ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓬꓳ‐ꓦ 6ꓽ30‐35 ꓥ ꓢꓲ ꓠꓬꓲ꓾ ꓥꓪ ꓠꓬ ꓢꓯꓼ ꓟꓬ ꓑ ꓑ ꓥꓳ꓿ ꓥꓪ ꓔꓯ ꓡ ꓢꓴ ꓠꓬ ꓮ ꓕꓯˍ ꓟꓲ ꓟꓽ ꓦꓰꓼ ꓟꓷꓼ ꓡ꓿ ꓥꓪ ꓔꓯ ꓙꓵꓻ ꓢꓴˍ ꓟꓲ ꓕꓲ ꓞꓲꓼ ꓟꓽ ꓢꓲꓼ ꓡ” ꓐꓰ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓑ ꓑ ꓠꓬ ꓦꓰꓼ ꓟꓷꓼˍ ꓟ ꓔꓯ ꓐꓳ ꓡꓰ ꓝꓲˍ ꓥ ꓟꓲ꓾ ꓢꓲꓼˍ ꓟ ꓔꓯ ꓐꓳ ꓡꓰ ꓝꓲˍ ꓐꓯ ꓟ ꓠꓽ ꓓꓵꓽ ꓙ ꓟꓶ ꓓꓴ ꓥ ꓡꓳ꓿ ꓦꓰꓼ ꓟꓷꓼˍ ꓕꓯ ꓬꓲ ꓑꓰ, ꓬꓲ ꓘꓴ. ꓔꓯ ꓜꓽˍ ꓠꓬ ꓐꓳ ꓡꓰˍ ꓟ ꓥ ꓢꓲ ꓠꓬꓲ꓾ ꓢꓲꓼ ꓡˍ ꓕꓯ ꓠꓽ ꓬꓲꓻ ꓙꓬ꓾ ꓥ ꓠꓬ ꓬꓲ. ꓬꓲꓻ ꓔꓯ ꓓꓳꓻ ꓠ ꓔ ꓡꓳ ꓟꓽ ꓥ ꓡ꓿ ʼꓑ ꓑʼ꓾ ꓦꓰꓼ ꓟꓷꓼˍ ꓟʼ꓾ ʼꓢꓲꓼˍ ꓟ” ꓐꓯ ꓘꓶꓽ ꓕꓱ ꓟ ꓠꓬ ꓔꓲ ꓢꓲꓽˍ ꓟ ꓢꓷ. ꓡꓰ ꓓꓴ ꓥ ꓡꓳ꓿ ꓬꓰ‐ꓢꓴ ꓠꓬ ꓞꓳ ꓤ ꓠꓲ, ꓟ ꓗꓪ ꓐꓰ ꓚꓵ ꓚꓵ ꓦꓰꓼ ꓟꓷꓼˍ ꓟ ꓐꓰ ꓢꓲꓼˍ ꓟ ꓔꓯ ꓐꓲ ꓡꓰ ꓝꓲ ꓢꓴ ꓐꓳ ꓡꓰ ꓝꓲ ꓢꓴ ꓕꓲ ꓣꓳˍ ꓟꓲ ꓥ ꓡꓳ꓿ ꓬꓲ ꓕꓲ ꓣꓳˍ ꓡꓰꓽ ꓬꓰ ꓐ ꓡˍ ꓡꓳ꓾ ꓐꓯˍ ꓟ ꓔꓯ ꓐꓯ ꓑꓶ ꓗꓷꓳ꓿ ꓬꓳ‐ꓦ 7ꓽ37 ꓗꓪ ꓬꓰ‐ꓢꓴ ꓡꓰ “ꓮꓽ ꓟ ꓥˍ ꓟꓲ ꓢꓲꓼˍ ꓠꓬ ꓥꓪ ꓔꓯ ꓧꓪ ꓓꓳꓻ ꓡꓯ꓿” ꓐꓰ ꓐꓯ ꓔ ꓡꓳ꓿
ꓢꓲꓽ ꓫꓬ ꓕꓱ ꓟ ꓗꓪ ꓐꓯ ꓔ ꓟ “ꓜꓽ ꓓꓳˍ ꓟ” ꓐꓯ ꓟ ꓐꓯ ꓘꓶꓽ ꓠꓬ “ꓙꓵꓻ ꓠꓲ, ꓬꓲ ꓢꓷ. ꓡꓰ ꓓꓴ” ꓥ ꓡꓳ꓿ ꓬꓰ‐ꓢꓴ ꓠꓬ ꓬꓲ ꓔꓯ ꓙꓵꓻ ꓢꓲ ꓬꓲ ꓔꓬ ꓗꓪ ꓡ ꓢꓴ ꓥ ꓕ ꓑꓳꓸꓼ ꓠꓬ ꓬꓲ ꓪ ꓠꓲ, ꓟ ꓠꓯꓸꓼ ꓗꓪ ꓦꓻ ꓔꓯ ꓟꓳ. ꓦꓰꓼ ꓟꓷꓼ ꓔꓬ ꓟ ꓐꓰ ꓢꓲꓼ ꓔꓬ ꓟ ꓔꓯ ꓐꓳ ꓡꓰ ꓝꓲˍ ꓥꓳ꓾ ꓐꓰ ꓐꓯ ꓔ ꓡꓳ꓿ ꓜꓽ ꓓꓴ ꓓꓳꓻ ꓓꓴ ꓠꓬ ꓣꓳ ꓧꓪꓽ ꓖꓳ ꓓꓱꓽ ꓐꓰ ꓶ ꓟꓽ ꓙꓳ ꓟꓽ ꓓꓻ ꓣꓱꓽ ꓞ, ꓟ ꓡꓰ ꓐꓰ꓾ ꓣꓳ ꓦꓻ ꓕꓲ ꓒꓳ, ꓐꓱ ꓶ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓙꓳ ꓟꓽ ꓓꓻ ꓟ ꓥ ꓡꓳ꓾ ꓐꓰ ꓬꓰ‐ꓢꓴ ꓡꓰ ꓐꓯˍ ꓡꓳ꓿
ꓣꓳ ꓠꓬ ꓣꓳ ꓖꓳ ꓓꓱꓽ ꓕꓲ ꓒꓳ, ꓦꓰꓼ ꓟꓷꓼˍ ꓟ ꓐꓰ ꓢꓲꓼˍ ꓟ ꓔꓯ ꓮ ꓕꓯ ꓟꓲ ꓚꓬ, ꓪˍ ꓡꓳ꓿ ꓢꓷ.ˍ ꓡꓳ꓿ ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓜꓽ ꓪ ꓓꓳꓻ ꓪ ꓠ, ꓟ ꓢꓯꓼ ꓕꓵꓼˍ ꓡꓳ꓿ ꓖꓳ ꓡꓱ ꓥ ꓟꓲ ꓣꓳ ꓤꓶꓻ ꓠꓯꓸꓼ ꓗꓪ ꓪ ꓜꓲ ꓠꓯ.ˍ ꓟ ꓬꓳ. ꓚꓵˍ ꓟ꓾ ꓦꓻ ꓔꓯ ꓟꓳ. ꓦꓰꓼ ꓟꓷꓼˍ ꓟ ꓐꓰ ꓢꓲꓼ ꓔꓬ ꓟ ꓔꓯ ꓠꓬ ꓣꓳ ꓟꓽ ꓚꓬ, ꓪ ꓔꓬ꓿ ꓕꓱ ꓟ ꓔꓯ ꓣꓳ ꓟꓬꓽ ꓠꓬꓲ ꓟꓲ ꓡꓰ, ꓗꓷˍ ꓡꓳ꓿ ꓣꓳ ꓤꓶꓻ ꓗꓪ ꓬꓲ ꓟ. ꓟꓲꓽ ꓠꓯ.ˍ ꓟ ꓬꓳ. ꓚꓵˍ ꓟ ꓣꓳ ꓦꓻ ꓦꓰꓼ ꓟꓷꓼˍ ꓟ ꓐꓰ ꓢꓲꓼˍ ꓟ ꓔꓯ ꓐꓳ ꓡꓰ ꓝꓲ ꓢꓴ꓾ ꓐꓲ ꓜꓲꓼ ꓡꓰ ꓝꓲ ꓢꓴ ꓠꓬ ꓢꓲ ꓬꓰ‐ꓢꓴ ꓕꓲ ꓣꓳˍ ꓡꓰꓽ ꓥ ꓡꓳ ꓐꓯ ꓟ ꓔꓯ ꓢꓷ. ꓙ ꓟꓳ ꓙ ꓠ, ꓟ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ꓿ ꓬꓲꓼ ꓠꓬꓲ. ꓖꓶ ꓡ ꓔꓬ ꓡꓳ꓿
