ꓟꓲ ꓠꓯ ꓕꓱ ꓟ ꓗꓪ ꓙꓳˍ ꓟ ꓮ ꓙꓵꓽ ꓠꓬ ꓪꓴ‐ꓢ ꓡꓰ ꓚꓰꓼ ꓔ ꓡꓳ꓿ ꓮ ꓫꓵꓽ ꓥˍ ꓟꓲ ꓪꓴ‐ꓢ ꓡꓰ ꓚꓰꓼ ꓔ ꓟ ꓡꓰ ꓐꓰ ꓬꓰ ꓔꓬ ꓡ꓿ ꓙꓱꓽ ꓤ ꓙꓱꓽ ꓟꓲ ꓥˍ ꓟꓲ ꓪꓴ‐ꓢ ꓮ ꓡꓲ ꓚꓰꓼ ꓔ ꓠꓬ ꓮ ꓡꓲ ꓬꓲ ꓪ ꓠꓬ ꓞꓳ ꓙꓳ ꓔꓬ ꓡꓳ꓿ ꓔꓯꓺ ꓥꓳꓽ꓾ ꓬꓲꓻ ꓯ, ꓠꓬ ꓬꓲꓻ ꓙꓬ ꓖꓴꓽ ꓗꓴ.ˍ ꓡꓳ꓿ ꓮ. ꓠꓽ ꓠꓬ ꓡꓴ ꓗꓴ.ˍ ꓡꓳ꓿ ꓮ. ꓠꓬꓲꓽ ꓠꓬ ꓓꓰ ꓟꓲ ꓟꓽ ꓙꓲˍ ꓡꓳ꓿ ꓮ ꓟꓴꓽ ꓥ ꓟꓲ ꓶꓻ ꓤ ꓚꓰ, ꓙꓲˍ ꓡꓳ꓾ ꓚꓬ ꓢꓲ. ꓕꓳꓽ ꓙꓲꓻˍ ꓡꓳ꓿ ꓕꓱ ꓟˍ ꓡꓰ ꓐꓰ ꓢꓲ, ꓜꓲ ꓢꓲ, ꓟꓲ꓾ ꓬꓲꓻ ꓙꓬ꓾ ꓥ ꓠꓬ ꓟꓵꓽ ꓘꓳꓼ ꓦꓬꓼ ꓠꓬꓲ ꓥ ꓟꓲ ꓬꓲ. ꓓꓻ ꓬꓲ. ꓪꓴ‐ꓢ ꓐꓯ ꓘꓶꓽ ꓠꓯꓸꓼ ꓘꓴꓽ ꓗꓪ ꓙꓰ ꓔꓬ ꓡꓳ꓿ ꓪꓴ‐ꓢ ꓠꓬ ꓕꓱ ꓡꓱ ꓗꓷ ꓔ ꓟ ꓑꓶ. ꓓꓴ꓾ ꓕꓱ ꓡꓱ ꓕꓵꓼ ꓪ ꓖꓶꓽ ꓔ ꓟ ꓑꓶ. ꓓꓴ ꓬꓲ ꓪ ꓠꓬ ꓕꓱ ꓡꓱ ꓞꓳ ꓙꓳ ꓔꓬ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓪꓴ‐ꓢ ꓠꓬ ꓕꓱ ꓡꓱ ꓠꓲ, ꓡꓶꓽ ꓙꓳˍ ꓟ ꓑꓶ. ꓓꓴ ꓥ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓪꓴ‐ꓢ ꓠꓬ ꓞꓳ ꓤ ꓔꓯ ꓚꓰꓼˍ ꓕꓯ ꓠꓬ꓾ ꓬꓲ ꓠꓬ ꓬꓲ ꓒꓬꓱꓽ ꓔꓯ ꓫꓱ.ˍ ꓟ ꓞꓳ ꓤ ꓔꓯ ꓚꓰꓼ ꓗꓷˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓞꓳ ꓤ ꓕꓱ ꓟ ꓠꓬ ꓓꓵꓽ ꓙꓽ ꓗꓴ.ˍ ꓟ꓾ ꓝꓮꓲ ꓠꓲ, ꓠꓵ ꓗꓴ.ˍ ꓟ꓾ ꓪꓴ‐ꓢ ꓒꓬꓱꓽ ꓔꓯ ꓫꓱ.ˍ ꓟ ꓠꓬ ꓣꓳ ꓠꓲ, ꓠꓵ ꓗꓴ.