ꓢꓲ ꓫꓬ ꓕꓳ ꓶ ꓗꓪ ꓪꓴ-ꓢ ꓬꓲ ꓢꓲ-ꓫꓬ-ꓟ-ꓦ ꓟꓽ ꓥ ꓠꓬ꓾ ꓮꓽ ꓟ ꓥ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓢꓲ ꓒꓽ ꓐꓰ ꓣꓷꓸ ꓟꓽ ꓐ ꓡ꓾ꓐꓰ ꓐꓯ ꓔ ꓡꓳ= ꓢꓲ-ꓫꓬ-ꓟ-ꓦ ꓠꓬꓲ ꓟꓳ ꓓꓴ ꓗꓪ ꓐꓰ ꓡꓰ ꓣꓳ ꓠꓬ ꓐꓹ ꓐ ꓪꓴ-ꓢ ꓔꓯ ꓐꓹ ꓐ ꓐꓰ ꓘꓴ ꓐ ꓡ ꓟ ꓣꓱꓽ ꓛꓰ ꓣꓳ ꓟꓶ_ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓢꓲ ꓒ ꓬꓰ-ꓢꓴ ꓔꓯ ꓢꓷꓸ ꓠꓹ ꓟ ꓠꓬ ꓧꓶꓸ ꓕꓯ ꓬꓲ ꓢꓯꓼ ꓪ ꓔꓯ ꓣꓳ ꓠꓲꓹ ꓟ ꓠꓯꓼ ꓗꓪ ꓓꓵꓽ ꓡ ꓠꓹ ꓟ ꓣꓳꓸ ꓚꓵ_ ꓡꓳ= ꓢꓲ-ꓫꓬ-ꓟ-ꓦ ꓪꓴ-ꓢ ꓠꓬ ꓣꓳ ꓠꓯꓼ ꓘꓴꓽ ꓗꓪ ꓙꓵ ꓠꓲꓹ ꓗꓪ ꓐꓰ ꓓꓵꓽ ꓡ_ ꓡꓳ=ꓖꓳ ꓓꓱ ꓔꓲꓹ ꓟ ꓗꓪ ꓐꓰ ꓣꓳ ꓠꓬ ꓢꓲ-ꓫꓬ-ꓟ-ꓦ ꓔꓯ ꓣꓳ ꓣꓱ ꓟ ꓕꓲ ꓡꓲꓹ ꓐꓹ ꓐ ꓤ ꓔꓲ ꓢꓲ-ꓫꓬ-ꓟ-ꓦ ꓪꓴ-ꓢ ꓔꓯ ꓣꓳ ꓣꓱ_ ꓟ ꓕꓲ ꓡꓲꓹ ꓐꓰ ꓢꓲ-ꓫꓬ-ꓟ-ꓦ ꓠꓬ ꓣꓳ ꓠꓯꓼ ꓘꓴꓽ ꓗꓪ ꓓꓵꓽ ꓡ_ ꓡꓳ= ꓘꓶꓽ ꓫꓵꓼ ꓡꓵ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓣꓳ ꓙꓳ ꓙꓳ ꓟꓳ ꓟꓽ ꓓ꓾ ꓢꓲ-ꓫꓬ-ꓟ-ꓦ ꓪꓴ-ꓢ ꓔꓯ ꓟꓲ ꓣꓳ ꓙꓳ ꓙꓳ ꓟꓳ ꓟꓽ ꓓ꓾ ꓘꓶꓽ ꓫꓵꓼ ꓡꓵ ꓗꓪ ꓠꓬ ꓐꓹꓐ ꓪꓴ-ꓢ ꓔꓯ ꓡꓰ ꓟꓬ ꓠꓬꓲ ꓐꓯ ꓔ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓘꓶꓽ ꓫꓵꓼ ꓫꓵꓼ ꓦꓬꓼ ꓠꓬꓲ ꓗꓪ ꓢꓲ ꓒ ꓬꓰ-ꓢꓴ ꓠꓬ ꓮꓽ ꓐ ꓮ ꓡꓰ ꓫꓵ ꓪꓴ-ꓢ ꓥ ꓟ꓾ ꓮꓽ ꓐ ꓠꓬ ꓮ ꓡꓰ ꓐꓰ ꓟꓲ ꓠꓯ ꓔꓯ ꓚꓰꓼ ꓔ ꓟꓮꓽ ꓐ ꓠꓬ ꓣꓳ ꓟꓲ ꓠꓯ ꓞꓳ ꓤ ꓬꓲ ꓮ ꓡꓰ ꓐꓰ ꓙ ꓖꓶ ꓔ ꓟ꓾ ꓮ ꓙꓵ ꓢꓲ ꓒ ꓬꓰ-ꓢꓴ ꓗꓪ ꓐꓰ ꓣꓳ ꓢꓷꓸ ꓪ ꓡꓳ= ꓕꓱ ꓟ ꓡꓰ ꓟꓽ ꓞꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ-ꓢꓴ ꓠꓬ ꓢꓲ-ꓫꓬ-ꓟ-ꓦ ꓠꓬ ꓮ ꓡꓰ ꓫꓵ ꓢꓲ-ꓫꓬ-ꓟ-ꓦ ꓥ ꓐꓯ_ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ_ ꓡꓳ= ꓢꓲ-ꓫꓬ-ꓟ-ꓦ ꓠꓬ ꓐꓹ ꓐ ꓤ ꓔꓲ ꓠꓯꓼ ꓗꓪ ꓐꓰ ꓓꓳ ꓡ ꓟ ꓥ ꓢꓲ ꓠꓬꓲ ꓚꓵ ꓚꓵ ꓪꓴ-ꓢ ꓥꓳ꓾ ꓬꓲ ꓠꓯꓼ ꓘꓴꓽ ꓗꓪ ꓐꓰ ꓣꓳ ꓠꓬ ꓮꓽ ꓐ ꓔꓯ ꓐꓹ ꓐ ꓐꓰ ꓘꓴ ꓐ ꓡ ꓟ꓾ ꓪꓴ-ꓢ ꓠꓯꓼ ꓘꓴꓽ ꓗꓪ ꓞꓳ ꓙꓳ ꓐ ꓡ ꓟ ꓣꓳ ꓟꓶ_ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ-ꓫꓬ-ꓟ-ꓦ ꓚꓱꓹ ꓣꓳ ꓬꓲ ꓪꓴꓸ ꓠ ꓠꓹ ꓗꓷ ꓟ ꓠꓬ ꓣꓳ ꓮ ꓙꓵ ꓠꓬ ꓢꓲ-ꓫꓬ-ꓟ-ꓦ ꓗꓪ ꓐꓰ ꓡꓰ ꓢꓲ ꓒ ꓬꓰ-ꓢꓴ ꓔꓯ ꓢꓲ ꓒꓽ ꓥ ꓐꓰ ꓣꓷꓸ ꓐ ꓡ ꓡꓳ= ꓮꓽ ꓐ ꓥ ꓐꓰ ꓣꓷꓸ ꓐ ꓡ ꓟ ꓕꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓣꓳ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓞꓳ ꓙꓳ ꓟ ꓗꓪ ꓢꓲ-ꓫꓬ-ꓟ-ꓦ ꓢꓯꓼ ꓪ ꓗꓪ ꓐꓰ ꓡꓰ ꓣꓳ ꓢꓯꓼ ꓕꓵꓼ ꓐ ꓡꓰ ꓢꓲ ꓠꓬꓲ ꓮ ꓫꓵ ꓬꓰ ꓥ ꓟꓲ ꓬꓲ ꓠꓯꓼ ꓘꓴꓽ ꓗꓪ ꓐꓰ ꓞꓳ ꓙꓳ ꓐ ꓡ ꓠꓹ ꓟ ꓐꓱ ꓶ ꓢꓲ-ꓫꓬ-ꓟ-ꓦ ꓟꓽ ꓐ ꓠꓬ ꓟꓽ ꓐ ꓡ ꓐꓯ ꓟ ꓔꓯ ꓣꓳ ꓓꓵꓼ ꓙ ꓠꓬꓲ ꓢꓲ ꓠꓬꓲ ꓮ ꓫꓵ ꓬꓰ ꓥ ꓟꓲ ꓢꓲ-ꓫꓬ-ꓟ-ꓦ ꓠꓯꓼ ꓘꓴꓽ ꓗꓪ ꓞꓳ ꓙꓳ ꓐ ꓡ ꓠꓹ ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ=
