Nꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲꓽ ꓠꓽ ꓟ ꓠꓬ ꓢꓯ. ꓬꓲꓼ ꓡ ꓑꓮꓲꓽ ꓗꓳ. ꓙꓰ ꓗ ꓠꓯ. (4) ꓠꓽ ꓕꓲꓽ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ ꓟ. ꓟꓲꓽ ꓘꓴꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ꓾ ꓬꓲ ꓠꓬ ꓙꓲꓻˍ ꓟ ꓮ ꓣꓳ ꓡꓳ. ꓒ ꓥ ꓡꓳ꓿ ꓬꓲ ꓮ ꓣꓳ ꓜꓴ ꓠꓬ ꓬꓲ ꓔꓯ ꓠ ꓠ, ꓡꓳ꓿ ꓬꓲ ꓮ ꓣꓳ ꓜꓴ ꓠꓬ ꓬꓲ ꓢꓯꓼ ꓔꓯ ꓚꓲ. ꓟꓶˍ ꓡꓳ꓿ ꓮ ꓣꓳ ꓡꓳ. ꓒꓽ ꓒ ꓕꓲꓺ ꓗꓪ ꓔꓬ ꓟ ꓮ ꓣꓳ ꓠꓬ ꓮ ꓡꓲ ꓟ ꓡꓰ. ꓘꓴꓽ ꓔꓯ, ꓙꓰ ꓟꓽ ꓐ ꓡ꓾ ꓦꓴꓻ ꓔꓯ, ꓙꓰ ꓟꓽ ꓐ ꓡ꓾ ꓮꓽ ꓟˍ ꓟꓲ ꓒꓬ, ꓜꓽ ꓟꓽ ꓐ ꓡ꓾ ꓐꓰ ꓐꓯ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓕꓵꓼ ꓪ ꓖꓶ ꓢꓲ ꓢꓯꓼ ꓖꓶˍ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓳꓽ ꓑ ꓙꓽˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓣꓳ ꓔꓯ ꓣꓳꓽ ꓡꓳ. ꓠꓬꓲˍ ꓕꓯ ꓮ. ꓣꓳ ꓐꓯˍ ꓟ ꓠꓬ ꓮ ꓫꓵꓽ ꓛꓴꓽ ꓟꓽ ꓙꓳ ꓢꓴ ꓥ ꓡꓳ꓿ ꓮ. ꓣꓳ ꓐꓯˍ ꓟ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓗꓴ. ꓢꓴ ꓥ ꓡꓳ꓿ ꓣꓳꓽ ꓠꓱ. ꓐꓯ ꓙꓱꓽ ꓤ ꓔꓯ ꓡꓳ. ꓠꓬꓲˍ ꓕꓯ꓾ ꓮ ꓡꓲ ꓟ ꓥ ꓟꓲ ꓮ ꓫꓵꓽ ꓥˍ ꓟꓲ ꓕꓲꓽ ꓫꓵꓽ ꓫꓵꓽ ꓠꓬꓲ ꓙꓳˍ ꓡꓳ꓿ ꓩꓴ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓬꓲ ꓓꓳꓼ ꓙꓳˍ ꓡꓳ꓿ ꓕꓳ, ꓗꓴ.