ˍ ꓟ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓲ. ꓪꓴ. ꓕꓯ ꓠꓬ ꓠꓵꓻ ꓠꓲ, ꓕꓱ ꓟ ꓠꓬ ꓒ ꓐꓲ ꓐꓲ ꓜꓲꓼ ꓡꓰˍ ꓟ ꓥ ꓡꓳ꓿ ꓮ‐ꓓꓯ ꓐꓰ ꓰ‐ꓪ ꓠꓬ ꓠꓵꓻ ꓠꓲ, ꓒ ꓐꓲ ꓐꓰ ꓞꓳ ꓙꓳ ꓔꓬ ꓟ ꓥ ꓡꓳ꓿ ꓝꓴꓲ. ꓕꓱ ꓟ ꓟꓲ ꓠꓯ ꓘꓴꓽ ꓗꓪ ꓓꓵꓽ ꓡ ꓗꓷ ꓗ ꓠꓯ. ꓠꓵꓻ ꓠꓲ, ꓕꓱ ꓟ ꓠꓬ ꓚꓲ. ꓛꓬ ꓐꓱ ꓶ ꓠꓲ, ꓠꓵˍ ꓟ ꓑꓶ. ꓓꓴ ꓠꓱ. ꓐꓯ ꓢꓴ ꓔꓯ ꓢꓰꓼˍ ꓟ ꓕꓱ ꓡꓱ ꓫꓵꓽ ꓔꓳ, ꓜꓳꓽ ꓡˍ ꓡꓳ꓿ ꓠꓵꓻ ꓠꓲ, ꓕꓱ ꓟ ꓠꓬ ꓟꓽ ꓐꓲꓻ ꓗꓷ ꓡꓰꓳ꓿ ꓠꓵꓻ ꓠꓲ, ꓖꓳ ꓟ ꓠꓬ ꓖꓳꓼ ꓡꓰꓳ꓿ ꓠꓵꓻ ꓠꓲ, ꓖꓳ ꓟ ꓠꓬ ꓣꓳ ꓐꓱ ꓶ ꓚꓵ ꓚꓵ ꓡꓳ. ꓠꓲ, ꓟꓽ ꓫꓵ ꓟ ꓕꓲꓽ ꓫꓵꓽ ꓒꓬꓱꓼ ꓡꓺꓳ꓿
ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓫꓵꓻˍ ꓟ ꓗꓪ ꓐꓰ ꓧꓪ. ꓡꓰ ꓗ ꓠꓯ.꓾ ꓬꓲ ꓠꓬ ꓝꓮꓲ ꓢꓯ. ꓬꓲꓼ ꓡ ꓗꓷ ꓗ ꓠꓯ. ꓕꓵꓼ ꓪ ꓕꓱ ꓟ ꓣꓳ ꓔꓯ ꓖꓶ ꓔ ꓬꓰˍ ꓡꓳ꓿ ꓕꓱ ꓟ ꓠꓬ ꓢ. ꓠꓯ ꓠꓽ ꓦꓬꓼ ꓠꓬꓲ ꓗꓪ ꓣꓳ ꓑ ꓙꓽ ꓪˍ ꓟ (YO-V 13:31-33, 34-35) ꓢꓲ ꓒ ꓬꓰ‐ꓢꓴ ꓠꓬ꓾ ꓥꓪ ꓠꓴ ꓪ ꓔꓯ ꓕꓵꓼ ꓪ ꓕꓲꓽ ꓟ ꓖꓶˍ ꓥꓳ꓿ ꓠꓴ ꓪ ꓔꓯ ꓥ ꓠꓲ, ꓠꓵˍ ꓟ ꓡꓰ ꓐꓰ ꓠꓴ ꓪ ꓥˍ ꓟꓲ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓠꓲ, ꓠꓵ ꓡꓯꓽ ꓘꓳ꓾ ꓐꓰ ꓐꓯ ꓔ ꓡꓳ꓿
ꓕꓵꓼ ꓪ ꓐꓯˍ ꓟ ꓠꓬ ꓮ ꓙꓵꓽ ꓖꓼ ꓛꓳ ꓠ ꓔ ꓡꓳ꓿ ꓕꓵꓼ ꓪ ꓐꓯˍ ꓟ ꓠꓬ ꓙꓵꓽ ꓗ ꓐꓰ ꓕꓲꓽ ꓡꓰ, ꓥꓳ꓿ ꓕꓱ ꓟ ꓠꓬ ꓪꓴ‐ꓢ ꓡꓰ ꓖꓶꓽ ꓔ ꓟ ꓙꓵꓽ ꓗ ꓫꓵꓼ ꓥ ꓡꓳ꓿ ꓮ ꓠꓱ ꓕꓯ ꓘꓶꓽ ꓫꓵꓽ ꓡꓵ ꓗꓪ ꓪꓴ‐ꓢ ꓠꓬ ꓣꓳ ꓔꓯ ꓙꓵꓽ ꓗ ꓖꓶˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓖꓳ ꓟ ꓠꓬ ꓮ ꓟꓶ ꓢꓲ ꓒ ꓬꓰ‐ꓢꓴ ꓖꓶꓽ ꓙ ꓟꓳˍ ꓟ ꓕꓵꓼ ꓪ ꓔꓯ ꓟꓽ ꓛꓲ ꓟꓽ ꓡꓯꓼ ꓡꓰ ꓟꓳ. ꓖꓶ ꓡˍ ꓟ ꓥ ꓡꓳ꓿ ꓮ ꓟꓶ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓐꓲ ꓜꓲꓼˍ ꓟ ꓕꓵꓼ ꓪ ꓕꓲ ꓟ ꓖꓶ ꓡˍ ꓡꓳ꓿ ꓕꓱ ꓟ ꓠꓬ ꓠꓲ, ꓠꓵ ꓡꓯ ꓘꓳ ꓠ, ꓟ ꓥ ꓡꓳ꓿
ꓙꓱꓽ ꓤ ꓙꓱꓽ ꓟꓲ꓾ ꓚꓰꓼ ꓫꓵꓽ ꓚꓰꓼ ꓙꓰꓽ ꓥ ꓕ ꓑꓳꓸꓼ ꓠꓬ ꓪꓴ‐ꓢ ꓐꓯ ꓘꓶꓽ ꓛꓳ ꓫꓱꓽ ꓔꓬ ꓟ ꓡꓰ ꓐꓰ꓾ ꓞꓳ ꓤ ꓥˍ ꓟꓲ ꓪꓴ‐ꓢ ꓐꓯ ꓘꓶꓽ ꓞꓳ ꓙꓳ ꓠ, ꓟ ꓬꓳ. ꓚꓰꓽˍ ꓡꓳ꓿ ꓞꓳ ꓤ ꓔꓯ ꓪꓴ‐ꓢ ꓠꓬ ꓕꓲꓽ ꓫꓵꓽˍ ꓡꓰꓽ ꓝꓲˍ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓥ ꓡ꓿ ꓪꓴ‐ꓢ ꓔꓯ ꓠꓲ, ꓠꓵ ꓠ, ꓟ ꓐꓰ ꓣꓳꓽ ꓠꓶꓽ ꓛꓳꓽ ꓕꓲꓽ ꓛꓳꓽ ꓔꓯ ꓠꓲ, ꓠꓵ ꓠ, ꓟ ꓥ ꓡꓳ꓿ ꓔꓯꓺ ꓥꓳꓽ꓾ ꓠꓴ ꓠꓬ ꓟꓽ ꓠꓲ, ꓠꓵ꓾ ꓪꓴ‐ꓢ ꓒꓬꓱꓽ ꓔꓯ ꓫꓱ.ˍ ꓟ ꓦ ꓕꓱ ꓟ ꓣꓳ ꓠꓲ, ꓠꓵ ꓐ ꓡˍ ꓥ ꓟꓲ ꓠꓴ ꓠꓬ ꓠꓵꓻ ꓠꓲ, ꓣꓱꓽ ꓛꓰꓽ ꓕꓱ ꓟ ꓔꓯ ꓟꓽ ꓘꓳ ꓣꓴ꓾ ꓟꓽ ꓠꓲ, ꓠꓵ꓾ ꓚꓲ. ꓛꓬꓽ ꓐꓱ ꓶ ꓗꓪ ꓚꓳ. ꓗꓳ. ꓙꓰ ꓠꓬ ꓠꓱ. ꓐꓯ ꓮꓽ ꓟ ꓐꓱ ꓶˍ ꓟꓲ ꓟꓽ ꓓꓵꓽ ꓙꓽ꓾ ꓠꓲ, ꓟ ꓠꓻ ꓟꓽ ꓗꓴ. ꓕꓱ ꓡꓱ ꓫꓵꓽ ꓡ ꓞꓳ ꓥꓳ ꓐꓯ ꓕꓯ ꓣꓳ ꓠꓬ ꓙꓱꓽ ꓤ ꓔꓯ ꓫꓱ. ꓡꓰꓳ꓿
