ꓬꓳ‐ꓦ 8ꓽ21‐30
ꓬꓰ‐ꓢꓴ ꓡꓰ ꓬꓲ ꓪ ꓔꓯ ꓝꓮꓲ ꓕꓲ ꓧꓪ,꓾ ꓥꓪ ꓠꓽ ꓙꓰˍ ꓥꓳ꓿ ꓠꓴ ꓪ ꓠꓬ ꓥꓪ ꓔꓯ ꓧꓪˍ ꓟꓲ꓾ ꓠꓴ ꓪ ꓠꓽ ꓠꓴ ꓪ ꓝꓴꓲ. ꓗꓪ ꓫꓵꓻˍ ꓥꓳ꓿ ꓥꓪ ꓙꓰˍ ꓟ ꓗꓪ ꓠꓴ ꓪ ꓙꓰ ꓟꓽ ꓐ ꓡ꓾ ꓐꓯˍ ꓡꓳ꓿ ꓖꓳ ꓕꓯ ꓬꓴ‐ꓔ ꓡ ꓞꓳ ꓡꓰ꓾ ꓥꓪ ꓙꓰˍ ꓟ ꓗꓪ ꓠꓴ ꓪ ꓙꓰ ꓟꓽ ꓐ ꓡ꓾ ꓐꓰ ꓬꓲ ꓐꓯˍ ꓟ ꓕꓯ ꓟ ꓠꓬ꓾ ꓬꓲ ꓚꓲ ꓛꓬ ꓔꓯ ꓢꓰꓼˍ ꓐꓰ ꓬꓰˍ ꓠꓬꓲ ꓐꓯˍ ꓟ ꓥ ꓡ? ꓐꓯˍ ꓡꓳ꓿
ꓖꓳ ꓡꓱ ꓠꓬ ꓬꓰ‐ꓢꓴ ꓡꓰ ꓬꓲ ꓪ ꓔꓯ꓾ ꓠꓴ ꓪ ꓠꓬ ꓠꓯ. ꓘꓪ ꓗꓪ ꓐꓰ ꓡ ꓟ ꓥ ꓢꓲ꓾ ꓥꓪ ꓠꓽ ꓕꓯꓽ ꓢꓲ ꓗꓪ ꓐꓰ ꓡˍ ꓟ ꓥ ꓡꓳ꓿ ꓠꓴ ꓪ ꓠꓬ ꓟꓲ ꓠꓯ ꓕꓱ ꓟ ꓗꓪ ꓟ ꓥ ꓡꓳ꓿ ꓥꓪ ꓠꓽ ꓟꓲ ꓠꓯ ꓕꓱ ꓟ ꓗꓪ ꓟ ꓟꓽ ꓥ꓿ ꓖꓳ ꓡꓱ ꓠꓬꓲ ꓥꓪ ꓡꓰ ꓠꓴ ꓪ ꓔꓯ꓾ ꓠꓴ ꓪ ꓝꓴꓲ. ꓗꓪ ꓠꓴ ꓪ ꓫꓵˍ ꓥꓳ꓾ ꓐꓯˍ ꓟ ꓥꓳ꓿ ꓮ ꓡꓲꓳ ꓐꓯ ꓠꓬ ꓥꓪ ꓠꓽ ꓙꓲ‐ꓢꓴ ꓖꓳ ꓕꓲ ꓣꓳ ꓥ ꓟ ꓠꓴ ꓪ ꓟꓽ ꓙꓵꓻ ꓠꓬ꓾ ꓠꓴ ꓪ ꓝꓴꓲ ꓗꓪ ꓠꓴ ꓪ ꓫꓵˍ ꓥꓳ꓾ ꓐꓯ ꓖꓶˍ ꓡꓳ꓿
ꓖꓳ ꓕꓯ ꓬꓲ ꓪ ꓡꓰ ꓬꓲ ꓔꓯ꓾ ꓠꓴ ꓮꓽ ꓟ ꓥ ꓡ? ꓐꓰ ꓠ ꓠꓬꓲˍ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓪ ꓔꓯ꓾ ꓥꓪ ꓠꓬ ꓬꓲ ꓪꓴ. ꓕꓯˍ ꓡꓰ ꓠꓴ ꓪ ꓔꓯ ꓐꓯ ꓖꓶ ꓗꓷ ꓟ ꓖꓳ ꓕꓲ ꓣꓳ ꓟ ꓥꓳ꓿ ꓥꓪ ꓠꓬ ꓠꓴ ꓪ ꓔꓯ ꓟꓳ. ꓐꓯ ꓓꓴˍ ꓐꓰ ꓐꓯ ꓟꓴ ꓞꓷ, ꓓꓴ ꓮꓽ ꓟꓬ, ꓙꓳˍ ꓡꓳ꓿ ꓖꓳ ꓡꓱ ꓥˍ ꓟꓲ ꓥꓪ ꓔꓯ ꓝꓲ ꓩꓴ ꓡ ꓢꓴ ꓠꓽ ꓔꓱ,ˍ ꓟ ꓥ ꓢꓲ꓾ ꓥꓪ ꓡꓰ ꓬꓲ ꓔꓯˍ ꓐꓰ ꓑ ꓙꓽˍ ꓟ ꓠꓬ ꓟꓲ ꓠꓯ ꓡ ꓞꓳ ꓔꓯ ꓐꓯ ꓖꓶˍ ꓡꓳ꓾ ꓐꓯˍ ꓡꓳ꓿
