ꓗ, ꓛꓲꓽ ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓐꓴ
ꓡ ꓞꓳ ꓕꓲꓽ ꓣꓳ ꓔꓬ, ꓢꓻˍ ꓐꓯˍ ꓟ ꓠꓬ ꓚꓵ ꓚꓵ ꓠꓬ ꓔꓬ, ꓢꓻ ꓠ, ꓟ ꓜꓽˍ ꓟ꓾ ꓔꓬ, ꓢꓻ ꓠ, ꓟ ꓣꓱꓽ ꓬꓰˍ ꓟ ꓬꓲ ꓫꓱ, ꓙꓳˍ ꓟ ꓪꓴ. ꓠꓬꓲ ꓥ ꓡꓳ꓿ ꓔꓬ, ꓢꓻˍ ꓟ ꓠꓬ ꓬꓲ ꓓꓻ ꓬꓲ ꓬꓲ ꓔꓱ, ꓬꓲ ꓟꓶ ꓔ ꓟ ꓡꓯꓼ ꓫꓴ ꓕꓲꓽ ꓟ ꓥ ꓐꓯˍ ꓥ ꓟꓲ꓾ ꓡꓯꓼ ꓫꓵ ꓔꓬ, ꓢꓻ ꓠ ꓗꓪꓼ ꓫꓵꓼ ꓠ, ꓟ ꓣꓳꓽ ꓔꓯ ꓶꓻ ꓙꓳˍ ꓟ ꓥ ꓡꓳ꓿ ꓕꓱ ꓕꓲꓽ ꓧꓪ, ꓠꓬ ꓮ ꓙꓵꓽ ꓔꓬ, ꓢꓻ ꓠ, ꓟ ꓐꓱ ꓶ ꓢꓷ. ꓠ ꓔ ꓟ ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓔꓯ ꓐꓯ ꓟ. ꓖꓶ ꓩꓴ ꓡˍ ꓥꓳ꓿
ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓐꓯˍ ꓟ ꓠꓬ ꓮ ꓫꓵꓽ ꓥ ꓡ
ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓐꓯˍ ꓟ ꓠꓬ ꓧꓪꓽ ꓖꓳ ꓓꓱꓽ ꓕꓲ ꓒꓳ,꓾ ꓠꓲ, ꓟ ꓕꓲꓽ ꓒꓳ, ꓐꓰ ꓠꓲ, ꓟ ꓓꓵꓽ ꓙꓽ ꓚꓱ, ꓕꓲꓽ ꓒꓳ, ꓗꓪ ꓙꓲꓻ ꓖꓴ ꓙꓳ ꓠ, ꓟ ꓣꓱꓽ ꓬꓰ ꓚꓱ, ꓔꓯ ꓐꓯˍ ꓟ ꓥ ꓡꓳ꓿ ꓬꓲ ꓪꓴ. ꓮ ꓒ ꓬꓰˍ ꓕꓯ ꓠꓬ ꓖꓳ ꓟꓬ ꓒꓳ ꓡꓶ. ꓙꓰˍ ꓟ ꓔꓯ ꓟꓽ ꓚꓬ, ꓪ꓿ ꓖꓳ ꓡꓱ ꓥ ꓟꓲ ꓟꓶ ꓫꓵ ꓡˍ ꓕꓯ ꓕꓱ ꓡꓱ ꓮ ꓔꓲ. ꓤ ꓟ ꓣꓳˍ ꓟ ꓬꓲ. ꓫꓱ, ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻˍ ꓟ ꓞꓳ ꓙꓳ ꓚꓱ, ꓔꓯ ꓟꓶ ꓡꓰ ꓝꓲ ꓐ ꓡˍ ꓟ ꓥ ꓡꓳ꓿
ꓕꓱ ꓗꓪ ꓣꓳ ꓚꓲ. ꓔ ꓓꓴ ꓕꓲꓽ ꓫꓵꓽ ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓣꓱꓽ ꓬꓰ ꓚꓱ, ꓔꓯ ꓕꓲ ꓝ. ꓗ ꓠꓯ. ꓕꓲ ꓝ. ꓬꓰ ꓪˍ ꓡꓳ꓾ ꓐꓯˍ ꓟ ꓥ ꓡꓳ꓿ ꓔꓬ, ꓢꓻˍ ꓟ ꓬꓲ ꓫꓱ, ꓣꓱꓽ ꓬꓰ ꓚꓱ, ꓔꓯ ꓟꓶ ꓤ ꓬꓰ ꓖꓶˍ ꓟ ꓠꓬ ꓗ, ꓛꓲꓽ ꓔꓬ, ꓢꓻˍ ꓟ ꓞꓳ ꓙꓳ ꓚꓱ, ꓔꓯ ꓟꓶ ꓡꓰ ꓝꓲˍ ꓟ ꓥ ꓡꓳ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓟ ꓞꓳ ꓤ ꓮ ꓟꓬ, ꓠꓬ ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓣꓱꓽ ꓬꓰ ꓚꓱ, ꓢꓶ. ꓟꓽ ꓞꓲ ꓖꓳ ꓓꓱꓽ ꓔꓬ, ꓢꓻ ꓝꓲˍ ꓟ ꓔꓯ ꓐꓬ ꓡꓰ ꓝꓲˍ ꓟ ꓚꓱ, ꓬꓲ ꓫꓱ, ꓔꓯ ꓡꓰꓽ ꓬꓰ ꓔꓬ ꓟ ꓟꓬꓽ ꓠꓬꓲ ꓥ ꓡꓳ꓿
ꓝꓮꓲ ꓕꓲꓽ ꓚꓱ, ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓟꓽ ꓢꓻ ꓝꓲ ꓟ ꓚꓱ, ꓔꓯ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓡꓰ ꓝꓲˍ ꓟ ꓚꓱ, ꓡꓰ ꓐꓰ ꓣꓱꓽ ꓬꓰ ꓔꓬ ꓟ ꓥ ꓡꓳ꓿ ꓔꓯꓺ ꓥꓳꓽ ꓕꓲꓽ ꓠꓬꓲ ꓗꓪ ꓬꓲ ꓗꓳ (ꓛꓵꓼ ꓡꓱ) ꓠꓬꓲꓽ ꓕꓴꓽ 3 ꓕꓴꓽ ꓛꓵꓼˍ ꓟ ꓠꓬ꓾ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓑꓶ. ꓓꓴ ꓕꓲꓽ ꓠꓬꓲ ꓗꓪ ꓕꓲꓽ ꓕꓴꓽˍ ꓡꓰꓽ ꓛꓵꓼˍ ꓠꓬ ꓔꓬ, ꓢꓻ ꓓꓴ ꓐꓱ ꓶ ꓬꓲ ꓫꓱ, ꓕꓲꓽ ꓟ ꓣꓱꓽ ꓬꓰ ꓚꓱ, ꓕꓲꓽ ꓟ ꓥ ꓡꓳ꓾ ꓐꓰ ꓓꓵꓽ ꓙ ꓟꓶ ꓔꓬ ꓡꓳ꓿
ꓚꓵ ꓚꓵ ꓬꓲꓻ ꓗꓳ ꓛꓵꓼ (ꓛꓵꓼ ꓡꓱ ꓛꓵꓼ)ˍ ꓟ ꓠꓬ ꓧꓪꓽ ꓖꓳ ꓓꓱꓽ ꓐꓱ ꓶ ꓟꓽ ꓙꓲꓻ ꓟ ꓥ ꓡꓳ꓿
ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓣꓱꓽ ꓬꓰ ꓚꓱ, ꓠꓬ ꓬꓲ ꓪꓴ. ꓬꓰ ꓪꓴ. ꓔꓴˍ ꓕꓯ ꓬꓰ ꓫ. ꓓꓴ ꓙꓳˍ ꓐꓯ ꓥ ꓟꓲ꓾ ꓟꓶ ꓤ ꓗꓪ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓮ ꓘꓶ. ꓙꓲꓻ ꓡ ꓝꓲˍ ꓡꓳ꓾ ꓐꓰ ꓢꓷ. ꓪ ꓡꓳ꓿
ꓣꓳꓽ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓗꓪ ꓗ, ꓛꓲꓽ ꓔꓬ, ꓢꓻ ꓠ, ꓟ ꓐꓱ ꓶ ꓠꓬ꓾ ꓮ ꓟꓶ ꓐꓯ ꓟꓳ. ꓖꓶˍ ꓟ ꓚꓱ, ꓐꓴ ꓔꓯ ꓦꓵꓻ ꓠ ꓔ ꓟ ꓥ ꓡꓳ꓿
ꓠꓯꓼ ꓜꓻ ꓜꓽ
ꓠꓯꓼ ꓠꓯꓼ ꓕꓯ ꓜꓽ ꓓꓴ ꓜꓽˍ ꓟ ꓠꓬ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓓꓴ ꓔꓯ ꓟꓬꓽ ꓠꓬꓲ ꓬꓰ ꓙ ꓔꓳ, ꓙ ꓖꓶˍ ꓟ ꓥ ꓡꓳ꓿ ꓔꓬ, ꓢꓻˍ ꓝꓲˍ ꓟ ꓗꓪ ꓟꓽ ꓓꓻ ꓬꓳ. ꓚꓰꓽˍ ꓟ ꓚꓱ, ꓕꓲꓽ ꓟ ꓥ ꓡꓳ꓿ ꓠꓯꓼ ꓠꓯꓼ ꓕꓯ ꓠꓯꓼ ꓜꓻ ꓜꓽˍ ꓟ ꓠꓬ ꓖꓳ ꓓꓱꓽ ꓠꓯꓸꓼ ꓗꓪ ꓪꓴꓽ ꓡ ꓟꓴ ꓡ ꓚꓱ, ꓔꓯ ꓢꓯꓼ ꓡꓴꓽ ꓖꓶ ꓢꓲ ꓠꓬꓲ꓾ ꓕꓲꓽ ꓠꓬꓲ ꓡꓱꓸꓼ ꓗꓪ ꓢꓺ ꓡꓰ ꓠ ꓟꓽ ꓜꓽ ꓪ ꓡꓰ ꓠ, ꓟ ꓐꓱ ꓶ ꓗꓽ ꓕ. ꓙ ꓖꓶˍ ꓟ ꓥ ꓡꓳ꓿
ꓠꓯꓼ ꓜꓻ ꓮ ꓕꓯ ꓟꓲ ꓜꓽ ꓢꓴ ꓐꓴ ꓠꓬ ꓟꓬꓱꓽ ꓔꓯ ꓪ ꓜꓲ ꓬꓰ ꓐ ꓡˍ ꓟ ꓡꓰ ꓐꓰ ꓓꓵꓽ ꓙꓽ ꓙꓽ ꓜꓲꓼ ꓟ ꓗꓪ ꓥ ꓟꓲ ꓪ ꓜꓲ ꓙꓲꓻ ꓡˍ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓔꓬ, ꓢꓻ ꓠꓲ, ꓫꓵˍ ꓠꓬ ꓕꓲ ꓠꓬꓲ ꓐꓱ ꓶ ꓬꓳ. ꓚꓰꓽˍ ꓟ ꓠꓯꓼ ꓜꓻ ꓔꓯ ꓟꓽ ꓓꓻ ꓟꓽ ꓞꓽ ꓜꓽ ꓠ ꓔ ꓟ ꓥ ꓡꓳ꓿
ꓪꓴꓽ ꓧꓶ ꓠꓽ
