ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓠꓬ꓾ “ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓥꓴꓻˍ ꓟ” ꓔꓯ ꓐꓯ ꓔ ꓟ ꓬꓳ‐ꓦ 21ꓽ11‐18 ꓗꓪ ꓟ ꓢꓲꓽ ꓫꓬ ꓕꓳꓽ ꓶ ꓥ ꓡꓳ꓿ ꓬꓲ ꓠꓬ ꓡꓱꓼ ꓜꓴ ꓠꓱ. ꓫꓱ ꓟꓸꓼ ꓗꓪ ꓦꓰꓼ ꓞ, ꓢꓲ ꓥꓴꓻ ꓔꓬ ꓡꓳ꓿ ꓟꓴ ꓗꓪ ꓝꓲ ꓓꓴ ꓠꓬꓲꓽ ꓣꓳ ꓡꓰ ꓬꓲ ꓔꓯ “ꓤ ꓟꓶ ꓤꓽꓳ꓾ ꓠꓴ ꓮ ꓫꓵꓽ ꓪꓴ. ꓠꓬꓲ ꓥꓴˍ ꓡ” ꓐꓰ ꓠ ꓠꓬꓲˍ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓔꓯ “ꓠꓴ ꓮ ꓫꓵꓽ ꓪꓴ. ꓠꓬꓲ ꓥꓴˍ ꓡ” ꓐꓰ ꓠ ꓠꓬꓲˍ ꓡꓳ꓿ ꓬꓲ ꓠꓬ ꓢꓲ ꓒ ꓔꓯ ꓟꓽ ꓟꓳꓻ ꓟ ꓪꓴ. ꓠꓬꓲ ꓥꓴˍ ꓟ ꓥ ꓡꓳ꓿
ꓣꓳ ꓥˍ ꓟꓲ ꓣꓳ ꓐꓱ ꓶ ꓟꓬꓽ ꓠꓬꓲ ꓬꓳ. ꓚꓰꓽˍ ꓢꓴ꓾ ꓣꓱꓽ ꓬꓯꓼ ꓢꓴ ꓕꓲ ꓣꓳ ꓔꓯ ꓣꓳ ꓤꓶꓻ ꓗꓪ ꓐꓰ ꓡꓳ ꓗꓷ ꓪ ꓡꓰˍ ꓕꓯ꓾ ꓟꓽ ꓥ ꓠꓬ꓾ ꓣꓳ ꓮ ꓘꓶ. ꓢꓯꓼ ꓕꓵꓼˍ ꓥ ꓟꓲ ꓣꓳ ꓠꓲ, ꓠꓵˍ ꓢꓴ ꓠꓲ, ꓟ ꓠꓻ ꓢꓴ ꓕꓲ ꓣꓳ ꓣꓳ ꓐꓰ ꓙꓻ ꓡꓯ ꓘꓳ ꓟꓽ ꓟꓶ ꓗꓷ ꓡꓰˍ ꓕꓯ ꓣꓳ ꓥꓴˍ ꓡꓳ꓿ ꓣꓳ ꓠꓬ ꓬꓲ ꓔꓯ ꓧꓪ ꓢꓲ꓾ ꓧꓪ ꓟꓽ ꓟꓳꓻ ꓗꓷ ꓡꓰˍ ꓕꓯ ꓣꓳ ꓥꓴꓻˍ ꓡꓳ꓿ ꓮ ꓛꓬ, ꓙꓱˍ ꓡꓳ꓿
ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓬꓲ ꓫꓵꓽ ꓪꓴ ꓔꓯ ꓣꓳ ꓡꓳ. ꓠꓬꓲˍ ꓕꓯ꓾ ꓬꓲ ꓠꓬ ꓬꓰ‐ꓢꓴ ꓔꓯ ꓧꓪˍ ꓡꓳ꓿ ꓬꓲ ꓧꓪ ꓔꓬ ꓟ ꓢꓲ ꓒ ꓠꓬ ꓬꓲ ꓔꓯ ꓟꓳꓻˍ ꓡꓳ꓿ ꓬꓲ ꓔꓯ “ꓟ‐ꓡꓲꓳ” ꓐꓰ ꓘꓴˍ ꓟ ꓢꓲ ꓒ ꓔꓯ ꓬꓲ ꓧꓪ ꓟꓳꓻ ꓡꓰꓳ꓿ ꓣꓳ ꓠꓬ ꓣꓳ ꓧꓪ ꓠꓲ, ꓫꓵˍ ꓟ ꓣꓳ ꓠꓲ, ꓠꓵ ꓢꓴ ꓔꓯ ꓧꓪˍ ꓟ ꓗꓪ ꓣꓳ ꓧꓪˍ ꓕ ꓑꓳꓸꓼ ꓠꓽ ꓧꓪ ꓟꓶ ꓟꓽ ꓓꓻ꓿ ꓣꓳ ꓠꓲ, ꓠꓵ ꓢꓴ ꓫꓵꓻ ꓗꓷ ꓗ ꓠꓯ. ꓬꓲ ꓔꓯ ꓣꓳ ꓝꓮꓲ ꓧꓪ ꓟꓶ ꓟꓽ ꓓꓻ꓿ ꓣꓳ ꓠꓲ, ꓠꓵ ꓢꓴ ꓒꓲꓼ ꓡꓰ ꓕꓯ ꓠꓬ ꓧꓪ ꓟꓶ ꓢꓴˍ ꓟꓲ ꓙꓳˍ ꓥꓳ꓾ ꓧꓪ ꓟꓽ ꓟꓶ ꓢꓴˍ ꓟꓲ ꓙꓳˍ ꓥꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓔꓯ ꓣꓳ ꓧꓪˍ ꓕꓯ ꓣꓳ ꓠꓬ ꓮ ꓕꓯ ꓥ ꓟꓲ ꓬꓲ ꓔꓯ ꓧꓪ ꓟꓶˍ ꓥꓳ꓿ ꓮ ꓡꓲꓳ ꓐꓯ ꓠꓬ ꓢꓲ ꓒ ꓠꓬ ꓣꓳ ꓔꓯ ꓮ ꓕꓯ ꓟꓲ ꓧꓪ ꓔꓬ ꓟ ꓑꓶ. ꓓꓴ ꓥ ꓡꓳ꓿
ꓬꓲ ꓠꓬ ꓙꓲˍ ꓟ ꓮ ꓣꓳ ꓡꓳ. ꓒ ꓥ ꓡꓳ꓿ ꓬꓲ ꓚꓲ. ꓛꓬ ꓡꓰ “ꓥꓪ ꓠꓽ ꓙꓲˍ ꓟ ꓮ ꓣꓳ ꓡꓳ. ꓒ ꓥ ꓡꓳ” ꓐꓰ ꓐꓯ ꓔ ꓡꓳ꓿ ꓢꓲ ꓒ ꓔꓯ ꓣꓳ ꓟꓽ ꓧꓪ ꓢꓰꓽ ꓕꓯ ꓡꓰ꓾ ꓬꓲ ꓠꓬ ꓣꓳ ꓟꓬꓱ ꓔꓯ ꓮ ꓕꓯ ꓥ ꓟꓲ ꓘꓴꓻ ꓔꓬ ꓡꓳ꓿ ꓣꓳ ꓠꓬ ꓢꓲ ꓒ ꓔꓯ ꓧꓪ ꓔꓬ ꓟ ꓠꓬ꓾ ꓢꓲ ꓒ ꓡꓰ ꓣꓳ ꓔꓯ ꓧꓪ ꓔꓬ ꓟ ꓔꓯ ꓓꓽ ꓔꓳ, ꓔꓬ ꓟ ꓥ ꓡꓳ꓿ ꓒꓲꓼ ꓬꓰ ꓢꓴ ꓔꓯ ꓧꓪ ꓠ, ꓟ ꓚꓬꓴ. ꓙ ꓠ, ꓟ ꓬꓲ ꓠꓬ ꓟꓲ ꓠꓯ ꓗꓪ ꓬꓯꓼ ꓡ ꓟ ꓥ ꓢꓲ꓾ ꓣꓳ ꓮ ꓙꓵꓽ ꓠꓬ ꓕꓲ ꓖ ꓟꓽ ꓥ ꓕꓲ ꓖ ꓖ ꓗꓪ ꓒꓲꓼ ꓡꓰ ꓔꓬ ꓢꓴ ꓐꓴ ꓥ ꓡꓳ꓿ ꓢꓲ ꓒ ꓪꓴ‐ꓢ ꓠꓬ ꓠꓵꓻ ꓠꓲ, ꓗꓪ ꓐꓰ ꓣꓳ ꓔꓯ ꓧꓪ ꓔꓬ ꓡꓳ꓿ ꓣꓳ ꓬꓰ ꓠ ꓔ ꓟ ꓠꓬ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓬꓰ ꓗꓷ ꓟ ꓡꓰ ꓐꓰ꓾ ꓠꓵꓻ ꓠꓲ, ꓡꓰ ꓢꓲ ꓒ ꓔꓯ ꓧꓪ ꓠ, ꓟ ꓥ ꓡꓳ꓿ ꓣꓳ ꓟꓽ ꓧꓪ. ꓡꓰ ꓟ ꓫꓴ ꓡꓰ ꓟ ꓐꓰ꓾ ꓣꓳ ꓠꓲ, ꓫ.ˍ ꓟ ꓠꓯꓸꓼ ꓗꓪ ꓢꓲ ꓒ ꓔꓯ ꓮ ꓡꓲ ꓧꓪ ꓠ, ꓟ ꓚꓱ, ꓔꓯ ꓟ‐ꓖ‐ꓓ‐ꓡꓲ ꓢꓴ ꓟ‐ꓡꓲ ꓡꓰ ꓣꓳ ꓔꓯ ꓟ. ꓖꓶ ꓔꓲ. ꓬꓰ ꓟ ꓥ ꓡꓳ꓿
