ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓚꓳ ꓑꓸ ꓠꓬ ꓬꓲ ꓢꓲ ꓒ ꓕꓯ ꓢꓲ ꓟꓽ ꓪꓴꓽ꓿ ꓝꓲ ꓓꓴˍ ꓟꓲ ꓬꓲ ꓔꓯ ꓝꓲ ꓢꓴ ꓕꓯ ꓢꓲ ꓟꓽ ꓪꓴꓽ꓿ ꓕꓱ ꓟꓬ ꓙꓰꓽ ꓠꓴ ꓪꓽ ꓢꓷꓸ ꓢꓲ ꓬꓰˍ ꓠꓬ ꓶꓼ ꓙꓳ ꓫꓱꓹ ꓙꓳˍ ꓥꓳ꓿ ꓠꓴ ꓪꓽ ꓮꓽ ꓙꓵ ꓡꓱꓸꓼ ꓔꓯ ꓐꓯˍ ꓟ ꓠꓽ ꓟꓽ ꓥ꓿ ꓥꓪ ꓡꓰ ꓢꓲ ꓔ ꓢꓴ ꓔꓯ ꓥꓪ ꓢꓷˍ ꓡꓳ꓿
ꓖꓳ ꓡꓱ ꓥ ꓟꓲ ꓢꓲꓽ ꓫꓬ ꓕꓳ ꓶ ꓗꓪ꓾ ꓥꓪ ꓜ ꓜꓽ ꓢꓴ ꓥꓪ ꓗꓪ ꓛꓳꓽ ꓬꓲ ꓛꓲ ꓟꓶ ꓓꓴ ꓡꓰ ꓥꓪ ꓔꓯ ꓑꓰꓹ ꓡ ꓡꓳ꓾ ꓐꓰ ꓐꓳ ꓔ ꓟ ꓐꓲ ꓡ ꓠꓹ ꓟ ꓥ ꓡꓳ꓿ ꓖꓳ ꓡꓱ ꓗꓷ ꓡꓰ ꓕꓯ꓾ ꓥꓪ ꓠꓽ ꓙꓲ-ꓢꓴ ꓥ ꓟ ꓠꓴ ꓪꓽ ꓙꓵꓻ ꓠꓹ ꓟ꓾ ꓟꓽ ꓒꓬꓱꓼ ꓡ ꓕꓯˍ ꓡꓰ ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓟ ꓥ ꓡꓳ꓿
ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓥꓪ ꓡꓰ ꓝꓲ ꓩꓴ ꓗꓷ ꓢꓴ ꓔꓯ ꓘꓳ ꓣꓴ ꓢꓴ ꓠꓽ ꓥꓪ ꓔꓯ ꓘꓳ ꓣꓴˍ ꓟ ꓥ ꓡꓳ꓿ ꓥꓪ ꓔꓯ ꓘꓳ ꓣꓴ ꓢꓴ ꓠꓬ ꓥꓪ ꓔꓯ ꓝꓲ ꓩꓴ ꓡ ꓢꓴ ꓔꓯ ꓘꓳ ꓣꓴˍ ꓟ ꓥ ꓡꓳ꓾ ꓐꓯˍ ꓡꓳ꓿
YO-V 13:16-20
ꓬꓰ‐ꓢꓴ ꓬꓲ ꓕꓲ ꓤꓶꓻ ꓡꓱꓸꓼ ꓠꓬ ꓠꓵꓻ ꓠꓲ, ꓐꓲ ꓞ,ˍ ꓟ ꓔꓯ꓾ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓖꓴ ꓟꓳ. ꓖꓶ ꓔ ꓡꓳ꓿ ꓣꓳ ꓟꓲ ꓠꓯ ꓞꓳ ꓤ ꓮ ꓙꓵꓽ ꓚꓬꓴ. ꓟꓶ ꓠ, ꓟ ꓐꓱ ꓶ ꓬꓲ ꓠꓬ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓫꓵꓻ ꓙ ꓗꓷˍ ꓟ ꓗꓪ ꓐꓰ ꓐ, ꓐ ꓠꓲ, ꓡꓶꓽ ꓔꓯ ꓛꓳ ꓫꓱꓽ ꓗꓷꓳ꓿ ꓪꓴ‐ꓢ ꓬꓲ ꓠꓵꓻ ꓠꓲ, ꓠꓬ ꓣꓳ ꓔꓯꓺ ꓢꓳ ꓓꓴ ꓥ ꓡꓳ꓿
ꓥꓪ ꓠꓴ ꓪ ꓔꓯ ꓠꓲ, ꓠꓵˍ ꓟ ꓡꓰ ꓐꓰ ꓠꓴ ꓪ ꓥˍ ꓟꓲ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯ ꓘꓳ꓾ ꓐꓰ ꓬꓰ‐ꓢꓴ ꓡꓰ ꓐꓯ ꓔ ꓡꓳ꓿ ꓐꓯ ꓘꓶꓽ ꓕꓱ ꓟ ꓗꓪ ꓐꓰ ꓣꓳ ꓠꓬ ꓕꓲ ꓣꓳ ꓛꓳꓽ ꓕꓲ ꓣꓳ ꓟꓽ ꓠꓲ, ꓠꓵ ꓟ꓾ ꓠꓲ, ꓐꓴ ꓡꓯ ꓘꓳˍ ꓟ ꓐꓰ꓾ ꓠꓱ. ꓐꓯ ꓢꓴ ꓔꓯ ꓟꓽ ꓙꓲꓻ ꓟ ꓗꓷ ꓡꓰ ꓝꓲˍ ꓟ ꓚꓱ, ꓔꓯ ꓡꓳ ꓩꓴ ꓗꓷ ꓠ, ꓟ ꓢꓳ ꓣꓴ ꓢꓲ ꓠꓬꓲ꓾ ꓖꓳ ꓗ ꓠꓯ. ꓣꓳ ꓠꓬ ꓗ, ꓛꓲꓽˍ ꓟ ꓐꓰ ꓫꓱ. ꓤ ꓙꓽ ꓗꓳ ꓠꓲ, ꓬꓲ ꓝꓳ, ꓟꓶ ꓬꓲ ꓚꓰ ꓒꓬꓱꓼ ꓡˍ ꓡꓳ꓿
ꓣꓳ ꓠꓬ ꓪꓴ‐ꓢ ꓠꓲ, ꓡꓶꓽ ꓔꓯ ꓒꓵꓽ ꓛꓳ ꓢꓲ꓾ ꓣꓳ ꓤꓶꓻ ꓔꓯ ꓪꓴ‐ꓢ ꓔꓯ ꓮ ꓡꓲ ꓐꓰ ꓔꓲꓺ ꓖꓶ ꓡꓯꓼ ꓙꓱ ꓠ, ꓟ ꓔꓯ ꓣꓳ ꓢꓳ ꓣꓴˍ ꓠꓬ꓾ ꓠꓱ. ꓐꓯ ꓮ ꓡꓲ ꓕꓲ ꓣꓳˍ ꓟꓲ ꓣꓳ ꓠꓯꓸꓼ ꓗꓪ ꓐꓰ ꓣꓴ ꓔꓯ, ꓙꓰ ꓟꓽ ꓐ ꓡ ꓟ ꓔꓱ, ꓚꓵˍ ꓟ ꓗ, ꓛꓲꓽ ꓓꓴ ꓚꓵ ꓣꓳ ꓧꓪ ꓟꓶˍ ꓥꓳ꓾ ꓐꓰ ꓪꓴ ꓢ ꓡꓰ ꓣꓳ ꓔꓯ ꓙ ꓟꓳ ꓘꓶꓽ ꓖꓶ ꓔ ꓡꓳ꓿ ꓠꓵꓻ ꓠꓲ, ꓕꓱ ꓟ ꓠꓬ ꓣꓳ ꓐꓴ ꓔꓯ ꓕꓲ ꓠꓲ, ꓕꓲ ꓪꓽ ꓗꓷ ꓡꓰ ꓝꓲ ꓢꓲ꓾ ꓣꓱꓽ ꓞ, ꓔꓬ ꓢꓴ ꓐꓴ ꓔꓯ ꓣꓱꓽ ꓙ ꓠ, ꓟ ꓣꓳ ꓔꓯ ꓧꓳꓽ ꓙꓰˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓮ ꓫꓵꓽ ꓬꓰˍ ꓟ ꓗꓪ ꓥˍ ꓟꓲ ꓪꓴ‐ꓢ ꓟꓬꓱ ꓗꓪ ꓐꓰ ꓬꓰ ꓠ, ꓟ ꓮ ꓕꓯ ꓥ ꓟꓲ ꓓꓵꓽ ꓙ ꓔ ꓡꓯ꓿