ꓖꓳ ꓡꓱ ꓥ ꓟꓲ ꓬꓰ‐ꓢꓴ ꓠꓬ ꓬꓲ ꓐ, ꓐ ꓔꓯ ꓖꓴ ꓢꓲ ꓐꓯˍ ꓟ ꓔꓯ ꓖꓴ ꓪ ꓟꓽ ꓙꓽ ꓜꓲꓼ꓿ ꓖꓳ ꓡꓱ ꓠꓬ ꓬꓰ‐ꓢꓴ ꓡꓰ꓾ ꓡ‐ꓞꓳ‐ꓮ‐ꓐꓲ ꓔꓯ ꓠꓴ ꓪ ꓔꓳ, ꓔꓴ ꓗꓷ ꓕꓯ ꓢꓲ.ˍ ꓡꓰ꓾ ꓥꓪ ꓮꓽ ꓟ ꓥ ꓟˍ ꓐꓰ꓾ ꓥꓪ ꓚꓲ ꓛꓬ ꓥꓪ ꓮ ꓫꓵꓽˍ ꓟꓲ ꓟꓽ ꓬꓰ ꓟˍ ꓐꓰ꓾ ꓐ, ꓐ ꓥꓪ ꓔꓯ ꓮ ꓡꓲ ꓟ. ꓖꓶ ꓡˍ ꓠꓬ ꓖꓳ ꓡꓱ ꓫ. ꓕꓱˍ ꓟ ꓠꓴ ꓪ ꓢꓷ. ꓡꓰˍ ꓥꓳ꓿ ꓥꓪ ꓔꓯ ꓝꓲ ꓩꓴ ꓡ ꓢꓴ ꓠꓬ ꓥꓪˍ ꓐꓰ ꓔꓬ ꓡꓳ꓿ ꓥꓪ ꓕꓲ ꓣꓳ ꓔꓯ.ˍ ꓡꓰꓽ ꓡꓳ ꓔ ꓟ ꓟꓽ ꓥ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓲ, ꓒꓴˍ ꓟ ꓥꓪ ꓮ ꓕꓯˍ ꓟꓲ ꓬꓰˍ ꓡꓳ꓾ ꓐꓯˍ ꓡꓳ꓿ ꓕꓱ ꓟꓬ ꓫꓵꓽ ꓬꓲ ꓐꓯˍ ꓕꓯ ꓡ ꓞꓳ ꓮꓽ ꓟꓬ, ꓬꓲ ꓔꓯ ꓙꓵꓻˍ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓬ ꓜꓽ ꓚꓲ. ꓧꓪꓽ ꓚꓲ.ˍ ꓟ (5) ꓠꓽ ꓕꓲ ꓠꓽ ꓠꓽ‐ꓠꓬꓲꓽ‐ꓠꓬꓲ ꓗꓪ ꓛꓲ ꓡꓺꓳ꓿ ꓠꓬꓲ. ꓠꓬꓲ ꓗꓪ ꓣꓳꓽ ꓵ ꓠ ꓔ ꓟ ꓢꓲ: ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 8ꓽ21‐30 ꓗꓪ ꓛꓲ ꓥꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓬꓰ‐ꓢꓴ ꓡꓰ “ꓡ ꓞꓳ ꓮ ꓐꓲ ꓔꓯ ꓠꓴ ꓪ ꓡꓰ ꓔꓳ, ꓔꓴ ꓗꓷˍ ꓕꓯ ꓢꓲ.