ꓢꓲ ꓒ ꓬꓰ-ꓢꓴ ꓬꓲ ꓤꓶꓻ ꓔꓯ ꓡꓳꓸ ꓠꓬꓲ ꓕꓯ ꓮ ꓙꓵ ꓡꓱꓼ ꓗꓪ ꓚꓵ ꓘꓶꓽ ꓥ ꓡꓳ= ꓣꓳ ꓪꓴꓸ ꓠꓶꓸ ꓗꓪ ꓐꓰ ꓓꓵꓽ ꓙ ꓛꓲ ꓟꓽ ꓐ ꓡ ꓫꓵ ꓣꓳ ꓢꓪꓸ ꓠꓬꓲ ꓟꓽ ꓐ ꓡ ꓫꓵ ꓚꓱꓹ ꓥ ꓡꓳ=ꓖꓳ ꓡꓱ ꓠꓬꓲ ꓣꓳ ꓡꓲ-ꓢꓴ ꓥꓳꓽ ꓥ ꓟꓲ ꓚꓵ ꓘꓶꓽ ꓐꓯ_ ꓟ ꓬꓲ ꓬꓲ ꓢꓶ ꓮ ꓟꓬꓹ ꓙꓳ_ ꓡꓳ= ꓚꓵ ꓔ ꓟ ꓘꓶꓽ ꓕꓲ ꓚꓱꓹ ꓐꓯ ꓠꓬ ꓚꓵ ꓔ ꓟ ꓫꓵꓽ ꓪꓴ꓾ ꓚꓵ ꓔ ꓟ ꓚꓱꓹ ꓐꓰ ꓙꓳ_ ꓡꓳ=
ꓥ ꓡꓳ꓾ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓮ ꓙꓵ ꓢꓴ ꓐꓱ ꓶ ꓢꓯꓼ ꓟꓬ ꓖꓶ ꓗꓷꓳ= ꓬꓲ ꓗꓪ ꓐꓰ ꓣꓳ ꓠꓬ ꓚꓬꓴ ꓟꓶ ꓡꓰꓳ= ꓖꓳ ꓡꓱ ꓐꓯ ꓥ ꓟꓲ ꓬꓲ ꓔꓯ ꓣꓳ ꓮ ꓙꓵ ꓢꓷꓸ ꓠꓹ ꓟ ꓠꓬ ꓣꓳ ꓟꓲ ꓠꓯ ꓞꓳ ꓤ ꓪꓴꓸ ꓠꓷꓸ ꓗꓪ ꓐꓰ ꓢꓷꓸ ꓟꓽ ꓐ ꓡ꓾ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓬꓲ ꓬꓰ_ ꓟ ꓮ ꓙꓵ ꓠꓬ ꓚꓵ ꓘꓶꓽ ꓥ ꓟ ꓡꓰ ꓟꓽ ꓞꓲ ꓬꓲ ꓕꓲ ꓖꓳ ꓓꓱ ꓡꓱꓼ ꓬꓲ ꓟꓲ ꓠꓯ ꓗꓪ ꓬꓯꓼ ꓡ ꓟ ꓮ ꓙꓵ ꓟꓴ ꓗꓪ ꓗꓴꓷꓼ ꓓꓯ ꓙꓰ_ ꓟ ꓮ ꓙꓵ ꓠꓬ ꓣꓳ ꓐꓱ ꓶ ꓐꓲ_ ꓟ ꓚꓵ ꓘꓶꓽ ꓕꓲ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓬꓲ ꓚꓵ ꓘꓶꓽ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓕꓲ ꓣꓳ ꓡꓰ ꓐꓰ ꓒꓬꓱ ꓟꓳ ꓡ ꓡꓳ= ꓕꓱ ꓡꓱ ꓒꓬꓱ ꓟꓳ ꓡ ꓟ ꓑꓶ ꓓꓴ ꓫ ꓢꓴ ꓟꓷꓼ ꓢꓴ ꓣꓳ ꓔꓯ ꓐꓳ ꓡꓰ ꓝꓲ ꓢꓴ ꓒꓬꓱꓼ ꓡ ꓡꓳ= ꓬꓲ ꓚꓲ ꓛꓬ ꓞꓳ ꓫꓸ ꓕꓲ ꓣꓳ ꓡꓰ ꓐꓰ ꓮ ꓠꓬꓲ ꓡꓳ ꓕꓵ ꓗꓪ ꓒꓬꓱ ꓟꓳ ꓡ ꓟ ꓑꓶ ꓓꓴ ꓣꓳ ꓮ ꓙꓵ ꓢꓴ ꓠꓬ ꓞꓳ ꓐꓳ ꓡꓰ ꓐꓰ ꓒꓬꓱꓽ ꓟꓳ ꓡ꓾ꓳ = ꓮ ꓡꓰ ꓐꓰ ꓞꓳ ꓐꓳ ꓡꓰ ꓐꓰ ꓒꓬꓱꓽ ꓟꓳ ꓡ ꓡ꓾ ꓢꓲ ꓒ ꓬꓰ-ꓢꓴ ꓔꓯ ꓙꓵꓻ ꓟ ꓗꓪ ꓐꓰꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓐꓳ_ ꓟ ꓞꓳ ꓤ꓾ ꓠꓲꓹ ꓟ ꓘꓴꓽ ꓠꓯꓼ ꓗꓪ ꓐꓳ_ ꓟ ꓞꓳ ꓤ ꓒꓬꓱꓼ ꓡ ꓡꓳ= ꓕꓱ ꓟ ꓠꓬ ꓣꓳ ꓐꓱ ꓶ ꓚꓵ ꓘꓶꓽ ꓕꓲ ꓟ ꓥ ꓡꓳ=
ꓝꓮꓲ ꓢꓲ ꓒ ꓬꓰ-ꓢꓴ ꓠꓬ 30 ꓘꓳꓼ ꓬꓲ ꓮ ꓟ ꓟ-ꓡꓲ ꓐꓰ ꓬꓳ-ꓢꓷ ꓡꓯ ꓒꓯꓹ ꓠꓯꓼ ꓘꓴꓽ ꓗꓪ ꓔꓬ ꓡꓳ= ꓢꓲ ꓡꓲꓹ ꓡꓲꓹ ꓐꓰ 30 ꓘꓳꓼ ꓮ ꓡꓰ ꓗꓪ ꓡꓲ ꓮ ꓟ ꓡꓲ ꓟꓽ ꓢꓷꓸ ꓢꓷꓸ ꓐꓰ ꓟꓬꓱꓽ ꓬꓰ ꓢꓲ ꓠꓬꓲ ꓞꓳ ꓙꓳ ꓗꓴꓸ ꓡ ꓡꓳ= ꓖꓳ ꓡꓱ 30 ꓘꓳꓼ ꓔꓬ ꓗꓳꓸ ꓙꓰ ꓟ ꓑꓶ ꓓꓴ ꓣꓳ ꓔꓯ ꓮ ꓫꓵ ꓟꓳꓸ ꓖꓶ ꓡ ꓡ꓾ ꓪꓴ-ꓢ ꓔꓯ ꓠ ꓡꓳꓸ ꓟ ꓐꓰ ꓣꓳ ꓮꓽ ꓐ ꓮ ꓟ ꓔꓯ ꓠ ꓡꓳꓸ ꓟ ꓠꓬ ꓮ ꓟꓬ ꓛꓲ ꓣꓳꓸ ꓚꓵ_ ꓡ ꓐꓯ_ ꓟ ꓣꓳ ꓔꓯ ꓟꓳꓸ ꓖꓶ ꓡ ꓡꓳ= ꓕꓱ ꓟ ꓥ ꓟꓲ ꓚꓵ ꓘꓶꓽ ꓕꓲ ꓟ ꓥ ꓡꓳ= ꓮ ꓡꓰꓳ ꓐꓯ ꓠꓬ ꓮ ꓫꓵ ꓟꓲ ꓬꓰ ꓐ ꓡ ꓢꓴ ꓟꓴ ꓗꓪ ꓐꓰ ꓟꓲ ꓠꓯ ꓚꓰꓼ ꓢꓴ ꓐꓹ ꓐ ꓠꓬ ꓞꓳ ꓤ ꓠꓯꓼ ꓘꓴꓽ ꓗꓪ ꓔꓬ ꓢꓲ ꓠꓬꓲ 30 ꓘꓳꓼ ꓟꓬꓱꓽ ꓬꓰ ꓡꓳꓹ ꓬꓰ ꓟ ꓠꓬ ꓣꓳ ꓐꓱ ꓶ ꓓꓵ ꓙ ꓟꓶ ꓓꓴ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓤꓶꓻ ꓗꓪ ꓐꓹ ꓐ ꓔꓯ ꓠ ꓡꓳꓸ ꓠꓹ ꓟ ꓐꓰ ꓮꓽ ꓐꓽ ꓮ ꓟ ꓔꓯ ꓠ ꓡꓳꓸ ꓠꓹ ꓟ ꓠꓬ ꓣꓳꓸ ꓚꓵ ꓓꓰ ꓡꓳ ꓐꓯ_ ꓟ ꓚꓵ ꓘꓶꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓡꓳ=
ꓝꓮꓲ ꓚꓵ ꓘꓶꓽ ꓕꓲ ꓟ ꓟ ꓠꓬ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ ꓣꓳ ꓔꓯ ꓢꓲ ꓫꓬ ꓡꓰ ꓝꓲ_ ꓡꓳ ꓐꓯ_ ꓟ ꓥ ꓡꓳ= ꓮꓲ ꓒ ꓠꓬ ꓬꓲ ꓐꓯ ꓘꓶꓽ ꓗꓪ ꓐꓰ ꓟꓸ ꓖꓶ ꓐꓱ ꓖꓶ_ ꓡꓳ=ꓬꓲ ꓐꓯ ꓘꓶꓽ ꓕꓯ ꓠ ꓠꓹ ꓢꓴ ꓠꓬ ꓠꓲꓹ ꓟ ꓠꓯꓼ ꓗꓪ ꓢꓲ ꓫꓬ ꓡꓰ_ ꓡꓳ= ꓝꓮꓲ ꓬꓲ ꓠꓬ ꓞꓳ ꓠꓻ ꓔꓯ ꓫꓬꓹ ꓖꓶ_ ꓡꓳ= ꓫꓵꓻ ꓢꓴ ꓔꓯ ꓢꓯꓸ ꓬꓲꓼ ꓡ ꓝꓲ_ ꓡꓳ= ꓬꓲ ꓠꓻ ꓢꓴ ꓒꓬ ꓢꓴ ꓔꓯ ꓫꓬꓹ ꓖꓶ_ ꓟ ꓑꓶ ꓓꓴ ꓬꓲ ꓖꓳ ꓓꓱ ꓠꓯꓼ ꓗꓪ ꓠꓻ ꓓꓴ ꓡꓰ_ ꓡꓳ= ꓬꓲ ꓠꓻ ꓓꓴ ꓕꓱ ꓟ ꓗꓪ ꓐꓰ ꓣꓳ ꓠꓬ ꓓꓻ ꓡꓰ_ ꓡꓳ= ꓕꓱ ꓟ ꓥ ꓟꓲ ꓣꓳ ꓐꓱ ꓶ ꓚꓵ ꓘꓶꓽ ꓥ ꓡꓳ=ꓬꓲ ꓟꓶꓽ ꓢꓲ ꓒ ꓬꓰ-ꓢꓴ ꓠꓬ ꓫꓵꓻ_ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓡꓳ= ꓚꓵ ꓘꓶꓽ ꓓ ꓟ ꓘꓴ ꓗꓪ ꓮ ꓙꓵ ꓔꓯ ꓠꓯꓸ ꓓꓰ ꓡꓰ_ ꓟ ꓚꓵ ꓘꓶꓽ ꓠꓬ ꓫꓵꓻ ꓟ ꓔꓯ ꓧꓪꓸ ꓡꓰ_ ꓟ ꓥ ꓡꓳ= ꓬꓲ ꓕꓱ ꓡꓱ ꓫꓵꓻ ꓓꓰ ꓔꓯ ꓧꓪꓸ ꓡꓰ_ ꓟ ꓐꓰ ꓣꓳ ꓮ ꓙꓵ ꓠꓬ ꓚꓬꓴ ꓟꓶ ꓡꓰꓳ= ꓬꓲ ꓫꓵꓻ ꓟ ꓗꓪ ꓐꓰ ꓣꓳ ꓠꓬ ꓢꓯꓸ ꓬꓲꓼ ꓡꓳ꓾
