ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ
ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓥꓪ ꓠꓴ ꓛꓲ ꓒꓯ, ꓔꓯ ꓟꓽ ꓞꓲ ꓕꓯ ꓠꓽ ꓠꓴ ꓠꓬ ꓥꓪ ꓐꓰ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ꓾ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ꓿ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓠꓬ (ꓬꓳ‐ꓦ 13ꓽ1‐15) ꓥ ꓡꓳ꓿ ꓟ. ꓟꓲꓽ ꓝꓲ. ꓗꓪ ꓠꓬ꓾ ꓡꓳ, ꓬꓰˍ ꓟ ꓟꓶꓽ ꓘꓶꓽ ꓜꓻ ꓜꓽ ꓑꓮꓲꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡꓳ꓿ ꓒꓲ‐ꓕꓱ ꓔꓬ ꓗꓪ ꓛꓲ ꓡˍ ꓕꓯ ꓢꓲ ꓒ ꓬꓰ‐ꓢꓴ ꓡꓰ ꓒꓲ‐ꓕꓱ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡꓳ꓿
ꓖꓳ ꓕꓯ ꓠꓬ ꓒꓲ‐ꓕꓱ ꓡꓰ꓾ ꓢꓲ ꓒꓽꓳ꓾ ꓠꓴ ꓮ ꓫꓵꓽ ꓑꓶ. ꓓꓴ ꓥꓪ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡ꓿ ꓥꓪ ꓛꓲ ꓒꓯ, ꓔꓯ ꓠꓴ ꓔꓯ ꓮ ꓕꓯ ꓥ ꓟꓲ ꓟꓽ ꓞꓲ ꓝꓲ꓾ ꓐꓰ ꓒꓳ, ꓖꓶˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓡꓰ꓾ ꓥꓪ ꓠꓴꓻ ꓛꓲ ꓒꓯ, ꓟꓽ ꓞꓲ ꓕꓯ ꓠꓽ ꓠꓴ ꓠꓬ ꓥꓪ ꓐꓰ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ꓾ ꓐꓰ ꓐꓯ ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓛꓳꓽ ꓒꓯ, ꓐꓴ ꓛꓲ ꓒꓯ, ꓔꓯ ꓮ ꓫꓵꓽ ꓑꓶ. ꓓꓴ ꓞꓲꓽ ꓖꓶˍ ꓡ꓿ ꓛꓲ ꓒꓯ, ꓐꓯˍ ꓟ ꓠꓽ ꓕꓲꓽ ꓖꓳ ꓓꓱꓽ ꓡꓱꓸꓼ ꓗꓪ ꓟꓽ ꓢꓲꓽ ꓫꓬ ꓓꓰ ꓡꓰ ꓟ ꓕꓲ ꓔꓳ. ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓒꓲ‐ꓕꓱ ꓠꓬ ꓕꓱ ꓡꓱ ꓒꓳ, ꓖꓶˍ ꓡꓳ꓿ “ꓢꓲ ꓒꓽꓳ꓾ ꓠꓴꓻ ꓥꓪ ꓛꓲ ꓒꓯ, ꓔꓯ ꓡꓰꓽ ꓟꓽ ꓞꓲ꓾ ꓥꓪ ꓡꓯꓽ ꓒꓯ, ꓥꓪ ꓪꓴ. ꓓꓵ ꓔꓯˍ ꓟꓲ ꓞꓲꓽ ꓖꓶ ꓡꓯ꓾” ꓐꓰ ꓐꓯˍ ꓡꓳ꓿ ꓖꓳ ꓕꓯ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓖꓳ ꓓꓱꓽ ꓠꓽ ꓞꓲꓽ ꓔ ꓕꓯ ꓠꓽ ꓫꓬꓻ ꓡꓰˍ ꓟ ꓥꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓛꓲꓽ ꓒꓯ, ꓠꓽ ꓮ ꓕꓯ ꓟꓲ ꓟꓽ ꓢꓲꓽ ꓫꓬ ꓟ ꓥꓳ꓿ ꓖꓳ ꓟ ꓑꓶ. ꓓꓴ ꓛꓲ ꓒꓯ, ꓞꓲꓽ ꓗꓷ ꓕꓯ ꓠꓽ ꓓꓻ ꓡꓰꓳ꓾ ꓐꓰ ꓒꓳ, ꓖꓶˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓥˍ ꓟꓲ ꓣꓳ ꓒ ꓕꓲꓺ ꓗꓪ ꓔꓬ ꓢꓴ꓾ ꓥ ꓠꓬ꓾ ꓣꓳ ꓕꓲꓽ ꓦꓲꓻ ꓗꓪ ꓔꓬ ꓢꓴ ꓔꓯ ꓛꓲ ꓒꓯ, ꓞꓲꓽ ꓖꓶ ꓠꓬꓲˍ ꓡ꓿ ꓤ ꓠꓱ ꓤ ꓒꓬꓱꓼ ꓔꓬ ꓕꓯ ꓠꓬ ꓞꓲꓽ ꓖꓶˍ ꓡꓳ꓿ ꓕꓲ ꓐꓱ ꓠꓬ ꓮꓽ ꓐ ꓮ ꓟ ꓛꓲ ꓒꓯ, ꓔꓯˍ ꓟꓲ ꓞꓲꓽ ꓖꓶˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓠꓱ. ꓐꓯ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓛꓲ ꓒꓯ, ꓞꓲꓽ ꓖꓶ ꓠ, ꓟ ꓣꓳ ꓠꓲ, ꓟ ꓗꓪ ꓟꓽ ꓙꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓕꓲꓽ ꓖꓳ ꓓꓱꓽ ꓡꓱꓸꓼ ꓗꓪ ꓟꓽ ꓢꓲꓽ ꓫꓬ ꓓꓰ ꓡꓰ ꓟ ꓛꓲ ꓒꓯ, ꓔꓯ ꓠꓽ ꓕꓲꓺˍ ꓟꓲ ꓕꓲꓺ ꓠꓲ, ꓟꓽ ꓫꓵ꓿
