Nꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡ ꓑꓮꓲꓽ ꓗꓳ. ꓙꓰ ꓗ ꓠꓯ. 3 ꓠꓽ ꓕꓲꓽ ꓠꓽ ꓟ ꓢꓲ‐ꓒ‐ꓦꓬꓼ‐ꓠꓬꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓛꓳꓽ ꓒꓯ, ꓒꓲ‐ꓕꓱ ꓐꓰ꓾ ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓚꓲ. ꓛꓬ ꓬꓲ ꓟꓳ. ꓖꓶˍ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓳ ꓑ ꓙꓽˍ ꓥꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓲꓽ ꓫꓬ ꓕꓳꓽ ꓶ ꓔꓯ ꓡꓳ. ꓠꓬꓲˍ ꓕꓯ ꓢꓲ ꓒ ꓬꓰ‐ꓢꓴ ꓬꓲ ꓝꓲ ꓓꓴ ꓐꓴ ꓥ ꓟ ꓒꓲ‐ꓕꓱ ꓐꓴ ꓯ‐ꓓꓱ‐ꓣꓴ ꓐꓴ꓾ ꓝꓮꓲ ꓬꓲ ꓛꓳꓽ ꓒꓯ, ꓐꓴ ꓮ ꓙꓵꓽ ꓠꓬ ꓬꓲ ꓪ ꓙꓳˍ ꓟ ꓖꓴꓽ ꓙꓴꓽ꓾ ꓬꓲ ꓪ ꓙꓳˍ ꓟ ꓓꓰ ꓟꓲ꓾ ꓬꓲ ꓪ ꓙꓳˍ ꓟ ꓦꓲꓻ ꓢꓲ ꓟ ꓤ ꓫꓵ. ꓤ ꓠꓱ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓗ ꓠꓯ. ꓖꓼ ꓛꓳ ꓡ ꓗꓷ ꓟ ꓥ ꓡꓳ꓿ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓗ ꓠꓯ. ꓛꓳ ꓙꓰ ꓢꓴ ꓥ ꓡꓳ꓿ ꓬꓲ ꓪ ꓙꓳˍ ꓟ ꓮ ꓙꓵꓽ ꓕꓲꓽ ꓫꓵꓽˍ ꓟꓲ ꓟꓽ ꓔꓯ, ꓙꓰ꓿ ꓬꓲ ꓪ ꓥꓪ. ꓓꓳꓽ ꓔꓬ ꓕꓯ ꓢꓲ ꓒ ꓬꓰ‐ꓢꓴ ꓬꓲ ꓪ ꓔꓯ ꓘꓴ ꓡˍ ꓕꓯ꓾ ꓥꓪ. ꓑꓱ. ꓐꓰ ꓕꓲꓽ ꓛꓳˍꓽ꓾ ꓮꓽ ꓐ ꓮ ꓟ ꓐꓴ ꓮ ꓙꓵꓽ ꓔꓯ ꓡꓳ ꓗꓷ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓖꓼ ꓙꓰ ꓢꓴ꓾ ꓛꓳ ꓙꓰ ꓢꓴ ꓐꓴ ꓥ ꓡꓳ꓿
ꓖꓳ ꓡꓱ ꓠꓬꓲ 3 ꓘꓳꓼ ꓖꓼ ꓛꓳ ꓙꓰ ꓗ ꓠꓯ. ꓢꓲ ꓒ ꓬꓰ‐ꓢꓴ ꓠꓬ ꓠꓱ. ꓐꓯ ꓢꓴ ꓡꓰ ꓢꓰꓼ ꓗꓷˍ ꓟ ꓟꓶ ꓗꓷꓳ꓿ ꓢ ꓠꓬꓲ ꓕꓲꓽ ꓠꓬꓲ ꓗꓪ ꓝꓮꓲ ꓢꓯ. ꓬꓲꓼ ꓡˍ ꓥꓳ ꓐꓰ ꓐꓯˍ ꓥ ꓟꓲ ꓬꓲ ꓪ ꓟꓽ ꓙꓵꓻ꓿ ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓠꓲ, ꓟ ꓫ. ꓔꓬ ꓡꓳ꓿ ꓢ. ꓠꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓟ ꓠꓬ꓾ ꓒꓲ‐ꓕꓱ ꓐꓰ ꓬꓲ ꓝꓲ ꓓꓴ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓫꓵꓻ ꓗꓷ ꓗ ꓠꓯ. ꓬꓲ ꓪ ꓠꓬ ꓬꓲꓼ ꓙꓰ ꓢꓲ ꓠꓬꓲ ꓥꓪ. ꓓꓳꓽ ꓙꓰˍ ꓥꓳ ꓐꓯ ꓢꓲ ꓠꓲ, ꓟ ꓙꓬ ꓢꓲ ꓠꓬꓲ꓾ ꓠꓲ, ꓟ ꓫ. ꓫ. ꓡꓰꓽ ꓬꓲꓼ ꓙꓰˍ ꓟ ꓢꓲꓽ ꓫꓬ ꓕꓳꓽ ꓶ ꓣꓳ ꓑ ꓙꓽˍ ꓥꓳ꓿
ꓬꓲ ꓪ ꓠꓬ ꓖꓳ ꓡꓱ ꓥꓪ. ꓓꓳꓽ ꓙꓰˍ ꓕꓯ ꓕꓲ ꓦꓬꓼ ꓡꓱꓸꓼ ꓥꓪ. ꓕꓲꓽ ꓟˍ ꓟꓲ ꓓꓳꓽ ꓟꓽ ꓟꓶ꓿ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲ ꓪ ꓔꓬ ꓗꓪ ꓡ ꓢꓲ ꓠꓬꓲ꓾ ꓠꓴ ꓪ ꓥꓪ. ꓓꓳꓽ ꓟꓶˍ ꓡ꓾ ꓐꓰ ꓠ ꓠꓬꓲˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓪ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓡꓳ. ꓟꓽ ꓓꓳ ꓡ꓿ ꓢꓲ ꓒ ꓬꓰ‐ꓢꓴ ꓥ ꓟ ꓬꓲ ꓪ ꓟꓽ ꓢꓷ.꓿ ꓮ ꓫꓵꓽˍ ꓟꓲ ꓓꓳꓽ ꓟꓽ ꓟꓶ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬꓲ ꓢꓲ ꓒ ꓡꓰ ꓬꓲ ꓪ ꓔꓯ ꓠꓴ ꓪ ꓥꓪ. ꓑꓱ. ꓔꓯ ꓡꓯꓼ ꓙ ꓕꓲ ꓛꓱꓽ ꓗꓪ ꓬꓲꓻ ꓙꓬ ꓠꓯ.ˍ ꓗꓪ ꓡꓳ ꓧꓳꓽ ꓗꓷ ꓐꓰ ꓐꓯ ꓖꓶˍ ꓡꓳ꓿ ꓬꓲ ꓪ ꓖꓳ ꓡꓱ ꓬꓰˍ ꓕꓯ ꓥꓪ. ꓠꓬꓲ ꓮꓽ ꓟꓬ, ꓓꓳꓽ ꓟꓶˍ ꓡꓳ꓿ ꓥꓪ. ꓑꓱ. ꓧꓽ ꓡꓰˍ ꓗꓪ ꓛꓲ ꓬꓲ ꓪ ꓠꓬ ꓥꓪ. ꓓꓳꓽ ꓟꓶˍ ꓡꓳ꓿
