ꓖꓳ ꓕꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓲ-ꓚꓰꓸ-ꓑꓮꓲꓬꓰˍ ꓟ ꓝꓲꓸ ꓥ ꓢꓲ ꓟꓵꓽ ꓞꓴꓽ ꓥ ꓡꓳ꓿ ꓬꓰ-ꓢꓴ ꓠꓬ ꓢꓲꓽ ꓫꓬ ꓦꓲ ꓗꓪ ꓟ ꓢꓳ-ꓡꓳ-ꓟꓳ ꓡꓽ ꓦꓲ ꓘꓶꓽ ꓗꓪ ꓫꓱꓽ ꓚꓳ ꓔꓬ ꓕꓯ꓾ ꓬꓴ-ꓔ ꓡ ꓞꓳ ꓠꓬ ꓬꓲ ꓚꓳ ꓡꓳ ꓗꓪ ꓜꓲꓼ ꓡ ꓢꓲ ꓬꓲ ꓔꓯ꓾ ꓠꓴ ꓠꓬ ꓥꓪ ꓠꓴꓽ ꓔꓯ ꓮ ꓡꓲ ꓟꓶ ꓛꓲ ꓓꓵꓽ ꓙ ꓟꓬꓽ ꓔꓬ ꓝꓲˍ ꓐꓯˍ ꓡ? ꓙꓲ-ꓢꓴ ꓖꓳ ꓕꓲ ꓣꓳ ꓟ ꓠꓴ ꓥ ꓠꓬ ꓥꓪ ꓠꓴꓽ ꓔꓯ ꓔꓱꓹ ꓔꓱꓹꓼ ꓐꓯ ꓖꓶ ꓡꓯ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓗꓷˍ ꓟꓲ ꓠꓴ ꓪꓽ ꓟꓽ ꓙꓵꓻ꓿ ꓥꓪ ꓐꓹ ꓐ ꓟꓬꓱ ꓗꓪ ꓐꓰ ꓥꓪ ꓬꓰˍ ꓟ ꓟꓬꓱꓽ ꓡꓰ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙˍ ꓡꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓠꓬ ꓥꓪ ꓮ ꓣꓳ ꓗꓪ ꓟ ꓟꓽ ꓥ ꓠꓬꓲ ꓟꓽ ꓙꓵꓻ꓿ ꓥꓪ ꓮ ꓣꓳ ꓠꓬ ꓥꓪ ꓢꓯꓼ ꓔꓯ ꓠ ꓠꓹ ꓗꓴˍ ꓡꓳ꓿ ꓥꓪˍ ꓟꓲ ꓬꓲ ꓪꓽ ꓔꓯ ꓢꓷꓸ ꓢꓲ꓾ ꓬꓲ ꓪꓽˍ ꓟꓲ ꓥꓪ ꓔꓯ ꓛꓳ ꓡ ꓡꓳ꓿
