ꓢꓲꓽ ꓫꓬˍ ꓟ ꓕꓲꓽ ꓠꓽ ꓧꓳꓡꓬ ꓪꓰꓰꓗ ꓠꓽ ꓠꓬꓲꓽ ꓠꓬꓲ꓾ ꓠꓬꓲ. ꓠꓬꓲ ꓗꓪ ꓵ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓠꓬ YO-V = 13:21-33, 36-38 ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓡꓳ, ꓬꓰˍ ꓟ ꓟꓶꓽ ꓘꓶ ꓜꓻ ꓜꓽ ꓔꓬ ꓕꓯ꓾ ꓬꓰ‐ꓢꓴ ꓠꓬ ꓬꓲ ꓔꓯ ꓪꓴꓽ ꓜꓽ ꓢꓴ ꓠꓬ ꓬꓴ‐ꓓ ꓥ ꓟ ꓐꓰ꓾ ꓒꓲ‐ꓕꓱ ꓬꓰ‐ꓢꓴ ꓔꓯ ꓟꓽ ꓢꓷ. ꓐꓰ 3 ꓧꓪ, ꓣꓷꓠ. ꓥꓳ꓾ ꓐꓰ ꓐꓯˍ ꓟ ꓔꓯ ꓣꓳ ꓑ ꓙꓽ ꓪˍ ꓡꓳ꓿ ꓐꓯ ꓘꓶꓽ ꓕꓱ ꓟ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓬꓰ‐ꓢꓴ ꓡꓰ ꓛꓲ ꓒꓯ, ꓞꓲꓽ ꓖꓶ ꓗꓷ ꓗ ꓠꓯ. ꓐꓯˍ ꓟ ꓐꓯ ꓘꓶꓽ ꓥ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓛꓲ ꓒꓯ, ꓔꓯ ꓞꓲꓽ ꓖꓶˍ ꓟ ꓠꓬ꓾ ꓬꓲ ꓪ ꓐꓱ ꓶ ꓐꓰ ꓞꓳ ꓤ ꓮ ꓙꓵꓽ ꓐꓱ ꓶ꓾ ꓬꓲ ꓢꓯꓼ ꓟꓬ ꓖꓶ ꓗꓷˍ ꓟ ꓠꓬ ꓠꓵꓻ ꓠꓲ, ꓐˍ ꓟ ꓠꓵꓻ ꓠꓲ, ꓚꓬꓼˍ ꓟ ꓢꓲ ꓒ ꓬꓲ ꓠꓵꓻ ꓠꓲ, ꓟꓬꓱꓽ ꓬꓲ ꓢꓷ. ꓡꓰ ꓓꓴ ꓕꓲ ꓟ ꓥ ꓡꓳ꓿
ꓬꓰ‐ꓢꓴ ꓠꓬ ꓬꓲ ꓔꓯ ꓟꓽ ꓢꓷ. ꓐꓰ ꓣꓷꓠ.ˍ ꓟ ꓝꓲ ꓓꓴ ꓒꓲ‐ꓕꓱ ꓬꓲ ꓛꓲ ꓒꓯ, ꓐꓰ꓾ ꓬꓲ ꓔꓯ ꓪꓴꓽ ꓜꓽ ꓢꓴ ꓥ ꓟ ꓘ‐ꓡꓲꓳ ꓢꓴ ꓬꓴ‐ꓓ ꓛꓲꓽ ꓒꓯ, ꓐꓰ ꓕꓲ ꓪˍ ꓬꓲ ꓝꓲ ꓓꓴ ꓮ ꓙꓵꓽ ꓛꓲ ꓒꓯ, ꓔꓯ ꓞꓲꓽ ꓖꓶ ꓗꓷꓳ꓿ ꓕꓱ ꓟˍ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓔꓯ ꓫꓵꓻˍ ꓟ ꓙ ꓖꓴ ꓗꓪ ꓧꓳꓽ ꓙꓰ ꓢꓴ ꓐꓰ꓾ ꓮ ꓙꓵꓽ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓔꓲ ꓖꓶ ꓗꓷꓳ꓿
ꓒꓳ‐ꓡꓳ ꓡꓰ ꓣꓳ‐ꓟ ꓡꓳ ꓒꓱ ꓢꓴ ꓐꓴ ꓔꓯ ꓐꓳ ꓔ ꓟ ꓣꓳ‐ꓟ ꓕꓳꓽ ꓶ ꓗꓪ꓾ ꓣꓳ ꓝꓴꓲ. ꓐꓱ ꓶ ꓫꓵꓻ ꓙ ꓗꓷ ꓟ ꓢꓲ ꓒ ꓬꓲ ꓠꓵꓻ ꓠꓲ, ꓔꓯ ꓕꓱ ꓡꓱ ꓖꓴ ꓟ. ꓖꓶ ꓔ ꓡꓳ꓿ “ꓣꓳ ꓐꓴ ꓠꓬ ꓝꓴꓲ. ꓙꓳ ꓢꓴ ꓥ ꓢꓰꓽ ꓕꓯ ꓡꓰ ꓙꓲ‐ꓢꓴ ꓣꓳ ꓐꓱ ꓶ ꓫꓵꓻ ꓙ ꓗꓷ ꓟ ꓗꓪ ꓐꓰ ꓾ ꓪꓴ‐ꓢ ꓣꓳ ꓔꓯ ꓠꓲ, ꓠꓵˍ ꓟ ꓟꓳ. ꓖꓶ ꓓꓳ ꓡˍ ꓡꓳ꓾” ꓐꓰ (ꓣꓳ‐ꓟ 5ꓽ8) ꓗꓪ ꓐꓳ ꓔ ꓡꓳ꓿ ꓬꓰ‐ꓢꓴ ꓙꓲ‐ꓢꓴ ꓠꓬ ꓣꓳ ꓟꓽ ꓐ ꓡ ꓟ꓾ ꓟꓽ ꓧꓪ. ꓟ ꓔꓯ ꓬꓲ ꓠꓲ, ꓠꓵˍ ꓡꓳ꓿ ꓣꓳ ꓝꓴꓲ. ꓙꓳˍ ꓟ ꓗꓪˍ ꓟꓲ ꓬꓲ ꓣꓳ ꓔꓯ ꓠꓲ, ꓠꓵˍ ꓡꓳ꓿ ꓕꓱ ꓟ ꓠꓬ ꓢꓲꓽ ꓫꓬˍ ꓟ ꓕꓱ ꓕꓲ ꓠꓽ ꓧꓳꓡꓬ ꓪꓰꓰꓗ ꓐꓱ ꓶ ꓢꓲ ꓒ ꓬꓲ ꓐꓯ ꓘꓶꓽ ꓥ ꓡꓳ꓿ ꓕꓱ ꓕꓲ ꓠꓽ ꓡꓱꓸꓼ ꓗꓪ ꓢꓲ ꓒ ꓠꓬ ꓟꓲ ꓠꓯ ꓞꓳ ꓤ ꓔꓯ ꓠꓲ, ꓠꓵˍ ꓟ ꓑꓶ. ꓓꓴ ꓬꓲ ꓢꓯꓼ ꓟꓬ ꓖꓶ ꓗꓷˍ ꓟ ꓚꓱ, ꓔꓯ ꓣꓳ ꓑ ꓙꓽ ꓪˍ ꓥꓳ꓿
ꓬꓲ ꓠꓵꓻ ꓠꓲ, ꓠꓬ ꓙꓲˍ ꓟ ꓬꓲ ꓫꓱ, ꓐꓱ ꓶ꓾ ꓙꓲˍ ꓟ ꓟꓬꓱꓽ ꓐꓱ ꓶˍ ꓡꓰꓽ ꓡꓯꓼ ꓫꓴ ꓕꓲꓽ ꓟ ꓟꓽ ꓥ꓿ ꓢꓲ ꓒ ꓪꓴ‐ꓢ ꓠꓬ ꓣꓳ ꓮ ꓫꓵꓽˍ ꓟꓲ ꓟꓽ ꓬꓰ ꓢꓰꓽ ꓕꓯ ꓡꓰ ꓣꓳ ꓔꓯ ꓬꓲ ꓠꓵꓻ ꓠꓲ, ꓖꓶ ꓔ ꓟ ꓥ ꓢꓲ ꓠꓬꓲ꓾ ꓣꓳ ꓠꓬ ꓮ ꓟꓬ, ꓚꓱ, ꓗꓪ ꓐꓰ ꓪꓴ‐ꓢ ꓔꓯ ꓟꓽ ꓣꓷꓠ. ꓕꓯ ꓥˍ ꓟꓲ꓾ ꓣꓳ ꓠꓬ ꓢꓲ ꓒ ꓔꓯ ꓪꓴꓽ ꓜꓽ ꓢꓴ ꓬꓴ‐ꓓ ꓡꓰ ꓐꓰ ꓬꓰ‐ꓢꓴ ꓔꓯ ꓠꓲ, ꓟ ꓫ. ꓡꓰ ꓢꓴ ꓬꓰ ꓗꓷˍ ꓕꓯ ꓥ ꓟꓲ ꓬꓲ ꓠꓬ ꓣꓳ ꓔꓯ ꓮ ꓕꓯ ꓟꓲ ꓠꓲ, ꓠꓵ ꓔꓬ ꓡꓳ꓿ ꓢꓲ ꓒ ꓬꓲ ꓪꓴꓽ ꓓꓰˍ ꓟ ꓠꓵꓻ ꓠꓲ, ꓠꓬ ꓣꓳ ꓔꓯ ꓢꓲ ꓒ ꓔꓬ ꓗꓪ ꓚꓱ, ꓬꓲꓼ ꓙꓰ ꓠ, ꓟ ꓢꓯꓼ ꓖꓶ ꓔꓬ ꓟ ꓥ ꓢꓲ ꓠꓬꓲ꓾ ꓣꓳ ꓠꓬ ꓢꓲ ꓒ ꓔꓯ ꓖꓼ ꓛꓳ ꓔꓬ ꓟ ꓔꓯ ꓝ. ꓢꓲ ꓣꓱꓽ ꓬꓰ ꓠ, ꓟ ꓣꓳ ꓔꓯ ꓢꓯꓼ ꓖꓶ ꓡꓵ, ꓔꓴ ꓖꓶ ꓡ ꓔꓬ ꓟ ꓥ ꓡꓳ꓿