ˍ ꓡꓰ꓾ ꓥꓪ ꓮꓽ ꓟ ꓥ ꓟ ꓠꓴ ꓪ ꓢꓷ. ꓡꓰˍ ꓥꓳ꓾” ꓐꓰ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓕꓯꓼ ꓔꓶ. ꓗꓷ ꓟꓶ ꓢꓲ ꓡꓯꓼ ꓐꓳ ꓔꓶ. ꓓꓴ ꓖꓳ ꓟ ꓔꓯ ꓔꓳ, ꓔꓴ ꓟꓶ ꓗꓷˍ ꓕꓯ ꓢꓲ. ꓡꓰꓽ꓾ ꓚꓵ ꓚꓵ ꓢꓲ ꓒ ꓠꓬ ꓮ ꓟ ꓥ ꓟ ꓔꓯ ꓞꓳ ꓤ ꓐꓴ ꓟꓳꓻ ꓪˍ ꓟ ꓥ ꓢꓲ ꓠꓬꓲ꓾ ꓟꓲ ꓠꓯ ꓕꓱ ꓟ ꓐꓱ ꓶ ꓪꓴ‐ꓢ ꓬꓲ ꓠꓵꓻ ꓠꓲ, ꓔꓯ ꓬꓰ‐ꓢꓴ ꓡꓰ ꓐꓯ ꓑꓶ ꓔ ꓡꓳ꓿
ꓬꓰ‐ꓢꓴ ꓠꓬ ꓞꓳ ꓤ ꓒꓬꓱꓽ ꓶꓻ ꓞ, ꓟ ꓪꓴ‐ꓢ ꓥ ꓟ꓾ ꓞꓳ ꓤ ꓒꓬꓱꓽ ꓗꓪ ꓐꓰ ꓪꓴ‐ꓢ ꓬꓲ ꓠꓵꓻ ꓠꓲ, ꓥ ꓟ ꓔꓯ꓾ ꓬꓰ‐ꓢꓴ ꓔꓯ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓕꓯ ꓔꓶ. ꓗꓷ ꓢꓲ ꓡꓯꓼ ꓐꓳ ꓔꓶ. ꓓꓴ ꓖꓳ ꓟ ꓔꓯ ꓔꓳ, ꓔꓴ ꓗꓷˍ ꓕꓯ꓾ ꓢꓷ. ꓡꓰ ꓓꓴ ꓖꓳ ꓟ ꓠꓬ ꓔꓲ ꓢꓲꓽ ꓡˍ ꓡꓳ꓾ ꓫꓬꓽ ꓫꓬꓽ ꓡꓰꓽ ꓟꓳꓻ ꓪ ꓓˍ ꓡꓳ꓿ ꓖꓳ ꓡꓱ ꓠꓬꓲ ꓡꓯꓼ ꓐꓳ ꓔꓶ. ꓓꓴ ꓠꓬ ꓙꓲ‐ꓢꓴ ꓔꓯ ꓙꓵꓻ ꓢꓴ ꓐꓴ ꓐꓱ ꓶ ꓬꓲ ꓢꓷ. ꓡꓰ ꓓꓴ ꓕꓲꓽ ꓟ ꓒꓬꓱꓼ ꓡˍ ꓡꓳ꓾ ꓙꓲ‐ꓢꓴ ꓔꓯ ꓙꓵꓻ ꓢꓴ ꓙꓲ‐ꓢꓴ ꓢꓲ ꓤ ꓐꓴ ꓠꓬ ꓫ. ꓙꓵ ꓜꓲꓽˍ ꓟ ꓔꓯ ꓠꓲ, ꓥꓳˍ ꓟ ꓑꓶ. ꓓꓴ ꓟꓽ ꓥ ꓥ ꓐꓰ꓾ ꓣꓳ ꓐꓴ ꓠꓬ ꓡꓯꓼ ꓐꓳ ꓔꓶ. ꓓꓴ ꓗꓪ ꓫꓵꓻ ꓙ ꓗꓷ ꓟ ꓬꓰ‐ꓢꓴ ꓙꓲ‐ꓢꓴ ꓔꓯ ꓟꓲ ꓠꓯ ꓐꓱ ꓶ ꓪꓴ‐ꓢ ꓬꓲ ꓠꓵꓻ ꓠꓲ, ꓬꓲ ꓢꓷ. ꓡꓰ ꓓꓴ ꓕꓲ ꓟˍ ꓡꓰ ꓐꓰ ꓢꓷ. ꓙ ꓟꓳ ꓙˍ ꓟ ꓑꓶ. ꓓꓴ ꓥ ꓡꓳ꓿
