Nꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓢ. ꓠꓯ ꓠꓬ ꓣꓳ ꓮ ꓘꓶ. ꓥꓳ ꓡꓳ. ꓔꓬ ꓟ ꓢꓯ. ꓬꓲꓼ ꓡ ꓑꓮꓲꓽ ꓛꓲ ꓡꓺꓳ꓿ ꓡꓲ ꓞꓲ ꓦꓬꓽ ꓡꓲ ꓞꓲ ꓠꓬꓲ ꓜ ꓚꓲ. ꓧꓪꓽ ꓚꓲ. ꓢꓲ ꓠꓬꓲ ꓪꓽ ꓘꓴ ꓗꓳ. ꓡ ꓟ ꓢ. ꓠꓯ ꓠꓬ ꓮ ꓓꓲꓽ ꓗ, ꓛꓲꓽˍ ꓟ ꓦꓬꓼ ꓠꓬꓲ ꓛꓲ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓓꓴꓽ ꓔꓯ ꓧꓪ. ꓡꓰꓳ꓿ ꓫꓵꓻˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓧꓪ. ꓟꓽ ꓓꓻꓳ꓿ ꓕꓱ ꓟ ꓠꓬ ꓣꓳ ꓐꓱ ꓶ ꓗ, ꓛꓲꓽ ꓓꓴ ꓓꓳꓽ ꓓꓽ ꓟ ꓕꓲ ꓟ ꓥ ꓡꓳ꓿ ꓮ ꓡꓲꓳ ꓐꓯ ꓠꓬ ꓮ ꓠꓱ ꓟꓵꓽ ꓟꓽ ꓚꓰꓼ ꓟꓲ ꓟꓽ ꓚꓰꓼ ꓕꓯ ꓡꓰ ꓫꓵꓻ ꓗꓪ ꓚꓳ. ꓢꓯꓼ ꓬꓲ ꓡ ꓐ ꓡ ꓢꓴ꓾ ꓫꓵꓻ ꓢꓴ ꓔꓯ ꓢꓯꓼ ꓬꓲꓼ ꓡ ꓝꓲ ꓐ ꓡ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓤ ꓔꓲ.꓾ ꓪꓴ‐ꓢ ꓮ ꓐꓲ ꓥ ꓟ ꓑꓶ. ꓓꓴ ꓫꓵꓻ ꓓꓴꓽ ꓔꓯ ꓬꓲ. ꓧꓪ. ꓡꓰꓳ꓿ ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓗ, ꓛꓲꓽ ꓓꓴ ꓥ ꓡꓳ꓿
ꓢ. ꓠꓯ ꓠꓽ ꓦꓬꓼ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓣꓳ ꓑ ꓙꓽ ꓪˍ ꓟ ꓠꓬ ꓟ‐ꓕꓲ 28ꓽ1‐10 ꓥ ꓡꓳ꓿ ꓟ‐ꓡꓲ‐ꓬ ꓟ‐ꓓ‐ꓡꓰ‐ꓠ ꓐꓰ ꓤ ꓟꓶ ꓤ ꓕꓲ ꓜꓴꓻ ꓠꓬ ꓡꓱꓼ ꓜꓴꓻ ꓗꓪ ꓙꓰ ꓠꓬꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓬꓲ ꓫꓵꓻ ꓟꓳ ꓔꓯ ꓡꓳ. ꓠꓬꓲ ꓠ, ꓟ ꓐꓱ ꓶ ꓙꓰ ꓠꓬꓲˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻˍ ꓟ ꓗꓪ ꓐꓰ ꓢꓯ. ꓬꓲꓼ ꓙꓰ ꓟ ꓑꓶ. ꓓꓴ ꓡꓱꓼ ꓜꓴ ꓗꓪ ꓟꓽ ꓔꓬꓳ꓿ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓪ ꓔꓯ꓾ ꓢꓲ ꓒ ꓬꓰ‐ꓢꓴ ꓠꓬ ꓢꓯ. ꓬꓲꓼ ꓙꓰꓳ꓾ ꓐꓰ ꓐꓯ ꓖꓶˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓓꓴꓽ ꓔꓯ ꓧꓪ. ꓡꓰꓳ꓿ ꓚꓱ, ꓬꓲꓼ ꓙꓰ ꓢꓲ ꓠꓬꓲ ꓬꓲ ꓠꓬꓲ ꓤ ꓐꓴ ꓔꓯ ꓐꓯ ꓖꓶ꓾ ꓬꓲ ꓛꓳꓽ ꓒꓯ, ꓐꓴ ꓔꓯ ꓐꓯ ꓖꓶ꓾ ꓐꓰ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓪ ꓐꓴ ꓔꓯ ꓝꓲ ꓩꓴˍ ꓟ ꓟ. ꓟꓲꓽ ꓥ ꓡꓳ꓿
ꓟ. ꓟꓲꓽ ꓕꓱ ꓟ ꓔꓯ ꓣꓳ ꓡꓳ. ꓠꓬꓲˍ ꓟ ꓗꓪ ꓬꓲ ꓪꓴ. ꓕꓲ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓪ ꓠꓬ ꓞꓳ ꓫꓵꓻ ꓠꓬꓲꓽ ꓗꓴ. ꓚꓸꓼ ꓗꓪ ꓙꓰ ꓢꓲ ꓠꓬꓲ ꓧꓪ ꓙꓰˍ ꓡꓳ꓾ ꓐꓯ ꓟ ꓣꓳ ꓡꓳ. ꓟꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫꓵꓻ ꓟ ꓑꓶ. ꓓꓴ ꓬꓲ ꓔꓯ ꓡꓱꓼ ꓜꓴ ꓗꓪ ꓔꓵ. ꓗꓷꓳ꓿ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓫꓵꓻ ꓢꓴ ꓪꓴ‐ꓢ ꓟꓽ ꓥ꓿ ꓕꓲ ꓞꓲꓼ ꓕꓲ ꓑ ꓢꓯ. ꓔꓬ ꓟ ꓪꓴ‐ꓢ ꓥ ꓟ ꓑꓶ. ꓓꓴ ꓫꓵꓻ ꓓꓴꓽ ꓔꓯ ꓬꓲ ꓧꓪ. ꓡꓰˍ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓤ ꓟꓶ ꓤ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓫꓵꓻ ꓢꓴ ꓠꓬꓲꓽ ꓗꓴ. ꓚꓸꓼ ꓗꓪ ꓧꓪ ꓙꓰˍ ꓕꓯ ꓧꓪ ꓟꓽ ꓟꓶ꓿ ꓟ. ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓔꓯ ꓬꓲ ꓪꓴ. ꓕꓲ ꓫꓵꓽ ꓢꓷ. ꓡꓰ ꓝꓲˍ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓔꓯ ꓫꓵꓻˍ ꓟ ꓗꓪ ꓕꓽ ꓧꓪ꓾ ꓐꓰ ꓣꓳ ꓔꓯ ꓐꓯ ꓟꓳ. ꓖꓶ ꓡˍ ꓡꓳ꓿ ꓔꓯ ꓥꓳꓽ ꓐꓯˍ ꓠꓬ ꓫꓵꓻˍ ꓟ ꓠꓬ ꓮ ꓫꓵꓽ ꓥ ꓡ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓓꓵˍ ꓡꓳ꓿ ꓝꓴꓲ. ꓪꓽ ꓒꓵꓽ ꓠꓬ ꓫꓵꓻˍ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿
