ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓕꓱ ꓕꓲ ꓠꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓢꓲ ꓡꓲ ꓟ ꓠꓬ ꓠꓴ ꓪ ꓔꓯ ꓖꓶˍ ꓥꓳ꓿ ꓥꓪ ꓖꓶˍ ꓟ ꓢꓲ ꓡꓲ ꓟ ꓠꓬ ꓟꓲ ꓠꓯ ꓕꓱ ꓟ ꓖꓶˍ ꓟ ꓡꓰ ꓐꓰ ꓟꓽ ꓗ,꓿ ꓥꓪ ꓔꓯ ꓙꓵꓻ꓿ ꓠꓴ ꓪ ꓠꓲ, ꓟ ꓕꓽ ꓫ.꓿ ꓐ, ꓐ ꓪꓴ‐ꓢ ꓔꓯ ꓙꓵꓻ꓿ ꓥꓪ ꓐꓯ ꓘꓶꓽ ꓠ ꓠ,꓾ ꓐꓯ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓬꓳ‐ꓦ 14ꓽ23‐29 ꓗꓪ ꓚꓳ. ꓣꓳꓽ ꓔꓯ ꓢꓯꓼ ꓖꓶ ꓡ ꓔꓬ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓟꓶ ꓣꓳꓽ ꓦꓬꓼ ꓠꓬꓲ ꓗꓪ ꓠꓬ ꓢꓲ ꓡꓲ ꓟ ꓐꓯˍ ꓟ ꓠꓬ ꓟꓽ ꓙꓳꓻꓳ꓿ ꓮ ꓡꓲ ꓗꓪ ꓥˍ ꓟꓲ ꓙꓳꓺ ꓛꓱꓽ ꓓꓴ꓾ ꓮ ꓡꓲ ꓗꓪ ꓥˍ ꓟꓲ ꓓꓵꓽ ꓙ ꓫ. ꓓꓴ꓾ ꓮ ꓫꓵꓽ ꓬꓰˍ ꓗꓪ ꓥˍ ꓟꓲ ꓚꓵ ꓚꓵ ꓣꓳ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓢꓲ ꓡꓲ ꓟ ꓟꓽ ꓙꓳ ꓫꓵꓽ ꓮ ꓟꓬ, ꓙꓳ ꓡˍ ꓡꓳ꓿ ꓣꓳ ꓔꓯ ꓙꓳꓺ ꓡꓰ ꓝꓲˍ ꓟ꓾ ꓣꓳ ꓔꓯ ꓛꓱꓽ ꓡꓰ ꓝꓲˍ ꓟ ꓕꓱ ꓡꓱ ꓫꓵꓽ ꓡꓰꓽ ꓣꓳ ꓔꓳ, ꓜꓳꓽ ꓔꓬ ꓡꓳ꓿ ꓝꓮꓲ ꓟꓲ ꓠꓯ ꓕꓱ ꓟ ꓖꓶˍ ꓟ ꓢꓲ ꓡꓲ ꓟ ꓥˍ ꓟꓲ ꓕꓲꓽ ꓑ, ꓤ ꓥ ꓡꓳ꓿ ꓕꓲꓽ ꓑ, ꓤ ꓡꓰꓽ ꓣꓳ ꓔꓯ ꓢꓲ ꓡꓲ ꓗꓷ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓝꓮꓲ ꓕꓲ ꓑ, ꓗꓷ ꓡꓰˍ ꓕꓯ ꓢꓲ ꓡꓲ ꓟ ꓖꓳ ꓟ ꓥˍ ꓟꓲ ꓝꓮꓲ ꓕꓲ ꓧꓶ. ꓟꓶꓽ ꓡꓰꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓖꓶˍ ꓢꓲ ꓡꓲ ꓟ ꓠꓬ ꓕꓱ ꓡꓱ ꓟꓽ ꓥ꓿
