꓕꓯ ꓥꓪ ꓙꓰ ꓠꓬ ꓠꓴ ꓪ ꓐꓱ ꓶ ꓟꓬ, ꓠꓬꓲ ꓙꓲ ꓡꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓟꓽ ꓙꓰ ꓠꓬ ꓠꓲ, ꓟ ꓗꓴ ꓖꓶ ꓢꓴ ꓠꓴ ꓪ ꓔꓯ ꓽ ꓡ ꓐꓰ ꓐꓯ ꓡꓳ꓿ (ʼꓬꓳ‐ꓦ 16ꓽ7) ꓗꓪ ꓡꓳ. ꓟꓳ ꓪ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰ ꓗ. ꓠꓯ (10) ꓦꓬꓼ ꓕꓯ ꓝꓲ ꓓꓴ ꓐꓴ ꓐꓰ ꓡ ꓞꓳ (120) ꓣꓳ ꓐꓴ ꓕꓲ ꓪ ꓔꓬ ꓟ ꓙꓵ, ꓕꓯ ꓢꓲ‐ꓫꓬ‐ꓟ‐ꓦ ꓠꓬ ꓮ ꓔꓳ. ꓡꓰ ꓐꓰ ꓬꓲ ꓪ ꓕꓯ ꓢꓲ ꓬꓯꓼ ꓡ ꓟ ꓥ ꓡꓳ꓿
ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓯ ꓫꓴ (7) ꓫꓵꓽ ꓥ ꓟ ꓙꓼ ꓜꓲꓼ ꓠꓲ, ꓢꓷ. ꓠꓲ,꓾ ꓙ ꓗꓳ ꓠꓲ, ꓠꓵꓻ ꓠꓲ, ꓧꓳꓽ ꓪꓴ ꓟꓴ ꓗꓴ. ꓟ ꓢꓷ. ꓠꓲ,ʼ꓾ ꓜ ꓘꓴˍ ꓠꓲ, ꓢꓷ. ꓠꓲ, ꓔꓯ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓖꓶ ꓔ ꓟ ꓥ ꓡꓳ꓿ ꓖꓳ ꓟ ꓡꓰ ꓟꓽ ꓞꓲ ꓢꓲ‐ꓫꓬ‐ꓟ‐ꓦ ꓖꓶ ꓟ ꓡꓯ ꓫꓴ ꓐꓰ ꓣꓱ ꓛꓰ ꓡꓯ ꓫꓴ (12) ꓫꓵꓽ ꓔꓯ ꓥ ꓟ ꓠꓵꓻ ꓠꓲ,꓾ ꓗ, ꓛꓲ ꓠꓲ,꓾ ꓢꓲ ꓡꓲ ꓟ꓾ ꓠꓲ, ꓟ ꓫꓵˍ ꓟ꓾ ꓚꓲ. ꓛꓬ ꓙꓲꓻ ꓫꓬ ꓟ꓾ ꓜꓲꓽ ꓘꓴ ꓠꓲ, ꓥ ꓡꓳ꓿
ꓪꓴ‐ꓢ ꓶ ꓓꓳꓽ ꓫꓱ, ꓓꓳꓽ ꓔꓯ ꓚꓺ ꓟ. ꓖꓶ ꓠ, ꓟ ꓞꓳ ꓫꓵꓽ ꓪ ꓟꓽ ꓪ ꓮ ꓙꓵꓽ ꓔꓯ ꓚꓺ ꓟ. ꓖꓶ ꓠ, ꓟ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ ꓘꓶ. ꓣꓱ ꓬꓯꓼ ꓟ ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓖꓶ ꓡ ꓟ ꓣꓱ ꓛꓰ ꓡꓯ ꓫꓴ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓬꓲ ꓧꓪꓽ ꓖꓳ ꓓꓱ ꓥ ꓟ ꓬꓲ ꓘꓴ ꓜꓲꓼ ꓞꓳ ꓥ ꓟꓲ ꓬꓲ ꓗ. ꓠꓯ ꓢꓲ ꓞꓳ ꓢꓴ ꓙꓲ‐ꓢꓴ ꓢꓲꓺ ꓤ ꓐꓴ ꓕꓯ ꓢꓲ ꓔꓱ ꓚꓵˍ ꓟ ꓐꓰ ꓠꓬꓲ. ꓠꓬꓲ ꓗꓪ ꓛꓲ ꓧꓪ ꓪꓴ. ꓟꓴ ꓔꓬ ꓟ ꓥ ꓡꓳ꓿ ꓮʼꓟꓶ ꓣꓳ ꓔꓬ ꓟ ꓦꓬꓼ ꓠꓬꓲ ꓠꓬ (ꓮꓲ) ꓐꓰ ꓟꓬꓱꓺ ꓔ ꓟ ꓙꓼ ꓪꓴ. ꓠꓲ, ꓠꓬ ꓮ ꓘꓶ. ꓛꓲ ꓣꓱ ꓡ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓟꓲ ꓠꓯ ꓡ ꓞꓳ ꓐꓴ ꓗꓳ. ꓡꓳ ꓗꓪ ꓥ ꓟꓲ (ꓮꓲ) ꓡꓰ ꓖꓪ ꓫꓵꓽ ꓡ ꓟ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓗꓳ. ꓡꓳ ꓗꓪ ꓠꓬ (ꓮꓲ) ꓕꓯ ꓢꓲ ꓪ ꓠꓬꓲˍ ꓟ (ꓧꓲ) ꓟꓬꓱꓺ ꓔ ꓟ (ꓧꓳꓡꓬ ꓢꓑꓲꓣꓲꓔ ꓲꓠꓔꓰꓡꓡꓲꓖꓰꓠꓚꓰ ) ꓡꓰ ꓣꓳ ꓕꓲ ꓣꓳ ꓛꓳ ꓕꓲ ꓣꓳ ꓢꓯ. ꓔꓬ ꓟ ꓤꓶꓻ ꓠꓯ, ꓗꓪ ꓧꓳꓽ ꓪꓴ. ꓟꓴ ꓝꓲ ꓠ, ꓟ ꓣꓳ ꓬꓯꓼ ꓟ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓠꓲ, ꓥ ꓡ ꓐꓯ ꓠꓬ (ꓮꓲ) ꓠꓬ ꓙꓼ ꓠꓯ, ꓗꓪ ꓡ ꓞꓳ ꓡꓰ ꓖꓶ ꓔ ꓟ ꓡꓰ ꓐꓯ ꓐ ꓡ ꓟ ꓥ ꓡꓳ꓿ ꓧꓲ (ꓢꓲ‐ꓫꓬ‐ꓟ‐ꓦ) ꓪꓴ‐ꓢ ꓠꓬ ꓣꓳ ꓞꓳ ꓙꓳ ꓢꓯ. ꓔꓬ ꓟ ꓗꓪ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓒꓬꓱꓼ ꓔꓬ ꓟ ꓫꓵꓽ ꓪꓴꓽ ꓐꓰ ꓐꓰ ꓔꓱ ꓚꓵˍ ꓟ ꓔꓯ ꓮ ꓕꓯ ꓥ ꓟꓲ ꓟꓽ ꓐꓬ ꓡꓰ ꓟꓽ ꓟꓶ ꓡꓰ ꓕꓲ ꓞꓲꓼ ꓕꓲ ꓑ ꓔꓱ ꓚꓵˍ ꓟ ꓡꓰ ꓢꓯ. ꓔꓬ ꓟ ꓪꓴ. ꓠꓬꓲ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓞꓳ ꓙꓳ ꓟ ꓤꓶꓻ ꓠꓯ, ꓗꓪ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓔꓯ ꓣꓳ ꓤꓶꓻ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓣꓳ ꓠꓲ, ꓟ ꓗ, ꓘꓶꓽ ꓒꓴ ꓔ ꓓꓴ ꓬꓰ ꓡꓯ꓿ ꓬꓲ ꓔꓯ ꓘꓴ ꓓꓴ ꓬꓰ ꓡꓯ꓿ ꓬꓲ ꓔꓯ ꓬꓲ ꓙꓵ, ꓖꓶ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿ ‘