ꓔꓬ, ꓢꓻ ꓢꓴ ꓮ ꓙꓵꓽ ꓠꓬ ꓟꓬꓱꓽ ꓬꓰ ꓙꓵ, ꓠꓽ ꓙꓵ, ꓕꓱ ꓡꓱ ꓘꓶꓽ ꓔ ꓟ ꓥ ꓡꓳ꓿ ꓪꓴꓽ ꓧꓶ ꓠꓽˍ ꓐꓯˍ ꓟ ꓗꓪ ꓑꓧꓳꓠꓰ ꓣꓱꓽˍ ꓟ꓾ ꓦꓲꓓꓰꓳ ꓡꓳ. ꓠꓬꓲˍ ꓟ ꓕꓱ ꓡꓱ ꓫꓵꓽ ꓟꓽ ꓬꓰ ꓬꓰ ꓐꓰ ꓒ ꓐꓲ ꓠꓽˍ ꓟ ꓔꓯ ꓐꓯˍ ꓟ ꓥ ꓡꓳ꓿
ꓒ ꓐꓳ. ꓬꓲꓼ ꓔ ꓢꓲ ꓪꓴꓽ ꓧꓶ ꓠꓽˍ ꓟ ꓠꓬ ꓔꓬ, ꓢꓻ ꓝꓲˍ ꓟ ꓬꓲ ꓫꓱ, ꓣꓱꓽ ꓬꓰ ꓚꓱ, ꓠꓯꓸꓼ ꓗꓪ ꓟ ꓕꓲꓽ ꓟ ꓥ ꓡꓳ꓿
ꓠꓯꓼ ꓠꓯꓼ ꓗꓪ ꓫꓵꓽ ꓫꓵꓽ ꓕꓲꓽ ꓐꓶꓽ (30 ꓟꓲꓠ) ꓙ ꓖꓴ ꓫꓱꓽ
ꓠꓯꓼ ꓠꓯꓼ ꓗꓪ ꓟꓲꓽ ꓦꓲꓻ ꓫꓬ ꓟꓶˍ ꓟ ꓗꓪ ꓫꓵꓽ ꓫꓵꓽ ꓕꓲꓽ ꓐꓶꓽ (30 ꓟꓲꓠ) ꓙ ꓖꓴ ꓫꓱꓽˍ ꓟ ꓠꓬ ꓐꓵꓼ ꓟꓵ ꓔꓯ ꓢꓯꓼ ꓙꓳ ꓡ ꓝꓲ ꓐ ꓡˍ ꓟ ꓡꓰꓽ ꓟꓽ ꓞꓲꓺ꓾ ꓖꓳ ꓓꓱꓽ ꓠꓯꓸꓼ ꓗꓪ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶ ꓐ ꓡ ꓢꓲ꓾ ꓖꓳ ꓓꓱꓽ ꓐꓰ ꓠꓲ, ꓟ ꓔꓯ ꓔꓬ, ꓢꓻ ꓡꓰ ꓝꓲˍ ꓥꓳ꓿
1 ꓙꓵ, ꓠꓬꓲ ꓔ. ꓗꓷ ꓕ ꓑꓳꓸꓼ 2 ꓟꓲ‐ꓠꓲ ꓙꓻ ꓖꓴ ꓫꓱꓽ
ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓬꓰ ꓪˍ ꓟ ꓟꓬꓱꓽ ꓟꓬꓽ ꓠꓬꓲ ꓠꓬ ꓠꓬꓲ ꓔ ꓢꓲ ꓬꓰ ꓪˍ ꓟ ꓥ ꓡꓳ꓿ ꓟꓶ ꓤ ꓠꓬꓲ ꓔ ꓗꓷ ꓟ ꓪꓴ. ꓠꓬꓲ ꓖꓳ ꓓꓱꓽ ꓔꓬ, ꓢꓻ ꓓꓴ ꓚꓱ, ꓔꓯ ꓟꓽ ꓐꓬ ꓡꓰ ꓠ, ꓟ ꓐꓱ ꓶ ꓠꓬ 1 ꓙꓵ, ꓠꓬꓲ ꓔ ꓗꓷ ꓕ ꓑꓳꓸꓼ 2 ꓟꓲ‐ꓠꓲ ꓙꓻ ꓖꓴ ꓫꓱꓽ ꓠ ꓔ ꓟ ꓥ ꓡꓳ꓿
ꓦꓲꓻ ꓘꓴꓽ ꓟꓬꓱꓽ ꓬꓰ
ꓦꓲꓻ ꓘꓴꓽ ꓟꓬꓱꓽ ꓬꓰˍ ꓟ ꓥ ꓟꓲ ꓔꓬ, ꓢꓻ ꓠ ꓛꓲ ꓡꓵ ꓡꓯꓼ ꓡꓵˍ ꓟ ꓡꓰ ꓕꓲꓽ ꓡꓰ, ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓗꓪ ꓔꓬ, ꓢꓻ ꓠ, ꓟ ꓐꓱ ꓶ ꓠꓬ ꓦꓲꓻ ꓘꓴꓽ ꓟꓬꓱꓽ ꓔꓯ ꓐ ꓡˍ ꓗꓪ ꓛꓲ ꓬꓰ ꓢꓲ ꓔꓬ, ꓢꓻ ꓠ ꓞꓳ ꓙꓳ ꓙꓰ ꓡꓯ꓿