ꓖꓳ ꓡꓱ ꓐꓯ ꓥ ꓟꓲ ꓠꓬꓲ. ꓠꓬꓲ ꓣꓳ ꓦ ꓡꓱꓻ ꓔꓬ ꓟ꓾ ꓣꓳ ꓔꓯ ꓚꓬꓴ. ꓙ ꓖꓶ ꓡ ꓔꓬ ꓟ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡꓳ ꓐꓯˍ ꓟ ꓠꓬ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓮ ꓡꓲ ꓘꓶ ꓛꓲ ꓠꓲ, ꓠꓵˍ ꓡ ꓐꓯ ꓟ ꓔꓯ ꓣꓳꓽ ꓡꓳ. ꓢꓷ. ꓓꓴ ꓥꓳ꓿
ꓕꓱ ꓡꓱ ꓛꓲ ꓒꓯ, ꓞꓲꓽ ꓖꓶˍ ꓟ ꓠꓬ ꓠꓲ, ꓠꓵˍ ꓟ ꓡꓰꓽ ꓟꓽ ꓞꓲ꓾ ꓢꓲ ꓒ ꓬꓰ‐ꓢꓴ ꓬꓲ ꓚꓲ. ꓛꓬ ꓚꓳꓽ ꓚꓲ. ꓛꓬ ꓙ ꓣꓳꓽˍ ꓟ ꓠꓲ, ꓟ ꓡꓰ ꓬꓲ ꓠꓯꓸꓼ ꓗꓪ ꓣꓳꓺ ꓢꓴ ꓔꓯ ꓫꓱ. ꓤˍ ꓟ꓾ ꓥ ꓠꓬ꓾ ꓛꓲ ꓒꓯ, ꓐꓯˍ ꓟ ꓟꓽ ꓢꓲꓽ ꓫꓬ ꓟ ꓔꓯ ꓬꓲ ꓡꓰ ꓞꓲꓽ ꓫꓬ ꓖꓶˍ ꓕꓯ ꓠꓽ ꓕꓲ ꓖꓳ ꓓꓱꓽ ꓡꓱꓸꓼ ꓫꓬ ꓡꓰꓳ꓿ ꓕꓱ ꓟ ꓕꓲ ꓡꓰ,ˍ ꓥꓳ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓕꓱ ꓡꓱ ꓞꓲꓽ ꓖꓶˍ ꓟ ꓬꓲ. ꓬꓲ ꓢꓲ ꓝꓮꓲ ꓕꓲ ꓟ ꓠꓬ꓾ ꓒꓲ‐ꓕꓱ ꓔꓯ ꓞꓲꓽ ꓖꓶˍ ꓕꓯ ꓒꓲ‐ꓕꓱ ꓠꓽ ꓕꓲꓽ ꓖꓳ ꓓꓱꓽ ꓡꓱꓸꓼ ꓫꓬ ꓡꓰꓳ꓿ ꓖꓳ ꓟ ꓑꓶ. ꓓꓴ ꓬꓲ ꓠꓬ ꓢꓲ ꓒ ꓬꓰ‐ꓢꓴ ꓐꓰ ꓗꓴ. ꓙꓲꓽ ꓙꓳˍ ꓟ ꓕꓲꓽ ꓣꓳ ꓒꓬꓱꓼ ꓡꓺꓳ꓾ ꓐꓯ ꓟ ꓬꓲ. ꓬꓲ ꓢꓲ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ꓾ ꓬꓲ ꓠꓬ ꓪꓴ‐ꓢ ꓤ ꓔꓲ. ꓥ ꓡꓳ꓿ ꓣꓳ ꓦ ꓡꓱ ꓔꓬ ꓟ ꓪꓴ‐ꓢ ꓡꓰꓽ ꓥ ꓡꓳ꓿ ꓘꓴ ꓜꓲꓼ ꓞꓳ ꓬꓲ ꓪꓴ. ꓓꓵ꓾ ꓬꓲ ꓚꓰˍ ꓟꓲ ꓥ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓽ ꓪꓴꓽˍ ꓟ ꓟꓽ ꓚꓬ, ꓔ ꓔ ꓐꓰ꓾ ꓙꓽ ꓣꓳ ꓢꓲ ꓠꓬꓲ ꓬꓲ ꓝꓲ ꓓꓴ ꓐꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓡꓳ꓿
ꓕꓱ ꓟ ꓕꓲꓽ ꓡꓰ, ꓥꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓛꓲ ꓒꓯ, ꓞꓲꓽ ꓓꓳ ꓡꓰ ꓗ ꓠꓯ. ꓕꓱ ꓡꓱ ꓐꓯ ꓖꓶˍ ꓡꓳ꓿ ꓥꓪ ꓠꓴ ꓪ ꓔꓯ ꓛꓲ ꓒꓯ, ꓞꓲꓽ ꓖꓶˍ ꓟ ꓡꓰ ꓐꓰ ꓠꓱ. ꓐꓯ ꓔꓯ ꓖꓳ ꓡꓱ ꓬꓰ꓾ ꓐꓰ ꓕꓵꓼ ꓪ ꓖꓶ ꓔꓲ. ꓟ ꓥ ꓡꓳ꓿
ꓕꓱ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓛꓲ ꓒꓯ, ꓞꓲꓽ ꓝꓲˍ ꓟ ꓠꓽ꓾ ꓪꓴꓽ ꓢꓴ ꓟꓴ ꓢꓴ ꓪꓴ. ꓓꓵ ꓣꓱꓽ ꓢꓴ ꓠꓬ ꓣꓳ ꓠꓯꓸꓼ ꓗꓪ ꓣꓳꓺ ꓢꓴ ꓮ ꓙꓵꓽ꓾ ꓣꓳ ꓟꓬ ꓛꓲ ꓢꓯꓼ ꓪ ꓟꓽ ꓙꓳ ꓢꓴ ꓢꓯꓼ ꓪ ꓐꓽ ꓔꓬ ꓢꓴ꓾ ꓥ ꓠꓬ꓾ ꓢꓷ. ꓠꓲ, ꓟꓽ ꓙꓳ ꓢꓴ꓾ ꓥ ꓠꓬ ꓒꓴ ꓫꓵ ꓟꓽ ꓙꓳ ꓢꓴ꓾ ꓥ ꓠꓬ ꓣꓳ ꓠꓯꓸꓼ ꓗꓪ ꓞꓰ ꓓˍ ꓟ ꓞꓳ ꓤ ꓮ ꓙꓵꓽ ꓔꓯ ꓣꓳ ꓡꓰ ꓠꓵꓻ ꓠꓲ, ꓗꓪ ꓐꓰ꓾ ꓙ ꓣꓳꓽˍ ꓟ ꓠꓲ, ꓟ ꓡꓰ ꓬꓯꓼ ꓙꓰ ꓢꓲ ꓠꓬꓲ ꓬꓲ ꓪ ꓔꓯ ꓣꓳꓽ ꓫꓬ, ꓔꓱ, ꓖꓶ ꓠ, ꓟ꓾ ꓠꓵꓻ ꓠꓲ, ꓗꓪ ꓐꓰ ꓬꓰ ꓙ ꓖꓶ ꓠ, ꓟ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓡꓴ ꓫꓵꓽ ꓙꓲꓻ ꓫꓬ, ꓟ ꓘꓴ ꓜꓲꓼ ꓞꓳ ꓪꓴ. ꓓꓵ ꓣꓱꓽ ꓢꓴ ꓐꓴ ꓪꓴ‐ꓢ ꓤ ꓠꓱ ꓐꓴ ꓒꓬꓱꓼ ꓡ ꓝꓲ ꓠꓲ, ꓫꓵˍ ꓟ ꓑꓶ. ꓓꓴ ꓬꓲ ꓝꓲ ꓓꓴ ꓐꓴ ꓔꓯ ꓡꓳ, ꓬꓰˍ ꓟ ꓟꓶꓽ ꓘꓶ ꓜ ꓜꓽ ꓑꓮꓲꓽ ꓗꓪ ꓕꓱ ꓡꓱ ꓟ. ꓖꓶ ꓗꓷ ꓟ ꓥ ꓡꓳ꓿ ꓣꓳ ꓮ ꓙꓵꓽ ꓥˍ ꓟꓲ ꓙ ꓣꓳꓽˍ ꓟ ꓠꓲ, ꓟ ꓡꓰ ꓠꓵꓻ ꓠꓲ, ꓗꓪ ꓐꓰ ꓣꓳꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓛꓲ ꓒꓯ, ꓞꓲꓽ ꓖꓶ ꓡꓯ ꓘꓳˍ ꓟ꓾ ꓥ ꓠꓬ ꓠꓵꓻ ꓠꓲ, ꓗꓪ ꓐꓰ ꓣꓱꓽ ꓙ ꓬꓰ ꓙ꓾ ꓙ ꓣꓳꓽˍ ꓟ ꓠꓲ, ꓟ ꓡꓰ ꓖꓽ ꓖꓶ ꓡꓯ ꓘꓳˍ ꓟ꓾ ꓫꓱ. ꓤ ꓡꓯ ꓘꓳ ꓗꓴ.ˍ ꓟ ꓔꓯ ꓣꓱꓽ ꓬꓰ ꓓꓴ ꓥꓳ꓾ ꓐꓰ ꓠꓬꓲ. ꓠꓬꓲ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓦ ꓢꓯꓼ ꓪ ꓣꓴ ꓓꓴ ꓥꓳ꓿
