ꓪꓴ-ꓢ ꓠꓬ ꓮ-ꓓꓯ ꓐꓰ ꓰ-ꓪ ꓔꓯ ꓚꓰꓼ ꓢꓲ ꓠꓬꓲ ꓮ ꓘꓶꓸ ꓐꓲ ꓜꓲꓼ_ ꓟ꓾ ꓮ ꓫꓵ ꓟꓲ ꓙꓳ_ ꓟ꓾ꓐꓱ ꓗꓪ ꓬꓲ ꓪ ꓔꓯ ꓗꓷ ꓔ ꓡꓳ꓾ ꓖꓳ ꓡꓱ ꓥ ꓟꓲ ꓬꓲ ꓪ ꓔꓯ ꓙꓵꓽ ꓗ ꓕꓲ ꓟ ꓖꓶ ꓢꓲ ꓠꓬꓲ ꓠꓱꓸ ꓐꓯꓼ ꓮ ꓙꓵ ꓠꓬ ꓬꓰ ꓓ_ ꓡꓳ= ꓔꓲꓹ ꓫꓵ ꓗꓪ ꓓꓱꓼ_ ꓟ ꓢꓶꓹ ꓢꓶꓽ ꓔꓯ ꓠꓬ ꓕꓽ ꓜ ꓐꓰ ꓐꓯ ꓢꓲ ꓠꓬꓲ ꓙꓵꓽ ꓗ ꓕꓲ ꓟ ꓔꓶ ꓖꓶ_ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓟꓴ ꓗꓪ ꓝꓲ ꓓꓴ ꓗꓪ ꓐꓰ ꓠꓲꓽ ꓢ-ꓓꓯ ꓒꓬꓱꓼ ꓙꓰ ꓟ꓾ ꓠꓲꓽ ꓢ-ꓓꓯ ꓠꓬ ꓬꓲ ꓪ ꓠꓬꓲ ꓫꓵꓸ ꓔꓯ ꓤ ꓠꓬꓲ ꓫꓵ ꓠꓬꓲ ꓢꓲ ꓠꓬꓲ ꓝꓴꓲ ꓬꓰ ꓗꓷꓳ= ꓝꓴ ꓬꓰ ꓗꓷ ꓟ ꓡꓰ ꓐꓰ ꓬꓲ ꓪꓽ ꓒꓵꓽ ꓠꓬ ꓫꓵꓻ_ ꓟ ꓟꓶ ꓗꓷꓳ= ꓖꓳ ꓗꓪ ꓐꓰ ꓝꓴꓲ ꓐꓯ_ ꓟ ꓟꓲ ꓠꓯ ꓕꓱ ꓟ ꓗꓪ ꓛꓲ ꓡꓻꓳ=
ꓮ-ꓓꓯ ꓰ-ꓪ ꓬꓰ ꓗꓷ ꓟ ꓝꓴꓲ ꓠꓬ ꓮ ꓡꓰ ꓐꓰ ꓣꓳ ꓐꓰ ꓗꓳꓸ ꓙꓰ ꓙꓳ_ ꓡ꓾ ꓥ ꓡꓳ꓾ ꓮ-ꓓꓯ ꓰ-ꓪ ꓠꓬ ꓣꓳ ꓞꓳ ꓤ ꓥ ꓕ ꓑꓳꓸ ꓬꓲ ꓮꓽ ꓒꓵ ꓮ ꓑ ꓥ ꓟ ꓑꓶ ꓓꓴ ꓞꓳ ꓤ ꓙꓳ ꓥ ꓕ ꓑꓳꓸ ꓠꓬ ꓮ-ꓓꓯ ꓰ-ꓪ ꓗꓪ ꓐꓰ ꓡ_ ꓟ ꓑꓶ ꓓꓴ ꓬꓲ ꓫꓵ ꓬꓲ ꓧꓪ ꓣꓳ ꓠꓬ ꓮ ꓽ ꓒꓵ ꓮ ꓑ ꓬꓰ ꓗꓷ ꓟ ꓝꓴꓲ ꓥ ꓟꓲ ꓣꓳ ꓟꓯ ꓠ ꓗꓷ ꓡꓰꓳ= ꓖꓳ ꓡꓱ ꓠꓬꓲ ꓝꓴꓲ ꓠꓬ ꓟꓲ ꓠꓯ ꓕꓱ ꓟ ꓘꓴꓽ ꓗꓪ ꓓꓵꓽ ꓡꓰꓳ= ꓟꓲ ꓠꓯ ꓕꓱ ꓟ ꓗꓪ ꓓꓵ ꓡ ꓟ ꓐꓰ ꓟꓲ ꓠꓯ ꓞꓳ ꓤ ꓥ ꓕ ꓑꓳꓸ ꓠꓬ ꓟꓽ ꓙꓲ ꓟ ꓔꓯ ꓪ ꓙꓲ ꓠꓲꓹ ꓫꓵ_ ꓟ꓾ ꓥꓶ_ ꓟ ꓠꓲꓹ ꓟ ꓕꓱ ꓡꓱ ꓐꓰ ꓙꓲ_ ꓟ ꓙꓳ ꓥ ꓟꓲ ꓥꓶ_ ꓟ ꓠꓲꓹ ꓟ ꓟꓬ ꓠꓬꓲ ꓕꓱ ꓡꓱ ꓐꓰ ꓓꓵꓽ ꓡꓻꓳ= ꓣꓳ ꓮ ꓫꓵ ꓕꓲ ꓫꓵ ꓬꓰ ꓠꓬ ꓣꓳ ꓠꓲꓹ ꓟ ꓠꓯꓼ ꓗꓪ ꓟꓽ ꓙꓲ ꓟ꓾ ꓟꓽ ꓜꓳ ꓟ ꓔꓯ ꓠꓲꓹ ꓫꓵ_ ꓟ꓾ ꓟꓬ ꓠꓬꓲ ꓙꓲ_ ꓟ ꓬꓰ ꓠꓹ ꓟ ꓐꓱ ꓶ ꓢꓯꓼ ꓐ_ ꓟ꓾ ꓝꓮꓲ ꓣꓳ ꓟꓲ ꓠꓯ ꓞꓳ ꓤ ꓔꓯ ꓡꓰ ꓟꓽ ꓞꓲ ꓙꓱ ꓤ ꓙꓱ ꓟꓲ ꓢꓲꓹ ꓜꓲ ꓢꓶꓹ ꓪꓰ ꓔꓯ ꓥ ꓟꓲ ꓕꓱ ꓡꓱ ꓝꓴꓲ ꓑꓶ ꓓꓴ ꓮ ꓘꓶꓸ ꓫꓸ ꓙꓵ ꓡꓰꓳ= ꓕꓱ ꓟ ꓠꓬ ꓝꓴꓲ ꓐꓯ_ ꓟ ꓮ ꓘꓶꓸ ꓙꓳꓺ ꓓꓴ ꓧꓸ ꓟ ꓟꓲ ꓠꓯ ꓞꓳ ꓤ ꓐꓱ ꓶ ꓝꓴꓲ ꓐꓯ_ ꓟ ꓠꓲꓹ ꓟ ꓠꓻ ꓓꓴ ꓕꓱ ꓡꓱ ꓫꓵ ꓥ ꓟ ꓣꓳ ꓡꓳꓸ ꓟꓳ_ ꓡꓳ=
ꓖꓳ ꓡꓱ ꓐꓯ ꓥ ꓟꓲ ꓝꓴꓲ ꓢꓯꓼ ꓪ ꓠꓬ ꓮ ꓟꓬ ꓛꓲ ꓪꓽ ꓠꓬꓲ_ ꓥ ꓟꓲ ꓪꓴ-ꓢ ꓢꓯꓼ ꓪ ꓠꓬ ꓪ ꓙꓵ ꓪꓽ ꓠꓬꓲ_ ꓡꓳ= ꓝꓴꓲ ꓐꓯ_ ꓟ ꓢꓯꓼ ꓪ ꓕꓱ ꓡꓱ ꓛꓲ ꓙꓳ_ ꓠꓬ ꓠꓵꓻ ꓠꓲꓹ ꓐꓯ_ ꓟ ꓢꓯꓼ ꓪ ꓠꓬ ꓣꓳ ꓵ ꓖꓴ ꓟꓽ ꓓ꓾ ꓖꓳ ꓡꓱ ꓠꓬꓲ ꓪꓴ-ꓢ ꓠꓬ ꓕꓲ ꓣꓳ_ ꓟ ꓬꓲ ꓤ ꓔꓲ ꓔꓯ ꓟꓲ ꓠꓯ ꓕꓱ ꓟ ꓗꓪ ꓝꓲ ꓩꓴ ꓢꓲ ꓠꓬꓲ ꓝꓴꓲ ꓖꓳ ꓟ ꓠꓯꓼ ꓘꓴꓽ ꓗꓪ ꓔꓬ ꓟ ꓞꓳ ꓤ ꓮ ꓙꓵ ꓔꓯ ꓬꓲ ꓢꓳ ꓣꓴ_ ꓡꓳ= ꓝꓴꓲ ꓕꓲ ꓟ ꓡꓰ ꓟꓲ ꓠꓯ ꓔꓯ ꓙꓵꓽ ꓐ ꓡ ꓟ꓾ ꓠꓬ ꓠꓵꓻ ꓠꓲꓹ ꓠꓬ ꓮ ꓡꓰ ꓛꓲ ꓬꓰ ꓐ ꓡ_ ꓡ꓾ ꓐꓯ_ ꓟ ꓣꓳ ꓢꓷꓸ_ ꓡꓳ= ꓮ ꓡꓰꓳ ꓐꓯ ꓠꓬ ꓝꓴꓲ ꓐꓰ ꓠꓵꓻ ꓠꓲꓹ ꓠꓬ ꓦꓶ ꓠꓲꓹ ꓐꓰ ꓠꓵꓻ ꓠꓲꓹ ꓠꓬ ꓠꓵꓻ ꓠꓲꓹ ꓠꓬ ꓪ ꓙꓲ ꓪꓴꓽ_ ꓡꓳ꓾ ꓟꓽ ꓥ ꓡ꓾ ꓦꓶ ꓠꓲꓹ ꓕꓲ ꓚꓱꓹ ꓐꓯ ꓠꓬ ꓝꓴꓲ ꓕꓱ ꓟ ꓟꓲ ꓠꓯ ꓕꓱ ꓟ ꓔꓯ ꓪꓴꓸ ꓔꓲꓸ ꓪꓴꓸ ꓑ ꓬꓰ ꓐ ꓡ ꓠꓬ ꓠꓵꓻ ꓠꓲꓹ ꓕꓱ ꓟ ꓠꓬ ꓪ ꓙꓲ ꓬꓲꓸ ꓝꓸ ꓕꓲ ꓦ ꓛꓲ ꓬꓰ ꓐ ꓡ_ ꓡꓳ= ꓖꓳ ꓡꓱ ꓠꓬꓲ ꓞꓳ ꓤ ꓠꓬ ꓝꓴꓲ ꓮ ꓡꓰ ꓛꓲ ꓬꓰ ꓗꓷ ꓥ ꓟꓲ ꓮ ꓡꓰ ꓗꓷ ꓛꓲ ꓫ ꓔꓬ ꓥ ꓟꓲ ꓪꓴ-ꓢ ꓠꓬ ꓵ ꓖꓴ ꓟꓽ ꓓꓽ ꓟ ꓠꓵꓻ ꓠꓲꓹ ꓡꓰ ꓣꓳ ꓔꓯ ꓮ ꓕꓯ ꓥ ꓟꓲ ꓘꓳꓹ ꓣꓴ ꓔꓬ ꓡꓳ= ꓣꓳ ꓔꓯ ꓮ ꓕꓯ ꓥ ꓟꓲ ꓬꓲ ꓔꓬ ꓗꓪ ꓛꓲ ꓡ ꓠꓹ ꓟ ꓐꓱ ꓶ ꓬꓲ ꓠꓬ ꓘꓴꓽ ꓔꓬ ꓡꓳ= ꓐꓹ ꓐ ꓪꓴ-ꓢ ꓠꓬ ꓬꓲ ꓤ ꓔꓲꓸ ꓔꓯ ꓝꓲ ꓩꓴ ꓗꓷ ꓢꓲ ꓠꓬꓲ ꓞꓳ ꓤ ꓮ ꓙꓵ ꓔꓯ ꓚꓬꓴ ꓓꓳ ꓗꓷꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓙꓵꓻ ꓢꓲ ꓠꓬꓲ ꓬꓲ ꓔꓯ ꓣꓷꓠꓸ ꓕꓯ ꓠꓬ ꓣꓳ ꓚꓬ ꓗꓷ ꓟ ꓝꓴꓲ ꓣꓳ ꓬꓰ ꓥꓳꓽ ꓗꓷ ꓟ ꓝꓴꓲ ꓔꓯ ꓬꓲ ꓡꓰ ꓖꓼ ꓖꓶ ꓢꓲ ꓠꓬꓲ ꓣꓳ ꓠꓬ ꓙꓲ ꓫꓬ ꓟ ꓤ ꓠꓱ ꓐꓴ ꓒꓬꓱꓼ ꓡ ꓡꓳ=
