ꓠꓬꓲ. ꓠꓬꓲ ꓗꓪ ꓠꓬ꓾ ꓠꓴ ꓪ ꓠꓬ ꓕꓱ ꓟꓬ ꓙꓰꓽ ꓟ ꓢꓷ. ꓙ ꓟꓳ ꓙ ꓢꓴ ꓥ ꓡꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓦ ꓢꓯꓼ ꓪ ꓣꓴ ꓓꓴ ꓥ ꓡꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (Luke 24:35-48) ꓥꓳ꓿ ꓟ. ꓟꓲꓽ ꓝꓲ. ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓛꓳꓽ ꓒꓯ, ꓠꓬꓲꓽ ꓣꓳ ꓔꓯ ꓟ. ꓖꓶˍ ꓡꓳ꓿ ꓬꓲ ꓛꓳꓽ ꓒꓯ, ꓠꓬꓲꓽ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓫꓵꓻ ꓘꓪ ꓡꓰ ꓗ ꓠꓯ. ꓬꓲ‐ꓟ‐ꓪꓴ‐ꓢꓶ ꓡꓳ ꓒꓱ ꓗꓪ ꓙꓰ ꓔꓬ ꓡꓳ꓿ ꓖꓳ ꓕꓯ ꓠꓬ ꓬꓲ‐ꓟ‐ꓪꓴ‐ꓢꓶ ꓙ ꓖꓴ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓪ ꓠꓬꓲꓽ ꓫꓵ. ꓒ ꓕꓲꓺ ꓗꓪ ꓦꓰꓼ ꓡ ꓢꓲ ꓠꓬꓲ꓾ ꓠꓴ ꓪ ꓢꓲ ꓡꓲ ꓟ ꓙꓳ ꓝꓲ꓾ ꓐꓰ ꓐꓯ ꓖꓶˍ ꓡꓳ꓿ ꓬꓲ ꓪ ꓠꓬꓲꓽ ꓫꓵ. ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰˍ ꓕꓯ ꓮ ꓘꓶ. ꓙꓳꓺ ꓡꓰ ꓢꓲ ꓠꓬꓲ ꓓꓵꓽ ꓙꓽ ꓟꓬꓽ ꓡꓰ꓾ ꓢꓲ ꓒ ꓬꓰ‐ꓢꓴ ꓔꓯ ꓫꓵꓻ ꓗꓴ. ꓫꓵꓻ ꓦ ꓐꓰ ꓟꓳꓻ ꓡꓰꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓴ ꓪ ꓕꓽ ꓙꓳꓺ꓿ ꓠꓴ ꓪ ꓮ ꓫꓵꓽ ꓑꓶ. ꓓꓴ ꓓꓵꓽ ꓙꓽ ꓟꓬꓽˍ ꓡ꓿ ꓥꓪ ꓥ ꓡꓳ꓿ ꓫꓵꓻ ꓗꓴ. ꓫꓵꓻ ꓦ ꓠꓽ ꓪꓳꓽ ꓔꓳ ꓟꓽ ꓙꓳ꓿ ꓮ ꓟꓶ ꓥꓪ ꓔꓯ ꓫꓱ, ꓠꓬꓲ ꓡꓯ꓿ ꓥꓪ ꓠꓽ ꓪꓳꓽ ꓔꓳ ꓙꓳˍ ꓡꓳ꓿ ꓠꓴ ꓪ ꓔꓯ ꓜꓽ ꓓꓴ ꓙꓳˍ ꓡ꓾ ꓐꓰ ꓐꓯ ꓢꓲ ꓬꓲ ꓪ ꓟꓲꓽ ꓙꓬ ꓗꓪ ꓜꓽ ꓟ. ꓖꓶˍ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ ꓝꓮꓲ ꓝ. ꓢꓲ ꓠꓬꓲ꓾ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓳ ꓔ ꓟ ꓡꓰ ꓠꓬꓲ. ꓠꓬꓲ ꓗꓪ ꓐꓲ ꓜꓲꓼ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓢꓽ ꓠꓬꓲ ꓕꓲꓽ ꓠꓬꓲ ꓗꓪ ꓢꓯ. ꓬꓲꓼ ꓡˍ ꓥꓳ ꓐꓯˍ ꓟ ꓐꓲ ꓜꓲꓼ ꓡꓰ ꓟ ꓥ ꓡꓳ꓾ ꓐꓰ ꓐꓯ ꓖꓶ ꓢꓲ ꓠꓬꓲ ꓬꓲ ꓪ ꓠꓬꓲꓽ ꓫꓵ. ꓔꓯ ꓕꓱ ꓟꓬ ꓙꓰꓽ ꓢꓲ ꓒ ꓬꓰ‐ꓢꓴ ꓟ. ꓖꓶˍ ꓟ ꓮ ꓙꓵꓽ ꓔꓯ ꓬꓲ ꓪ ꓠꓬꓲꓽ ꓫꓵ. ꓔꓯ꓾ ꓠꓴ ꓪ ꓠꓬ ꓕꓱ ꓟꓬ ꓙꓰꓽ ꓟ ꓢꓷ. ꓙ ꓟꓳ ꓙ ꓢꓴ ꓥ ꓡꓳ꓿ ꓙꓰ ꓢꓲ ꓠꓬꓲ ꓠꓱ. ꓐꓯ ꓮ ꓙꓵꓽ ꓔꓯ ꓐꓯ ꓖꓶ ꓬꓰ꓾ ꓐꓯˍ ꓟ ꓟ. ꓟꓲꓽ ꓬꓲ ꓕꓲꓽ ꓟꓳꓽ ꓥꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓬꓲ ꓝꓲ ꓓꓴ ꓠꓬꓲꓽ ꓣꓳ ꓔꓯ ꓢꓲ ꓒ ꓬꓰ‐ꓢꓴ ꓣꓱꓽ ꓢꓲ ꓠꓬꓲ ꓝꓮꓲ ꓤꓰꓽ ꓞ, ꓟ ꓬꓲ ꓝꓲ ꓓꓴ ꓐꓴ ꓔꓯ ꓢꓷ. ꓙ ꓟꓳ ꓙ ꓢꓴ ꓬꓰ ꓝꓲˍ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓢꓯ. ꓬꓲꓼ ꓡ ꓟ ꓥꓪ ꓟꓳꓻ ꓡꓰꓳ꓿ ꓥꓪ ꓠꓴꓽ ꓠꓬꓲꓽ ꓣꓳ ꓟꓳꓻ ꓡꓰꓳ꓾ ꓐꓰ ꓢꓷ. ꓙ ꓟꓳ ꓙ ꓖꓶꓽ ꓠ, ꓟ ꓐꓱ ꓶ ꓕꓱ ꓡꓱ ꓝꓲ ꓩꓴˍ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓔꓯ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓡꓰ꓾ ꓣꓳ ꓥˍ ꓟꓲ ꓕꓱ ꓟꓬ ꓙꓰꓽ ꓟ ꓔꓯ ꓢꓷ. ꓙ ꓟꓳ ꓙ ꓢꓴ ꓥ ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓐꓯ ꓔꓬ ꓡꓳ꓿ ꓣꓳ ꓠꓬ ꓝꓲ ꓓꓴ ꓠꓬꓲꓽ ꓣꓳ ꓡꓰ ꓐꓰ ꓠꓱ. ꓐꓯ ꓔꓯ ꓣꓳ ꓥˍ ꓟꓲ ꓢꓷ. ꓙ ꓟꓳ ꓙ ꓢꓴ꓾ ꓣꓳꓽ ꓬꓰ ꓓꓴ ꓥꓳ꓿
ꓮ ꓡꓲ ꓐꓰ ꓢꓷ. ꓙ ꓟꓳ ꓙ ꓢꓴ ꓬꓰ ꓓꓴ ꓥ ꓡ ꓐꓯˍ ꓠꓬ꓾ ꓠꓬꓲ. ꓠꓬꓲ ꓠꓬ ꓥꓪ ꓠꓴꓽ ꓢꓲ ꓒ ꓬꓰ‐ꓢꓴ ꓔꓯ ꓟꓳꓻ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓫꓱ,ˍ ꓟꓲ ꓫꓱ,ˍ ꓟꓶ ꓡꓰꓳ꓿ ꓕꓲˍ ꓟꓲ ꓪ ꓕꓲ ꓡꓰꓳ꓿ ꓢꓲ ꓒ ꓬꓰ‐ꓢꓴ ꓠꓽ ꓮ ꓘꓶ. ꓙꓲˍ ꓟ ꓥ ꓡꓳ꓿ ꓬꓲ ꓐꓯ ꓔ ꓟ ꓡꓰ ꓢꓽ ꓠꓬꓲ ꓕꓲꓽ ꓠꓬꓲ ꓗꓪ ꓢꓯ. ꓬꓲꓼ ꓡ ꓐ ꓡˍ ꓟ ꓪꓴ‐ꓢ ꓥ ꓡꓳ꓿ ꓫꓵꓻˍ ꓟ ꓗꓪ ꓐꓰ ꓢꓯ. ꓬꓲꓼ ꓡˍ ꓟ ꓪꓴ‐ꓢ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓢꓴ ꓔꓯˍ ꓟꓲ ꓚꓬꓴ. ꓖꓶˍ ꓟ ꓢꓲ ꓒ ꓪꓴ‐ꓢ ꓥ ꓡꓳ꓾ ꓐꓰ ꓢꓴ ꓔꓯ ꓐꓯ ꓖꓶ ꓠ, ꓟ ꓢꓷ. ꓙ ꓟꓳ ꓙ ꓢꓴ ꓣꓳꓽ ꓔꓯ ꓬꓰ ꓝꓲ ꓠꓲ, ꓫꓵˍ ꓡꓳ꓿
ꓕꓱ ꓟ ꓑꓶ. ꓓꓴ ꓕꓱ ꓡꓱ ꓐꓰ ꓐꓯ ꓖꓶ ꓐ ꓡ ꓠ, ꓟ ꓥ ꓟꓲ꓾ ꓣꓳ ꓧꓶ. ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓟꓶ ꓠ, ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓣꓳꓽ ꓛ ꓠꓬꓲ ꓠ, ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓮ ꓡꓲ ꓟꓶ ꓡꓰˍ ꓡ ꓐꓯ ꓠꓬ꓾ ꓣꓳ ꓮ ꓘꓶ. ꓫ. ꓙꓵ ꓟꓶ ꓙꓵ ꓡˍ ꓕꓯ꓾ ꓮ ꓘꓶ. ꓠꓲ, ꓟ ꓙꓬ ꓡˍ ꓕꓯ꓾ ꓮ ꓘꓶ. ꓪꓴ‐ꓢ ꓔꓯ ꓓꓰꓽˍ ꓟꓲ ꓮ ꓫꓵˍ ꓟꓽ ꓟꓶ ꓡ ꓕꓯ꓾ ꓖꓳ ꓕꓯ ꓠꓬ ꓣꓳ ꓠꓬ ꓪꓴ‐ꓢ ꓔꓯ ꓟꓶˍ ꓟꓽ ꓟꓶ꓾ ꓐꓯ ꓟ ꓣꓳ ꓢꓷ. ꓡꓰˍ ꓥꓳ꓿ ꓮ ꓡꓲ ꓔꓳ, ꓜꓳꓽ ꓡˍ ꓥ ꓟꓲ꓾ ꓫꓵꓻˍ ꓟ ꓔꓳ, ꓜꓳꓽ ꓡˍ ꓥ ꓟꓲ ꓣꓳ ꓠꓬ ꓪꓴ‐ꓢ ꓔꓯ ꓕꓶ ꓕꓶ ꓡꓰꓽ ꓙꓵꓻ ꓔꓬ ꓥꓳ ꓐꓯ ꓠꓬ꓾ ꓕꓱ ꓟ ꓠꓬ ꓣꓳ ꓠꓬ ꓪꓴ‐ꓢ ꓔꓯ ꓢꓷ. ꓙ ꓟꓳ ꓙ ꓢꓴ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓠꓱ. ꓐꓯ ꓢꓴ ꓔꓯ ꓠꓬ꓾ ꓥꓪ ꓠꓴꓽ ꓠꓽ ꓮ ꓡꓲ ꓓ, ꓥ ꓟꓲ ꓢꓲ ꓒ ꓬꓰ‐ꓢꓴ ꓔꓯ ꓥꓪ ꓠꓴꓽ ꓙꓵˍ ꓡꓳ꓿ ꓬꓲ ꓠꓽ ꓚꓵ ꓚꓵ ꓟ ꓪꓴ‐ꓢ ꓥ ꓡꓳ꓿ ꓢꓯ. ꓬꓲꓼ ꓡˍ ꓟ ꓪꓴ‐ꓢ꓾ ꓥꓪ ꓠꓴꓽ ꓔꓯ ꓚꓬꓴ. ꓐ ꓡˍ ꓟ ꓪꓴ‐ꓢ ꓥ ꓡꓳ ꓐꓰ꓾ ꓢꓴ ꓔꓯ ꓐꓯ ꓟ. ꓖꓶ ꓐ ꓡˍ ꓗꓪ ꓛꓲ ꓣꓳ ꓥˍ ꓟꓲ ꓢꓷ. ꓙ ꓟꓳ ꓙ ꓢꓴ ꓬꓰ ꓓꓴ ꓥꓳ꓿ ꓢꓲ ꓒ ꓬꓰ‐ꓢꓴ ꓥ ꓟꓲ꓾ ꓣꓳ ꓔꓯ ꓕꓱ ꓡꓱ ꓬꓰ ꓐ ꓡ ꓠ, ꓟ ꓣꓳ ꓔꓯ꓾ ꓠꓴ ꓪ ꓕꓽ ꓙꓳ꓾ ꓠꓴ ꓪ ꓠꓬ ꓢꓲ ꓡꓲ ꓟ ꓙꓳˍ ꓡꓳ꓾ ꓥꓪ ꓥ ꓡꓳ꓾ ꓠꓴ ꓪ ꓠꓱ. ꓐꓯ ꓔꓯ ꓢꓷ. ꓙ ꓟꓳ ꓙ ꓢꓴ ꓬꓰ ꓙꓰ꓾ ꓕꓽ ꓙꓳꓺ꓾ ꓐꓯ ꓢꓲ ꓣꓳ ꓔꓯ ꓢꓯꓼ ꓪ ꓖꓶ ꓡ ꓔꓬ ꓟ ꓥ ꓡꓳ꓿
