ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢ. ꓠꓯ ꓠꓬ Divine Mercy ꓐꓰ ꓐꓯˍ ꓟ ꓪꓴ‐ꓢ ꓫꓱ. ꓤˍ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓬꓳ‐ꓦ 20ꓽ19‐31 ꓗꓪ ꓣꓳ ꓑ ꓙꓽ ꓪˍ ꓟ ꓠꓬ꓾ ꓕꓳ‐ꓟ ꓐꓰ ꓟꓬꓱ ꓔ ꓟ Thomas ꓠꓬ ꓪꓴ‐ꓢ ꓔꓯ ꓟꓽ ꓙꓵꓻ ꓟ꓾ ꓢꓲ ꓒ ꓬꓰ‐ꓢꓴ ꓬꓲ ꓒ ꓕꓲ ꓗꓪ ꓟꓶ ꓤ ꓔꓬ ꓗꓳ. ꓙꓰ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡˍ ꓟ ꓔꓯ ꓬꓲ ꓟꓽ ꓟꓳꓻ ꓪ ꓕ ꓑꓳꓸꓼ ꓟꓽ ꓙꓵꓻ ꓐꓰ ꓐꓯˍ ꓟ ꓢꓲꓽ ꓫꓬ ꓕꓳꓽ ꓶ ꓝꓲ. ꓔꓯ ꓣꓳ ꓠ ꓠ, ꓪ ꓓꓴ ꓥ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓗ ꓠꓯ. ꓬꓲ ꓝꓲ ꓓꓴ ꓐꓴ ꓔꓯ ꓬꓲ ꓟꓳ. ꓖꓶˍ ꓡꓳ꓿ ꓖꓳ ꓕꓲ ꓙꓵ, ꓗꓪ ꓕꓳ‐ꓟ ꓠꓬ ꓖꓳ ꓗꓪ ꓟꓽ ꓔꓬ꓿ ꓖꓳ ꓡꓱ ꓠꓬꓲ ꓛꓳꓽ ꓒꓯ, ꓐꓴ ꓬꓲ ꓔꓯ꓾ ꓢꓲ ꓒ ꓠꓬ ꓚꓵ ꓚꓵ ꓢꓯ. ꓬꓲꓼ ꓡꓺꓳ꓾ ꓐꓰ ꓐꓯˍ ꓕꓯ ꓬꓲ ꓟꓽ ꓙꓵꓻ꓿ ꓢꓲ ꓒ ꓬꓰ‐ꓢꓴ ꓬꓲ ꓡꓯꓽ ꓒꓯ, ꓗꓪ ꓧꓳ ꓝꓲ ꓗ. ꓑ꓾ ꓬꓲ ꓙꓴꓽ ꓐꓬ ꓗꓪ ꓡ. ꓒꓬ. (ꓐ ꓥꓷ) ꓗ. ꓑ ꓔꓯ ꓟꓽ ꓟꓳꓻ ꓕ ꓑꓳꓸꓼ ꓥꓪ ꓟꓽ ꓙꓵꓻ꓾ ꓐꓰ ꓬꓲ ꓐꓯˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓥˍ ꓟꓲ ꓪꓴ‐ꓢ ꓔꓯ ꓙꓵꓻ ꓟꓽ ꓠ ꓫꓵꓽ ꓕꓲ ꓖ ꓕꓲ ꓧꓶ. ꓔꓳ, ꓜꓳꓽ ꓪˍ ꓥꓳ꓿ ꓣꓳ ꓮ ꓡꓲ ꓬꓰˍ ꓥ ꓟꓲ꓾ ꓮ ꓡꓲ ꓪꓽ ꓘꓴˍ ꓥ ꓟꓲ ꓪꓴ‐ꓢ ꓟꓽ ꓓꓽ ꓔꓳ, ꓡ ꓕꓯ꓾ ꓕꓲ ꓚꓱ, ꓐꓯˍ ꓠꓬ ꓪꓴ‐ꓢ ꓙꓳˍ ꓟ ꓡꓰ ꓟꓽ ꓗ, ꓕꓯ꓾ ꓟꓽ ꓔꓬ, ꓪ ꓕꓯ꓾ ꓣꓳ ꓠꓲ, ꓟ ꓘꓴꓽ ꓗꓪ ꓪꓴ‐ꓢ ꓔꓯ ꓙꓵꓻ ꓠ, ꓟ ꓮ ꓘꓶ. ꓫˍ ꓟ ꓦꓬꓼ ꓠꓬꓲˍ ꓟꓲ ꓙꓳ ꓡˍ ꓡꓳ꓿ ꓣꓳ ꓫ. ꓙꓵ ꓟꓶ ꓙꓵˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓟꓽ ꓠ ꓠ꓾ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓟꓽ ꓓꓻ ꓓꓻ ꓗꓽ ꓔ ꓓˍ ꓟˍ ꓟꓲ ꓙꓳˍ ꓡꓳ꓿
ꓙꓲꓻ ꓫꓬ ꓢꓴ ꓕꓳ‐ꓟ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓢꓯ. ꓬꓲꓼ ꓡˍ ꓟ ꓔꓯ ꓙꓵꓻ ꓟꓽ ꓐ ꓡ ꓟ ꓠꓬ꓾ ꓟꓲ ꓠꓯ ꓡꓳꓖꓲꓚ ꓐꓰ ꓐꓯˍ ꓟ ꓟꓲ ꓠꓯ ꓓꓵꓽ ꓙꓽ ꓚꓱ, ꓕꓲꓽ ꓒꓳ, ꓗꓪ ꓐꓰ ꓮ ꓡꓲ ꓥˍ ꓟꓲ ꓒꓬꓱꓼ ꓡ ꓟꓽ ꓓꓻ ꓟ꓾ ꓕꓱ ꓡꓱ ꓫꓵꓽ ꓓꓵꓽ ꓙꓽ ꓚꓱ, ꓠꓬ ꓬꓲ ꓔꓯ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓠ, ꓟ ꓐꓱ ꓶ ꓗꓽ ꓕ. ꓔ ꓖꓶˍ ꓡꓳ꓿ ꓮ ꓡꓲꓳ ꓐꓯ ꓠꓬ ꓮ ꓠꓱ ꓟꓵꓽ ꓟꓽ ꓚꓰꓼ ꓟꓲ ꓟꓽ ꓚꓰꓼ ꓕꓯ ꓡꓰ ꓞꓳ ꓤ ꓐꓯˍ ꓟ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓢꓴ ꓮꓽ ꓟˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓮ ꓡꓲ ꓬꓰˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓟꓽ ꓠ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓜꓵꓻ ꓘꓷ ꓡꓰ ꓟ ꓬꓲ ꓢꓷ.ˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓮ ꓡꓲ ꓥˍ ꓟꓲ ꓢꓯ. ꓬꓲꓼ ꓡ ꓟꓽ ꓠ ꓐꓯ ꓢꓲ ꓖꓳ ꓡꓱ ꓓꓵꓽ ꓙꓽ ꓔꓬ ꓡꓳ꓿