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓗꓪ ꓚꓵ ꓘꓶꓽ ꓐꓯ_ ꓟ ꓠꓬ ꓮ ꓘꓶꓸ ꓐꓲ_ ꓡꓳ꓾ ꓐꓯ_ ꓟ ꓣꓳ ꓡꓳꓸ ꓟꓳ_ ꓡꓳ= ꓠꓴ ꓠꓬ ꓪꓴ-ꓢ ꓔꓯ ꓙꓵꓻ ꓠꓹ ꓟ ꓮ ꓙꓵ ꓢꓷꓸ ꓟꓽ ꓛꓲ꓾ ꓠꓴ ꓠꓬ ꓪꓴ-ꓢ ꓔꓯ ꓠꓲꓹ ꓠꓵꓻ ꓠꓹ ꓟ ꓮ ꓙꓵ ꓢꓷꓸ ꓟꓽ ꓛꓲ꓾ ꓬꓲ ꓔꓯ ꓙꓵꓻ ꓕꓲ ꓖꓼ ꓬꓲ ꓐꓯ ꓘꓶꓽ ꓔꓯ ꓕꓲ ꓖꓼ ꓠꓬ ꓠꓴ ꓠꓬ ꓵ ꓖꓴ ꓟꓽ ꓓ ꓟ ꓶꓼ ꓤ ꓫꓱꓸ ꓤ ꓟꓶ_ ꓡꓳ ꓐꓯ_ ꓟ ꓢꓲ ꓒ ꓬꓰ-ꓢꓴ ꓬꓲ ꓚꓵ ꓘꓶꓽ ꓗꓪ ꓐꓰ ꓣꓳ ꓔꓯ ꓟꓳꓸ ꓖꓶ ꓡ ꓔꓬ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓣꓳ ꓟꓽ ꓢꓷꓸ ꓕꓯ ꓣꓳ ꓪꓴꓸ ꓠꓶꓸ ꓗꓪ ꓐꓰ ꓢꓷꓸ ꓟꓽ ꓐ ꓡ ꓕꓯ ꓣꓳ ꓮ ꓫꓵ ꓥ ꓟ ꓚꓬꓹ ꓟꓽ ꓪ ꓕꓯ ꓠꓲꓹ ꓟ ꓕꓽ ꓫꓸ ꓪꓴ-ꓢ ꓔꓯ ꓡꓯꓼ ꓛꓱ ꓢꓲ ꓠꓬꓲ ꓪꓴ-ꓢ ꓔꓯ ꓠꓻ ꓡꓳꓸ ꓢꓲ ꓠꓬꓲ ꓮꓽ ꓐꓽ ꓮ ꓟ ꓔꓯ ꓠꓲꓹ ꓠꓵꓻ ꓢꓲ ꓠꓬꓲ ꓞꓳ ꓙꓳ ꓡꓯ꓾ ꓖꓳ ꓡꓱ ꓠꓬꓲ ꓢꓲ ꓒ ꓬꓰ-ꓢꓴ ꓡꓰ ꓐꓰ ꓣꓳ ꓥ ꓟꓲ ꓪꓴ-ꓢ ꓟꓲ ꓙꓬ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓣꓱ ꓛꓰ ꓗꓪ ꓐꓰ ꓓꓵꓽ ꓙ ꓟꓶ ꓓꓴ ꓮ ꓟꓬꓹ ꓬꓰ ꓐ ꓡ ꓥꓳ=