ꓢꓲ ꓒ ꓬꓰ‐ꓢꓴ ꓖꓶˍ ꓟ ꓢꓲ ꓡꓲ ꓟ ꓠꓬ ꓠꓲ, ꓫ. ꓟꓬ ꓫ. ꓓꓴ ꓮ ꓙꓵꓽ ꓟ ꓘꓴꓽ ꓠꓯꓸꓼ ꓗꓪ ꓢꓲ ꓡꓲ ꓡꓲ ꓐꓰ ꓔꓬ ꓪˍ ꓟ ꓣꓱꓽ ꓛꓰꓽ꓾ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓘꓶꓻ ꓡꓶꓽ ꓗꓽ ꓡꓽ ꓓꓴ ꓠꓲ, ꓫ. ꓟꓬ ꓫ. ꓓꓴ ꓘꓴꓽ ꓠꓯꓸꓼ ꓗꓪ ꓢꓲ ꓡꓲ ꓡꓲˍ ꓐꓰ ꓔꓬ ꓪˍ ꓟ ꓣꓱꓽ ꓛꓰꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ. ꓢꓲ ꓡꓲ ꓟ ꓣꓳ ꓔꓯ ꓖꓶˍ ꓡꓳ꓾ ꓐꓰ ꓐꓯ ꓔ ꓡꓳ꓿ ꓢꓲ ꓡꓲ ꓟ ꓡꓯꓼ ꓫꓴ ꓕꓱ ꓟ ꓔꓯ ꓶꓻ ꓤ ꓖꓶˍ ꓟ ꓡꓰ ꓐꓰ ꓖꓶ ꓠ. ꓡ? ꓕꓱ ꓡꓱ ꓣꓴ ꓠ. ꓡ꓾ ꓐꓰ ꓣꓳꓽ ꓠ ꓠꓬꓲ ꓓꓴ ꓙꓳˍ ꓡꓳ꓿
ꓥ ꓡꓳ꓾ ꓕꓱ ꓟ ꓠꓬ ꓮ ꓫꓵ. ꓔꓯ ꓫꓱ.ˍ ꓐꓰ ꓣꓳꓽ ꓡꓳ. ꓠꓬꓲˍ ꓕꓯ ꓣꓳꓽ ꓮ ꓠꓱ ꓦꓬꓼ ꓠꓬꓲ ꓗꓪ ꓣꓮꓓꓲꓳ ꓠ ꓠ, ꓟ ꓔꓯ ꓫꓱ.ˍ ꓡꓳ꓿ ꓣꓮꓓꓲꓳ ꓠ ꓠ, ꓕꓯ ꓬꓲ ꓢꓲ, ꓗ. ꓔꓯ ꓚꓵ, ꓓꓳ ꓢꓲ ꓠꓬꓲ꓾ ꓬꓲ ꓚꓰ ꓔꓯ ꓣꓴ ꓠ ꓔ ꓡꓳ꓾ ꓒꓽ ꓠ ꓔ ꓡꓳ꓿ ꓣꓮꓓꓲꓳ ꓢꓲ, ꓗ. ꓔꓯ ꓣꓳꓽ ꓟꓽ ꓣꓴ ꓣꓴ ꓟꓽ ꓒꓬꓱ ꓒꓬꓱ ꓐꓰ ꓣꓳ ꓠꓬ ꓠ ꓠ, ꓟꓽ ꓠ꓿ ꓕꓱ ꓟˍ ꓡꓰ ꓐꓰ ꓪꓴ‐ꓢ ꓖꓶˍ ꓟ ꓬꓲ. ꓢꓲ ꓡꓲ ꓟ ꓣꓱꓽ ꓛꓰꓽ ꓔꓯ ꓠꓬ ꓣꓳꓽ ꓙꓵꓻ ꓠꓲ, ꓢꓲ, ꓗ. ꓔꓯ ꓚꓵ, ꓓꓳ ꓢꓲ ꓠꓬꓲ ꓘꓳ ꓣꓴ ꓠ ꓔ ꓡꓳ꓿ ꓶꓻ ꓤ ꓕꓲ ꓟ ꓔꓯ ꓘꓳ ꓣꓴˍ ꓟ ꓡꓰ ꓐꓰ ꓟꓽ ꓥ꓿ ꓪꓴ‐ꓢ ꓠꓯꓸꓼ ꓗꓪ ꓚꓳ. ꓬꓲ. ꓢꓲ ꓡꓲ ꓟ ꓠꓬ ꓣꓳ ꓔꓯ ꓟꓳ. ꓐꓬꓱꓻ ꓩꓴ ꓡˍ ꓟ꓾ ꓟꓲꓽ ꓦꓲ ꓗꓪ ꓐꓰ ꓐꓬꓱꓻ ꓩꓴ ꓡˍ ꓟ ꓡꓰ ꓐꓰ ꓮ ꓡ ꓫꓱ.ˍ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓐꓯ ꓔ ꓡꓳ꓿ ꓥꓪ ꓠꓴ ꓪ ꓔꓯ ꓢꓲ ꓡꓲ ꓟ ꓠꓴ ꓪ ꓔꓯ ꓖꓶˍ ꓥꓳ꓾ ꓐꓰ ꓐꓯ ꓔ ꓡꓳ꓿ ꓬꓲ ꓢꓲ ꓡꓲ ꓟ ꓔꓯ ꓣꓳ ꓘꓳ ꓣꓴ ꓠ, ꓟ ꓐꓱ ꓶ ꓬꓲ ꓔꓯ ꓙꓵꓻ ꓠ, ꓟ ꓬꓳ. ꓚꓰꓽˍ ꓡꓳ꓿ ꓬꓲ ꓐꓯ ꓘꓶꓽ ꓠ ꓠ, ꓢꓲ ꓠꓬꓲ ꓬꓲ ꓐꓯˍ ꓟ ꓔꓯ ꓒꓵꓽ ꓛꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓖꓳ ꓕꓯ ꓠꓬ ꓣꓳ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓢꓲ ꓡꓲ ꓐꓰ ꓗꓷ ꓡꓰˍ ꓥꓳ꓿