ꓣꓳ ꓠꓬ ꓪꓴ‐ꓢ ꓒꓬꓱꓽ ꓟꓬ ꓔꓯ ꓫꓱ. ꓠ, ꓟ ꓐꓱ ꓶ ꓚꓰꓼ ꓔ ꓥˍ ꓟꓲ ꓣꓳ ꓠꓵꓻ ꓠꓲ, ꓕꓱ ꓟ ꓟꓽ ꓙꓳ ꓕꓯ ꓠꓬ ꓣꓳ ꓠꓬ ꓠꓱ. ꓐꓯ ꓙꓱꓽ ꓤ ꓙꓱꓽ ꓟꓲˍ ꓡꓰ ꓐꓰ ꓗꓷ ꓡꓰˍ ꓥꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓠꓱ. ꓐꓯ ꓞꓳ ꓫꓵꓽ ꓞꓳ ꓙꓰꓽ ꓔꓯ ꓠꓲ, ꓠꓵ ꓗꓴ.ˍ ꓟ꓾ ꓣꓳ ꓦꓲꓻ ꓢꓴ ꓔꓯ ꓟꓽ ꓥ ꓥ ꓠꓱ. ꓐꓯ ꓔꓯ ꓠꓲ, ꓠꓵ ꓗꓴ.ˍ ꓟ ꓠꓬ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓕꓲꓽ ꓫꓵꓽˍ ꓡꓰꓽ ꓙꓳˍ ꓡꓳ꓿ ꓮ ꓫꓵꓽ ꓥˍ ꓟꓲ ꓕꓱ ꓡꓱ ꓠꓲ, ꓠꓵ ꓟꓽ ꓗꓴ.꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓕꓵꓼ ꓪ ꓫꓵꓼ ꓕꓲꓽ ꓟ ꓖꓶ ꓔ ꓡꓳ꓿ ꓕꓲꓽ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ ꓐꓰ ꓣꓳ ꓔꓯ ꓐꓯ ꓖꓶ ꓡˍ ꓡꓳ꓿
ꓠꓵꓻ ꓠꓲ, ꓐꓰ ꓐꓯˍ ꓕꓯ ꓟꓲ ꓠꓯ ꓞꓳ ꓤ ꓮ ꓟꓬ, ꓠꓬ ꓕꓱ ꓡꓱ ꓥꓳꓽ ꓓ, ꓫꓵꓽ ꓙꓳˍ ꓡꓳ꓿ ꓮ ꓡꓲ ꓥꓳꓽ ꓓ, ꓡ꓿ ꓠꓵꓻ ꓠꓲ, ꓕꓱ ꓟ ꓚꓲ. ꓛꓬ ꓐꓱ ꓶ꓾ ꓚꓲ. ꓛꓬ ꓠꓵˍ ꓕꓯ꓾ ꓚꓲ. ꓛꓬ ꓣꓱꓽ ꓞ, ꓕꓯ ꓕꓱ ꓟ ꓔꓯ ꓣꓴ ꓠꓲ, ꓫꓵˍ ꓟ꓾ ꓖꓳ ꓟ ꓔꓯ ꓚꓲ. ꓛꓬ ꓦꓲꓻ ꓘꓴꓽ ꓗꓪ ꓓ, ꓠꓲ, ꓫꓵˍ ꓟ ꓗꓷ ꓔ ꓠꓲ, ꓫꓵˍ ꓟ꓾ ꓚꓲ. ꓛꓬ ꓶꓽ ꓬꓰ ꓠꓲ, ꓫꓵˍ ꓟ꓾ ꓕꓱ ꓡꓱ ꓫꓵꓽ ꓥ ꓟ ꓑꓶ. ꓓꓴ ꓕꓱ ꓟ ꓠꓬ ꓟꓲ ꓠꓯ ꓞꓳ ꓤ ꓓꓵꓽ ꓙˍ ꓟ ꓕꓲꓽ ꓚꓱ, ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟ. ꓟꓲꓽ ꓘꓴꓽ ꓗꓪ ꓪꓴ‐ꓢ ꓡꓰ ꓐꓯ ꓖꓶ ꓡˍ ꓟ ꓚꓱ, ꓠꓬ ꓖꓳ ꓡꓱ ꓟꓽ ꓥ꓿ ꓪꓴ‐ꓢ ꓡꓰ ꓟꓳ. ꓖꓶ ꓡˍ ꓟ ꓚꓱ, ꓠꓬ ꓠꓵ ꓠꓲ, ꓐꓰ ꓐꓯˍ ꓟ ꓠꓬ ꓣꓳ ꓠꓵˍ ꓕꓲ ꓣꓳ ꓟ ꓐꓱ ꓶ꓾ ꓣꓳ ꓠꓵˍ ꓕꓲꓽ ꓫꓵꓽ ꓟ ꓐꓱ ꓶ ꓖꓶꓽˍ ꓟ ꓥ ꓡꓳ꓿ ꓣꓳ ꓔꓯ ꓙꓳˍ ꓟ ꓖꓶˍ ꓟ꓾ ꓣꓳ ꓔꓯ ꓙꓳˍ ꓟ ꓙꓲꓻ ꓓꓰ ꓡꓰˍ ꓟ ꓖꓶˍ ꓟ꓾ ꓬꓲ ꓐꓰ ꓕꓲꓽ ꓡꓰ, ꓔꓬ ꓠꓲ, ꓫꓵˍ ꓟ ꓕꓱ ꓡꓱ ꓫꓵꓽ ꓠꓲ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓞꓳ ꓤ ꓕꓲꓽ ꓣꓳ ꓔꓯ ꓠꓲ, ꓠꓵˍ ꓕꓯ ꓠꓴ ꓔꓯ ꓙꓳˍ ꓟ ꓠꓴ ꓔꓯ ꓙꓲˍ ꓟ ꓮ ꓙꓵꓽ ꓬꓲ ꓔꓯ ꓖꓶꓽ ꓐ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓔꓯ ꓠꓲ, ꓠꓵˍ ꓟ ꓑꓶ. ꓓꓴ ꓥ ꓡꓳ꓿ ꓕꓱ ꓟ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓖꓶꓽ ꓡˍ ꓟ ꓠ ꓠꓵꓻ ꓠꓲ, ꓥ ꓡꓳ꓿ ꓟꓲ ꓠꓯ ꓗꓪ ꓐꓰ ꓓꓳ ꓡˍ ꓟ ꓠꓵꓻ ꓠꓲ, ꓠꓬ꓾ ꓣꓳ ꓠꓵˍ ꓕꓲ ꓣꓳ ꓟ ꓔꓯ ꓣꓳ ꓦꓲꓻ ꓘꓴꓽ ꓗꓪ ꓧꓳꓽ ꓔꓯ, ꓡ ꓠꓲ, ꓫꓵˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲ ꓢꓲ, ꓪꓰ ꓕꓲꓽ ꓪꓰ ꓔꓯ ꓣꓳ ꓠꓲ, ꓠꓵˍ ꓕꓯ ꓬꓲ ꓔꓯ ꓣꓳ ꓠꓬ ꓧꓼ ꓠꓲ, ꓫꓵˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓟ. ꓟꓲꓽ ꓘꓴꓽ ꓗꓪ ꓖꓳ ꓡꓱ ꓟꓽ ꓥ꓿ ꓢꓲ, ꓪꓰ ꓔꓯ ꓠꓲ, ꓠꓵˍ ꓥꓳ ꓐꓯ ꓠꓬ ꓢꓲ, ꓪꓰ ꓖꓳ ꓟ ꓔꓯ ꓮ ꓡꓲ ꓐꓰ ꓟꓬꓽ ꓠꓬꓲ ꓐꓲꓻ ꓡ ꓠ, ꓟ꓾ ꓮ ꓡꓲ ꓐꓰ ꓟꓬꓽ ꓠꓬꓲ ꓪꓴꓽ ꓡ ꓠ, ꓟ꓾ ꓐꓶꓽ ꓓꓲ ꓡꓯ, ꓓꓲ ꓢꓰꓼ ꓖꓶˍ ꓟ꓾ ꓕꓱ ꓟ ꓡꓰꓽ ꓠꓵꓻ ꓠꓲ, ꓥ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓡꓰ ꓢꓯꓼ ꓟꓬ ꓖꓶ ꓗꓷꓳ꓿
