ꓟꓴ ꓗꓪ ꓝꓲ ꓓꓴ (ꓮꓠꓖꓰꓡꓢ) ꓐꓰ ꓐꓯ_ ꓟ ꓚꓱꓹ ꓔꓯ ꓠ ꓠꓹ ꓓꓴ ꓬꓰ ꓡꓯ= ꓙꓲꓻ ꓫꓬ ꓢꓴ ꓮꓴꓖꓴꓢꓔꓲꓠꓰ ꓠꓬ ꓮꓠꓖꓰꓡ ꓐꓰ ꓐꓯ_ ꓟ ꓟꓴ ꓗꓪ ꓝꓲ ꓓꓴ ꓠꓬ ꓬꓲ ꓪ ꓟꓬꓱꓺ ꓚꓵ ꓚꓵ ꓟꓽ ꓥ꓾ ꓐꓰ ꓐꓯ ꓔ ꓡꓳ꓾ ꓬꓲ ꓪ ꓪꓴ-ꓢ ꓔꓯ ꓟꓬꓱꓽ ꓬꓰ_ ꓟ ꓔꓶꓸ ꓳꓝꓝꓲꓚꓰ ꓐꓯ_ ꓟ ꓬꓲꓸ ꓟꓬꓱꓺ ꓥ ꓡꓳ꓾ ꓐꓰ ꓐꓯ ꓔ ꓡꓳ= ꓐꓯ ꓠꓬ ꓬꓲ ꓪ ꓠꓬ ꓦ ꓥ ꓡꓳ꓾ ꓬꓲ ꓟꓬꓱꓺ ꓟꓽ ꓥ꓾ ꓖꓳ ꓡꓱ ꓠꓬꓲ ꓬꓲ ꓪ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ꓾ ꓕꓲ ꓚꓱꓹ ꓚꓱꓹ ꓗꓪ ꓐꓰ ꓪꓴ-ꓢ ꓒꓬꓱꓽ ꓔꓯ ꓒꓬꓱꓽ ꓔꓳꓹ ꓟꓬ ꓔꓳꓹ ꓟꓳ ꓪ ꓢꓴ ꓥ ꓢꓲ ꓠꓬꓲ ꓪꓴ-ꓢ ꓔꓯ ꓫꓱꓸ ꓖꓶ ꓔꓬ ꓡꓳ= ꓬꓲ ꓪ ꓠꓬ ꓬꓲ ꓜꓴ ꓬꓲꓸ ꓟꓯꓼ ꓕꓱ ꓡꓱ ꓙꓳ_ ꓡꓳ= ꓝꓮꓲ ꓬꓲ ꓪ ꓠꓬ ꓦ ꓥ ꓟꓲ ꓠꓲꓹ ꓡꓶꓽ ꓐꓰ ꓢꓷꓸ ꓠꓲꓹ ꓕꓱ ꓡꓱ ꓫꓵ ꓙꓳ_ ꓡꓳ= ꓧꓪ ꓖꓳ ꓓꓱ ꓟꓽ ꓙꓳ ꓥ ꓟꓲ ꓬꓲ ꓪ ꓠꓲꓹ ꓟ ꓠꓯꓼ ꓘꓴꓽ ꓗꓪ ꓬꓲ ꓪ ꓢꓷꓸ_ ꓟ ꓬꓲ ꓪ ꓠꓲꓹ ꓡꓶꓽ ꓙꓳ_ ꓟ ꓥ ꓡꓳ= ꓟꓴ ꓗꓪ ꓝꓲ ꓓꓴ ꓮ ꓙꓵ ꓠꓬ ꓢꓲ ꓒ ꓬꓰ-ꓢꓴ ꓡꓰ ꓚꓰꓼ ꓔ ꓟ ꓥ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓐꓱ ꓶ ꓢꓲ ꓒ ꓬꓰ-ꓢꓴ ꓔꓯ ꓣꓱꓽ ꓙ ꓢꓴ ꓢꓲ ꓒ ꓬꓰ-ꓢꓴ ꓔꓯ ꓫꓱꓸ ꓖꓶ ꓢꓴ ꓚꓰꓼ ꓔ ꓟꓳꓸ_ ꓟ ꓥ ꓡꓳ= ꓮ ꓙꓵ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓘꓴꓽ ꓗꓪ ꓐꓰ ꓒꓬꓱꓼ ꓡ ꓟ ꓥ ꓡꓳ= ꓟꓳ ꓓ_ ꓟ ꓥ ꓟꓲ ꓟꓽ ꓟꓳ ꓓ_ ꓟ ꓟꓥ ꓟꓲ ꓮ ꓙꓵ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓐꓰ ꓒꓬꓱꓼ ꓡ ꓟ ꓑꓶ ꓓꓴ ꓮ ꓙꓵ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓣꓱꓽ ꓙ ꓔꓬ ꓢꓴ ꓔ ꓙ ꓔꓬ ꓢꓴ ꓢꓲ ꓒ ꓬꓰ-ꓢꓴ ꓝꓲ_ ꓟ ꓔꓯ ꓬꓰ ꓢꓴ ꓡꓰ ꓥꓳ=
