ꓪꓴ-ꓢ ꓠꓬ ꓬꓲ ꓟꓬꓱꓺ꓾ ꓬꓲ ꓚꓱꓹ ꓞꓳ ꓤ ꓔꓯ ꓐꓯ ꓟꓳꓸ ꓖꓶ ꓡ ꓟ ꓟꓸ ꓟꓲꓽ ꓣꓳ ꓠ ꓠꓹ ꓓꓳ ꓡꓰ ꓟ ꓥꓳ= ꓣꓳ ꓚꓱꓹ ꓠꓱꓸ ꓐꓯꓼ ꓢꓴ ꓔꓯ ꓐꓯ ꓟꓳꓸ ꓖꓶ ꓕꓯ ꓣꓳ ꓔꓯ ꓠꓲꓹ ꓠꓵ ꓡꓳ꓾ ꓣꓳ ꓔꓯ ꓣꓱꓽ ꓞ ꓐ ꓡ ꓡꓳ꓾ ꓐꓯ_ ꓟ ꓬꓲ ꓬꓲꓼ ꓢꓲ ꓐꓰ ꓕꓲ ꓡꓲꓹ ꓥꓳ= ꓕꓱ ꓟ ꓡꓰ ꓐꓰ ꓪꓴ-ꓢ ꓥ ꓟꓲ ꓬꓲ ꓟꓬꓱ ꓔꓯ ꓬꓲ ꓚꓱꓹ ꓔꓯ ꓐꓯ ꓟꓳꓸ ꓖꓶ_ ꓟ ꓠꓬ ꓞꓳ ꓤ ꓐꓰ ꓬꓲ ꓗꓳꓸ ꓙꓰ ꓙꓳ ꓠꓹ ꓟ ꓥꓳ꓾ ꓐꓯ_ ꓟ ꓥꓳ=
ꓕꓱ ꓕꓲ ꓠꓽ ꓗꓪ ꓣꓳ ꓪꓴ-ꓢ ꓟꓸ ꓟꓲꓽ ꓟꓸ ꓖꓶ_ ꓟ ꓗꓪ ꓠꓬ ꓪꓴ-ꓢ ꓬꓲ ꓟꓬꓱꓺ ꓐꓯ ꓟꓳꓸ ꓖꓶ ꓗꓸ ꓠꓯꓸ ꓬꓲ ꓠꓬ ꓮ ꓡꓰ ꓫꓵ ꓪꓴ-ꓢ ꓥ ꓐꓯ_ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓔꓬ ꓡꓳ꓾ꓪꓴ-ꓢ ꓠꓬ ꓔꓱꓹ ꓚꓵ_ ꓟ ꓪꓴ-ꓢ ꓥ ꓡꓳ꓾ ꓐꓯ_ ꓟ ꓬꓲ ꓐꓯ ꓟꓳꓸ ꓖꓶ_ ꓡꓳ= ꓔꓱꓹ ꓚꓵ_ ꓐꓯ_ ꓟ ꓠꓬ ꓠꓲꓹ ꓖꓳꓼ ꓟ ꓟꓽ ꓙꓳ ꓟ꓾ ꓬꓲ ꓠꓯꓼ ꓗꓪ ꓗꓶꓸ ꓞ ꓟ ꓟꓽ ꓙꓳ ꓟ꓾ ꓬꓲ ꓯꓼ ꓗꓪ ꓔꓱꓹ ꓜꓳ ꓟ ꓡꓰ ꓙꓳ_ ꓟ꓾ ꓥ ꓡꓳ= ꓣꓳ ꓟꓲ ꓠꓯ ꓕꓱ ꓟ ꓗꓪ ꓠꓬ ꓞꓳ ꓤ ꓠꓬ ꓢꓯꓼ ꓐ_ ꓟ ꓑꓶ ꓓꓴ ꓖꓳꓼ ꓠꓲꓹ ꓮ ꓘꓶꓸ ꓙꓳ_ ꓡꓳ= ꓕꓱ ꓗꓪ ꓟꓽ ꓖꓳꓼ ꓠꓬ ꓝꓮꓲ ꓕꓲ ꓘꓴꓸ ꓗꓪ ꓖꓳꓽ ꓡꓳ= ꓮ ꓙꓵ ꓡꓱꓼ ꓐꓲ ꓐꓲ ꓜꓲꓼ ꓜꓲꓼ ꓔꓱꓹ ꓚꓵ_ ꓫꓵ ꓟꓽ ꓙꓳ꓾ ꓕꓲ ꓞꓲꓼ ꓔꓱꓹ ꓚꓵ ꓢꓴ ꓠꓬ ꓪꓴ-ꓢ ꓕꓲ ꓣꓳ ꓡꓰ ꓥꓳ= ꓝꓮꓲ ꓬꓲ ꓚꓲ ꓛꓬ ꓔꓱꓹ ꓚꓵ_ ꓟ ꓙꓳ_ ꓟ ꓡꓰ ꓟꓽ ꓞꓲ ꓬꓲ ꓚꓲ ꓛꓬ ꓥ ꓟꓲ ꓔꓱꓹ ꓚꓵ_ ꓟ ꓥ ꓡꓳ= ꓬꓲ ꓠꓯꓼ ꓗꓪ ꓐꓰ ꓗꓶꓸ ꓥꓳꓽ ꓛꓬ ꓥꓳꓽ ꓕꓲ ꓘꓶ ꓡꓲ ꓟꓽ ꓓꓳ ꓡ꓾ ꓖꓳ ꓡꓱ ꓠꓬꓲ ꓬꓲ ꓐꓯ ꓧꓪꓸ ꓘꓶꓽ ꓕꓲ ꓘꓶ ꓡꓲ ꓕꓲ ꓘꓶꓽ ꓚꓵ ꓚꓵ ꓒꓬꓱꓼ ꓡ ꓢꓲ ꓠꓬꓲ ꓫ ꓓ ꓡꓳ ꓐꓯ_ ꓟ ꓣꓳ ꓔꓯ ꓪꓴ-ꓢ ꓡꓰ ꓐꓯ ꓟꓳꓸ ꓖꓶ ꓡ ꓡꓳ= ꓝꓮꓲ ꓔꓱꓹ ꓚꓵ_ ꓟ ꓪꓴ-ꓢ ꓠꓬ ꓣꓳ ꓔꓯ ꓠꓵ ꓠꓲꓹ ꓪꓴ-ꓢ ꓥ ꓟꓲ ꓥ ꓡꓳ= ꓣꓳ ꓝꓴꓲ ꓬꓰ ꓗꓷ ꓗꓸ ꓠꓯꓸ ꓬꓲ ꓠꓬ ꓖꓼ ꓖꓶ_ ꓟ꓾ ꓬꓲ-ꓢꓷ-ꓡꓲ ꓡ ꓞꓳ ꓐꓴ ꓝꓴꓲ ꓬꓰ ꓗꓷ ꓗꓸ ꓠꓯꓸ ꓓꓵꓽ ꓙ ꓒꓳꓹ ꓬꓲꓼ ꓡ ꓕꓯ ꓖꓼ ꓖꓶ_ ꓟ꓾ ꓣꓳ ꓡꓳꓸ ꓟꓳ_ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓠꓬ ꓠꓵꓻ ꓠꓲꓹ ꓓꓽ ꓟ ꓥ ꓡꓳ= ꓪꓴ-ꓢ ꓠꓬ ꓔꓱꓹ ꓚꓵ_ ꓟ ꓥ ꓡꓳ꓾ ꓬꓲ ꓠꓬ ꓙꓵꓻ ꓒꓵ_ ꓡꓳ=ꓬꓲ ꓔꓯ ꓙꓵꓻ ꓢꓲ ꓠꓬꓲ ꓛꓳ ꓙꓳ ꓡꓯ=
ꓖꓳ ꓡꓱ ꓠꓬꓲ ꓢꓔꓸ ꓠꓲꓚꓧꓳꓡꓮꓢ ꓪꓽ ꓘꓴ ꓘꓶꓽ ꓔꓯ ꓕꓲ ꓪ ꓪꓽ ꓘꓴ ꓓꓴ ꓬꓰ ꓡꓯ꓾
ꓥꓪ ꓪꓴ-ꓢꓻꓳ꓾ ꓥꓪ ꓪꓴ-ꓢꓻꓳ꓾ ꓥꓪ ꓔꓯ ꓠꓴ ꓐꓰ ꓗꓶꓹ ꓶꓽ ꓡꓰ ꓝꓲ_ ꓟ ꓮ ꓙꓵ ꓔꓯ ꓣꓴ ꓦ ꓖꓶ ꓡꓯ꓾ ꓥꓪ ꓔꓯ ꓠꓴ ꓐꓰ ꓠꓶꓽ ꓡꓰ ꓝꓲ_ ꓟ꓾ ꓕꓲꓻ ꓡꓰ ꓝꓲ_ ꓟ ꓮ ꓙꓵ ꓔꓯ ꓥꓪ ꓔꓬ ꓗꓪ ꓣꓴ ꓔꓯꓹ ꓖꓶ ꓡꓯ꓾ ꓥꓪ ꓪꓴ-ꓢꓻꓳ꓾ ꓥꓪ ꓪꓴ-ꓢꓻꓳ꓾ ꓥꓪ ꓔꓯ ꓥꓪ ꓚꓲ ꓛꓬ ꓐꓱ ꓶ ꓡꓰ ꓟꓽ ꓥ ꓥ ꓐꓰ ꓠꓴ ꓐꓱ ꓶ ꓡꓰ ꓢꓯꓸ ꓔꓬ ꓠꓹ ꓟ ꓢꓯꓼ ꓕꓵꓼ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓪ ꓖꓶ ꓡꓯ= ꓮꓟꓰꓠ=
