ꓮ ꓙꓵꓽ ꓔꓯ ꓧꓪ. ꓧꓪ.꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓠꓴ ꓪ ꓠꓲ, ꓟ ꓫ.ˍ ꓟ ꓠꓬ ꓗ, ꓛꓲꓽ ꓓꓴ ꓒꓬꓱꓼ ꓡˍ ꓥꓳ꓾ ꓐꓯˍ ꓟ ꓐꓯ ꓘꓶꓽ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ ꓬꓳ‐ꓦ 16ꓽ16‐20 ꓥ ꓡꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ꓾ ꓠꓴ ꓪ ꓕꓲꓽ ꓑ, ꓤ ꓠꓬ ꓥꓪ ꓔꓯ ꓟꓽ ꓟꓳꓻ ꓗꓷ ꓡꓰˍ ꓥꓳ꓿ ꓝꓮꓲ ꓕꓲꓽ ꓑ, ꓤ ꓠꓬ ꓠꓴ ꓪ ꓥꓪ ꓔꓯ ꓝꓮꓲ. ꓟꓳꓻ ꓪˍ ꓥꓳ꓾ ꓐꓰ ꓐꓯ ꓖꓶˍ ꓟ ꓥ ꓡꓳ꓿
ꓖꓳ ꓕꓯ ꓠꓬ ꓬꓲ ꓝꓲ ꓓꓴ ꓐꓴ ꓡꓰ꓾ ꓕꓲꓽ ꓑ, ꓤ ꓐꓯ ꓟ ꓠꓬ ꓮ ꓫꓵꓽ ꓔꓯ ꓐꓯ ꓔꓬ ꓡ꓿ ꓬꓰ‐ꓢꓴ ꓡꓰ ꓐꓯˍ ꓟ ꓕꓲꓽ ꓑ, ꓤ ꓐꓯˍ ꓟ ꓔꓯ ꓬꓲ ꓪ ꓟꓽ ꓙꓽ ꓜꓲꓼ ꓡꓰ꓿ ꓖꓳ ꓟ ꓑꓶ. ꓓꓴ ꓬꓲ ꓪ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓠ ꓠꓬꓲ ꓡꓯ ꓘꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ꓾ ꓠꓴ ꓪ ꓠꓲ, ꓟ ꓫ. ꓟ ꓠꓽ ꓗ, ꓛꓲꓽ ꓓꓴ ꓒꓬꓱꓼ ꓡˍ ꓥꓳ꓾ ꓐꓰ ꓐꓯ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓕꓲꓽ ꓑ, ꓤ ꓐꓰ ꓐꓯ ꓔꓬ ꓡꓳ꓿ ꓕꓲꓽ ꓑ, ꓤ ꓐꓯˍ ꓟ ꓬꓲ. ꓬꓲ ꓢꓲ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓟꓶ ꓫꓵ ꓕꓯ ꓠꓽ ꓬꓲ ꓔꓯ ꓢꓴ ꓡꓰ ꓘꓶꓻ ꓠꓬꓲ ꓓꓶꓽ ꓠꓬꓲ ꓕꓱ ꓡꓱ ꓬꓲ ꓔꓯ ꓢꓴ ꓡꓰ ꓢꓰꓼ ꓗꓷˍ ꓟ ꓥ ꓡꓳ꓿ ꓕꓱ ꓡꓱ ꓖꓳ ꓑꓳ. ꓬꓲ ꓠꓬ ꓫꓵꓻ ꓪˍ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓕꓲꓽ ꓑ, ꓤ ꓗꓷ ꓡꓰ ꓠꓬ ꓬꓲ ꓚꓱ, ꓬꓲꓼ ꓡˍ ꓥꓳ꓾ ꓐꓰ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓫꓵˍ ꓗꓪ ꓐꓰ ꓢꓯ. ꓬꓲꓼ ꓡ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓔꓬ, ꓗꓪ ꓚꓱ, ꓬꓲꓼ ꓡˍ ꓟ ꓔꓯ ꓐꓯˍ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓲ ꓝꓲ ꓓꓴ ꓐꓴ ꓡꓰ ꓕꓱ ꓡꓱ ꓓꓵꓽ ꓙꓽ ꓔꓬ ꓟ ꓠꓬ꓾ ꓳ ꓣꓳ ꓢꓲ ꓒ ꓠꓽ ꓫꓵꓻ ꓢꓲ ꓠꓬꓲ ꓮ ꓕꓯ ꓟꓲ ꓟꓽ ꓚꓱ, ꓬꓲꓼ ꓡꓺꓳ꓿ ꓮ ꓕꓯ ꓟꓲ ꓣꓳ ꓢꓲ ꓒ ꓔꓯ ꓟꓽ ꓪ ꓟꓳꓻꓳ꓿ ꓬꓲ ꓔꓯ ꓠꓬ ꓢꓴ ꓡꓰ ꓘꓶꓻ ꓤꓲ ꓠꓬꓲ ꓓꓶꓽ ꓠꓬꓲ ꓬꓰˍ ꓥꓳ꓾ ꓐꓰ ꓕꓱ ꓡꓱ ꓓꓵꓽ ꓙ ꓔꓬ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ꓾ ꓕꓱ ꓡꓱ ꓟꓽ ꓥ꓿ ꓬꓲ ꓝꓲ ꓓꓴ ꓐꓴ ꓔꓯ꓾ ꓠꓴ ꓪ ꓠꓲ, ꓟ ꓕꓽ ꓫ.꓾ ꓠꓴ ꓪ ꓠꓲ, ꓟ ꓫ. ꓟ ꓠꓬ ꓗ, ꓛꓲꓽ ꓓꓴ ꓒꓬꓱꓼ ꓡˍ ꓥꓳ ꓐꓰ ꓐꓯˍ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓬꓲ ꓫꓵꓻˍ ꓗꓪ ꓐꓰ ꓝꓮꓲ. ꓢꓯ. ꓬꓲꓼ ꓡˍ ꓠꓬ꓾ ꓖꓳ ꓕꓯ ꓠꓽ ꓢꓲ ꓒ ꓬꓰ‐ꓢꓴ ꓠꓽ ꓧꓶ. ꓕꓯ ꓬꓲ ꓝꓲ ꓓꓴ ꓐꓴ ꓐꓰ ꓔꓬ, ꓟ ꓕꓲꓽ ꓡꓰ, ꓟꓽ ꓥ ꓓꓻꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻˍ ꓟ ꓔꓯ ꓧꓪ. ꓡꓰ ꓢꓲ ꓠꓬꓲ ꓫꓵꓻˍ ꓟ ꓔꓯ ꓧꓪ. ꓡꓰ ꓟ ꓢꓲ ꓒ꓾ ꓟꓲ ꓠꓯ ꓔꓯ ꓚꓬꓴ. ꓖꓶ ꓗꓷ ꓟ ꓢꓲ ꓒ꓾ ꓝꓴꓲ. ꓮ ꓙꓵꓽ ꓔꓯ ꓣꓴ ꓗꓷ ꓟ ꓢꓲ ꓒ꓾ ꓬꓲ ꓫꓵꓽ ꓗꓪ ꓐꓰ ꓣꓳꓽ ꓝꓴꓲ. ꓮ ꓙꓵꓽ ꓔꓯ ꓞꓲꓽ ꓫꓬꓻ ꓗꓷ ꓟ ꓢꓲ ꓒ ꓒꓬꓱꓼ ꓡˍ ꓥꓳ꓿
ꓕꓱ ꓡꓱ ꓒꓬꓱꓼ ꓡ ꓢꓲ ꓠꓬꓲ ꓠꓴ ꓪ ꓔꓬ ꓗꓪ ꓚꓱ, ꓬꓲꓼ ꓡˍ ꓕꓯ ꓠꓴ ꓪ ꓠꓽ ꓗ, ꓛꓲꓽ ꓓꓴ ꓒꓬꓱꓼ ꓡꓺꓳ꓿ ꓕꓱ ꓟ ꓑꓶ. ꓓꓴ ꓠꓴ ꓪ ꓕꓲꓽ ꓒ, ꓤ ꓠꓬ ꓠꓲ, ꓟ ꓫ.