ꓐꓹ ꓐ ꓪꓴ-ꓢ ꓠꓬ ꓡ ꓞꓳ ꓕꓲ ꓣꓳ ꓠꓯꓼ ꓗꓪ ꓬꓰ ꓙ ꓡꓳꓸ ꓙ ꓠꓹ ꓟ ꓐꓱ ꓶ ꓟꓴ ꓗꓪ ꓝꓲ ꓓꓴ ꓕꓲ ꓣꓳ ꓕꓲ ꓣꓳ ꓬꓲ ꓠꓬ ꓑꓶ ꓖꓶ ꓔ ꓡꓳ= ꓬꓲ ꓠꓬ ꓣꓳ ꓔꓯ ꓙꓲ_ ꓟ ꓬꓰ ꓠꓹ ꓟ ꓐꓱ ꓶ ꓣꓳ ꓔꓯ ꓪ-ꓢ ꓠꓲꓹ ꓡꓶꓽ ꓛꓳ ꓠꓹ ꓟ ꓐꓱ ꓶ ꓣꓳ ꓔꓯ ꓟꓽ ꓙꓲ ꓟ ꓗꓪ ꓐꓰ ꓗꓽ ꓕ ꓠꓹ ꓟ ꓐꓱ ꓶ ꓬꓲ ꓠꓬ ꓮ ꓕꓯ ꓥ ꓟꓲ ꓠꓬꓲ ꓙ ꓡꓳꓸ ꓙ ꓔꓬ ꓡꓳ= ꓖꓳ ꓡꓱ ꓠꓬꓲ ꓣꓳ ꓗ-ꓕꓳ-ꓡꓲꓗ ꓪꓽ ꓘꓴ ꓕꓯ ꓬꓲꓸ ꓟꓶꓽ ꓗꓪ ꓡꓳꓸ ꓔꓬ ꓟ ꓟꓴ ꓗꓪ ꓝꓲ ꓓꓴ ꓐꓰ ꓐꓯ ꓢꓲ ꓠꓬꓲ ꓮ ꓕꓯ ꓟꓲ ꓪꓽ ꓘꓴ_ ꓡꓳ= ꓕꓱ ꓟ ꓠꓬ ꓪꓴ-ꓢ ꓡꓰ ꓚꓰꓼ ꓔ ꓖꓶ_ ꓟ ꓟꓴ ꓗꓪ ꓝꓲ ꓓꓴ ꓥ ꓡꓳ= ꓕꓲ ꓠꓬꓲ ꓡꓲ ꓕꓲ ꓠꓬꓲ ꓛꓳ ꓙꓳ_ ꓟ ꓦꓬꓼ ꓣꓳ ꓗꓳ ꓡꓳ ꓗꓪ ꓟꓴ ꓗꓪ ꓝꓲ ꓓꓴ ꓬꓲꓸ ꓜꓴ ꓬꓲ ꓟꓯꓼ ꓔꓬ ꓡꓳ꓾ ꓐꓯ_ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓮ ꓫꓵ ꓬꓰ ꓥ ꓟꓲ ꓐꓹ ꓐ ꓪꓴ-ꓢ ꓠꓲꓹ ꓡꓶꓽ ꓛꓳ ꓐ ꓡ ꓢꓲ ꓠꓬꓲ ꓟꓴ ꓗꓪ ꓝꓲ ꓓꓴ ꓐꓯ_ ꓟ ꓠꓬ ꓢꓲ ꓒ ꓬꓰ-ꓢꓴ ꓠꓯꓼ ꓗꓪ ꓒꓬꓱꓼ ꓡ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓐꓱ ꓶ ꓒꓬꓱꓼ ꓡ ꓡꓳ ꓐꓯ ꓟ ꓔꓯ ꓓꓵꓽ ꓙ ꓠꓬꓲ ꓢꓲ ꓠꓬꓲ ꓣꓳ ꓥ ꓟꓲ ꓢꓲ ꓒ ꓬꓰ-ꓢꓴ ꓣꓱꓽ ꓙ ꓔꓬ ꓕꓯ ꓟꓴ ꓗꓪ ꓝꓲ ꓓꓴ ꓥ ꓟꓲ ꓣꓳ ꓔꓯ ꓣꓱꓽ ꓙ ꓔꓬ ꓡꓳ ꓐꓯ ꓟ ꓔꓯ ꓣꓳ ꓢꓷꓸ ꓓꓴ ꓬꓰ ꓡꓯ=