ꓣꓳ ꓥˍ ꓟꓲ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓠꓲ, ꓠꓵ ꓢꓲ ꓠꓬꓲ ꓬꓲ ꓙꓵ, ꓖꓶ ꓐ ꓡˍ ꓟ꓾ ꓣꓳ ꓔꓯ ꓙꓳˍ ꓟ ꓢꓷ. ꓠꓲ, ꓣꓳ ꓔꓯ ꓙꓳˍ ꓟ ꓒꓴ ꓫꓵ ꓐꓴ ꓔꓯ ꓚꓳ ꓡꓳ ꓚꓳ ꓫꓵ ꓗꓪ ꓔꓬ ꓢꓴ ꓐꓴ ꓔꓯ ꓕꓱ ꓡꓱ ꓐꓰ ꓬꓰ ꓐ ꓡˍ ꓥꓳ ꓐꓯ ꓠꓬ꓾ ꓣꓳ ꓔꓯ ꓪꓴ‐ꓢ ꓡꓰ ꓚꓰꓼ ꓔ ꓟ ꓬꓲ ꓤ ꓫꓵ. ꓤ ꓠꓱ ꓒꓬꓱꓼ ꓡˍ ꓥꓳ꓿ ꓖꓳ ꓡꓱ ꓠꓬꓲ ꓮ ꓙꓵꓽ ꓢꓴ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓠꓯꓸꓼ ꓗꓪ ꓣꓳ ꓠꓲ, ꓠꓵ ꓓꓴ ꓬꓰ ꓡꓯ꓿ ꓪꓴ‐ꓢ ꓣꓳ ꓔꓯ ꓚꓰꓼ ꓔ ꓟ ꓠꓬ ꓬꓲ ꓔꓶ ꓙꓱꓼ ꓠꓬꓲꓽ ꓟˍ ꓡꓰꓽ ꓙꓳˍ ꓡꓳ꓿ ꓕꓱ ꓟ ꓠꓬ ꓟꓲ ꓠꓯ ꓕꓱ ꓟ ꓗꓪ ꓬꓲ ꓔꓯ ꓢꓷ. ꓠ, ꓟ꓾ ꓬꓲ ꓔꓯ ꓠꓲ, ꓠꓵ ꓠ, ꓟ ꓐꓰ꓾ ꓕꓲꓽ ꓠꓬꓲ ꓙꓳˍ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓬꓲ ꓐꓰ ꓕꓲꓽ ꓡꓰ, ꓔꓬ ꓠ, ꓟ ꓥ ꓡꓳ꓿ ꓟꓴꓽ ꓗꓪ ꓗꓴꓷꓼ ꓗꓪ ꓬꓲ ꓐꓰ ꓕꓲꓽ ꓡꓰ, ꓔꓬ ꓠ, ꓟ ꓠꓬ ꓟꓲ ꓠꓯ ꓕꓱ ꓟ ꓗꓪ ꓠꓵꓻ ꓠꓲ, ꓣꓱꓽ ꓛꓰꓽ ꓠꓵꓻ ꓠꓲ, ꓟꓬꓱꓽ ꓔꓯ ꓬꓰ ꓠ ꓔ ꓡꓳ꓿ ꓢꓲ ꓒ ꓠꓯꓸꓼ ꓗꓪ ꓙꓵꓻ ꓢꓲ ꓠꓬꓲ ꓢꓲ ꓒ ꓬꓲ ꓠꓵꓻ ꓠꓲ, ꓔꓯ ꓠꓱ. ꓐꓯ ꓢꓴ ꓔꓯ ꓐꓯ ꓟꓳ. ꓖꓶ ꓢꓴ ꓒꓬꓱꓼ ꓡ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿ ꓫ. ꓟꓳ꓿