ˍ ꓥꓳ꓿ ꓖꓳ ꓕꓯ ꓠꓬ ꓥꓪ ꓟꓽ ꓔꓬ꓿ ꓖꓳ ꓡꓱ ꓐꓯ ꓥ ꓟꓲ ꓥꓪ ꓫꓵꓻ ꓢꓲ ꓠꓬꓲ ꓢꓯ. ꓬꓲꓼ ꓡˍ ꓕꓯ ꓠꓽ ꓠꓴ ꓪ ꓗ, ꓛꓲꓽ ꓓꓴ ꓒꓬꓱꓼ ꓡˍ ꓥꓳ ꓐꓯ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓠꓬꓲ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓝꓲ ꓓꓴ ꓐꓴ ꓐꓰ ꓣꓳ ꓔꓯ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓐꓯ ꓖꓶ ꓡ ꓔꓬ ꓟ ꓠꓬ꓾ ꓕꓲꓽ ꓑ, ꓤ ꓠꓴ ꓪ ꓥꓪ ꓔꓯ ꓟꓽ ꓟꓳꓻ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓐꓯ ꓥ ꓟꓲ ꓠꓴ ꓪ ꓟꓽ ꓟꓳꓻ ꓔꓬ ꓕꓯ ꓠꓬ ꓥꓪ ꓐꓯ ꓘꓶꓽ ꓔꓯ ꓛꓳ ꓒꓵꓽ꓿ ꓥꓪ ꓚꓱ, ꓬꓲꓼ ꓡˍ ꓕꓯ ꓮ ꓙꓵꓽ ꓠꓬ ꓠꓴ ꓪ ꓐꓱ ꓶ ꓗ, ꓛꓲꓽ ꓓꓴ ꓥ ꓡꓳ꓿ ꓟꓲ ꓠꓯ ꓗꓪ ꓔꓬ ꓕꓯ ꓠꓴ ꓪ ꓫ. ꓙꓵ ꓟꓶ ꓙꓵ ꓓꓴ ꓔꓳ, ꓜꓳꓽˍ ꓟ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓥꓪ ꓚꓱ, ꓬꓲꓼ ꓡˍ ꓕꓯ ꓠꓬ ꓠꓴ ꓪ ꓐꓱ ꓶ ꓗ, ꓛꓲꓽ ꓓꓴ ꓡꓯꓼ ꓫꓴ ꓐꓯ ꓖꓴ ꓟꓽ ꓓꓻ ꓕꓲꓽ ꓞꓲꓼ ꓕꓲꓽ ꓑ ꓟ ꓡꓯꓼ ꓫꓴ ꓢꓯꓼ ꓪ ꓠꓬ ꓠꓴ ꓪ ꓐꓱ ꓶ ꓥꓳ꓿ ꓠꓴ ꓪ ꓠꓲ, ꓟ ꓕꓽ ꓫ.꓿ ꓠꓲ, ꓟ ꓫ. ꓓꓴ ꓠꓽ ꓗ, ꓛꓲꓽ ꓓꓴ ꓒꓬꓱꓼ ꓡˍ ꓥꓳ꓿ ꓥꓪ ꓔꓯ ꓙꓵꓻ꓾ ꓥꓪ ꓔꓯ ꓡꓳ. ꓠꓬ, ꓔꓬ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓣꓳꓽ ꓔꓯ ꓕꓱ ꓡꓱ ꓐꓯ ꓖꓶ ꓡ ꓔꓬ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓣꓳꓽ ꓮ ꓙꓵꓽ ꓥˍ ꓟꓲ ꓟꓲ ꓠꓯ ꓗꓪ ꓔꓬ ꓕꓯ ꓫ. ꓙꓵ ꓟꓶ ꓙꓵ ꓓꓴ ꓠꓴ ꓪ ꓮ ꓡꓲ ꓘꓶ ꓛꓲ ꓔꓳ, ꓜꓳꓽ ꓔꓬ ꓥ ꓟꓲ꓾ ꓠꓲ, ꓟ ꓕꓽ ꓫ.꓿ ꓣꓳ ꓢꓲ ꓒ ꓬꓰ‐ꓢꓴ ꓣꓳ ꓐꓰ ꓕꓲꓽ ꓡꓰ, ꓔꓬ ꓕꓯ ꓠꓽ ꓢꓲ ꓒ ꓬꓰ‐ꓢꓴ ꓕꓲꓽ ꓠꓬꓲ ꓙꓳˍ ꓠꓬ ꓣꓳ ꓔꓯ ꓗ, ꓛꓲꓽ ꓓꓴ ꓒꓬꓱꓼ ꓡ ꓝꓲˍ ꓥꓳ꓿
