ꓥꓪ ꓔꓯ ꓝꓲ ꓩꓴ ꓡ ꓢꓴ ꓐꓹ ꓐ ꓡꓰ ꓟꓽ ꓚꓵꓹ ꓧꓳꓽ ꓡ ꓠꓬ꓾ ꓮꓽ ꓟˍ ꓟꓲ ꓥꓪ ꓔꓯ ꓡ ꓟꓽ ꓐ ꓡ꓿ ꓥꓪ ꓔꓯ ꓡ ꓢꓴ ꓔꓯ ꓠꓬ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓡꓰ ꓢꓯꓸ ꓬꓲꓼ ꓡ ꓝꓲˍ ꓥꓳ꓿ ꓟꓷꓽ ꓠꓷꓹ ꓝꓸ ꓢꓴ ꓕꓳ ꓶ ꓗꓪ꓾ ꓬꓲ ꓪꓽ ꓮꓽ ꓙꓵ ꓠꓬ ꓪꓴ-ꓢ ꓡꓰ ꓟꓸ ꓔ ꓟ ꓗꓷ ꓡꓰˍ ꓥꓳ꓾ ꓐꓰ ꓐꓳ ꓔ ꓡꓳ꓿
ꓐꓹ ꓐ ꓔꓯ ꓑ ꓙꓽ ꓢꓲ ꓢꓳ ꓟꓶ ꓢꓴ ꓥ ꓕ ꓑꓳꓸ ꓠꓬ ꓥꓪ ꓔꓯ ꓡꓻˍ ꓥꓳ꓿ ꓪꓴ-ꓢ ꓔꓯˍ ꓐꓰ ꓡꓻ ꓢꓴ ꓖꓳ ꓕꓲ ꓣꓳ ꓟꓽ ꓥ ꓠꓬ꓾ ꓬꓲ ꓔꓯ ꓟꓳꓻ ꓠꓬꓲ ꓢꓴ ꓟꓽ ꓙꓳ꓿ ꓥꓪ ꓠꓽ ꓐꓹ ꓐ ꓔꓯ ꓟꓳꓻ ꓠꓬꓲꓳ꓿
ꓥꓪ ꓔꓱꓹ ꓔꓱꓹꓼ ꓠꓴ ꓪꓽ ꓔꓯ ꓐꓯ ꓖꓶˍ ꓠꓬꓲ꓾ ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓟ ꓢꓯꓼ ꓟꓬ ꓙꓳˍ ꓡꓳ꓿ ꓥꓪ ꓠꓽ ꓢꓯꓼ ꓟꓬ ꓑ ꓑ ꓥ ꓡꓳ꓿ ꓠꓴ ꓪꓽ ꓒꓵꓽ ꓒ ꓐꓴ ꓠꓬ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓟ-ꓠ ꓑ ꓑ ꓜꓽ ꓢꓲ ꓫꓵꓻꓳ꓿ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓟꓽ ꓫꓵꓻ ꓡ꓿
ꓥꓪ ꓠꓽ ꓟꓴꓽ ꓗꓪ ꓗꓪ ꓐꓰ ꓬꓯꓼ ꓡ ꓟ ꓑ ꓑ ꓬꓲ ꓢꓯꓸ ꓥ ꓡꓳ꓿ ꓑ ꓑ ꓕꓱ ꓟ ꓜꓽ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓸ ꓔꓬ ꓥꓳ꓿ ꓝꓮꓲ ꓠꓬ ꓟꓲ ꓠꓯ ꓡ ꓞꓳ ꓢꓯꓼ ꓟꓬ ꓐꓱ ꓶ꓾ ꓥꓪ ꓖꓶ ꓠꓹ ꓟ ꓑ ꓑ ꓠꓬ꓾ ꓥꓪ ꓧꓪꓽ ꓥ ꓡꓳ꓾ ꓐꓯˍ ꓡꓳ꓿
ꓬꓳ‐ꓦ 6ꓽ44‐51
ꓣꓳ ꓐꓴ ꓤꓶꓻ ꓠꓬ ꓣꓳ ꓡꓰ ꓢꓲ ꓔ ꓟ ꓚꓱ, ꓡꓰ ꓫꓬ, ꓔꓶ ꓔ ꓟ ꓥ ꓡꓳ꓿ ꓣꓳ ꓢꓲ ꓔ ꓟ ꓡꓰ ꓣꓳ ꓒꓬꓱꓼ ꓡˍ ꓡꓳ꓿ ꓣꓳ ꓛꓳ ꓫꓱꓽ ꓗꓷ ꓟ ꓣꓳ ꓘꓳ ꓗꓳ. ꓗꓷ ꓟ ꓠꓬ ꓟꓲꓽ ꓕꓯꓽ ꓢꓲ ꓟ ꓦꓬꓼ ꓠꓬꓲ ꓗꓪ ꓣꓳ ꓮꓽ ꓟ ꓒꓬꓱꓼ ꓡˍ ꓟ ꓔꓯ ꓖꓴ ꓟꓳ. ꓖꓶ ꓔꓬ ꓡꓳ꓿
ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓣꓳ ꓠꓲ, ꓫꓵˍ ꓟ ꓚꓱ, ꓔꓯ ꓢꓲ ꓠ, ꓟ ꓢꓯꓼ ꓕꓵꓼ ꓠ ꓗ, ꓡꓳ꓿ ꓣꓳ ꓬꓰ ꓠꓬꓲˍ ꓟ ꓛꓳ ꓫꓱꓼ ꓠꓬꓲˍ ꓟ ꓗꓪ ꓟꓬꓽ ꓠꓬꓲ ꓬꓳ. ꓚꓵˍ ꓟ ꓠꓬ ꓪꓴ‐ꓢ ꓔꓯ ꓠ ꓠ, ꓟ ꓐꓰ ꓢꓲ ꓒ ꓔꓬ ꓗꓪ ꓐꓰ ꓢꓳ ꓣꓴˍ ꓟ ꓥ ꓡꓳ꓿
ꓬꓰ‐ꓢꓴ ꓡꓰ ꓐꓯˍ ꓡꓳ꓾ ꓪꓴ‐ꓢ ꓡꓰ ꓣꓳ ꓔꓯ ꓟꓽ ꓚꓵ, ꓧꓳꓽ ꓗꓷ ꓕ ꓑꓳꓸꓼ ꓣꓳ ꓮꓽ ꓟ ꓥˍ ꓟꓲ ꓬꓲ ꓔꓬ ꓗꓪ ꓡ ꓟꓽ ꓐ ꓡ꓾ ꓐꓰ ꓐꓯ ꓔ ꓡꓳ꓿ ꓪꓴ‐ꓢ ꓣꓱꓽ ꓛꓰꓽ ꓗꓪ ꓐꓰ ꓣꓳ ꓔꓯ ꓙꓲꓻˍ ꓟ ꓒꓵꓽˍ ꓟ ꓚꓱ, ꓗꓪ ꓒꓳ, ꓡꓶ. ꓡꓰ ꓝꓲˍ ꓟ ꓢꓲꓺ ꓣꓴ ꓓꓴ ꓔꓯ ꓬꓰ ꓐ ꓡ ꓠ, ꓟ ꓐꓱ ꓶ ꓢꓯꓼ ꓪ ꓡꓴꓽ ꓖꓶ ꓢꓲ ꓠꓬꓲ꓾ ꓬꓲ ꓣꓱꓽ ꓛꓰꓽ ꓗꓪ ꓐꓰ ꓣꓳ ꓔꓯ ꓕꓲꓽ ꓞꓲꓼ ꓕꓲꓽ ꓑ ꓟ ꓢꓯꓼ ꓟꓬ ꓗꓪ ꓧꓳꓽ ꓛꓲ ꓬꓰˍ ꓥꓳ꓿
