ꓢꓲꓺ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯˍ ꓙꓰ ꓟ ꓑꓮꓲꓽ (The ascention of the Lord)
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰ ꓟ ꓑꓮꓲꓽ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ (24ꓽ46‐53) ꓝꓲ. ꓗꓪ ꓥ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓐꓱ‐ꓕ‐ꓠꓲ ꓒ ꓕꓲ ꓗꓪ ꓧꓳꓽ ꓙꓰ ꓢꓲ ꓠꓬꓲ ꓬꓲ ꓪ ꓔꓯ ꓶꓼ ꓥꓳ ꓙꓱ ꓖꓶ ꓕꓯ ꓬꓰ‐ꓢꓴ ꓠꓬ ꓟꓴ ꓗꓪ ꓗꓪ ꓓꓯ ꓙꓰ ꓟ ꓚꓱ, ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓠꓬꓲ. ꓠꓬꓲ ꓕꓲ ꓟꓲ ꓠꓯ ꓗꓪ ꓗ‐ꓔꓳ‐ꓡꓲꓗ ꓙꓲ‐ꓢꓴ ꓢꓲꓺꓤ ꓐꓴ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰ ꓟ ꓑꓮꓲꓽ ꓓꓽ ꓔꓯ ꓗ, ꓛꓲ ꓛꓲ ꓡꓰ ꓬꓰ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯˍ ꓙꓰ ꓐꓯ ꓟ ꓠꓬ ꓣꓳ ꓔꓬ ꓟ ꓟꓲ ꓠꓯ ꓗꓪ ꓢꓲꓺ ꓒ ꓬꓰ‐ꓢꓴ ꓟꓲ ꓠꓯ ꓧꓪꓽ ꓖꓳ ꓓꓱ ꓕꓲ ꓒꓳ, ꓗꓪ ꓟꓽ ꓔꓬ ꓢꓲ ꓠꓬꓲ ꓐ, ꓐ ꓪꓴ‐ꓢ ꓠꓯˍ ꓗꓪ ꓡ ꓙꓰ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓟꓴ ꓗꓪ ꓗꓪ ꓐꓯ ꓟ ꓠꓬ ꓐ, ꓐ ꓪꓴ‐ꓢ ꓐꓰ ꓕꓲ ꓪ ꓔꓬ ꓟ ꓔꓯ ꓐꓯ ꓔ ꓟ ꓥ ꓡꓳ꓿ ꓐ, ꓐ ꓪꓴ‐ꓢ ꓠꓬ ꓬꓲ ꓬꓲ ꓮ ꓘꓶ. ꓠꓲ, ꓠꓵ ꓟ ꓮ‐ꓐꓲ ꓔꓯ ꓚꓬꓴ ꓙꓳ ꓟ ꓟꓲ ꓠꓯ ꓔꓯ ꓚꓬꓴ ꓠ, ꓟ ꓟꓲ ꓠꓯ ꓬꓯꓼ ꓡ ꓕꓯ ꓡ ꓞꓳ ꓡꓰ ꓟꓽ ꓔꓱ ꓟꓽ ꓜꓳꓽ ꓬꓰ ꓟ꓾ ꓝꓴꓲ ꓖꓶ ꓟ ꓬꓲ ꓔꓯ ꓠꓲ, ꓜꓳ ꓟ ꓮ ꓙꓵꓽ ꓗꓪ ꓐꓰ ꓧꓪ, ꓡꓰ ꓟ ꓑꓶ. ꓓꓴ ꓑꓲ ꓔꓯ ꓟꓴ ꓗꓪ ꓗꓪ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓑꓶ. ꓓꓴ ꓒꓴ ꓡꓰ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲ ꓠꓬ ꓗꓳ. ꓗꓷ ꓟ ꓙꓵ, ꓕꓯ ꓫꓵꓻ ꓡꓰ ꓟ ꓟꓲ ꓠꓯ ꓠꓯˍ ꓗꓪ ꓔꓬ ꓢꓲꓽ ꓫꓬ ꓢꓴ ꓐꓴ ꓦꓻ ꓮ ꓙꓵꓽ ꓠꓬ ꓟꓴ ꓖꓪ ꓖꓪ ꓢꓲ ꓠꓬꓲ ꓢꓲꓺ ꓒ ꓗ. ꓠꓯ ꓛꓳꓽ ꓠ, ꓟ ꓙꓵꓽ ꓪ ꓡꓰ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓟꓴ ꓗꓪ ꓗꓪ ꓓꓯ ꓙꓰ ꓟ ꓠꓬ ꓣꓳ ꓟꓲ ꓠꓯ ꓡ ꓞꓳ ꓐꓴ ꓐꓱ ꓶ ꓣꓳ ꓟꓲ ꓠꓯ ꓗꓪ ꓧꓪꓽ ꓖꓳ ꓓꓱ ꓫꓵꓻ ꓡꓰ ꓥ ꓟꓲ ꓣꓳ ꓦꓻ ꓥ ꓠꓬ ꓟꓴ ꓗꓪ ꓗꓪ ꓬꓲ ꓐꓰ ꓕꓲ ꓪ ꓔꓬ ꓠ, ꓟ ꓥꓳꓽ ꓡꓳ ꓓꓴ ꓖꓶ ꓔ ꓟ ꓥ ꓢꓲ ꓠꓬꓲ ꓙꓵꓻ ꓠ, ꓟ ꓢꓲꓺ ꓒ ꓐꓯ ꓔ ꓟ ꓐꓯ ꓘꓶꓽ ꓔꓯ ꓒꓲ ꓜꓲꓼ ꓡꓰ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓐ, ꓐ ꓔꓬ ꓟ ꓦꓲꓻ ꓗꓪ ꓬꓲ ꓔꓬ ꓔꓶ. ꓮ ꓟꓬ, ꓙꓳ ꓡꓳ ꓐꓰ ꓣꓳ ꓟꓲ ꓠꓯ ꓡ ꓞꓳ ꓐꓱ ꓶ ꓐꓯ ꓔ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓠꓲ, ꓟ ꓐꓬ ꓔꓬ ꓟ ꓝꓲ ꓓꓴ ꓐꓴ ꓔꓯ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓬꓯꓼ ꓡ ꓢꓲ ꓠꓬꓲ ꓢꓯꓼ ꓪ ꓖꓶ ꓡ ꓟ ꓔꓯ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓟꓲ ꓠꓯ ꓡ ꓞꓳ ꓮ ꓙꓵꓽ ꓥ ꓟꓲ ꓟꓽ ꓙꓲ ꓟ ꓝꓴꓲ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓙꓰ ꓓꓴ ꓬꓰ ꓡꓯ꓿
ꓣꓳ ꓟꓲ ꓠꓯ ꓡ ꓞꓳ ꓐꓴ ꓠꓬ ꓣꓳ ꓒꓴ ꓫꓵ꓾ ꓣꓳ ꓒꓵꓽ ꓶ ꓙꓳˍ ꓗꓪ ꓣꓳ ꓠꓲ, ꓟ ꓥꓳꓽ ꓢꓴ ꓐꓴ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓔꓯ ꓟꓴ ꓗꓪ ꓢꓲꓺꓒ ꓠꓲ, ꓒꓴ ꓟ ꓦꓻ ꓜꓽ ꓓꓴ ꓧꓪ ꓠ, ꓟ ꓐꓰ ꓟꓲ ꓠꓯ ꓐꓬ ꓡꓰ ꓗꓴ ꓟ ꓒꓵꓽ ꓫꓵꓽ ꓒꓵꓽ ꓙꓰ ꓔꓯ ꓡꓰ ꓬꓲ ꓙꓵ, ꓖꓶ ꓢꓲ ꓠꓬꓲ ꓧꓪ ꓟ ꓔꓯ ꓠꓽ ꓗꓷ ꓠ, ꓟ ꓢꓲꓺ ꓒ ꓔꓯ ꓬꓲ ꓙꓵ, ꓖꓶ ꓢꓲ ꓠꓬꓲ ꓧꓪ ꓠ, ꓟ ꓢꓯꓼ ꓖꓶ ꓔ ꓡꓳ꓿
ꓟ‐ꓕꓲ (6ꓽ21) ꓟꓲ ꓠꓯ ꓗꓪ ꓧꓪꓽ ꓟꓵ ꓐꓵꓽ ꓡꓴꓻ ꓐꓰ ꓙꓲꓽ ꓜꓽ ꓡ ꓟ ꓗꓪ ꓝꓮꓲ ꓠꓬ ꓘꓴꓽ ꓒꓽ ꓟꓲ ꓦꓲꓻ ꓘꓴ ꓕꓴ ꓢꓲ ꓘꓴꓽ ꓡ ꓟ ꓗꓪ꓾ ꓠꓴ ꓪ ꓚꓲ. ꓛꓬ ꓐꓱ ꓶ ꓒꓵꓽ ꓶ ꓕꓽ ꓫ ꓔ ꓐꓰ ꓐꓯ ꓔ ꓡꓳ꓿ ꓣꓳ ꓐꓴ ꓧꓪ ꓠ, ꓟ ꓠꓬ ꓢꓲꓺ ꓒ ꓔꓯ ꓡꓰ ꓥ ꓟ ꓔꓯ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓐꓰ ꓢꓯꓼ ꓖꓶ ꓩꓴ ꓡ ꓥꓳꓽ ꓫ. ꓟꓳ ꓪ꓿
