ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓕꓱ ꓕꓲ ꓠꓽ ꓠꓬ ꓑꓮꓡꓟ ꓢꓴꓠꓓꓮꓬ ꓐꓰ ꓐꓯˍ ꓟ ꓢꓲ, ꓒꓬꓽ ꓑꓶ ꓖꓶˍ ꓟ ꓑꓮꓲꓽ꓾ ꓢꓲ, ꓪꓰ ꓐꓱ ꓖꓶˍ ꓟ ꓑꓮꓲꓽ ꓠꓽ ꓦꓬꓼ ꓠꓬꓲ ꓥ ꓡꓳ꓿ ꓡꓳꓽ ꓟꓲꓽ ꓥꓳꓽ ꓗꓪ ꓐꓰ ꓐꓯˍ ꓠꓬ မေတ္တာပန်းတနင်္ဂနွေနေ့ ꓐꓰ ꓐꓯˍ ꓟ ꓠꓬꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫ. ꓙꓵ ꓜꓲꓽ ꓢꓲ ꓫꓵꓻ ꓘꓽ ꓠ, ꓟ ꓐꓱ ꓶ ꓙꓱ‐ꓣꓴ‐ꓢ‐ꓡꓱ ꓡꓳ ꓒꓱ ꓗꓪ ꓠꓲ, ꓒꓵꓽ ꓠꓲ, ꓡꓱꓻ ꓙꓰ ꓢꓲ ꓠꓬꓲ꓾ ꓒ‐ꓡꓲ‐ꓢꓷ ꓐꓴ꓾ ꓟ. ꓟꓲꓽ ꓚ ꓟ. ꓒ ꓐꓴ꓾ ꓔꓲ ꓒ ꓐꓴ ꓡꓯꓽ ꓒꓯ, ꓗꓪ ꓫ. ꓙꓵ ꓜꓲꓽ ꓢꓲ ꓫꓵꓻˍ ꓟ ꓬꓲ ꓚꓲ. ꓟꓶ ꓓꓴ ꓐꓯ ꓢꓲ ꓣꓳ ꓬꓰ ꓔꓬ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓠꓲ, ꓡꓶꓽ ꓙꓳ ꓙꓳˍ ꓡꓰꓽ꓾ ꓠꓲ, ꓘꓪꓽ ꓫꓵ ꓫꓵˍ ꓡꓰꓽ ꓫ. ꓙꓵ ꓟꓶ ꓙꓵ ꓓꓴ ꓔꓯ ꓘꓳ ꓣꓴˍ ꓡꓳ꓿
ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓫ. ꓙꓵ ꓜꓲꓽˍ ꓟ ꓣꓳ ꓑ ꓙꓽ ꓪˍ ꓥꓳ꓿ ꓬꓲ ꓔꓯ ꓓꓶꓽ ꓢꓴ ꓔꓲ. ꓢꓴ ꓟꓶꓽ ꓶ ꓔꓲ. ꓧꓳꓽ ꓢꓴ꓾ ꓪꓽ ꓫꓱ, ꓢꓴ꓾ ꓬꓲ ꓔꓯ ꓛꓲ ꓒꓯ, ꓡꓰ ꓑꓰ, ꓢꓴ꓾ ꓕꓱ ꓡꓱ ꓫꓵꓽ ꓮ ꓙꓵꓽ ꓔꓯ ꓬꓲ ꓜꓲꓽ ꓗꓳ. ꓙꓰˍ ꓡꓳ꓿ ꓡꓳ, ꓬꓰˍ ꓕꓯ ꓬꓲ ꓠꓬ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ “ꓥꓪ ꓪꓴ‐ꓢꓺꓳ꓾ ꓥꓪ ꓪꓴ‐ꓢꓺꓳ꓾ ꓮ ꓫꓵꓽ ꓪꓴ. ꓠꓬꓲ ꓥꓪ ꓔꓯ ꓡꓳ ꓒꓰ, ꓡ” ꓐꓯˍ ꓟ ꓐꓯ ꓘꓶꓽ ꓪꓽ ꓘꓴ ꓘꓶꓽ ꓡꓰ ꓬꓲ ꓢꓯꓼ ꓟꓬ ꓖꓶ ꓗꓷˍ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓠꓲ, ꓫ. ꓟꓬ ꓫ.ˍ ꓟ꓾ ꓫꓵꓽ ꓚꓵ. ꓓꓳˍ ꓟ꓾ ꓫ. ꓙꓵ ꓜꓲꓽˍ ꓟ ꓔꓯ ꓣꓳꓽ ꓡꓳ. ꓠꓬꓲˍ ꓕꓯ ꓮ ꓡꓲ ꓥ ꓟꓲ ꓣꓳ ꓠꓬ ꓓꓵꓽ ꓙꓽ ꓟꓽ ꓑꓶ.꓿ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓠꓲ, ꓫ. ꓟꓬ ꓫ.ˍ ꓟ ꓔꓯ ꓡꓳ. ꓠꓬꓲ ꓡꓯ꓿ ꓣꓳ‐ꓟ ꓟꓯꓼ ꓜꓴ ꓐꓴ ꓬꓲ ꓔꓯ ꓓꓶꓽˍ ꓟ ꓔꓲ.ˍꓟ꓾ ꓛꓲ ꓒꓯ, ꓡꓰ ꓑꓰ, ꓢꓴ ꓑꓰ,꓾ ꓡꓯꓼ ꓛ ꓫꓱ, ꓢꓴ ꓫꓱ,꓾ ꓓꓶꓽ ꓢꓴ ꓓꓶꓽ꓾ ꓔꓲ. ꓢꓴ ꓔꓲ.꓾ ꓟꓶꓽ ꓶ, ꓔꓲ. ꓧꓳꓽ ꓢꓴ ꓔꓲ. ꓧꓳꓽ꓾ ꓕꓱ ꓡꓱ ꓪꓽ ꓫꓱ ꓠꓬꓲ ꓓꓶꓽ ꓠꓬꓲ ꓔꓲ. ꓠꓬꓲ ꓬꓰ ꓔꓬ ꓟ ꓔꓯ ꓣꓳꓽ ꓟꓳꓻ ꓠꓬꓲ꓿ ꓟꓬ ꓢꓶꓽ ꓡꓰ ꓟꓳꓻ ꓠꓬꓲ꓿ ꓮ ꓡꓲ ꓘꓶ ꓛꓲ ꓫ. ꓙꓵ ꓜꓲꓽ ꓓꓴ ꓥ ꓡ꓿
ꓟꓴꓽ ꓗꓪ ꓐꓰ ꓟꓲ ꓠꓯ ꓚꓰꓼ ꓢꓴ ꓢꓲ ꓒ ꓠꓬ ꓞꓳ ꓤ ꓡꓰ ꓔꓲ.ˍ ꓟ ꓔꓯ ꓕꓱ ꓡꓱ ꓙ ꓣꓳꓽˍ ꓟ꓾ ꓘꓳ ꓣꓴˍ ꓟ ꓠꓬ ꓚꓵ ꓚꓵ ꓓꓵꓽ ꓙꓽ ꓟꓶ ꓓꓴ ꓥ ꓡꓳ꓾ ꓠꓵꓻ ꓠꓲ, ꓓꓽ ꓟ ꓥ ꓡꓳ꓾ ꓐꓯ ꓟ ꓔꓯ ꓣꓳ ꓡꓳ. ꓟꓳˍ ꓡꓳ꓿ ꓬꓲ ꓧꓪꓽ ꓖꓳ ꓓꓱꓽ ꓕꓲ ꓛꓱꓽ ꓗꓪ ꓠꓲ, ꓫ. ꓟꓬ ꓫ.ˍ ꓟ꓾ ꓫꓵꓽ ꓚꓵ. ꓓꓳˍ ꓟ꓾ ꓓꓶꓽˍ ꓟ ꓔꓲ.ˍ ꓟ ꓘꓳ ꓣꓴˍ ꓟ ꓡꓰꓽ ꓟꓽ ꓞꓲ ꓬꓲ ꓦꓻ ꓕꓲ ꓒꓳ, ꓗꓪ ꓥ ꓟꓲ ꓚꓵ ꓚꓵ ꓠꓲ, ꓟ ꓫ. ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓮ ꓘꓶ. ꓠꓲ, ꓠꓵˍ ꓟ꓾ ꓬꓲ ꓐꓰ ꓕꓲ ꓛꓳˍ ꓞꓳ ꓙꓳ ꓗꓳ. ꓙꓰ ꓟ ꓘ‐ꓡꓲꓳ ꓬꓴ‐ꓓ ꓡꓰ ꓬꓲ ꓔꓯ ꓪꓴꓽ ꓜꓽˍ ꓟ ꓔꓯ ꓬꓲ ꓟꓶˍ ꓡꓳ꓿ ꓣꓳ ꓠꓲ, ꓠꓵ ꓢꓴ ꓕꓲ ꓣꓳ ꓗꓪ ꓐꓰ ꓣꓳ ꓟꓶˍ ꓟ ꓪꓽ ꓒꓵꓽ꓾ ꓣꓳ ꓙꓵꓻ ꓔ ꓟ ꓕꓲ ꓣꓳ ꓗꓪ ꓐꓰ ꓣꓳ ꓖꓶ ꓡˍ ꓟ ꓛꓴꓽ꓾ ꓣꓳ ꓠꓲ, ꓟ ꓬꓲ ꓔꓯ ꓙꓵꓻ ꓓ, ꓕꓲ ꓣꓳ ꓟ ꓡꓰ ꓣꓳ ꓔꓯ ꓑꓰ, ꓡˍ ꓟ꓾ ꓣꓳ ꓔꓯ ꓗ. ꓧꓪ ꓡˍ ꓟ꓾ ꓣꓳ ꓔꓯ ꓪꓴꓽ ꓜꓽˍ ꓟ꓾ ꓕꓰ ꓡꓰ ꓫꓵꓽ ꓶꓻ ꓕꓲ ꓟ ꓔꓯ ꓣꓳ ꓮ ꓡꓲ ꓘꓽ ꓗꓳ. ꓙꓰ ꓐ ꓡˍ ꓡ꓿
ꓕꓱ ꓟ ꓡꓰꓽ ꓟꓽ ꓞꓲ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓮ ꓘꓶ. ꓦ ꓡꓱ ꓐꓳˍ ꓟ꓾ ꓪꓽ ꓘꓪꓽˍ ꓟ ꓒꓲ‐ꓕꓱ ꓥˍ ꓟꓲ ꓬꓲ ꓔꓯ ꓟꓽ ꓢꓷ. ꓐꓰ ꓣꓷꓠ.ˍ ꓡꓳ꓿ ꓕꓱ ꓟˍ ꓟꓲ ꓣꓳ ꓢꓷ. ꓗꓳ. ꓡꓺꓳ꓿ ꓖꓳ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓧꓪꓽ ꓖꓳ ꓓꓱꓽ ꓕꓲ ꓒꓳ, ꓗꓪ ꓠꓲ, ꓫ. ꓟꓬ ꓫ. ꓟ ꓡꓰꓽ ꓟꓽ ꓞꓲ꓾ ꓠꓲ, ꓟ ꓠꓲ, ꓫ.ˍ ꓟ ꓓꓶꓽˍ ꓟ ꓔꓲ.ˍ ꓟ ꓮ ꓙꓵꓽ ꓬꓲ ꓘꓳ ꓗꓳ. ꓙꓰˍ ꓡꓳ꓿ ꓣꓳ ꓐꓱ ꓶ ꓬꓲ ꓫ. ꓙꓵ ꓗꓳ. ꓙꓰˍ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓔꓬ ꓕꓯ ꓬꓲ ꓠꓬ “ꓥꓪ ꓪꓴ‐ꓢꓺꓳ꓾ ꓥꓪ ꓪꓴ‐ꓢꓺꓳ꓾ ꓮ ꓫꓵꓽ ꓪꓴ. ꓠꓬꓲ ꓥꓪ ꓔꓯ ꓡꓳ ꓒꓰ, ꓡ” ꓐꓰ ꓘꓴꓻ ꓔꓴ ꓡˍ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓠꓬ ꓚꓵ ꓚꓵ ꓠꓲ, ꓟ ꓫ.