ꓠꓬꓲ. ꓠꓬꓲ ꓗꓪ ꓣꓳ ꓦ ꓢꓯꓼ ꓣꓴ ꓠ ꓔ ꓟ ꓢꓲꓽ ꓫꓬ ꓕꓳꓽ ꓶ ꓝꓲ. ꓠꓬ ꓝꓲ ꓓꓴ 16ꓽ22‐34 ꓥ ꓡꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓒꓳ‐ꓡꓳ ꓐꓰ ꓫꓲ‐ꓡ ꓠꓬ ꓶꓼ ꓓꓳꓽ ꓫꓱ, ꓓꓳꓽ ꓚˍ ꓟ ꓑꓶ. ꓓꓴ ꓬꓲ ꓪ ꓔꓯ ꓐꓵ ꓞꓶ ꓚꓵ, ꓡꓵ. ꓗꓷ ꓢꓲ ꓓꓶꓽˍ ꓡꓳ꓿ ꓖꓳ ꓗ ꓠꓯ. ꓬꓲ ꓪ ꓔꓷ, ꓙꓰ ꓟꓽ ꓐ ꓡ ꓠ, ꓟ ꓐꓱ ꓓꓴꓽ ꓗꓪ ꓧꓳꓽ ꓗꓷˍ ꓡꓳ꓿ ꓕꓲꓽ ꓢ ꓘꓪ (ꓦꓬꓼ ꓔꓱ, ꓫꓵ) ꓗꓪ ꓒꓳ‐ꓡꓳ ꓐꓰ ꓫꓲ‐ꓡ ꓠꓬ ꓪꓽ ꓘꓴ ꓢꓲ ꓪꓴ‐ꓢ ꓔꓯ ꓫꓱ. ꓖꓶ ꓓꓴ ꓟꓴꓽ ꓖꓪꓽ ꓖꓪ ꓔꓬ ꓕꓯ꓾ ꓪꓴ‐ꓢ ꓬꓲ ꓪꓽ ꓠꓬꓲˍ ꓟ ꓬꓯꓼ ꓡ ꓢꓲ ꓐꓱ ꓓꓴꓽ ꓗ ꓘꓶ ꓮ ꓙꓵꓽ ꓒꓴ ꓡ ꓢꓲ ꓠꓬꓲ꓾ ꓬꓲ ꓪ ꓠꓬ ꓐꓱ ꓔ ꓟ ꓗꓪ ꓐꓰ ꓡꓲ, ꓗꓷꓳ꓿
ꓒꓳ‐ꓡꓳ ꓐꓰ ꓫꓲ‐ꓡ ꓠꓬ ꓮ ꓫꓵꓽ ꓝꓴꓲ. ꓔꓯ ꓟꓲ ꓬꓲ ꓪ ꓟꓽ ꓬꓰ꓿ ꓬꓲ ꓪ ꓬꓰ ꓞꓳ. ꓡꓰ ꓟ ꓬꓰ ꓥꓳꓽ ꓡꓰ ꓟˍ ꓟꓲ ꓟꓽ ꓙꓳ꓿ ꓬꓲ ꓪ ꓠꓬ ꓶꓼ ꓓꓳꓽ ꓫꓱ, ꓓꓳꓽ ꓟ. ꓟꓲꓽ ꓚˍ ꓡꓳ꓾ ꓪꓴ‐ꓢ ꓔꓯ ꓣꓱꓽ ꓙˍ ꓡꓳ꓿ ꓖꓳ ꓡꓱ ꓬꓰˍ ꓟ ꓑꓶ. ꓓꓴ ꓢꓴ ꓡꓰ ꓬꓲ ꓪ ꓔꓯ ꓔꓲ. ꓡˍ ꓡꓳ꓾ ꓓꓶꓽ ꓡˍ ꓡꓳ꓾ ꓐꓱ ꓓꓴꓽ ꓗꓪ ꓧꓳꓽ ꓗꓷˍ ꓡꓳ꓿ ꓬꓲ ꓪ ꓠꓬ ꓙꓲˍ ꓟ ꓬꓰ ꓔꓬ ꓥ ꓟꓲ ꓬꓲ ꓪ ꓠꓬ ꓢꓴ ꓡꓰ ꓘꓶꓻ ꓙꓵˍ ꓟ ꓟꓶˍ ꓟ ꓑꓶ. ꓓꓴ ꓟꓲ ꓠꓯ ꓟꓬ ꓢꓶꓽ ꓡꓰ ꓡꓳ. ꓠꓬꓲˍ ꓕꓯ ꓠꓽ ꓪꓴ‐ꓢ ꓔꓯ ꓱꓽ ꓠꓱꓽ ꓓꓴ ꓙꓳ ꓡˍ ꓡꓳ꓾ ꓠ ꓠꓬꓲ ꓓꓴ ꓙꓳ ꓡˍ ꓡꓳ꓿ ꓖꓳ ꓡꓱ ꓥ ꓟꓲ ꓝꓲ ꓓꓴ ꓖꓳ ꓠꓬꓲꓽ ꓣꓳ ꓠꓬ ꓫ. ꓙꓵ ꓔꓬ ꓟ ꓘꓴꓽ ꓠꓯꓸꓼ ꓗꓪ ꓐꓰ ꓪꓴ‐ꓢ ꓔꓯ ꓪꓽ ꓘꓴ ꓢꓲ ꓓꓴ ꓟꓴ, ꓟꓴꓽ ꓖꓪꓽ ꓖꓪ ꓔꓬ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓫ. ꓙꓵ ꓓꓴ ꓠꓲ, ꓫ. ꓟꓬ ꓫ. ꓓꓴ ꓠꓯꓸꓼ ꓗꓪ ꓐꓰ ꓪꓴ‐ꓢ ꓔꓯ ꓙꓵꓻ ꓠꓲ, ꓡꓰ ꓝ. ꓢꓲ ꓦ ꓡꓱ ꓢꓴ ꓐꓴ ꓐꓱ ꓶ꓾ ꓪꓴ‐ꓢ ꓔꓬ ꓗꓪ ꓒꓳ, ꓖꓶ ꓓꓴ ꓕꓲꓽ ꓟ ꓙꓳˍ ꓡꓳ꓿ ꓪꓴ‐ꓢ ꓔꓯ ꓫꓱ. ꓖꓶ ꓓꓳ ꓟꓴ, ꓟ꓾ ꓦ ꓡꓱˍ ꓟ ꓠꓬ꓾ ꓮ ꓙꓵꓽ ꓔꓯ ꓒꓳ, ꓡꓶ. ꓡꓰ ꓝꓲˍ ꓡꓳ꓿ ꓐꓱ ꓓꓴꓽ ꓗꓪ ꓐꓱ ꓟꓶ ꓔ ꓟ ꓗꓪ ꓐꓰ ꓡꓲ, ꓗꓷ ꓟꓶˍ ꓡꓳ꓿ ꓒꓳ‐ꓡꓳ ꓐꓰ ꓫꓲ‐ꓡ ꓬꓲ ꓪ ꓠꓬꓲꓽ ꓣꓳ ꓐꓱ ꓓꓴꓽ ꓗꓪ ꓐꓰ ꓛꓰ, ꓙꓰˍ ꓠꓬ ꓢꓰꓼ ꓗꓷ ꓠ, ꓟ ꓐꓱ ꓶ ꓟꓬꓱꓽ ꓖꓶ ꓔ ꓟ ꓟꓶ ꓢꓴ ꓐꓱ ꓓꓴꓽ ꓦꓴ ꓠꓬ, ꓢꓴ ꓥ ꓟꓲ꓾ ꓝꓲ ꓓꓴ ꓠꓬꓲꓽ ꓣꓳ ꓟꓲꓽ ꓙꓬ ꓗꓪ ꓛꓲ ꓝꓲ. ꓖꓶꓽ ꓗꓷꓳ꓿ ꓬꓲ ꓥˍ ꓟꓲ ꓦ ꓡꓱ ꓢꓴ ꓕꓲꓽ ꓣꓳ ꓒꓬꓱꓼ ꓡꓺꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓣꓳ ꓤꓶ ꓫ. ꓙꓵ ꓓꓴ ꓠꓲ, ꓫ. ꓓꓴ ꓠꓯꓸꓼ ꓗꓪ ꓐꓰ ꓪꓴ‐ꓢ ꓔꓯ ꓝ. ꓢꓲ ꓫꓱ. ꓖꓶ ꓡꓯ꓾ ꓦ ꓡꓱ ꓡꓯ꓿ ꓣꓳ ꓐꓱ ꓶ ꓪꓽ ꓠꓬꓲˍ ꓟ ꓢꓷ. ꓡꓰ ꓓꓴ ꓬꓲ ꓫꓵꓼ ꓠꓬ ꓣꓳꓽ ꓔꓯ ꓡꓳ. ꓠꓬ, ꓔꓬ ꓡꓳ꓾ ꓦꓴ ꓠꓬ, ꓔꓬ ꓡꓳ꓿