ꓚꓵ. ꓬꓲꓻ ꓓꓳ ꓠ ꓖꓳ ꓓꓱꓽ ꓡꓵ ꓖꓶˍ ꓟ ꓔꓯ ꓮ ꓕꓯ ꓟꓲ ꓬꓰ ꓖꓶ
ꓕꓲ ꓠꓬꓲ ꓡꓰ ꓕꓲ ꓠꓬꓲ ꓚꓵ. ꓬꓲꓻ ꓓꓳ ꓠ ꓖꓳ ꓓꓱꓽ ꓡꓵ ꓖꓶˍ ꓟ ꓠꓬ ꓖꓳ ꓓꓱꓽ ꓔꓯ ꓡꓳ. ꓐꓲꓻ ꓡ ꓝꓲˍ ꓟ ꓡꓰ ꓐꓰ꓾ ꓠꓲ, ꓟ ꓐꓰ ꓖꓳ ꓓꓱꓽ ꓔꓬ, ꓢꓻ ꓠ, ꓟ ꓐꓱ ꓶ ꓟꓬꓽ ꓠꓬꓲ ꓬꓰ ꓙ ꓖꓶˍ ꓟ ꓥ ꓡꓳ꓿ ꓕꓲꓽ ꓠꓬꓲ ꓗꓪ 15 ꓟꓲ‐ꓠꓲ ꓛꓲ ꓚꓵ. ꓬꓲꓻ ꓓꓳ ꓠ ꓖꓳ ꓓꓱꓽ ꓡꓵ ꓖꓶ ꓠ ꓔ ꓟ ꓥ ꓡꓳ꓿
ꓖꓳ ꓟ ꓡꓰꓽ ꓟꓽ ꓞꓲ ꓗ, ꓛꓲꓽ ꓔꓬ, ꓢꓻˍ ꓟ ꓛꓳ ꓫꓱꓽ ꓚꓱ, ꓔꓯ ꓟꓶ ꓡꓰ ꓠ, ꓟ ꓐꓱ ꓶ ꓠꓬ ꓕꓱ ꓡꓱ ꓫꓵꓽ ꓔꓯ ꓥ ꓟꓲ ꓬꓰ ꓠ ꓔ ꓡꓳ꓿
ꓖꓳ ꓗꓪ ꓕꓱ ꓗꓪ ꓛ ꓙꓰˍ ꓠꓬ ꓙꓻ ꓖꓴ ꓫꓱꓽ ꓙꓰ
ꓮ ꓡꓲ ꓐ ꓡˍ ꓮ ꓡꓲ ꓙꓻ ꓖꓴ ꓫꓱꓽ
ꓕꓲ ꓠꓬꓲ ꓗꓪ ꓛꓲ ꓦꓽ 10,000 ꓫꓱꓽ ꓖꓶ
ꓪꓽ ꓙꓵꓽ ꓓꓯꓻ
ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓜꓽ ꓫꓵꓽ ꓜꓽ ꓙꓰꓽ ꓔꓯ ꓡꓰꓽ ꓜꓽ
ꓬꓲꓻ ꓙꓬ ꓮ ꓟꓬ, ꓓꓳꓻ
ꓜꓽ ꓓꓴ ꓔꓯ ꓟꓽ ꓗꓷ, ꓡꓰ ꓠ ꓜꓽ
ꓟꓶꓽ ꓘꓶ ꓬꓲꓼ ꓔ ꓦˍ ꓕꓯ ꓜꓽ ꓓꓴ ꓮ ꓟꓬ, ꓕꓽ ꓜꓽ
ꓛꓵꓼ ꓡꓵ ꓛꓵꓼˍ ꓟ ꓔꓯ ꓠꓽ ꓗꓷ ꓐ ꓡˍ ꓠꓬ ꓠꓽ ꓗꓷ
ꓞꓼ ꓐꓳ ꓐꓬꓽ ꓮ ꓟꓬ, ꓚꓬꓼˍ ꓟ ꓬꓲ ꓛꓵꓻ ꓕꓽ ꓓꓳꓻ ꓠꓲ, ꓟ ꓗ, ꓛꓲꓽ ꓢꓲ ꓧꓪꓽ ꓖꓳ ꓓꓱꓽ ꓔꓬ, ꓢꓻ ꓠꓲ, ꓫꓵˍ ꓠꓬ ꓕꓯꓽ ꓢꓲ ꓗꓪ ꓐꓯ ꓡꓳ, ꓬꓰ ꓟ ꓔꓯ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓬꓰ ꓔꓬ ꓟ ꓬꓲ ꓫꓱ, ꓒꓬꓱꓼ ꓡ ꓠ, ꓟ ꓬꓰ ꓢꓯꓼ ꓕꓵꓼ ꓡꓯ ꓐꓰ ꓐꓯ ꓖꓶ ꓠꓲ, ꓫꓵˍ ꓡꓳ꓿