ꓟꓲ ꓠꓯ ꓔꓯ ꓠꓲ, ꓠꓵˍ ꓟ ꓪꓴ‐ꓢ ꓬꓲ ꓠꓵꓻ ꓠꓲ, ꓔꓯ ꓟ. ꓖꓶ ꓠ, ꓟ ꓐꓱ ꓶ ꓪꓴ‐ꓢ ꓠꓬ ꓬꓲ ꓤ ꓔꓲ. ꓬꓰ‐ꓢꓴ ꓔꓯ ꓟꓲ ꓠꓯ ꓗꓪ ꓝꓲ ꓩꓴ ꓗꓷˍ ꓡꓳ꓿ ꓬꓰ‐ꓢꓴ ꓠꓬ ꓬꓲ ꓢꓯꓼ ꓟꓬ ꓖꓶ ꓠ ꓗꓷ ꓡꓰˍ ꓟ ꓔꓯ ꓢꓷ. ꓥˍ ꓟꓲ꓾ ꓪꓴ‐ꓢ ꓬꓲ ꓠꓵꓻ ꓠꓲ, ꓟꓬꓱꓽ ꓪꓴ‐ꓢ ꓙ ꓟꓳ ꓘꓶꓽ ꓔꓯ ꓐꓲ ꓜꓲꓼ ꓡꓰ ꓝꓲˍ ꓡꓳ꓿ ꓡꓳ, ꓬꓰˍ ꓗꓪ ꓛꓲ ꓬꓰ‐ꓢꓴ ꓠꓬ ꓪꓴ‐ꓢ ꓔꓯ ꓠ ꓡꓳ. ꓗꓷꓳ꓿ ꓡꓳ, ꓬꓰˍ ꓕꓯ ꓬꓰ‐ꓢꓴ ꓬꓲ ꓫꓵꓻ ꓙˍ ꓟ ꓠꓬ ꓬꓲ ꓢꓯꓼ ꓟꓬ ꓢꓶ. ꓟꓽ ꓞꓲꓺ ꓟꓲ ꓠꓯ ꓔꓯ ꓠꓲ, ꓠꓵˍ ꓟ ꓪꓴ‐ꓢ ꓬꓲ ꓠꓵꓻ ꓠꓲ, ꓔꓯ ꓟꓳ. ꓖꓶ ꓓꓴ ꓪꓽ ꓠꓬꓲˍ ꓟ ꓕꓲ ꓟ ꓒꓬꓱꓼ ꓡ ꓗꓷꓳ꓿ 1 ꓘꓳ‐ꓡꓱ‐ꓕꓴ 11ꓽ26 ꓗꓪ ꓝꓲ ꓓꓴ ꓒꓳ‐ꓡꓳ ꓡꓰ ꓐꓯˍ ꓟ ꓠꓬ꓾ ꓣꓳ ꓠꓬ ꓘꓶꓽ ꓫꓵꓽ ꓬꓰ ꓠ, ꓟ ꓜꓲꓼ ꓡꓳꓽˍ ꓕ ꓑꓳꓸꓼ꓾ ꓟꓲ‐ꓢ ꓬꓰ ꓪꓽ ꓘꓴ ꓠ, ꓟ ꓜꓲꓼ ꓡꓳꓽˍ ꓕ ꓑꓳꓸꓼ꓾ ꓣꓳ ꓐꓴ ꓠꓬ ꓣꓳ ꓮ ꓙꓵꓽ ꓐꓱ ꓶ ꓢꓲ ꓒ ꓬꓲ ꓫꓵꓻ ꓙ ꓗꓷ ꓟ꓾ ꓟꓲ ꓠꓯ ꓔꓯ ꓠꓲ, ꓠꓵˍ ꓟ ꓢꓲ ꓒ ꓬꓲ ꓠꓵꓻ ꓠꓲ, ꓔꓯ ꓝꓮꓲ ꓕꓲ ꓧꓪ, ꓐꓯ ꓑꓶ ꓔꓬ ꓟ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓘꓶꓽ ꓫꓵꓽ ꓬꓰˍ ꓟ ꓗꓪ ꓐꓰ꓾ ꓢꓲ ꓒ ꓬꓲ ꓧꓪꓽ ꓐꓰ ꓫꓵꓽ ꓔꓯ ꓜꓽ ꓓꓳꓻˍ ꓟ ꓗꓪ ꓐꓰ꓾ ꓟꓲ ꓠꓯ ꓕꓱ ꓟ ꓔꓯ ꓠꓲ, ꓠꓵˍ ꓟ ꓢꓲ ꓒ ꓬꓲ ꓠꓵꓻ ꓠꓲ, ꓔꓯ ꓬꓲ ꓑꓰ, ꓟꓳꓻ ꓪˍ ꓟ ꓥ ꓡꓳ꓿ ꓪꓴ‐ꓢ ꓬꓲ ꓠꓵꓻ ꓠꓲ, ꓔꓯ ꓠꓱ. ꓐꓯ ꓢꓴ ꓔꓯ ꓫꓬꓽ ꓫꓬꓽ ꓡꓰ ꓟꓳꓻ ꓡꓰ ꓠ꓾ ꓬꓲ ꓑꓰ, ꓟꓳꓻ ꓡꓰ ꓠ ꓬꓰ ꓠ, ꓟ ꓐꓱ ꓶ ꓘꓶꓽ ꓫꓵꓽ ꓬꓰˍ ꓟ ꓗꓪ ꓐꓰ ꓣꓳ ꓐꓴ ꓔꓯ ꓝꓲ ꓩꓴ ꓔ ꓟ ꓥ ꓡꓳ꓿