ˍ ꓡꓳ꓿ ꓮꓽ ꓟ ꓥˍ ꓟꓲ ꓬꓲ ꓔꓯ ꓡꓳ ꓒꓰ, ꓗꓷꓳ꓿ ꓮꓽ ꓟ ꓥˍ ꓟꓲ ꓬꓲ ꓔꓯ ꓟꓽ ꓠꓲ, ꓠꓵꓳ꓿ ꓮꓽ ꓟ ꓥˍ ꓟꓲ ꓬꓲ ꓔꓯ ꓟꓷꓽ ꓶ, ꓔꓲ. ꓧꓳꓽ ꓡˍ ꓡꓳ꓿ ꓮ ꓟ ꓥˍ ꓟꓲ ꓬꓲ ꓔꓯ ꓛꓲ ꓒꓯ, ꓡꓰ ꓑꓰ, ꓡˍ ꓡꓳ꓿ ꓪꓴ‐ꓢ ꓥˍ ꓟꓲ ꓬꓲ ꓔꓯ ꓡꓳ ꓒꓰ, ꓔˍ ꓡꓳ꓾ ꓐꓰ ꓬꓲ ꓠꓲ, ꓟ ꓠꓯꓸꓼ ꓗꓪ ꓘꓳ ꓣꓴ ꓟꓶˍ ꓡꓳ꓿
ꓢꓲ ꓒ ꓬꓰ‐ꓢꓴ ꓬꓲ ꓟꓲ ꓠꓯ ꓕꓱ ꓟ ꓗꓪ ꓟ. ꓟꓲꓽ ꓚ ꓟ. ꓖꓶ ꓔꓬ ꓕꓯ ꓐ, ꓐ ꓪꓴ‐ꓢ ꓔꓯ ꓪꓴ‐ꓢ ꓐꓰ ꓟꓽ ꓐꓯ꓿ ꓥꓪ ꓐ, ꓐꓽ꓾ ꓥꓪ ꓐ, ꓐ꓾ ꓡꓰꓽ ꓐꓯˍ ꓡꓳ꓿ ꓥꓪ ꓐ, ꓐ ꓠꓬ ꓥꓪ ꓐꓰ ꓔꓬ ꓡꓳ꓿ ꓥꓪ ꓐ, ꓐ ꓠꓲ, ꓡꓶꓽ ꓥꓪ ꓛꓳˍ ꓡꓳ꓾ ꓐꓰ ꓐꓯ ꓢꓲ ꓮꓽ ꓐ ꓐꓰ ꓤ ꓕꓲ ꓣꓳˍ ꓡꓰ ꓐꓰ ꓐꓯ ꓢꓲ ꓬꓲ ꓞꓳ ꓙꓳˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓫ. ꓙꓵ ꓟꓶ ꓙꓵˍ ꓕꓯ “ꓥꓪ ꓪꓴ‐ꓢꓺꓳ꓾” ꓐꓯ ꓢꓲ ꓠꓬꓲ ꓘꓴ ꓓꓰꓽˍ ꓗꓪ ꓛꓲ ꓒꓬꓱꓼ ꓡˍ ꓡꓳ꓿ ꓕꓲ ꓚꓱ, ꓐꓯˍ ꓠꓬ ꓮꓽ ꓐ ꓐꓰ ꓤ꓾ ꓕꓱ ꓡꓱ ꓫꓵꓽ ꓠꓲ, ꓟ ꓟꓽ ꓥ ꓥ ꓐꓰ꓾ ꓮꓽ ꓐ ꓐꓰ ꓤ ꓐꓯˍ ꓟ ꓠꓵꓻ ꓠꓲ, ꓡꓰ ꓐꓲ ꓓ, ꓟ ꓟꓽ ꓥ ꓥ ꓐꓰ꓾ ꓪꓴ‐ꓢ ꓐꓰ ꓮ ꓔꓲ. ꓗꓶ, ꓶꓽ ꓢꓲ ꓠꓬꓲ ꓬꓲ ꓠꓲ, ꓟ ꓠꓯꓸꓼ ꓗꓪ ꓫ. ꓙꓵˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓢꓴ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓕꓲ ꓘꓴ ꓟꓽ ꓥ ꓕꓲ ꓘꓴ ꓗꓪ ꓔꓳ, ꓜꓳꓽˍ ꓥꓳ꓿ ꓣꓳ ꓧꓪꓽ ꓖꓳ ꓓꓱꓽ ꓠꓲ, ꓫ. ꓟꓬ ꓫ.ˍ ꓟ꓾ ꓢꓴ ꓡꓰ ꓓꓶꓽ ꓡ ꓔꓲ. ꓡˍ ꓟ ꓟꓽ ꓥˍ ꓟꓲ ꓠꓻˍ ꓟ ꓒꓬꓽˍ ꓟ ꓗꓪ ꓐꓰ ꓣꓳ ꓧꓪꓽ ꓖꓳ ꓓꓱꓽ ꓐꓬ ꓡꓰˍ ꓟ ꓠꓻ ꓡꓰˍ ꓟ꓾ ꓐꓱꓽ ꓙꓰ ꓡꓱ. ꓙꓰˍ ꓟ ꓗꓪ ꓐꓰ ꓣꓳꓽ ꓧꓪꓽ ꓖꓳ ꓓꓱꓽ ꓠꓻ ꓡꓰˍ ꓟ꓾ ꓕꓱ ꓡꓱ ꓫꓵꓽ ꓑꓶ. ꓓꓴ ꓣꓳ ꓧꓪꓽ ꓖꓳ ꓓꓱꓽ ꓠꓲ, ꓫˍ ꓡꓳ꓿ ꓕꓱ ꓟ ꓡꓰꓽ ꓟꓽ ꓞꓲꓺ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓣꓳꓽ ꓥ ꓟꓲ ꓣꓳ ꓙꓵˍ ꓕꓲ ꓣꓳ ꓟ ꓣꓳ ꓔꓯ ꓗꓶ. ꓜꓽ ꓡ꓾ ꓣꓳ ꓙꓵˍ ꓕꓲ ꓣꓳ ꓟ ꓣꓳ ꓔꓯ ꓟ. ꓜꓽ ꓡ꓾ ꓣꓳ ꓠꓲ, ꓠꓵˍ ꓕꓲ ꓣꓳ ꓟ ꓣꓳ ꓔꓯ ꓛꓴꓽˍ ꓡꓰꓽ ꓖꓶ ꓡˍ ꓟ꓾ ꓕꓱ ꓡꓱ ꓫꓵꓽ ꓢꓲ ꓒ ꓬꓰ‐ꓢꓴˍ ꓡꓰ ꓐꓰ ꓠꓲ, ꓟ ꓐꓶꓽ ꓗꓷˍ ꓟ ꓦꓬꓼ ꓠꓬꓲˍ ꓟꓲ ꓓꓳ ꓡ ꓗꓴ.ˍ ꓥꓳ꓿ “ꓥꓪ ꓪꓴ‐ꓢꓺꓳ꓾ ꓥꓪ ꓪꓴ‐ꓢꓺꓳ꓾ ꓮ ꓫꓵꓽ ꓪꓴ. ꓠꓬꓲ ꓥꓪ ꓔꓯ ꓡꓳ ꓒꓰ, ꓡ” ꓐꓰ ꓪꓽ ꓘꓴ ꓠꓲ, ꓫꓵ ꓡˍ ꓟ ꓦꓬꓼ ꓠꓬꓲˍ ꓟꓲ ꓔꓳ, ꓜꓳꓽ ꓡˍ ꓥꓳ꓿
ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓣꓳ ꓔꓯ ꓢꓳ ꓓꓴ ꓠꓬ꓾ ꓬꓲ ꓠꓬ ꓕꓱ ꓟ ꓮ ꓙꓵꓽ ꓔꓯ ꓪꓽ ꓘꓴ ꓢꓲ ꓠꓬꓲ ꓜꓲꓽ ꓗꓳ. ꓙꓰˍ ꓡꓳ꓿ ꓠꓲ, ꓫ. ꓟꓬ ꓫˍ ꓟ ꓤ, ꓠꓬꓲ ꓫꓵꓽ ꓠꓬꓲ ꓓꓴ꓾ ꓟꓬ ꓐꓲ ꓞꓰꓻ ꓓꓴ ꓕꓱ ꓟ ꓠꓬ ꓪꓴ‐ꓢ ꓠꓴ ꓔꓯ ꓟꓽ ꓠꓲ, ꓠꓵ ꓟ ꓑꓶ. ꓓꓴ ꓟꓽ ꓥ ꓥ꓾ ꓠꓲ, ꓫꓵˍ ꓟ ꓑꓶ. ꓓꓴ ꓖꓶ ꓡˍ ꓡꓳ ꓐꓯ ꓟ ꓔꓯ ꓢꓲ ꓒ ꓬꓰ‐ꓢꓴ ꓢꓷ. ꓢꓲ ꓠꓬꓲ ꓘꓳ ꓣꓴ ꓗꓷꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓗꓪ ꓔꓳ, ꓜꓳꓽˍ ꓟ ꓠꓲ, ꓫ. ꓟꓬ ꓫ. ꓓꓴ꓾ ꓟꓳꓻ ꓓˍ ꓟ ꓢꓷ. ꓡꓰ ꓓꓴ ꓕꓱ ꓟ ꓠꓬ ꓪꓴ‐ꓢ ꓥꓪ ꓔꓯ ꓟꓽ ꓠꓲ, ꓠꓵꓳ꓾ ꓪꓴ‐ꓢ ꓥꓪ ꓔꓯ ꓡꓳ ꓒꓰ, ꓗꓷꓳ꓾ ꓪꓴ‐ꓢ ꓥꓪ ꓔꓯ ꓟꓲ ꓡꓰ, ꓗꓷꓳ꓾ ꓐꓰ ꓓꓵꓽ ꓙˍ ꓟ ꓟꓽ ꓥ ꓥ ꓐꓰ꓾ ꓥꓪ ꓫ. ꓙꓵ ꓟꓶ ꓙꓵ ꓓꓴ ꓕꓱ ꓟ ꓔꓯ ꓘꓳ ꓣꓴˍ ꓟ ꓗꓪ ꓐꓰ ꓥꓪ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ ꓔꓯ ꓥꓪ ꓘꓳ ꓣꓴ ꓔꓬ ꓡꓳ꓿ ꓥꓪ ꓦ ꓐꓱ ꓶ ꓥꓪ ꓦꓲꓻ ꓘꓴꓽ ꓢꓴ ꓐꓱ ꓶ ꓥꓪ ꓜꓲꓽˍ ꓥꓳ꓿ ꓪꓴ‐ꓢ ꓐꓱ ꓶ ꓥꓪ ꓜꓲꓽˍ ꓥꓳ꓿ ꓠꓵꓻ ꓠꓲ, ꓗꓪ ꓐꓰ ꓥꓪ ꓛꓳ ꓫꓱꓽˍ ꓥꓳ꓾ ꓐꓯ ꓢꓲ ꓠꓬꓲ ꓛꓳ ꓫꓱꓽ ꓠ, ꓟ ꓠꓬ ꓠꓬꓲ. ꓠꓬꓲ ꓑꓮꓡꓟ ꓢꓴꓠꓓꓮꓬ ꓐꓰ ꓐꓯˍ ꓟ ꓢꓲ ꓒ ꓬꓰ‐ꓢꓴ ꓬꓲ. ꓙ ꓣꓳꓽ ꓠꓲ, ꓡꓰ ꓠꓲ, ꓘꓪꓽ ꓫꓵ ꓫꓵ ꓡꓰꓽ ꓫ. ꓙꓵ ꓟꓶ ꓙꓵˍ ꓟ ꓔꓯ ꓘꓳ ꓣꓴˍ ꓟ ꓑꓮꓲꓽ ꓗꓪ꓾ ꓣꓳ ꓥ ꓟꓲ ꓕꓱ ꓟ ꓔꓯ ꓙꓽ ꓜꓲꓼ ꓠ ꓗ, ꓡꓳ꓿꓿
ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳˍ ꓟ ꓦꓬꓼ ꓠꓬꓲ ꓗꓪ ꓚꓲ. ꓛꓬ ꓡꓯꓼ ꓐꓳ ꓔꓶ. ꓓꓴ꓾ ꓚꓲ. ꓛꓬ ꓘꓳ ꓣꓴ ꓠ ꓔ ꓟ ꓕꓱ ꓟ ꓔꓯ ꓜꓳꓽ ꓜꓳꓽ ꓘꓳ ꓣꓴ ꓐ ꓡ ꓢꓲ ꓠꓬꓲ꓾ ꓢꓲ ꓒ ꓬꓰ‐ꓢꓴ ꓗ ꓠꓯ. ꓒ ꓕꓲ ꓐꓰ ꓖꓼ ꓛꓳ ꓐ ꓡ ꓢꓴ ꓒꓬꓱꓼ ꓡꓰ ꓠ, ꓟ ꓐꓱ ꓶ ꓢꓯꓼ ꓕꓵꓼ ꓙꓰ ꓡꓯ꓿