ˍ ꓡꓳ꓿ ꓮ. ꓠꓬꓲꓽ ꓮ. ꓥꓼ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓪ ꓔꓯ ꓪꓴ. ꓛꓲ ꓙꓳˍ ꓡꓳ꓿ ꓦ ꓟ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓪ ꓠꓬ ꓢꓯꓼ ꓙꓳˍ ꓡꓳ꓿ ꓐꓬꓽ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓪ ꓠꓬ ꓬꓲ ꓤꓲꓽ ꓓꓴꓽ ꓙꓳˍ ꓡꓳ꓿ ꓔꓶ. ꓗꓴ.ˍ ꓡꓳ꓿ ꓮ ꓫꓵꓽ ꓙꓱꓽ ꓤ ꓗꓪ ꓥ ꓟꓲ ꓕꓱ ꓡꓱ ꓫꓵꓽ ꓙꓲˍ ꓫꓵꓽ꓾ ꓬꓲ ꓪ ꓚꓲ. ꓛꓬ ꓬꓲ ꓪ ꓗ, ꓐꓽ ꓐ ꓡˍ ꓫꓵꓽ꓾ ꓢꓯꓼ ꓪꓽ ꓕꓲꓽ ꓫꓵꓽ ꓫꓵꓽ ꓙꓳˍ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓮ. ꓣꓳ ꓔꓯ ꓠꓽ ꓕꓱ ꓡꓱ ꓫꓵꓽ ꓟꓽ ꓙꓳ꓿ ꓮ. ꓣꓳ ꓠꓽ ꓮ ꓘꓶ. ꓫꓵꓻ ꓢꓻˍ ꓡꓳ꓿ ꓮ. ꓣꓳ ꓠꓽ ꓮ ꓘꓶ. ꓠꓻ ꓡꓰ ꓢꓻˍ ꓡꓳ꓿ ꓮ. ꓣꓳ ꓐꓯˍ ꓟ ꓠꓬ ꓮꓽ ꓟ ꓡꓰ ꓮ ꓡꓲ ꓣꓴ ꓠꓲ, ꓫꓵˍ ꓣꓴ꓾ ꓬꓲ ꓠꓬ ꓢꓻ ꓢꓻ ꓡꓰꓽ ꓫꓵꓻˍ ꓡꓳ꓿ ꓖꓳ ꓡꓱ ꓠꓬꓲ ꓪꓰ ꓕꓳ, ꓐꓴ꓾ ꓡꓽ ꓟ ꓐꓴ꓾ ꓚꓬꓽ ꓢꓲꓽ ꓐꓴ ꓠꓬ ꓮ ꓕꓯ ꓥ ꓟꓲ ꓕꓱ ꓟ ꓔꓯ ꓡꓰꓽ ꓦꓬ ꓠꓬ, ꓔꓬ ꓡꓳ꓿ ꓮ. ꓠꓽ ꓗꓳ. ꓐꓴ ꓠꓬ ꓮ ꓣꓳ ꓔꓯ ꓮ ꓡꓲ ꓜꓽ ꓠ, ꓟ ꓡꓰꓽ ꓡꓳ. ꓔꓬ ꓡꓳ꓿
ꓖꓳ ꓡꓱ ꓐꓯ ꓥ ꓟꓲ ꓮ ꓣꓳ ꓜꓴ ꓬꓲ ꓪ ꓦ ꓡꓱ ꓖꓴ ꓠꓬ ꓮ. ꓣꓳ ꓡꓳ. ꓒꓽ ꓡꓰꓽ ꓥ ꓡꓳ꓿ ꓮ. ꓣꓳ ꓡꓳ. ꓒꓽ ꓮ ꓡꓲ ꓗꓪ ꓙꓰ ꓝꓲˍ ꓠꓬ ꓬꓲ ꓪ ꓖꓳ ꓗꓪ ꓙꓰˍ ꓡꓳ꓿ ꓮ ꓡꓲ ꓗꓪ ꓠꓽ ꓝꓲˍ ꓠꓬ ꓠꓽˍ ꓡꓳ꓿ ꓮ ꓫꓵꓽ ꓖꓶꓽ ꓜꓽˍ ꓠꓬ ꓜꓽˍ ꓡꓳ꓿ ꓮ ꓫꓵꓽ ꓖꓶ ꓓꓳꓻˍ ꓠꓬ ꓓꓳꓻˍ ꓡꓳ꓿ ꓮ. ꓣꓳ ꓐꓯˍ ꓟ ꓠꓬ ꓮ. ꓣꓳ ꓡꓳ. ꓒ ꓬꓲ ꓢꓯꓼ ꓬꓲ ꓚꓲ. ꓟꓶˍ ꓡꓳ꓿ ꓕꓱ ꓟ ꓠꓬ ꓚꓵ ꓚꓵ ꓓꓵꓽ ꓙ ꓟꓶ ꓓꓴ ꓥ ꓡꓳ꓿ ꓠꓱ. ꓐꓯ ꓢꓯꓼ ꓗꓪ ꓐꓰ ꓘꓴˍ ꓠꓬ ꓬꓲ ꓪ ꓟꓽ ꓓꓽ ꓔꓳ,꓾ ꓬꓲ ꓪ ꓟꓽ ꓓꓳ ꓡ꓿ ꓔꓯꓺ ꓥꓳꓽ ꓐꓯˍ ꓠꓬ ꓮ. ꓣꓳ ꓔꓯ ꓬꓲ ꓐꓱ ꓘꓴꓽ ꓗꓪ ꓗꓶ ꓔ ꓕꓯ ꓮ. ꓣꓳ ꓡꓳ. ꓒ ꓠꓬ ꓬꓲ ꓟꓬꓱ ꓕꓲꓽ ꓟ ꓕꓲꓽ ꓟ ꓘꓴˍ ꓡꓳ꓿ ꓮ. ꓣꓳ ꓠꓬ ꓓꓳ ꓡˍ ꓡꓳ꓿ ꓠꓱ. ꓐꓯ ꓢꓯꓼ ꓗꓪ ꓐꓰ ꓘꓴˍ ꓠꓬ ꓬꓲ ꓪ ꓟꓽ ꓓꓳ ꓡ꓿ ꓕꓱ ꓟ ꓠꓬ ꓚꓵ ꓚꓵ ꓓꓵꓽ ꓙꓽ ꓟꓶ ꓓꓴ ꓥ ꓡꓳ꓿
ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ꓾ ꓬꓲ ꓠꓬ ꓙꓲꓻˍ ꓟ ꓮ ꓣꓳ ꓡꓳ. ꓒꓽ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳꓽ ꓠꓬ ꓮ. ꓣꓳ ꓥ ꓡꓳ꓿ ꓣꓳ ꓠꓬ ꓮ ꓫꓵꓽ ꓬꓰ ꓟꓽ ꓗꓴ. ꓢꓴ ꓥ ꓡꓳ꓿ ꓣꓳꓽ ꓠꓬ ꓮ ꓫꓵꓽ ꓟꓽ ꓒꓵꓽ ꓢꓴ ꓥ ꓡꓳ꓿ ꓮ. ꓣꓳˍ ꓡꓰ ꓐꓰ ꓫꓵꓻ ꓢꓻˍ ꓫꓵꓽ꓾ ꓮ. ꓣꓳˍ ꓡꓰ ꓐꓰ ꓠꓻ ꓓꓴ ꓑ ꓓꓴ ꓡꓰ ꓢꓻˍ ꓫꓵꓽ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓗꓶ, ꓶꓽ ꓡꓰˍ ꓕꓯ꓾ ꓢꓲꓺ ꓒ ꓬꓰ‐ꓢꓴ ꓬꓲ ꓘꓴꓻ ꓢꓯꓼ ꓔꓯ ꓣꓳ ꓚꓲ. ꓟꓽ ꓟꓶ ꓕꓯ꓾ ꓢꓲꓺ ꓒ ꓬꓰ‐ꓢꓴ ꓬꓲ ꓡꓯꓼ ꓝꓲ. ꓡꓯꓼ ꓖꓳꓼ ꓗꓪ ꓣꓳꓽ ꓟꓽ ꓔꓬ ꓕꓯ ꓣꓳꓽ ꓠꓬ ꓮ ꓡꓲ ꓥˍ ꓟꓲ ꓫꓵꓻˍ ꓥꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓾ ꓣꓳ ꓠꓬ ꓣꓳ ꓚꓲ. ꓛꓬ ꓢꓯꓼ ꓪ ꓮ ꓫꓵꓽˍ ꓟꓲ ꓟꓽ ꓙꓳ꓿ ꓮ. ꓣꓳˍ ꓡꓰ ꓐꓰ ꓣꓳ ꓠꓬ ꓠꓲꓽ ꓢ‐ꓓꓯ ꓔꓯ ꓗꓽ ꓐ ꓡˍ ꓟ ꓢꓯꓼ ꓪ ꓣꓳꓽ ꓔꓯ ꓟꓽ ꓙꓳ꓿ ꓠꓲꓽ ꓢ‐ꓓꓯ ꓔꓯ ꓓꓶꓽ ꓧꓪ. ꓡꓰ ꓠ, ꓟ ꓢꓯꓼ ꓪ ꓣꓳꓽ ꓔꓯ ꓟꓽ ꓙꓳ꓿ ꓣꓳꓽ ꓔꓯ ꓒꓬ, ꓜꓽ ꓠ, ꓟ꓾ ꓣꓳꓽ ꓡꓱ. ꓙꓰˍ ꓟ ꓔꓯ ꓠꓲ, ꓒꓴ ꓔꓬ ꓟ ꓠꓲꓽ ꓢ‐ꓓꓯ ꓔꓯ ꓣꓳꓽ ꓠꓬ ꓮ ꓡꓲ ꓥ ꓟꓲ ꓓꓶꓽ ꓧꓪ. ꓡꓰ ꓟꓽ ꓓꓻ꓿ ꓣꓳꓽ ꓚꓲ. ꓛꓬ ꓠꓯꓸꓼ ꓘꓴꓽ ꓗꓪ ꓓꓳ ꓡˍ ꓟ ꓤ, ꓠꓬꓲ ꓫꓵꓽ ꓠꓬꓲ ꓓꓴ꓾ ꓫꓵꓽ ꓧꓪꓽ ꓠꓯꓼ ꓤ, ꓠꓬꓲ ꓫꓵꓽ ꓠꓬꓲ ꓓꓴ ꓔꓯ ꓥ ꓟꓲ ꓣꓳꓽ ꓧꓪ. ꓡꓰ ꓟꓽ ꓓꓻ꓿ ꓓꓶꓽ ꓧꓪ. ꓡꓰ ꓟꓽ ꓓꓻ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳꓽ ꓠꓬ ꓮ ꓫꓵꓽ ꓟꓽ ꓒꓵꓽ ꓢꓴ ꓮ ꓫꓵꓽ ꓟꓽ ꓗꓴ. ꓢꓴ ꓥ꓿ ꓢꓲꓺ ꓒ ꓬꓰ‐ꓢꓴ ꓮ. ꓣꓳ ꓡꓳ. ꓒ ꓟꓽ ꓔꓬ ꓕꓯ ꓣꓳ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓢꓴ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡ ꓔꓬ ꓡꓳ꓿ ꓠꓴ ꓠꓬ ꓪꓴ‐ꓢ ꓘꓴꓻ ꓢꓯꓼ ꓐꓰ ꓶꓽ ꓤ ꓗꓶ, ꓶꓽ ꓡꓰꓳ꓿ ꓣꓳ ꓔꓯ ꓓꓵꓽ ꓙꓽ ꓠꓬꓲ ꓝꓲˍ ꓟ ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓮ ꓟꓶ ꓟ ꓦꓬꓼ ꓠꓬꓲ ꓗꓪ Social Media ꓐꓯˍ ꓟ Online ꓕꓯꓽ ꓢꓲ ꓗꓪ ꓮ ꓫꓵꓽ ꓥˍ ꓟꓲ ꓖꓳ ꓗꓪ ꓬꓲ ꓢꓯꓼ ꓣꓳ ꓑ ꓙꓽˍ ꓡꓳ꓿ ꓟꓬꓽ ꓠꓬꓲ ꓟꓽ ꓙꓲꓻ ꓟ ꓢꓯꓼ ꓣꓳ ꓑ ꓙꓽˍ ꓡꓳ꓿ ꓮ ꓡꓲ ꓫꓵꓽ ꓕꓲ ꓣꓳ ꓥˍ ꓟꓲ ꓟ. ꓒ ꓬꓰ ꓗꓴ.ˍ ꓡꓳ꓿ ꓮ ꓡꓲ ꓫꓵꓽ ꓕꓲ ꓣꓳ ꓥˍ ꓟꓲ ꓣꓳ ꓔꓯ ꓖꓳ ꓡꓱ ꓬꓰ ꓡꓯ ꓕꓱ ꓡꓱ ꓬꓰ ꓡꓯ ꓟ. ꓖꓶ ꓔꓬ ꓡꓳ꓿ ꓕꓱ ꓟ ꓠꓬ ꓟꓽ ꓜꓳꓽ꓿ ꓖꓳ ꓟ ꓠꓬ ꓟꓽ ꓜꓳꓽ ꓐꓰ꓾ ꓣꓳ ꓔꓯ ꓟ. ꓖꓶ ꓔꓬ ꓡꓳ꓿ ꓟꓬꓽ ꓠꓬꓲ ꓝꓴꓲ. ꓔꓯ ꓫꓬꓽ ꓫꓬꓽ ꓡꓰꓽ ꓬꓲ ꓪ ꓬꓰ ꓔꓬ ꓡꓳ꓿ ꓝꓴꓲ. ꓓꓽ ꓟ ꓥˍ ꓟꓲ ꓝꓴꓲ. ꓟꓽ ꓥ ꓟˍ ꓡꓰ ꓐꓰ ꓟꓲ ꓠꓯ ꓕꓱ ꓟ ꓟꓲ ꓠꓯ ꓕꓱ ꓟ ꓠꓬ ꓟꓳ. ꓖꓶ ꓡˍ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓘꓴꓻ ꓢꓯꓼ ꓔꓯ ꓚꓲ. ꓟꓽ ꓟꓶ ꓕꓯ꓾ ꓬꓲ ꓢꓯꓼ ꓐꓰ ꓶꓽ ꓤ ꓗꓶ, ꓶꓽ ꓡꓰˍ ꓕꓯ꓾ ꓕꓲ ꓠꓬꓲ ꓕꓲ ꓠꓬꓲ ꓬꓲ ꓢꓯꓼ ꓔꓯ ꓠ ꓠ, ꓢꓲ ꓠꓬꓲ ꓢꓲꓽ ꓫꓬ ꓕꓳꓽ ꓡ ꓗꓪ ꓓꓯ,ˍ ꓟ ꓬꓲ ꓢꓯꓼ ꓔꓯ ꓣꓳꓽ ꓟꓽ ꓠ ꓠ, ꓕꓯ꓾ ꓬꓲ ꓢꓯꓼ ꓔꓯ ꓣꓳꓽ ꓚꓲ. ꓟꓽ ꓟꓶ ꓕꓯ ꓣꓳ ꓠꓬ ꓠꓱ. ꓐꓯ ꓢꓯꓼ ꓔꓯ ꓠ ꓠ, ꓙꓰˍ ꓡꓳ꓿ ꓠꓱ. ꓐꓯ ꓡꓰ ꓐꓯ ꓖꓶꓽ ꓡˍ ꓟ꓾ ꓟꓲ ꓠꓯ ꓡꓰ ꓐꓯ ꓖꓶꓽ ꓡˍ ꓟ ꓚꓱ, ꓔꓯ ꓣꓳꓽ ꓛꓳ ꓪ ꓡꓰˍ ꓡꓳ꓿ ꓝꓮꓲ ꓣꓳꓽ ꓠꓬ ꓙ ꓖꓴ ꓟꓶꓽ ꓡꓰˍ ꓡꓳ꓿
ꓮ. ꓣꓳ ꓠꓬ ꓮ. ꓣꓳ ꓡꓳ. ꓒ ꓔꓯ ꓮ ꓕꓯ ꓟꓲ ꓟꓽ ꓡꓳ. ꓠꓬꓲ ꓔꓬ ꓕꓯ ꓬꓲ ꓢꓯꓼ ꓔꓯ ꓠꓲ, ꓟ ꓚꓵ, ꓢꓲ ꓣꓳ ꓮ ꓕꓯ ꓟꓲ ꓟꓽ ꓠ ꓠ, ꓔꓬ ꓕꓯ ꓠꓬ ꓮ ꓡꓲ ꓗꓷ ꓡꓰˍ ꓡ꓿ ꓚꓲ. ꓛꓬ ꓚꓳꓽ ꓚꓲ. ꓛꓬ ꓙꓰ ꓢꓲ ꓖ ꓜꓽ ꓙꓰˍ ꓠꓬ ꓮ ꓡꓲ ꓥˍ ꓟꓲ ꓮ. ꓣꓳ ꓡꓳ. ꓒꓽ ꓔꓯ ꓣꓳ ꓟꓶꓽ ꓡꓰˍ ꓥꓳ꓿ ꓮ. ꓣꓳ ꓡꓳ. ꓒꓽ ꓟꓶꓽ ꓡꓰˍ ꓕꓯ ꓣꓳ ꓠꓬ ꓙ ꓖꓴ ꓪꓴ. ꓡꓰˍ ꓥꓳ꓿ ꓙ ꓖꓴ ꓪꓴ. ꓡꓰ ꓠꓬ ꓪꓰ ꓕꓳ, ꓡꓰ ꓜꓽ ꓡˍ ꓥꓳ꓿ ꓪꓰ ꓕꓳ, ꓔꓯ ꓣꓳ ꓟꓳꓻˍ ꓠꓬ ꓣꓳꓽ ꓠꓬ ꓮ ꓡꓲ ꓥˍ ꓟꓲ ꓫꓵꓻˍ ꓥꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓣꓳ ꓠꓬ ꓮ ꓫꓵꓽˍ ꓟꓲ ꓬꓰ ꓟꓽ ꓐ ꓡ ꓟ ꓮ. ꓣꓳ ꓥ ꓟ ꓑꓶ. ꓓꓴ꓾ ꓙ ꓣꓳꓽˍ ꓟ ꓠꓲ, ꓟ꓾ ꓠꓴꓽˍ ꓟ ꓠꓲ, ꓟ ꓡꓰ ꓢꓲꓽ ꓫꓬ ꓑ ꓑ ꓗꓪ ꓓꓵˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓙ ꓣꓳꓽ ꓠꓲ, ꓡꓰ ꓬꓲ ꓔꓯ꓾ ꓮ ꓕꓯ ꓥ ꓟꓲ ꓡꓳ. ꓢꓲ ꓠꓬꓲ꓾ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓢꓲ ꓠꓬꓲ ꓞꓳ ꓙꓳ ꓙꓰ ꓡꓯ꓿ ꓖꓳ ꓡꓱ ꓬꓰˍ ꓠꓬ ꓣꓳ ꓦꓻ ꓚꓬꓴ. ꓟꓶˍ ꓥꓳ꓿ ꓮ ꓙꓵꓽ ꓢꓴ ꓢꓯꓼ ꓕꓵꓼ ꓙꓰ ꓡꓯ꓿