ꓖꓳ ꓡꓱ ꓠꓬꓲ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓡꓯꓽ ꓒꓯ, ꓗꓪ ꓟ ꓧꓳ ꓝꓲ ꓗ. ꓑ ꓗꓪ ꓥꓪ ꓟꓽ ꓫꓱ, ꓪ ꓕ ꓑꓳꓸꓼ꓾ ꓥꓪ ꓟꓽ ꓗ. ꓠꓬꓲ ꓕ ꓑꓳꓸꓼ ꓥꓪ ꓟꓽ ꓙꓵꓻ꓾ ꓐꓰ ꓐꓯ ꓟ ꓥ ꓡꓳ꓿ ꓮ ꓡꓲꓳ ꓐꓯˍ ꓠꓬ ꓬꓲ ꓠꓬ ꓞꓳ ꓤ ꓕꓲ ꓣꓳˍ ꓡꓰ ꓐꓰ ꓓꓵꓽ ꓙˍ ꓟ ꓑꓶ. ꓓꓴ ꓮ ꓡꓲ ꓥˍ ꓟꓲ ꓒꓬꓱꓼ ꓡ ꓟꓽ ꓓ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓳ‐ꓟ ꓔꓳ, ꓜꓳꓽ ꓗꓳ. ꓗꓷ ꓟ ꓡꓰ ꓐꓰ ꓣꓳ ꓥˍ ꓟꓲ ꓔꓳ, ꓜꓳꓽ ꓗꓳ. ꓠꓬꓲˍ ꓟ ꓮ ꓟꓬ, ꓙꓳˍ ꓥꓳ꓿ ꓞꓳ ꓤ ꓕꓲ ꓣꓳ ꓓꓵꓽ ꓙ ꓠꓬꓲˍ ꓕꓯ ꓮ ꓡꓲ ꓥˍ ꓟꓲ ꓒꓬꓱꓼ ꓡ ꓟꓽ ꓓꓻ ꓟ꓾ ꓞꓳ ꓤ ꓕꓲꓽ ꓣꓳ ꓢꓷ.ˍ ꓟ ꓗꓴ.ˍ ꓟ꓾ ꓢꓯꓼ ꓪ꓾ ꓐꓰ ꓢꓷ. ꓠꓲ, ꓮ ꓙꓵꓽ ꓗꓪ ꓐꓰ ꓮ ꓡꓲ ꓡꓰ. ꓒꓬꓱꓼ ꓡ ꓟꓽ ꓓꓻ ꓫꓵꓽ ꓫꓵꓽ ꓪꓴ꓾ ꓮ ꓡꓲ ꓡꓰ. ꓧꓪ. ꓡꓰ ꓟꓽ ꓓꓻ ꓫꓵꓽ ꓫꓵꓽ ꓪꓴ ꓪꓴ‐ꓢ ꓡꓰ ꓬꓰ ꓖꓶˍ ꓕꓯ ꓧꓪ. ꓡꓰˍ ꓟ ꓦꓬꓼ ꓠꓬꓲ ꓥˍ ꓟꓲ ꓣꓳ ꓔꓳ, ꓜꓳꓽ ꓗꓴ.ˍ ꓡꓳ꓿
ꓖꓳ ꓡꓱ ꓠꓬꓲ ꓕꓳ‐ꓟˍ ꓡꓰ ꓐꓰ ꓣꓳ ꓤꓶꓻ ꓗꓪ ꓟꓽ ꓙꓵꓻ ꓐꓰ ꓗꓷ ꓡꓰˍ ꓕꓯ ꓕꓳ‐ꓟ ꓔꓯ ꓓꓵꓽ ꓙꓽ꓿ ꓣꓳ ꓔꓳ, ꓜꓳꓽ ꓪˍ ꓟ ꓫꓵꓽ ꓪꓴ꓾ ꓪꓴ‐ꓢ ꓠꓬ ꓟꓽ ꓙꓳ ꓟ ꓡꓰ ꓐꓰ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓘꓳ ꓣꓴ ꓪˍ ꓥ ꓟꓲ꓾ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓓˍ ꓥ ꓟꓲ꓾ ꓪꓴ‐ꓢ ꓠꓬ ꓚꓵ ꓚꓵ ꓔꓬ ꓡꓳ ꓐꓯ ꓟ ꓔꓯ ꓣꓳ ꓙꓵꓻ ꓠ ꓗˍ ꓡꓳ꓿ ꓢꓲ ꓒ ꓬꓰ‐ꓢꓴ ꓐꓯ ꓔ ꓡꓳ꓾ ꓥꓪ ꓔꓯ ꓟꓽ ꓟꓳꓻ ꓠꓬꓲ ꓠꓬꓲ ꓙꓵꓻ ꓢꓴ ꓠꓽ ꓪ ꓜꓲ ꓶꓼ ꓙꓳ ꓫꓱ, ꓙꓳˍ ꓡꓳ ꓐꓰ ꓐꓯ ꓔ ꓡꓳ꓿
ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓠꓬ ꓕꓳ‐ꓟ ꓡꓰ ꓐꓰ ꓒꓬꓱꓽ ꓔꓳ, ꓟꓬ ꓔꓳ, ꓕꓲ ꓧꓪ,ˍ ꓟꓲ ꓟꓽ ꓪ ꓟꓳꓻ꓿ ꓖꓳ ꓡꓱ ꓐꓯ ꓥ ꓟꓲ ꓙꓵꓻ ꓠꓲ, ꓟꓬ ꓢꓶꓽ ꓗꓪ ꓐꓰ ꓣꓳ ꓬꓲ ꓔꓯ ꓟꓳꓻˍ ꓡꓳ꓿ ꓫ. ꓙꓵ ꓟꓶ ꓙꓵˍ ꓟ ꓦꓬꓼ ꓠꓬꓲ꓾ ꓖꓳ ꓟˍ ꓡꓰ ꓐꓰ ꓣꓳ ꓪꓴ‐ꓢ ꓔꓯ ꓟꓽ ꓙꓵꓻ ꓗꓷ ꓡꓰˍ ꓟ ꓦꓬꓼ ꓠꓬꓲ ꓗꓪ ꓪ ꓜꓲ ꓪꓽ ꓘꓴ ꓢꓲ ꓠꓬꓲ ꓬꓲ ꓔꓯ ꓙꓵꓻ ꓠ, ꓟ ꓬꓳ. ꓚꓰꓽˍ ꓡꓳ꓿
ꓝꓮꓲ ꓢ. ꓠꓯ ꓠꓬ Divine Mercy ꓐꓰ ꓐꓯˍ ꓟ ꓑꓮꓲꓽ ꓥ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓠꓬ ꓮ ꓕꓯ ꓟꓲ ꓟꓽ ꓖꓴ ꓡꓰ꓿ ꓣꓳ ꓠꓬ ꓬꓲ ꓔꓯ ꓙꓵˍ ꓥ ꓟꓲ ꓟꓽ ꓙꓵꓻ ꓥˍ ꓟꓲ꓾ ꓬꓲ ꓠꓬ ꓣꓳ ꓔꓯ ꓠꓲ, ꓟ ꓫꓵ ꓢꓲ ꓡꓳ. ꓔꓬ ꓡꓳ꓾ ꓣꓳ ꓔꓯ ꓦꓴ ꓠꓬ, ꓔꓬ ꓡꓳ ꓐꓯˍ ꓟ ꓑꓮꓲꓽ ꓔꓯ ꓣꓳꓽ ꓬꓰ ꓔꓬ ꓟ ꓥ ꓡꓳ꓿ ꓪꓴ‐ꓢ ꓠꓵ ꓠꓲ, ꓪꓴ‐ꓢ ꓫꓱ. ꓤ ꓠꓲ, ꓐꓯˍ ꓟ ꓠꓬ ꓟꓽ ꓡꓳ, ꓬꓰ꓿ ꓬꓲ ꓠꓲ, ꓟ ꓠꓯꓸꓼ ꓗꓪ ꓮ. ꓔꓳ.ˍ ꓡꓰ ꓐꓰ ꓐꓬ ꓔꓬ ꓡꓳ꓿ ꓐꓬ ꓔꓬ ꓟ ꓠꓵ ꓠꓲ, ꓮ. ꓔꓳ. ꓖꓳ ꓟ ꓠꓬ ꓮ ꓕꓯ ꓥ ꓟꓲ ꓟꓽ ꓫꓵꓻ꓿ ꓮ ꓕꓯ ꓥ ꓟꓲ ꓮ ꓔꓳ. ꓡ ꓡꓰ ꓖꓳ ꓟ ꓐꓬ ꓔꓬ ꓟ ꓥ ꓡꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓖꓳ ꓓꓱꓽ ꓕꓲꓽ ꓟ ꓡꓱꓸꓼ ꓗꓪ ꓕꓲ ꓔꓲ.ˍ ꓟꓲ ꓕꓲ ꓟꓽ ꓓꓻ ꓟ ꓠꓬ ꓠꓲ, ꓟ ꓥ ꓡꓳ꓿