ꓥꓪ ꓡꓰ ꓬꓲ ꓪꓽ ꓔꓯ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓖꓶ ꓢꓲ꓾ ꓬꓲ ꓪꓽ ꓠꓬ ꓮ ꓕꓯˍ ꓟꓲ ꓟꓽ ꓟꓶꓽ ꓬꓰ ꓢꓲ ꓠꓬꓲ꓾ ꓮ ꓟˍ ꓟꓲ ꓥꓪ ꓡꓯꓼ ꓒꓯꓹ ꓗꓪ ꓐꓰ ꓬꓲ ꓪꓽ ꓔꓯ ꓦꓴ ꓔꓯꓹ ꓙꓰ ꓟꓽ ꓐ ꓡ꓿ ꓥꓪ ꓔꓯ ꓬꓲ ꓪꓽ ꓡꓯꓼ ꓙꓱ ꓖꓶ ꓡ ꓢꓴ ꓥꓪ ꓐꓹ ꓐ ꓠꓬ ꓮꓽ ꓙꓵ ꓕꓯꓽ ꓢꓲ ꓪꓴꓽˍ ꓟ ꓥ ꓡꓳ꓿ ꓖꓳ ꓡꓱ ꓢꓲ ꓮ ꓟˍ ꓟꓲ ꓐꓹ ꓐ ꓡꓯꓼ ꓒꓯꓹ ꓗꓪ ꓐꓰ ꓬꓲ ꓪꓽ ꓔꓯ ꓦꓴ ꓔꓯꓹ ꓙꓰ ꓟꓽ ꓐ ꓡ꓿ ꓥꓪˍ ꓐꓰ ꓐꓹ ꓐ ꓠꓬ ꓕꓲ ꓣꓳˍ ꓡꓰꓽ ꓥꓳ꓾ ꓐꓯˍ ꓡꓳ꓿
YO-V 10:22-30
ꓬꓰ‐ꓢꓴ ꓠꓬ ꓣꓳ ꓔꓯ ꓮ ꓫꓵꓽ ꓟꓽ ꓗꓷ ꓡꓰ ꓝꓲ ꓝꓲ ꓐꓰ꓾ ꓐꓲ ꓜꓲꓼˍ ꓟ ꓤꓶꓻ ꓗꓪ ꓧꓳꓽ ꓙꓰ ꓠꓲ, ꓫꓵˍ ꓡꓳ꓿ ꓬꓲ ꓠꓬ ꓣꓳ ꓔꓯ ꓬꓲ ꓢꓯꓼ ꓔꓯ ꓠ ꓠ, ꓝꓲ ꓠꓲ, ꓫꓵˍ ꓡꓳ꓿ ꓬꓲ ꓠꓬ ꓣꓳ ꓤꓶꓻ ꓠꓯꓸꓼ ꓗꓪ ꓓꓵꓽ ꓡ ꓠ, ꓟ ꓣꓳ ꓬꓲ ꓙꓵ, ꓖꓶˍ ꓟ ꓔꓯ ꓥꓳ ꓡꓳ. ꓔꓬ ꓡꓳ꓿ ꓬꓰ‐ꓢꓴ ꓐꓰ ꓕꓲ ꓪ ꓔꓬ ꓟ ꓬꓲ ꓙꓵ, ꓠꓬ ꓮ ꓕꓯ ꓟꓲ ꓮꓽ ꓔꓳ ꓟꓽ ꓗꓷ ꓡꓰ꓿ ꓣꓳ ꓠꓬ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓔꓬ ꓕꓯ ꓥ ꓟꓲ꓾ ꓢꓲ ꓒ ꓐꓰ ꓕꓲ ꓪˍ ꓔꓬ ꓢꓲ ꓢꓲ ꓡꓲ ꓐꓰ ꓔꓬ ꓥˍ ꓟꓲ꓾ ꓣꓳ ꓬꓲ ꓙꓵ, ꓠꓬ ꓮꓽ ꓔꓳ ꓟꓽ ꓗꓷ ꓡꓰ꓿
ꓪꓽ ꓘꓴˍ ꓟ ꓠꓬ ꓮ ꓣꓳ ꓡꓳ. ꓢꓴ ꓥ ꓟ ꓢꓲ ꓒ ꓐꓰ ꓬꓲ ꓮ ꓣꓳ ꓥ ꓟ ꓣꓳꓽ ꓐꓰ ꓙꓻ ꓡꓯ ꓘꓳˍ ꓟ ꓚꓱ, ꓥ ꓢꓲ ꓠꓬꓲ꓾ ꓬꓲ ꓠꓵꓻ ꓠꓲ, ꓬꓲ ꓠꓯ.ˍ ꓟ ꓚꓵ ꓘꓶꓽ ꓡꓰ ꓣꓳ ꓠꓲ, ꓟ ꓔꓯ ꓢꓲ ꓡꓲ ꓡꓰ ꓝꓲˍ ꓡꓳ꓿
